Schebal carta ta stojol te Timoteo

1 Joʼon Pabloon, te jpuk-kʼopon yuʼun Cristo Jesús ta swenta te skʼanojel yoʼtan te Dios swenta ya kalbey skʼoplal te kuxlejalil te ay ta swenta te Cristo Jesús, 2 ya jtsʼibaybat ta atojol te carta ini, Timoteo, jnichʼan te kʼuxat ta koʼtane:

Ayukme ta atojol te slekil yoʼtan Dios te ma snujpʼuk ya kichʼtike sok akʼame snaʼbat yoʼbolil aba sok ayukme ta atojol te lamalkʼinal te talem ta stojol te jTatik Dios sok te Kajwaltik Cristo Jesús.

3 Ya kalbey wokol te Dios —jaʼ te machʼa sok spisil koʼtan ya x-abatinon ta stojol jich te bin-utʼil la spasik te antiguo jmeʼ jtate sok te lek te bin ya yalbon te koʼtan te bitʼil ya x-abatinon ta stojole— sok spisil-ora ya xjulat ta koʼtan te kʼalal ya jkʼanbey wokol te Dios ta kʼajkʼal ajkʼabal. 4 Te kʼalal ya xjul ta koʼtan te yaʼlel asite, koʼtanuk ya kilat yuʼun jich ya jta stseʼelil koʼtan. 5 Melel ya xjul ta koʼtan te yuʼun-nix smelelil-a te schʼuunel awoʼtane, te jaʼ nail ayin ta yoʼtan te achuchuʼ* Loida sok te Eunice te anane,* sok jnaʼoj te jaʼnix jich ay schʼuunel awoʼtan-euke.

6 Jaʼ yuʼun ya jultesbat ta awoʼtan te yakuk awakʼ xtilxan jich te bin-utʼil kʼajkʼ te majtanil yuʼun Dios te awichʼoj jaʼto te kʼalal la jkajan jkʼab ta atojole. 7 Melel te Diose maba la yakʼbotik xiwel ta koʼtantik, jaʼ la yakʼbotik yip koʼtantik, kʼuxul oʼtanil sok spʼijil koʼtantik. 8 Jaʼ yuʼun mame xkʼexawat ta yalbeyel skʼoplal te Kajwaltik, jaʼnix jich mame xkʼexawat ta jtojol ta skaj te chukulon ta swentae, jaʼ lek kujchuk awuʼun te wokoliletik ya xkʼax ta atojol ta swenta te lek yachʼil kʼop sok ayukme smukʼul awoʼtan ta stojol te yuʼel te Diose. 9 Jaʼ la yakʼbotik jkoleltik sok jaʼ la yikʼotik ta swenta te chʼul ikʼel yuʼun, pero ma jaʼuk ta swenta kaʼteltik te la yikʼotike, jaʼ ta swenta te skʼanojel yoʼtan sok te slekil yoʼtan te ma snujpʼuk ya kichʼtike. Jaʼ ini ayix tal bayal tiempo te la yakʼbotik kiltik ta swenta te Cristo Jesús, 10 pero ta ora ini jamal chikan ta ilel ta swenta te kʼalal chiknaj tal te Jkoltaywanej kuʼuntik jaʼ te Cristo Jesús. Jaʼ la slajinbey skʼoplal te lajele sok ta swenta te lek yachʼil kʼop la yakʼ jnaʼtik te ya xjuʼ ya jta jkuxlejaltik sok te bakʼetalil te maʼyuk bin-ora ya xkʼaʼe, 11 te jaʼ swentail te la kichʼ akʼbeyel kaʼtel ta jcholkʼop, ta jpuk-kʼop sok ta maestro.

12 Jaʼ swentail-euk te yakon ta stsʼikel spisil te wokoliletik ini, pero maba ya xkʼexawon yuʼun. Melel ya jnaʼbey sba te machʼa jchʼuunoj sok smukʼulinoj koʼtan te ya xjuʼ ya skanantay ta lek te bin kakʼojbey ta skʼab jaʼto ta Skʼajkʼalel ichʼel ta kʼop.* 13 Mame xa awijkitay te lekil kʼopetik te la kalbat awaʼiy ta swenta te chʼuunel oʼtanil sok te kʼuxul oʼtanil te ya jtatik ta skaj te jun ayotik sok te Cristo Jesús. 14 Ta swenta te koltayel yuʼun te chʼul espíritu* te kichʼojtike, kanantayame te kʼulejalil ini te akʼbil ta awentae.

15 Anaʼojix te la yijkitayonik spisil te machʼatik ayik ta skʼinal Asia, jich la spas-euk te Figelo sok te Hermógenes. 16 Akʼame yichʼ naʼbeyel yoʼbolil sba yuʼun te Kajwaltik te machʼatik ayik ta sna te Onesíforo, melel spisil-ora la yakʼbon smukʼul koʼtan sok maba kʼexaw ta jtojol te bitʼil chukulon ta cadenae. 17 Te kʼalal xtaluk ta Roma, maba la skom sba ta slebelon jaʼto te kʼalal la staone. 18 Akʼame naʼbotuk yoʼbolil sba yuʼun te Kajwaltik Jehová* ta Skʼajkʼalel ichʼel ta kʼop.* Te jaʼate anaʼojix spisil te aʼteliletik te la spas ta Éfeso.