Apocalipsis

13 Tekʼel jilel ta stiʼil sjiʼal mar te dragón.

Tey-abi la kil jkojt chambalam te xiʼbantik sba te yak ta lokʼel tal ta mar. Ay lajunchʼix xulub sok jukeb sjol. Ta jujunchʼix xulub ay jujun scorona sok ta jujun sjol ay biililetik te ya sbolkʼoptay te Diose. 2 Te chambalam te xiʼbantik sba te la kile jich yilel te bin-utʼil leopardo, pero te yok jaʼ jichik te bin-utʼil yok te oso, te ye jaʼ jich te bin-utʼil ye te león-choj. Te dragón la yakʼbey yuʼel, smukʼul naktajib sok tulan yaʼtel te chambalam te xiʼbantik sba.

3 La kil te ay jun sjol te ejchenajem te jich yilel te kʼan lajuk yuʼune, pero la yichʼ poxtayel te yejchen te kʼan lajuk yuʼune. Spisil te ants winiketik ta balumilal yan-nax la yilik-a te chambalam te xiʼbantik sba te jich jajch stʼunik. 4 La yichʼik ta mukʼ te dragón, melel jaʼ la yakʼbey tulan yaʼtel te chambalam te xiʼbantik sbae, sok la yichʼik ta mukʼ te chambalam te xiʼbantik sba te kʼalal jich yakik ta yalel: «¿Machʼa pajal sok te bin-utʼil te chambalam te xiʼbantik sbae? Sok ¿machʼa ya xjuʼ ya yakʼbey guerra?». 5 La yichʼ akʼbeyel ye yuʼun ya yal toyba kʼopetik sok bolkʼopetik, sok la yichʼ akʼbeyel tulan yaʼtel 42 u yuʼun ya x-aʼtej. 6 La sjam ye yuʼun ya sbolkʼoptay te Dios, yuʼun ya sbolkʼoptaybey te sbiile, te banti nainem sok te machʼatik nainemik ta chʼulchan. 7 La yichʼ akʼbeyel permiso yuʼun ya yakʼbey guerra te machʼatik chʼultesbilik sok te ya stsaltiklane, jaʼnix jich la yichʼ akʼbeyel tulan yaʼtel ta stojol spisil ta chajp tsʼumbaliletik, lumetik, kʼopiletik sok nacionetik. 8 Spisil te machʼatik nainemik ta balumilal yame yichʼik ta mukʼ. Jaʼto te kʼalal chiknaj tal te ants winiketik,* maʼyuk jtuluk te yichʼoj tsʼibayel sbiilik ta balbil jun yuʼun kuxlejalil yuʼun te Jkolel* Tuminchij te la yichʼ milele.

9 Teme ay machʼa ay schikine, akʼame schʼam yaʼiy ta lek te kʼope. 10 Teme ay machʼa ya yichʼ tsakel bael, yananix yichʼ tsakel bael-a. Teme ay machʼa ya xmilawan ta espada, yame yichʼ milel ta espada-euk. Jaʼ yuʼun ya skʼan te ya xkujch yuʼunik sok te ayuk schʼuunel yoʼtanik te machʼatik chʼultesbilike.

11 Tey-abi la kil yan chambalam te xiʼbantik sba te yak ta lokʼel tal ta lumkʼinal. Ay chaʼchʼix xulub jich te bin-utʼil xulub te jkolel* tuminchij, pero jich jajch ta kʼop te bin-utʼil jun dragón. 12 Jaʼnix jich, ta sit te sbabial chambalam te xiʼbantik sba la yakʼ ta ilel te pajal yip ya x-aʼtej soke. Ya suj te balumilal sok te machʼatik nainemik tey-a yuʼun ya yichʼik ta mukʼ te sbabial chambalam te xiʼbantik sbae, jaʼ te la yichʼ poxtayel te yejchen te kʼan lajuk yuʼune. 13 Jaʼnix jich ya spas mukʼul señailetik; ya yakʼ xko tal kʼajkʼ ta chʼulchan te ya xjul ta balumilal te ya sta ta ilel spisil te ants winiketike.

14 Ya sloʼlay te machʼatik nainemik ta balumilal sok te señailetik te akʼbot spas ta sit te chambalam te xiʼbantik sbae, jaʼnix jich la yalbey te machʼatik nainemik ta balumilal te akʼa spasbeyik slokʼomba te chambalam te xiʼbantik sbae, jaʼ te la yichʼ ejchentesel ta espada pero te chaʼkuxine. 15 La yichʼ akʼbeyel permiso te ya yakʼbey skuxlejal te slokʼomba te chambalam te xiʼbantik sbae, yuʼun jich ya xkʼopoj te slokʼomba te chambalam te xiʼbantik sba sok te ya smiltiklan spisil te machʼatik ma skʼan ya yichʼik ta mukʼ te slokʼomba te chambalam te xiʼbantik sbae.

16 Ta spisilik —mukʼ bikʼit, jkʼulejetik sok pobreetik, te machʼatik libre ayik sok te machʼatik mosoinbilik— yame yichʼik sujel yuʼun ya yichʼ akʼbeyel smarcaik ta swaʼel kʼabik o ta stiʼbaik, 17 yuʼun jich maʼyuk machʼa ya xjuʼ ya xmanbaj o ya xchonbaj jaʼnax te machʼa yichʼoj te marcae, jaʼ te sbiil te chambalam te xiʼbantik sba o te número yuʼun te sbiile. 18 Ta swenta ini ya skʼan te ayuk spʼijil koʼtantik: te machʼa ya snaʼ stsajtayel,* akʼa yajtay te número yuʼun te chambalam te xiʼbantik sbae, melel jaʼ número yuʼun winik; te número yuʼune jaʼ 666.