Te lek yachʼil kʼop ya yal te Lucas

6 Te Jesús kʼax ta yolil te awal tsʼunubiletik ta skʼajkʼalel sábado, te jnopojeletik yuʼune jajchik ta sjixtiklanel ta sk’abik te sit awal tsʼunubil yuʼun ya skʼuxbeyik te site. 2 Jaʼ yuʼun ay chaʼoxtul fariseoetik te jich albotik yuʼune: «¿Bin yuʼun te yakex ta spasel te bin ma xjuʼ ta pasel ta skʼajkʼalel sabadoe?». 3 Pero, jich la yal te Jesús: «¿Yuʼunbal maʼyuk akʼoponojik ta sJun Dios te bin la spas te David te kʼalal tal swiʼnal sok te winiketik te jokinbil yuʼune? 4 ¿Yuʼunbal ma anaʼojik te och ta sna Dios te David sok la sweʼ te panetik te akʼbil ta stojol te Diose sok te la yakʼbey sweʼ-euk te winiketik te jokinbil yuʼune? Maʼyuk machʼa ya xjuʼ ya sweʼ te panetik-abi, jaʼnax te sacerdoteetike». 5 Jich la yaltiklanbeyxan: «Te sNichʼan te Winike* jaʼ Ajwalil yuʼun te skʼajkʼalel sábado».

6 Ta yan skʼajkʼalel sábado, och ta sinagoga te Jesús ta nojpteswanej. Ay jtul winik tey-a te chamen schial te swaʼel kʼabe. 7 Te escribaetik sok te fariseoetik jaʼnax yakik ta smaliyel yilik teme ya slekubtes te winik ta skʼajkʼalel sábado, yuʼun jich ya slebeyik smul-a te Jesuse. 8 Pero, te Jesús la snaʼ stojol te bin yakik ta yalel ta yoʼtanike. Jaʼ yuʼun, jich la yalbey te winik te chamen schial te jchʼix skʼabe: «Tejkʼana aba liʼ ta olil». Jich te winike la stejkʼan sba ta yolilik. 9 Jich albotik yuʼun te Jesús: «Ay bin ya jojkʼoybeyex. ¿Bin ya xjuʼ ta pasel ta skʼajkʼalel sábado? ¿Jaʼbal te bin lek, o jaʼbal te bin ma lekuke? ¿Jaʼbal te skoltaybeyel skuxlejal jtul ants winik, o jaʼbal te ya kakʼtik te ya xlaje?». 10 Kʼalal la yil te Jesús te machʼatik ay ta sjoyobale, jich la yalbey te winike: «Xachʼa te akʼabe». Te kʼalal la xachʼ te skʼabe, lekub. 11 Te kʼalal jich la yilike, kʼaxto ilinik yuʼun sok jajch schapik te bin ya xjuʼ ya spasbeyik te Jesuse.

12 Ay jun kʼajkʼal te mo bael ta wits ta skʼoponel Dios te Jesuse, sjunal ajkʼabal la skʼopon Dios tey-a. 13 Te kʼalal sakub te kʼinale, la yikʼ tal te jnopojeletik yuʼune, la stsa 12 ta tul te la yakʼbey sbiilin jpuk-kʼopetik: 14 jaʼ te Simón te naʼbil sba bitʼil Pedro sok te Andrés te jun smeʼ statike, te Santiago, Juan, Felipe, Bartolomé, 15 Mateo, Tomás, Santiago snichʼan Alfeo, te Simón (te Machʼa ay sbujtsʼ yoʼtan), 16 Judas te snichʼan Santiago sok te Judas Iscariote (te machʼa la yakʼ ta kʼabal te Jesuse).

17 Te Jesús sok te jnopojeletik yuʼune koik tal ta wits, julik ta pamal kʼinal. Tey jul sta bayal ta tul jnopojeletik yuʼun sok kʼax bayal ta tul ants winiketik te talemik ta Judea, ta Jerusalén sok ta tiʼtiʼ mar yuʼun Tiro sok Sidón. Tal yaʼiybeyik stojol te skʼope sok te ya yichʼik lekubtesel yuʼun te schamelike. 18 Jaʼnix jich la yichʼik lekubtesel-euk te machʼatik utsʼinbilik yuʼun te pukujetike. 19 Spisil te ants winiketik yoʼtan ya spikik te Jesús, melel ya xlokʼ yuʼel te ya xlekubtesotik yuʼune.

