Te lek yachʼil kʼop ya yal te Lucas

2 Ta yorail-abi la yal mantal te César Augusto te akʼa yakʼ sbaik ta tsʼibayel ta jun spisil te ants winiketike. 2 (Te sbabial censo ini la yichʼ pasel kʼalal jaʼ ay ta gobernador yuʼun Siria-a te Quirinio). 3 Spisil te ants winiketik bajt yakʼ sbaik ta tsʼibayel ta jun te banti ay te slumalik ta jujuntule. 4 Bajt yakʼ sba ta jun-euk te Josee. Te bitʼil talem ta stsʼumbal Davide, lokʼ bael ta lum Nazaret te ay ta skʼinal Galilea, bajt ta lum Belén te ay ta skʼinal Judea te jaʼ slumal-a te Davide. 5 Bajt yakʼ sba ta tsʼibayel ta jun sok te María te yiname, melel nujpunik —jichnix te bin-utʼil schapojik— sok nopol* ya x-ayinix* te alal yikʼoje. 6 Te kʼalal ayik ta Belén, la sta yorail te ya x-ayin* te yale. 7 Jich ayin* te sba skerem-ale. La spots ta pakʼ sok la smejtsʼan ta yawil sweʼel chambalam, melel maʼyuk la staik te banti ya xjuʼ ya xjilik ta wayele.

8 Ta nopol* lum Belén ay jkanantuminchijetik te yakik ta skanantayel stuminchijik ta akiltik ta ajkʼabal. 9 Ta repentenax chiknaj ta stojolik te chʼul-abat yuʼun Jehová* sok xlemetnax ta sjoyobalik te yutsilal te Jehová,* bayal xiwik yuʼun. 10 Jich albotik yuʼun te chʼul-abate: «Mame xiwex, melel tal kalbeyex lek yachʼil kʼop te ya x-akʼbot sbujtsʼ yoʼtan spisil te ants winiketike. 11 Jtsʼintonax* yayinel* te jkoltaywanej awuʼunik ta slumal David, jaʼ te Kajwaltik Cristo. 12 Jichme ya xkʼot ataik te alale: potsbil ta pakʼ sok mejtsʼanbil ta yawil sweʼel chambalam». 13 Ta oranax chiknajxan bayal chʼul-abatetik te jich yakik ta yalbeyel yutsilal te Diose: 14 «Bayal yutsilal te Dios te ay ta chʼulchan, sok ay lamalkʼinal ta stojol te ants winiketik te ayik ta balumilal te lek ilbilik yuʼun te Diose».

15 Te kʼalal sujtik bael ta chʼulchan te chʼul-abatetike, jich jajch yalbey sbaik te jkanantuminchijetike: «Yame skʼan ya xbootik ta Belén, ya skʼan ya xbajt kiltik te bin kʼoemix ta pasel te la yakʼbotikix jnaʼtik te Jehovae».* 16 Jich oranax bajtik, tey kʼot staik-a te María sok te José soknix te alal te wayal yuʼunik ta yawil sweʼel chambalam. 17 Te kʼalal la yilik ini, jajch scholik te bin la yichʼik albeyel ta swenta te alale. 18 Spisil te machʼatik la yaʼiyik stojol te bin la scholik te jkanantuminchijetike chamnax yoʼtanik* yuʼun. 19 Yan stukel te Mariae jajch skʼej ta yoʼtan spisil te bintik la yichʼ cholele sok jajch snopilan ta yoʼtan te bintikwan swentail spisil ini. 20 Te kʼalal sujtik bael te jkanantuminchijetik, yakik ta yalbeyel bael yutsilal sok yalbeyel wokol te Diose, melel jichnix la yilik sok la yaʼiyik te bin-utʼil albotik yuʼun te chʼul-abatetike.

21 Te kʼalal tsʼakaj waxakeb kʼajkʼal yayinel-a* te alale, la yichʼ circuncisión,* Jesús sbiil la yakʼbeyik jichnix te bitʼil la yal te chʼul-abat te kʼalal mato yikʼoj alal-a te Mariae.

