Te lek yachʼil kʼop ya yal te Marcos

4 Ta yan buelta och ta nojpteswanej te Jesús ta stiʼil mar. La stsob sbaik tal kʼax bayal ants winiketik ta sjoyobal te Jesuse, jich yuʼun och ta barco, tey la snajkan sba-a, och bael jtebuk ta mar. Yan stukel te ants winiketik tekʼajtik jilel ta tiʼ mar. 2 Bayal bin jajch yakʼbey snop te ants winiketik ta swenta lokʼombakʼopetik. Jich la yal ta nojpteswanej: 3 «Chʼama awaʼiyik. Ay jtul jtsʼunbajel lokʼ bael ta stsʼunel te yawal tsʼunube. 4 Te kʼalal yak ta stsʼunel-a te yawal tsʼunube, ay kʼot ta tiʼbe. Tal te jaʼmal mutetik, la sbikʼik bael te awal tsʼunubile. 5 Ay yantik kʼot ta tontikil te banti maʼyuk lek slumil, oranax chʼiik tal, melel maba kʼubul te slumile. 6 Pero, te kʼalal lokʼ tal te kʼajkʼale, takijik yuʼun, melel maba kʼuben te slojp’ o yisim.* 7 Ay yantik te kʼot ta yolil chʼixtikil, chʼi tal te chʼixetike, tenotik yuʼun, jich maba la yakʼ sit. 8 Pero, ay yantik te kʼot ta lekil lum, chʼiik tal sok mukʼubik, jaʼ yuʼun sitinik ta lek: ay la yakʼ ta 30, ay la yakʼ ta 60 sok ay la yakʼ ta 100 te site». 9 Jich la yalxan: «Te machʼa ay schikine, akʼame schʼam yaʼiy ta lek te kʼope».

10 Kʼalal stukel ay-a te Jesuse, te machʼatik ayik ta sjoyobal sok te 12 ta tule jajch sjojkʼoybeyik bin swentail te lokʼombakʼopetike. 11 Jich la yal te Jesús: «Te jaʼexe ya awichʼik akʼbeyel anaʼik yuʼun Dios te bin mato yak’oj ta na’el-a ta swenta te Wentainel* yuʼun. Pero, te yantik ants winiketike jaʼnax ya yichʼik akʼbeyel snaʼik ta swenta lokʼombakʼopetik. 12 Manchukme ya yilik kʼinal yilel, maba ya yilik kʼinal, sok manchukme ya yaʼiyik stojol yilel, maba ya xkʼot ta yoʼtanik. Jich maʼyuk bin-ora ya sujtik ta stojol te Diose sok maba ya yichʼik pasbeyel perdón». 13 Sok jich la yaltiklanbeyxan: «Teme ma xkʼot ta awoʼtanik te lokʼombakʼop ini, ¿bin-utʼil ya xbajt kʼotuk ta awoʼtanik te yantik lokʼombakʼopetike?

14 »Te jtsʼunbajele ya stsʼun te skʼop Diose. 15 Te awal tsʼunubil te kʼot ta tiʼbe te banti ya yichʼ tsʼunel te skʼop Diose jaʼ skʼoplal te machʼatik ya yaʼiyik te skʼop te Diose, pero oranax ya xtal te Satanás ta sbulbeyel lokʼel te bin la yichʼ tsʼunel ta yoʼtanike. 16 Jaʼnix jich ay awal tsʼunubil te kʼot ta tontikil jaʼ skʼoplal te machʼatik ya yaʼiyik stojol te skʼop Dios te ya schʼuunik sok sbujtsʼ yoʼtanik. 17 Pero, maba kʼuben te slojp’ o yisim.* Manchukme ya spasik tulan cheʼoxeb kʼajkʼal, ya xchebaj yoʼtanik te kʼalal ya xtal wokolil sok kontrainel ta swenta te skʼop Diose. 18 Ay awal tsʼunubil te kʼot ta yolil chʼixtikil jaʼ skʼoplal te machʼatik ya yaʼiyik te skʼop Dios, 19 pero te bitʼil ya xkuxinik ta jujun kʼajkʼal, te loʼlayel yuʼun te kʼulejalil, spisil te bintik ya xbikʼtaj yoʼtanik yuʼun, ya stenik te skʼop Diose; jich maba ya sitin ta yoʼtanik. 20 Ta slajibal, te awal tsʼunubil te kʼot ta lekil lume jaʼ skʼoplal te machʼatik ya yaʼiyik te skʼop Dios te ya schʼuunik sok sbujtsʼ yoʼtanik, jaʼik te ya sitinike: ay la yakʼ ta 30, ay la yakʼ ta 60 sok ay la yakʼ ta 100 te site».