20 Te Jesús la sjach sit, la yil te jnopojeletik yuʼun sok jich la yal:

«Tseʼelnaxme awoʼtanik, jaʼex te pobreexe, melel yame awichʼik te Wentainel* yuʼun te Diose.

21 »Tseʼelnaxme awoʼtanik, jaʼex te ayex ta wiʼnal ta ora ini, melel yame yichʼ nojesel achʼujtik.

»Tseʼelnaxme awoʼtanik, jaʼex te yakex ta okʼel ta ora ini, melel yame stseʼejinex.

22 »Tseʼelukme awoʼtanik teme ya yilayex, ya spʼajex, ya sbolkʼoptayex sok te ma lek akʼoplal ya yalbeyex te ants winiketik ta skaj te sNichʼan te Winike.* 23 Chiknajuk ta ilel te kʼax tseʼel awoʼtanik te kʼalal jich ya xkʼot ta pasele, melel kʼax mukʼ te amajtanik ta chʼulchane, yuʼun jich la yichʼik kontrainel-euk te j-alwanejetik ta nameye.

24 »Pero, ¡ayme awokolik, jaʼex te jkʼulejexe, melel awichʼojikix te smukʼul awoʼtanike!

25 »¡Yame awil awokolik, jaʼex te nojel achʼujtik ta ora ini, melel yame awaʼiyik wiʼnal!

»¡Ayme awokolik, jaʼex te ya stseʼejinex ta ora ini, melel yame amel awoʼtanik sok yame x-okʼex!

26 »¡Ayme awokolik kʼalal lek akʼoplal ya yalbeyex te ants winiketike, melel te antiguo smeʼ statik te ants winiketik-abi, jaʼnix jich lek skʼoplal la yalbeyik te lotil j-alwanejetike!

27 »Pero, jaʼex te yakex ta yaʼiyel te jkʼope, ya kalbeyex te kʼuxukme ta awoʼtanik te akontraike, lekukme xa awilik te machʼatik ya spʼajexe, 28 kʼanbeyaik bendición ta stojol te machʼatik ma lek akʼoplal ya yalbeyexe sok kʼoponbeyaik Dios te machʼatik ya sbolkʼoptayexe. 29 Teme ay machʼa ya smajbat te achoe, akʼbeya smajbat te yane. Teme ay machʼa ya skʼan ya spojbat te anajtil kʼuʼe, akʼbeya jilel-euk te akʼuʼe. 30 Machʼauk-a te ay bin ya skʼanbate, akʼbeya. Teme ay machʼa ya spojbat te bintik ay awuʼune, mame xa akʼanbey sujtel.

31 »Jichnixme xa apas ta stojol yantik spisil te bin ya amulan te ya spasik ta atojole.

32 »Teme jaʼnax kʼux ya awaʼiy ta awoʼtanik te machʼatik kʼux ya yaʼiyexe, ¿bin lekilal ya ataik yuʼun? Melel te jmulawiletike kʼux ya yaʼiyik ta yoʼtanik-euk te machʼatik kʼux ya x-aʼiyotik yuʼune. 33 Teme jaʼnax lek ya awilik te machʼatik lek ya yilexe, ¿bin lekilal ya ataik yuʼun? Melel te jmulawiletik jich ya spasik-euk. 34 Teme jaʼnax ay bin ya awakʼbeyik smajan* te machʼatik ya anaʼik te ya sutbeyexe, ¿bin lekilal ya ataik yuʼun? Melel te jmulawiletik jich ya spasbey sbaik-euk, ay bin ya yakʼbey smajan te yan, melel ya snaʼ te ya sutbot yuʼune. 35 Yan te jaʼexe, kʼuxme xa awaʼiy ta awoʼtanik te akontratakik, lekme xa awilik te yantik sok mame xa amaliyik te ya sutbeyex te bin ya awakʼik ta majanele. Teme jich ya apasike, mukʼme te amajtan ya ataike sok yal snichʼnab ya xkʼoex yuʼun te Machʼa toyol aye, melel jaʼnix jich ay slekil yoʼtan ta stojol te machʼatik ma snaʼik yalel wokol sok te machʼatik ma lek stalelike. 36 Jaʼnix jich naʼbeya yoʼbolil sbaik te yantike, jichnix bitʼil ya snaʼbeyex yoʼbolil abaik te aTatik te ay ta chʼulchane.

