Te lek yach’il k’op ya yal te Juan

9 Te k’alal yak ta kʼaxel-a te Jesuse, la yil jtul winik te ma xyil kʼinal ta yayinelto.* 2 Jich jojkʼoybot yuʼun te jnopojeletik yuʼune: «Rabí,* ¿machʼa smul te bitʼil ma xyil kʼinal te winik ini, jaʼnixbal smul stukel o jaʼ smul te smeʼ state?». 3 Jich albotik yuʼun te Jesuse: «Ma jaʼuk smul ni jaʼuk smul te smeʼ state, pero jich kʼot ta stojol swenta jich ya yil te ants winiketik te bin ya xjuʼ ya spas te Diose. 4 Ya skʼan ya jpasbeytik te yaʼtel te machʼa la stikunon tal jich bitʼil te sakto te kʼinale. Melel maʼyuk machʼa ya xjuʼ ya x-aʼtejix-a teme och tal te ajkʼabale. 5 Te bitʼil liʼto ayon ta balumilale, jaʼ sakal kʼinalon yuʼun te balumilal». 6 Te kʼalal lajnax yoʼtan ta yalel ini, la stubatay te lume sok la spas ta ajchʼal. Patil la sjaxbey ta sit te winike 7 sok jich la yalbey: «Baan, poka asit ta s-estanqueul* jaʼ ta Siloam» (te ya skʼan ya yal «tikunbil»). Jich bajt, la spok sit, te kʼalal sujt tale, ya yilix kʼinal-a.

8 Jaʼ yuʼun, jich jajch yalik te spatxujk sok te machʼatik yilojik te ya xkʼanbaje: «¿Mabal jaʼuk te winik ini te ya snajkan sba ta kʼanbajele?». 9 Ay machʼatik la yalik: «Jaʼ». Ay yantik la yalik: «Ma jaʼuk, pero pajal sok yilel». Te winike jich la yal: «Melel, joʼon-nix-a». 10 Jaʼ yuʼun, jich la sjojkʼoybeyik: «¿Bin-utʼil jam te asite?». 11 Jich albotik yuʼun: «Te winik te Jesús sbiile la spas ajchʼal, la sjaxbon ta jsit sok jich la yalbon: ‹Baan ta Siloam, poka asit tey-a›. Jich boon, la jpok te jsite, jich la kil kʼinal». 12 Tey-abi, jich la sjojkʼoybeyik: «¿Banti ay te winik ya awale?». «Ma jnaʼ te banti aye», xchi te winike.

13 Jich la yikʼik bael ta stojol te fariseoetik te winik te ma xyil kʼinal-ae. 14 Skʼajkʼalel sábado-a te kʼalal la spas ajchʼal te Jesús sok te la sjambey sit te winike. 15 Jaʼ yuʼun, te fariseoetik la sjojkʼoybeyik-euk te bin-utʼil jam sit te winike. Jich la yal te winik: «La sjaxbon ajchʼal ta jsit, la jpok, jich ya kilix kʼinal». 16 Jich yuʼun, ay chaʼoxtul fariseoetik te jich jajch yalik: «Te winik ini maba talem ta stojol Dios, melel maba ya yichʼ ta mukʼ te skʼajkʼalel sábado». Ay yantik te jich la yalik: «Pero, ¿bin-utʼil ay-a te jtul jmulawil te ya xjuʼ ya spas milagroetik* jich bitʼil ini?». Jich yanyantik-a te bin la snopik ta stojole. 17 Jich la schaʼyalbeyik te winike: «Te bitʼil la sjambat te asite, ¿bin ya anop ta stojol?». Jich la yal te winike: «Jaʼ jtul j-alwanej».

18 Jich yuʼun, te judioetik ma schʼuun yoʼtanik teme yuʼun-nix ma xyil kʼinal-a te winike sok te ya yilix kʼinal ta ora ini. Jaʼ yuʼun la yikʼik tal te smeʼ state. 19 Jich la sjojkʼoybeyik: «¿Jaʼbal akerem nichʼanik ini te ya awalik te ma xyil kʼinal te kʼalal ayine?* Jich yuʼun, ¿bin-utʼil ay-a te ya yilix kʼinale?». 20 Jich la yalik te smeʼ state: «Jaʼ, jaʼ jkerem nichʼankotik sok jnaʼojkotik te ma xyil kʼinal te kʼalal ayine.* 21 Pero ma jnaʼkotik bin-utʼil ay-a te ya yilix kʼinale; sok ma jnaʼkotik machʼa-a te jambot sit yuʼune. Jaʼ xa ajojkʼoybeyik, melel mukʼix sok jaʼ akʼa kʼopojuk». 22 Jich la yalik te smeʼ stat ta skaj te xiʼojik te judioetik; melel te judioetik schapojikix-a te ya slokʼesik ta sinagoga machʼauk-a te ya schʼuun te jaʼ Cristo te Jesuse. 23 Jaʼ swentail te jich la yalik te smeʼ state: «Jaʼ xa ajojkʼoybeyik, melel mukʼix».

