Carta ta stojol te Hebreoetik

2 Jich yuʼun ya skʼan te ya jchʼam kaʼiytik ta lek te bin kaʼiyojtik stojole, kʼaxemtoxan-a te bin-utʼil kʼayemotik ta spasele, yuʼun jich maʼyuk bin-ora ya xjowijotik bael. 2 Melel teme smelelil te bin la yalbeyik skʼoplal te chʼul-abatetike sok teme la yichʼik castigo spisil te machʼatik la skʼaxuntayik te ley sok te maba la schʼuunik te mantale, 3 ¿bin-utʼil libre ya xjilotik ta stojol te castigo teme maʼyuk skʼoplal ta koʼtantik te mukʼul kolele? Melel jaʼ nail la yalbey skʼoplal te Kajwaltike, te machʼatik la yaʼiyik stojole la yalbotik te yuʼun-nix smelelil-ae, 4 ta yorailnix-abi te Dios la yakʼ ta naʼel te yuʼun-nix smelelil-a ta swenta milagroetik,* mukʼul aʼteliletik sok bayal ta chajp aʼteliletik te ay yutsilal sok te la spuk te chʼul espíritu* yuʼun jaʼ chikan te bin-utʼil la skʼan yoʼtan stukele.

5 Melel te balumilal te yakotik ta yalbeyel skʼoplal te yato xtal ta patile ma jaʼuk la yakʼbey ta skʼab te chʼul-abatetike. 6 Pero ay jtul testigo te jich la yal ta jun lugar: «¿Aybal skʼoplal te ants winik te spisil-ora ay ta awoʼtane? O ¿aybal skʼoplal te snichʼan te winik te ya akanantaye? 7 Pekʼelxan la apas te bin-utʼil te chʼul-abatetike; jaʼat la awakʼ te ya scoronain utsilal sok ichʼel ta mukʼ sok la awakʼbey swentain spisil te yaʼtel akʼabe. 8 La awakʼbey ta yeʼtal yok spisil te bintik aye». Te kʼalal la yakʼbey swentain spisil te bintik aye, maʼyuk bin-a te maba akʼbot swentain yuʼun te Diose. Manchukme mato kilojtik te swentainoj spisil te bintik aye, 9 yakotikix ta yilel te Jesús —te pekʼelxan la yichʼ pasel-a te bin-utʼil te chʼul-abatetike— te yichʼojix te corona yuʼun utsilal sok ichʼel ta mukʼ ta skaj te kʼax swokol jaʼto te kʼalal laje, yuʼun jich ta swenta te slekil yoʼtan Dios te ma snujpʼuk ya kichʼtik, te Jesús la yakʼ sba ta lajel ta stojol spisil te ants winiketike.

10 Melel lek la yil te Dios te jaʼnix ta swenta te chiknaj spisil te bintik ay —te kʼalal la yakʼbey yutsilal bayal ta tul yal snichʼnab—, la slekubtes ta swenta wokoliletik te Machʼa yichʼoj yaʼtel ta slebeyel skolel te yantike. 11 Melel te machʼa ya schʼulteswan sok te machʼatik yakik ta yichʼel chʼultesel jun-nax te banti talemike. Jaʼ yuʼun ma xkʼexaw ta yalel te jaʼ yermanotak 12 te kʼalal jich ya yal: «Ya kalbey skʼoplal te abiil ta stojol te kermanotake; ya jkʼayojtaybat awutsilal ta yolil te congregación». 13 Jaʼnix jich la yal: «Ya kakʼ smukʼul koʼtan ta stojol». Sok jich la yalxan: «Joʼon sok te kal jnichʼnab te la yakʼbon te Jehová».*

14 Jich bitʼil te chʼichʼbakʼet te «alnichʼanetik» ini, jaʼnix jich chʼichʼbakʼet kʼot-euk, yuʼun jich ta swenta te slajele ya slajin te machʼa swentainoj te lajele, jaʼ te Pukuje,* 15 sok te ya yakʼ ta libre spisil te machʼatik mosoinbilik te jayeb kʼajkʼal kuxulik ta skaj te ya xiʼik te lajele. 16 Melel chikan ta ilel te maba tal skoltay chʼul-abatetik, jaʼ tal skoltay te stsʼumbal te Abrahán. 17 Jaʼ swentail te pajal kʼot sok te «yermanotak» ta spisil, yuʼun jich kʼot ta mukʼul sacerdote te ya snaʼ yoʼbolil jbatik sok te jun yoʼtan ta stojol Dios, jich la yakʼ sba ta milbil majtanil ta skaj te smul te ants winiketik yuʼun jich lek ya yil sbaik sok-a te Diose. 18 Jich bitʼil kʼax swokol te kʼalal la yichʼ akʼel ta prueba, jich chapalix ta lek ta skoltayel te machʼatik ya yichʼik akʼel ta prueba.