37 »Jaʼnix jich mame xa alebeyik smul te yantike, jich maʼyuk bin-ora ya awichʼ lebeyel amulik-euk. Mame xa awakʼbeyik stoj smulik te yantike, jichme maʼyuk bin-ora ya awichʼik akʼbeyel atoj-euk te amulike. Pasbeyaik perdón te yantike, jichme ya awichʼik pasbeyel perdón-euk. 38 Kʼaytesa abaik ta yakʼel te bintik ay awuʼunike, jichme ya awichʼik akʼbeyel-euk. Jichme ya yakʼbeyex achupik bayal amajtanik, tenbil, yukʼilanbil sok tʼokolnax. Te bitʼil ya apʼisbeyik smul te yantike, jichnixme ya awichʼik pʼisbeyel-euk te amulike».

39 Te Jesús la yal yan lokʼombakʼop: «Te machʼa ma xyil kʼinal ma xjuʼ ya snit te machʼa ma xyil kʼinale, melel pajal ya xchʼayik koel ta jutbil* chʼen, ¿mabal jichuk? 40 Te jnopojel ma jaʼuk toyolxan ay ta stojol te smaestroe, pero machʼauk-a te la yichʼ pʼijubtesel ta leke jich ya xkʼot te bitʼil te smaestroe. 41 ¿Bin yuʼun ya awilbey te chʼin ak te ay ta sit te awermano, pero maba ya awil te tsʼamteʼ kʼatal ta asite? 42 ¿Bin-utʼil ay-a te jich ya awalbey te awermano ‹Hermano, ya jlokʼesbat te chʼin ak ay ta asite›, te bitʼil kʼatal tsʼamteʼ ta asit te jaʼate? ¡Jchaʼlam-oʼtan!* Lokʼesa nailuk te tsʼamteʼ kʼatal ta asite, jich ya xjuʼ ya awil te bin-utʼil ya alokʼesbey te chʼin ak ay ta sit te awermano.

43 »Spisil te teʼ te leke ma xjuʼ te kʼaʼem sit ya yakʼe, jaʼnix jich te teʼ te kʼaʼeme ma xjuʼ te lek sit ya yakʼe. 44 Melel te jujunpejt* teʼe yame yichʼ naʼbeyel sba ta swenta te site. Ma xjuʼ ta tulel* higoetik ta chʼixetik sok ma xjuʼ ta tulel tsʼusubetik ta jaʼmal chʼixetik. 45 Te machʼa lek yoʼtane jaʼ ya yalbey skʼoplal te bintik lek nojel ta yoʼtane; yan te machʼa ma lek yoʼtane jaʼ ya yalbey skʼoplal te bintik ma lek nojel ta yoʼtane. Melel te bintik ay ta yoʼtane jaʼ ya xlokʼ tal ta ye.

46 »Jich yuʼun, ¿bin yuʼun te ‹¡Kajwal! ¡Kajwal!› ya awalbonik teme maba ya apasik te bin ya kalbeyexe? 47 Ya kalbeyex awaʼiyik machʼa pajal skʼoplal sok te machʼa ya xtal ta jtojol te ya yaʼiybon te jkʼop sok te ya spas ta skuxlejale. 48 Jaʼ pajal sok te winik te la spas sna, kʼubul la sjambey schʼenal, la yakʼbey yiptajib ta sba ton. Kʼalal tal te snojelal te jaʼe, tulan la smaj te nae, pero maba la syukʼ sba, melel tulan te banti jajchem tal te yiptajibe. 49 Yan te machʼa ya yaʼiy te bin ya kale, pero maba ya spas ta skuxlejal jaʼ pajal sok te winik te la spas sna ta ba lum te ma la yakʼbey yiptajibe. Te kʼalal tal te snojelal te jaʼe, la smaj te nae, oranax jin koel tal. Ta melel, jin ta jkʼaxel».