2 Samuel

12 Jich yuʼun, te Jehová la stikun bael te Natán ta stojol te David. Te kʼalal kʼot te Natán ta stojol te David, jich la yalbey: «Ta jun mukʼul lum ay chaʼtul winiketik. Te jtule jaʼ jkʼulej, te yane pobre stukel. 2 Te jkʼulej winik kʼax bayal tuminchijetik yuʼun sok wakaxetik yuʼun, 3 yan stukel te winik te pobree jaʼnax ay jkojt chʼin meʼ tuminchij yuʼun te smanoj sok te skanantayoje. Jun-nax chʼiik sok te yal snichʼnabe. Te jkojt chʼin meʼ tuminchij jaʼ ya sweʼ te bin jteb ay yuʼun te winike, teynix ya yuchʼ jaʼ ta svaso sok ya xpetot ta wayel yuʼun. Te winik te pobree jaʼ jich la yil te bin-utʼil yantsil nichʼan. 4 Ta jun buelta jul yulaʼ te jkʼulej winik, pero maba la skʼan la stsak jkojtuk te tuminchijetik yuʼun ni jaʼuk te wakaxetik yuʼun swenta ya spasbey sweʼel te yulaʼe. Te bin la spase, jaʼ te la stsakbey tal te chʼin meʼ tuminchij yuʼun te winik te pobree sok jaʼ la schajpanbey sweʼ te yulaʼe».

5 Te kʼalal jich la yaʼiy stojol te David, kʼax bayal ilin ta stojol te jkʼulej winik sok jich la yalbey te Natán: «¡Jamal ya kal ta stojol Jehová te kuxul Dios te winik te jich la spas-abi yame skʼan ya yichʼ milel! 6 Ta skaj te jich la spas sok te maba la snaʼbey yoʼbolil sba te pobree, yame skʼan ya stoj chaneb buelta te jayebnix stojol-a te chʼin meʼ tuminchije».

7 Jich yuʼun, te Natán jich la yalbey te David: «¡Jaʼat te winik-abi! Jichme ya yal te Jehová te Dios yuʼun Israel: ‹Joʼon-nix la jtsaat yuʼun ochat ta ajwalil ta Israel sok la jkoltayat lokʼel ta skʼab te Saúl. 8 Jun koʼtan la kakʼbat te sna te awajwale sok la kakʼtiklanbat ta akʼab te yinamtak te awajwale. Jaʼnix jich la kakʼat ta ajwalil ta Israel sok ta Judá. Pero, teme yuʼun ma tikʼuk la awaʼiy-abi, bayalxan te bin kʼan jpas ta atojol te jichuke. 9 ¿Bin yuʼun la apʼajbey te skʼop te Jehová te kʼalal la apas te bin ma lek ya yile? ¡La amil ta espada te Urías te hitita-winike! Te kʼalal la amil sok te espada yuʼun te ammonitaetike, la awikʼbey te yiname. 10 Jich yuʼun, te espada spisilme-ora ya x-ayin ta stojol te machʼatik ay awuʼune, melel la apʼajon te kʼalal la awikʼbey te yinam te Urías te hitita-winike›. 11 Jich ya yal te Jehová: ‹Teynix ta ana ya kakʼ te ya xjajch awokol. Yame awil te bitʼil ya jpojbat te awinamtak sok yan machʼa ya kakʼbey soknix yame sjokinlan ta wayel ta sakal kʼinal. 12 Te jaʼate muken la apas, yan te joʼone yame kakʼ kʼotuk ta pasel ta stojol spisil Israel soknix yame kakʼ kʼotuk ta pasel ta sakal kʼinal›».

13 Te David jich la yalbey te Natán: «Jtaoj jmul ta stojol te Jehová». Te Natán jich la yalbey te David: «Te Jehová ya spasbat perdón* te amule. Maba ya xlajat. 14 Ta skaj te bitʼil maba la awichʼ ta mukʼ te Jehová, te anichʼan te ayineltoe,* yame xlaj».

15 Ta patil sujt bael ta sna te Natán.

Te Jehová la yakʼ te tsakot ta chamel te snichʼan te David te la sta sok te yinam te Urías. 16 Te David la skʼanbey wokol te Dios ta stojol te alal kereme. La smak sba ta na sok jkʼaxel la skom sweʼel, metsel ta lum ya xkʼax ajkʼabal yuʼun. 17 Jich yuʼun, te mamaletik te ay ta sna te David noptsajik* bael ta stojol sok kʼan sjachik, pero te David maba la skʼan jajchel sok maba la skʼan la sjokinlan ta weʼel. 18 Ta sjukebal kʼajkʼal, laj te alal kereme. Pero, te j-abatetik yuʼun te David ya xiwik ta yalbeyel-a te bitʼil lajix te alal kereme. Jich ya yalik: «Te kʼalal kuxulto-a te alal kereme, maba ya sjakʼbotik jkʼoptik-a te ajwalile. Jich yuʼun, ¿bin-utʼil ya xjuʼ ya kalbeytikix-a te lajix te alal kereme? Ya xjuʼ ay bin chopol* ya spas».