21 Jaʼnix jich la yaltiklanbeyxan: «Te kʼalal ya yichʼ tsumel kʼajkʼ, maba ya yichʼ nujanel moch ta sba o te ya yichʼ akʼel ta yeʼtal wayibal, ¿mabal jichuk? ¿Mabal yakuk yichʼ akʼel ta yawil? 22 Melel maʼyuk bin nakʼbil te ma xjuʼ ta chiknajtesele sok maʼyuk bin muken ay te ma xjuʼ ya yichʼ akʼel ta naʼel ta komonsitile. 23 Spisil te machʼa ay schikine, akʼame schʼam yaʼiy ta lek te kʼope».

24 Jich la yaltiklanbeyxan: «Chʼama awaʼiyik ta lek te bintik yakex ta yaʼiyel stojole. Melel te bin yilel ya apʼisik te yantike jaʼnix jich ya awichʼik pʼisel-euk, sok kʼaxto jich ya awichʼikxan-a. 25 Melel te machʼa ay bin ya xkʼot ta yoʼtane yame x-akʼbotxan xkʼot ta yoʼtan ta lek; pero te machʼa maʼyuk bin kʼoem ta yoʼtane yame yichʼ pojbeyel te bin jteb kʼoem ta yoʼtane».

26 Jich la yalxan: «Te Wentainel* yuʼun te Diose jaʼ pajal kʼoem sok jtul winik te ya stsʼun awal tsʼunubil ta lumkʼinal. 27 Te winike ya xway ta ajkʼabal sok ya xjajch ta kʼajkʼaleltik. Te awal tsʼunubile ya xchʼiik tal sok ya xmukʼubik, manchukme ma snaʼ te winik te bin yuʼun jich ya xkʼot ta pasele. 28 Te lumkʼinale stukel ya yakʼ sitinuk te awal tsʼunubile: nail ya xchiknaj tal te yabinal, patil ya xchiknaj te sniche, ta slajibal ya xyijub te sit te awal tsʼunubile. 29 Kʼalal yijubix-a te sit te awal tsʼunubile, te winike ya xbajt sboj tal, melel la staix yorail te ya yichʼ tsobeyel te site».

30 Jich la yalxan: «¿Bin ya xjuʼ ya jpajbeytik skʼoplal sok-a te Wentainel* yuʼun te Diose, o bin lokʼombakʼop ya xjuʼ ya jtuuntestik yuʼun ya jcholbeytik skʼoplal-a? 31 Jaʼ jich kʼoem te bin-utʼil jpʼij sbakʼ mostaza,* te kʼalal ya yichʼ tsʼunel ta lumkʼinal jaʼ kʼax chʼinxan-a te bitʼil te yantik sbakʼ awal tsʼunubile, 32 pero te kʼalal tsʼunbilix-ae, ya xchʼi sok jaʼ kʼax mukʼxan ya xkʼot-a te bitʼil te yantik awal tsʼunubile. Ya xlokʼ mukʼ skʼabkʼab, tey ya xtal-a te jaʼmal mutetik ta spasel te spechechik ta yaxinale».

33 La stuuntes bayal lokʼombakʼopetik jich bitʼil ini te kʼalal la schol te skʼop Diose, la yichʼ ta wenta te bantito kʼalal ya yichʼbeyik swentaile. 34 Ta melel, spisil-ora la stuuntes lokʼombakʼop kʼalal kʼopoj sok te ants winiketike; pero kʼalal stukel ay sok-a te jnopojeletik yuʼune, la scholbey yaʼiy spisil te bintik swentaile.

35 Ta kʼajkʼal-abi, te kʼalal yakix ta ijkʼubel-a te kʼinale, jich la yalbey te jnopojeletik yuʼune: «Kʼaxukotik bael ta jejch mar». 36 Te kʼalal la stikunikix bael-a te ants winiketike, te jnopojeletik la yikʼik bael ta barco te Jesús. Sok ay yantik barcoetik te jokinotik bael yuʼune. 37 Ta repentenax tal tulan yikʼal jaʼal ta mar. Te yip sbul te mar la syukʼilan te barco te kʼan nojuk ta jaʼ. 38 Te Jesús yakʼoj stsʼamjol ta wayel ta yit te barcoe. Te jnopojeletik tal stijik, jich la yalbeyik: «Maestro, yame xlajotik..., ¿yuʼunbal maʼyuk skʼoplal ta awoʼtan?». 39 Tey-abi jajch te Jesuse, la skom te ikʼ sok jich la yalbey te mare: «¡Chʼaban! ¡Lamajan!». Chʼab te ikʼe, jich lamalnax jilel te kʼinale. 40 Patil jich albotik yuʼun te Jesús: «¿Bin yuʼun te yakex ta xiwel? ¿Yuʼunbal mato ayuk schʼuunel awoʼtanik?». 41 Bayal xiwik te jnopojeletike sok jich jajch yalbey sbaik: «¿Machʼanix ta smelelil-a te winik ini te ya xchʼuunbot skʼop yuʼun te ikʼ sok te mare?».