24 Jaʼ yuʼun la yikʼik tal yan buelta te winik te ma xyil kʼinal-ae sok jich la yalbeyik: «Ala ta jamal te bin smelelil, jichme ya awichʼ ta mukʼ-a te Diose. Jnaʼojkotik te jmulawil te winik ya awale». 25 Jich la yal te winik: «Teme jmulawile, te joʼone ma jnaʼ. Te bin-nax ya jnaʼe jaʼ te ma xkil kʼinal-ae sok te ya kilix kʼinal ta ora ini». 26 Jaʼ yuʼun, jich la sjojkʼoybeyik: «¿Bin la spasbat? ¿Bin-utʼil la sjambat te asite?». 27 Jich albotik yuʼun te winik: «La kalbeyexix, pero ma xa akʼan ya achʼuunik te bin ya kale. ¿Bin yuʼun te ya akʼanik te ya kalbeyex-xane? ¿Yuʼunbal ya akʼan ya x-ochex ta jnopojel yuʼun-euk?». 28 Te kʼalal jich la yaʼiyik stojole, jich la yalbeyik sok slab yoʼtanik: «Te jaʼate jnopojelat yuʼun te winik-abi, yan te joʼonkotike jnopojelotik yuʼun te Moisés. 29 Jnaʼojkotik te kʼoponot yuʼun Dios te Moisés, yan te winik-abi ma jnaʼtik te banti taleme». 30 Jich albotik yuʼun te winik: «Chajp ta aʼiyel-a te ma xa anaʼik te banti talem te winik te la sjambon te jsite. 31 Jnaʼojtik te Dios ma xyaʼiybey skʼop te jmulawiletike, pero te machʼa ya xiʼ* te Dios sok te ya spasbey te skʼanojel yoʼtane ya x-aʼiybot skʼop yuʼun stukel. 32 Te jayebix jaʼbil kuxul te ants winiketik maʼyuk kaʼiyojtik stojol te ay machʼa ya sjambey sit te machʼa ma xyil kʼinal ta yayineltoe.* 33 Te manchuk talem ta stojol Dios te winik ini, maʼyuk bin ya xjuʼ ya spas te jichuke». 34 Jaʼ yuʼun, jich la yalbeyik: «Te jaʼate mero jmulawilat te kʼalal ayinate,* ¿jaʼatbal ya xtal anojptesotik?». Jich la stenik lokʼel.

35 Te Jesús la yaʼiy stojol te la stenik lokʼel te winike, jich la yalbey te kʼalal la stae: «¿Aybal schʼuunel awoʼtan ta stojol te sNichʼan te Winike?».* 36 Jich la yal te winike: «Albon kaʼiy machʼa-a, Kajwal, yuʼun jich ya kakʼ schʼuunel koʼtan ta stojol». 37 Jich albot yuʼun te Jesús: «Awilojix te machʼa-ae. Jaʼnix te machʼa yakat ta kʼop* soke». 38 Jich la yal te winike: «Ya kakʼ schʼuunel koʼtan ta atojol, Kajwal». Jich la snijan sba ta stojol. 39 Jich la yal te Jesús: «Talon ta balumilal yuʼun ya x-ichʼawanon ta kʼop, yuʼun jich ya yilik kʼinal te machʼatik ma xyilik kʼinal sok te machʼatik ya yilik kʼinal ta skʼopik maba ya yilik kʼinal». 40 Te kʼalal la yaʼiyik stojol te fariseoetik te tey ayik-euk-ae, jich la yalik: «¿Yuʼunbal ma xkilkotik kʼinal-euk?». 41 Jich albotik yuʼun te Jesús: «Te yuʼunuk ma xa awilik kʼinale, maʼyuk amulik te jichuke. Pero, te bitʼil ya awalik ‹Ya kiltik kʼinal›, te xchiexe, akuchoj te amulike».