Te lek yachʼil kʼop ya yal te Lucas

10 Ta patil, te Kajwaltik la stsaxan 70 ta tul jnopojeletik yuʼun, nail la stikun bael ta chaʼchaʼtul ta mukʼul lumetik sok ta chʼin lugaretik te banti ya xkʼax ta patil-euke. 2 Jich la yaltiklanbey: «Bayal sit te awal tsʼunubile, jaʼ maʼyuk bayal te j-aʼteletike. Jich yuʼun kʼanbeyaik te Yajwal te awal tsʼunubil te yakuk stikunxan j-aʼteletik ta stsobeyel sit te awal tsʼunubil yuʼune. 3 ¡Baanik! Yame jtikunex bael jich bitʼil tuminchijetik ta yolil jtiʼawal jaʼmal tsʼiʼetik. 4 Mame xa awichʼik bael yawil atakʼinik, aweʼelik sok atepik o axanabik, jaʼnix jich mame ayuk machʼa xa apatbeyik yoʼtan ta be. 5 Te kʼalal ya xkʼoex ta jun na, jichme nail xa awalik: ‹Ayukme lamalkʼinal ta na ini›. 6 Teme ay jtul tey-a te ay lamalkʼinal yuʼune, akʼa kʼotuk ta stojol te lamalkʼinal la awakʼbeyike. Teme maʼyuk tey-ae, akʼame sujtuk ta atojolik te lamalkʼinale. 7 Jilanik ta na-abi, weʼaik sok uchʼaik chikan te bin ya awichʼik akʼbeyele, melel te machʼa ya x-aʼteje snujpʼ te ya yichʼ tojel yuʼun te yaʼtele. Mame xa ajelulanik te na te banti ya xjilexe.

8 »Jaʼnix jich, ta bayuk mukʼul lum ya xkʼoex sok te ya yikʼex tey-ae, weʼaik te bin ya yakʼbeyexe, 9 sok lekubtesaik te jchameletik te tey ayik-a sok jich xa awalbeyik: ‹Nopol* ayix ta atojolik te Wentainel* yuʼun te Diose›. 10 Pero, ta bayuk mukʼul lum te ya xkʼoex te maba ya yikʼex tey-ae, lokʼanik ta mukʼul calleetik yuʼunik sok jich xa awalik: 11 ‹Swenta ya awilik te jaʼexnix maba la achʼuunike, ya jtijtintik jilel te stanul te alumalik te ay ta kok-kotike, pero naʼaik ini: nopol* ayix te Wentainel* yuʼun te Diose›. 12 Jamal ya kalbeyex ta Skʼajkʼalel ichʼel ta kʼop* kʼaxtoxan ya yil swokol te mukʼul lum ini te bin-utʼil te Sodoma.

13 »¡Yame awil awokol, Corazín! ¡Yame awil awokol, Betsaida! Te teyuk la yichʼ pasel ta Tiro sok ta Sidón te milagroetik la yichʼ pasel ta atojolike, la slapik chʼixal pakʼ* sok la snajkan sbaik ta tan yuʼun ya sujtes yoʼtanik te jichuke. 14 Jaʼ yuʼun, ta Skʼajkʼalel ichʼel ta kʼop* kʼaxtoxan ya awil awokolik te bin-utʼil te Tiro sok Sidón. 15 Jaxan te jaʼat, Capernaúm, ¿yuʼunbal ya akuy te ya stoyesat moel te Dios kʼalalto ta chʼulchan? ¡Maʼuk, yame stikunat bael kʼalalto ta Mukenal!*

16 »Te machʼa ya yaʼiybeyex akʼopike jaʼnix jich yame yaʼiybon-euk te jkʼope, te machʼa ya spʼajex jaʼnix jich yame spʼajon-euk. Te machʼa ya spʼajone jaʼnix jich ya spʼaj-euk te machʼa la stikunon tale».

17 Te kʼalal sujtik tal te 70 ta tul jnopojeletik sok stseʼelil yoʼtan jich la yalbeyik te Jesús: «Kajwal, jaʼnix jich te pukujetik ya schʼuunbotik jkʼoptik te kʼalal ya jtuuntestik te abiile». 18 Tey-abi, jich la yal te Jesuse: «Jich la kilix te chʼayix koel tal te Satanás ta chʼulchan jich bitʼil tsantsewal. 19 Ilawilik, la kakʼbeyex tulan awaʼtelik ta stsʼoʼel* ta tekʼel jtiʼawal chanetik sok tseketik,* jaʼnix jich ta stsalbeyel yuʼel te akontratakik. Mame ayuk bin ya yutsʼinex ta jkʼaxel. 20 Pero, mame jaʼuk tseʼel awoʼtanik yuʼun te ya schʼuunbeyex akʼopik te pukujetike, jaʼukme tseʼel awoʼtanik yuʼun te la yichʼix tsʼibayel te abiilik ta chʼulchan». 21 Ta yorail-abi, bayal sbujtsʼ yoʼtan te Jesús ta swenta te chʼul espíritu* yuʼun te Dios te jich la yal: «Jtat, ya kalbat yutsil akʼoplal ta komonsitil, jaʼat te Ajwalilat yuʼun chʼulchan sok balumilal, melel anakʼoj te nojptesel ini ta stojol te machʼatik pʼijike, jaʼ la awakʼbey snaʼ te machʼatik alaletik kʼoeme. Jich, jTat, melel jich ya skʼan awoʼtan te jich ya yichʼ pasele». 22 Te Jesús jich la yalxan: «Te jTate yakʼojbon ta jkʼab spisil te bintik aye. Maʼyuk machʼa ya snaʼbon jba te jaʼ Nichʼanilone, jaʼnax te jTate. Sok maʼyuk machʼa ya snaʼbey sba te jTate, joʼon-nax jtukel sok te jayeb machʼatik ya jkʼan ya kakʼ snaʼbey sbae».