19 Te kʼalal la yil te David te muken yakik ta kʼop* te j-abatetik yuʼune, la snaʼ stojol te lajix te alal kereme. Te David jich la sjojkʼoybey te j-abatetik yuʼune: «¿Yuʼunbal lajix te alal kereme?». «Laj, lajix», xchiik te j-abatetik yuʼune. 20 Jich jajch ta lum te David, atin sok la yakʼbey sba aceite te yichʼoj perfume, la sjel te skʼuʼ spak’ sok bajt ta sna te Jehová yuʼun ya yichʼ ta mukʼ. Tey-abi sujt tal ta sna* sok la skʼan sweʼel, jich weʼ. 21 Jaʼ yuʼun, jich jojkʼoybot yuʼun te j-abatetik yuʼune: «¿Bin yuʼun te jich ya apas ini? Te kʼalal kuxulto-a te alal kereme, la akom aweʼel sok maba la akom aba ta okʼel. Pero, jaʼnax te kʼalal laj te alal kereme, jajchat ta lum sok la akʼan weʼat». 22 Jich la sjakʼ te David: «Te kʼalal kuxulto-a te alal kereme, la jkom jweʼel sok maba la jkom jba ta okʼel, melel jich la kal ta koʼtan ‹Ma jnaʼ, repenta ya xjuʼ ya snaʼbon yoʼbolil jba te Jehová sok te ya yakʼ xkuxin te alal kereme›. 23 Pero, te bitʼil lajixe, ¿binxan swentail te ya jkom jweʼele? ¿Yuʼunbal ya xjuʼ ya xchaʼkuxaj kuʼun? Joʼon ya xboon te banti aye, pero ma xjuʼ ya xtal ta jtojol stukel».

24 Jich yuʼun, te David jajch smukʼubtesbey kʼinal yaʼiy te Bat-Seba te yiname. Tey-abi la sjokin ta wayel te Bat-Seba, ta patil ayin* jtul skerem-al te la yakʼbeyik sbiilin Salomón.* Te Jehová kʼux ta yoʼtan te alal kereme. 25 Ta swenta te kʼux aʼiybil yuʼun te Jehová, la stikun ta alel ta swenta te j-alwanej Natán te yakuk yakʼbeyik sbiilin Jedidías* te alal kereme.

26 Te Joab la yakʼbeyxan guerra te Rabá, jaʼ te skʼinal ammonitaetik sok la yuʼunin te mukʼul lum te banti ay te ajwalile.* 27 Jaʼ yuʼun, te Joab la stikun bael winiketik ta stojol te David ta yalbeyel jich ini: «La kakʼbey guerra te Rabá sok la kuʼuninix te mukʼul lum te banti ay jaʼe.* 28 Jich yuʼun tsoba te soldadoetik te jilemikxane, akʼbeya guerra te mukʼul lum sok uʼunina, jich ma joʼukon ya kuʼunin te mukʼul lum sok jich maba ya yalik te joʼon och ta jkʼabe».*

29 Jich yuʼun, te David la stsob spisil te soldadoetik sok bajt ta Rabá, la yakʼbey guerra sok jich la yuʼunin. 30 Tey-abi la slokʼesbey te corona te ay ta sjol te Malcam.* Te corona ini te jaʼ jun talento* yuʼun oro yalal sok te yichʼoj tʼujbil tonetik la xojbeyik ta sjol te David. Jaʼnix jich la spoj bael bayal biluketik ta mukʼul lum. 31 Jaʼnix jich la yikʼ bael te ants winiketik yuʼun te mukʼul lum swenta ya x-aʼtejik ta swuyel ton, ta stuuntesel aʼtejibaletik te ay sniʼ te ya xbojawan te pasbilik ta hierro, ta stuuntesel echej te pasbilik ta hierro sok ta spasel ladrilloetik. Jaʼ jich la spas ta stojol spisil te mukʼul lumetik yuʼun te ammonitaetike. Ta patil, te David sok spisil te soldadoetik sujtik bael ta Jerusalén.