23 Tey-abi la sut sba ta stojol te jnopojeletik sok jich la yalbey ta stukelik: «Tseʼelukme awoʼtanik yuʼun te bin yakex ta yilel ta ora ini. 24 Jamal ya kalbeyex te bayal j-alwanejetik sok ajwaliletik la skʼan yilik te bintik yakex ta yilel te jaʼexe, pero maba la yilik, sok la skʼan yaʼiyik stojol te bin yakex ta yaʼiyel stojole, pero maba la yaʼiyik stojol».

25 Tey-abi ay jtul winik te ya snaʼ ta lek te bin ya yal te Ley, la stejkʼan sba yuʼun ya spas ta prueba te Jesús, jich la sjojkʼoybey: «Maestro, ¿bin ya skʼan ya jpas yuʼun ya xkuxinon ta sbajtelkʼinal?». 26 Jich albot yuʼun te Jesuse: «¿Bin ya yal te Ley? ¿Bin ataoj ta kʼoponel tey-a?». 27 Jich la yal te winike: «‹Kʼuxukme xa awaʼiy ta awoʼtan te Jehová* Dios awuʼun ta spisil awoʼtan, ta spisil akuxlejal, ta spisil awip sok ta spisil apʼijil›, jaʼnix jich ‹kʼuxukme xa awaʼiy te apatxujk jichnix te bin-utʼil kʼux ya awaʼiy aba te jaʼate›». 28 Jich albot yuʼun te Jesuse: «La anaʼ sutel ta lek; pasaxan ini, jichme ya xkuxinat ta sbajtelkʼinal».

29 Pero ya skʼan ya yakʼ ta ilel te toj yoʼtane, jaʼ yuʼun jich la sjojkʼoybey te Jesuse: «¿Machʼanix-a te jpatxujke?». 30 Te Jesús jich la yalbey te winike: «Ay jtul winik te jajch tal ta Jerusalén, ko bael ta Jericó, pero tsakot yuʼun j-elekʼetik, la smajik sok la slokʼesbeyik te skʼuʼe, jtebxanix ma laj jilel yuʼunik te winike, jich bajtik te j-elekʼetike. 31 Ay jtul sacerdote te kʼax tey ta be-abi; pero te kʼalal la yil te winike, kʼax bael ta jejch be. 32 Jaʼnix jich kʼax jtul levita ta be-abi, te kʼalal la yil te winike, kʼax bael ta jejch be-euk. 33 Pero, ay jtul samaritano te kʼax tey-euk-ae, te kʼalal la yil te winike, kʼaxto la snaʼbey yoʼbolil sba. 34 Noptsaj* ta stojol te winike, la spokbey ta aceite sok ta vino te yejchene, jaʼnix jich la spotsbey. La smojtes ta sburro, la yikʼ bael ta jun wayibal na swenta tey ya skanantay-a. 35 Ta yan kʼajkʼal la slokʼes cheb denario,* la yakʼbey te yajwal te wayibal nae sok jich la yalbey: ‹Kanantaybon-a, teme aytoxan la alajin-ae, ya jtojbat te kʼalal ya sujton tale›. 36 ¿Machʼa ta yoxebal spatxujk kʼot te machʼa la yichʼ tsakel yuʼun te j-elekʼetike?». 37 Jich la yal te winike: «Jaʼ te machʼa naʼbot yoʼbolil sba yuʼune». Jich albot yuʼun te Jesuse: «Baan, jichme xa apas-euk».

38 Te Jesús jajchxan ta beel, kʼot ta chʼin jpam lum. Ay jtul ants tey-a te Marta sbiile, la yikʼ ochel ta sna te Jesuse. 39 Te Marta ay jtul yijtsʼin* te María sbiile, tal snajkan sba ta nopol* yok te Kajwaltike, yak ta schʼamel yaʼiy te bin yak ta yalele. 40 Pero, te Marta bayalnax te bin baem ta yoʼtan spasele, jaʼ yuʼun noptsaj* ta stojol te Jesús sok jich la yalbey: «Kajwal, ¿yuʼunbal maʼyuk skʼoplal ta awoʼtan te bitʼil jtukel la yijkitayon te kijtsʼin* ta spasel spisil te aʼtelile? Albeya te yakuk xtal skoltayone». 41 Jich albot yuʼun te Kajwaltike: «Marta, Marta, bayalnax te bin baem ta awoʼtan spasel sok te ya amel awoʼtan yuʼune, 42 pero jun-nax te bin ya skʼan pasele, ma puersauk te bayale. Yan stukel te María jaʼ la stsa te bin mukʼxan skʼoplale, jaʼ-abi maʼyuk machʼa ya xpojbot yuʼun».