22 Te kʼalal kʼot yorail te ya yichʼik lekubtesel jich te bitʼil ya yal te Ley yuʼun Moisés, moik bael ta Jerusalén yuʼun ya yakʼik ta stojol Jehová* te alal, 23 jich bin-utʼil tsʼibaybil ta Ley yuʼun te Jehová:* «Spisil te ba-alal kerem ya x-ayine,* jaʼme yuʼun ya xkʼot te Jehovae».* 24 Tey-abi la yakʼik te milbil majtanil jich bitʼil ya yal te Ley yuʼun Jehová:* «Chaʼkojt xpuliwok* o chaʼkojt jkolel stsumut».*

25 Ay jtul winik ta lum Jerusalén te toj yoʼtan sok yichʼoj ta mukʼ te Diose, Simeón sbiil, yak ta smaliyel te ya yichʼ mukʼubtesbeyel kʼinal yaʼiy te lum Israel, jaʼnix jich wentainbil yuʼun te chʼul espiritue.* 26 Jaʼnix jich akʼbot snaʼ yuʼun te chʼul espíritu* te maba ya xlaj jaʼto teme la yil te Cristo te Tsabil yuʼun te Jehová.* 27 Tijbot yoʼtan yuʼun te chʼul espíritu* yuʼun ya x-och ta templo. Te kʼalal och ta templo te José sok te María ta spasel te bin ya yal te Ley ta stojol te alal Jesús, 28 te Simeón la spet te alale sok jich la yalbey yutsil skʼoplal te Diose: 29 «Kajwal, Mukʼul Ajwalil, jun koʼtan ya xlajon jich te bitʼil awaloje, 30 melel la kilix te bin-utʼil ya awichʼ tal te kolel 31 te achajpanojix ta stojol spisil te lumetike. 32 Jaʼ sakal kʼinal ta stojol te ants winiketik yuʼun ya yilik sakal kʼinal sok ya sta yutsilal te lum Israel awuʼune». 33 Te smeʼ stat te alal chamnax yoʼtanik* yuʼun spisil te bin ya yichʼ alel ta stojole. 34 Jaʼnix jich akʼbotik bendición yuʼun te Simeón, sok jich la yalbey te María te snan* te alale: «Aʼiya awaʼiy stojol, te alal ini bayal machʼatik ta Israel ya xyalik yuʼun sok bayal machʼatik ya xjajchik yuʼun, jaʼnix jich yame yichʼ kontrainel, 35 jich ya xchiknaj te bin ay ta yoʼtan te ants winiketike. Jaʼnix jich te jaʼate, María, yame ata awokol te jich kʼoem bitʼil jun espada te ya slowat kʼaxele».

36 Jaʼnix jich ay jtul j-alwanej ants tey-a te Ana sbiile, jaʼ yantsil nichʼan te Fanuel te talem ta stsʼumbal Aser, mero meʼelix-a. Ta yachʼixilto nujpun, pero jaʼnax jukeb jaʼbil kuxin sok te smamalale. 37 Jil ta meʼba ants sok ayix 84 yaʼbilal-a, spisil-ora ay ta templo, ta kʼajkʼal ajkʼabal la skʼopon Dios sok la skom sweʼel tey-a. 38 Ta yorailnix-abi kʼot-euk te Ana te banti ayike, jajch yalbey wokol te Dios ta swenta te alale sok jajch yalbey skʼoplal ta stojol spisil te machʼatik yakik ta smaliyel te kolel yuʼun te Jerusalén.

39 Te kʼalal la spasikix spisil te bin ya yal te Ley yuʼun Jehová,* sujtik bael ta Nazaret te jaʼ slumalik te ay ta skʼinal Galilea. 40 Jich jajch ta mukʼubel te chʼin alal sok ta stael yip. Jaʼnix jich yak ta stael bayal spʼijil yoʼtan sok spisil-ora lek ilbil yuʼun te Diose.

41 Te smeʼ stat te Jesús kʼayemik-a te ya xbajtik ta Jerusalén ta spasel te Kʼin yuʼun Pascua ta jujun jaʼbil. 42 Te kʼalal ayix 12 yaʼbilal-a te Jesús, moik bael ta Jerusalén jich te bin-utʼil kʼayemik ta spasele. 43 Te kʼalal tsʼakaj te jayeb kʼajkʼal ya yichʼ pasel te kʼine, sujtik bael, yan stukel te kerem Jesús jil ta Jerusalén, ma la snaʼik stojol te smeʼ state. 44 Beenemikix jun kʼajkʼal-a te kʼalal la yilik te maba tey ay-a te Jesús ta yolil te machʼatik pajal yakik ta sujtel bael soke. Jich jajchik ta sleel ta yolil te machʼatik ay bin yutoj sbaik soke, jaʼnix jich ta yolil te machʼatik ya snaʼbeyik sbae. 45 Jich bitʼil te ma la staike, sujtik bael ta Jerusalén ta sleel ta bayuk. 46 Jaʼto ta yoxebal kʼajkʼal la staik ta templo. Nakal ta yolil te maestroetik yuʼun te ley sok yak ta yaʼiyel stojol spisil te bin ya yalike sok yak ta spasel jojkʼoyeletik ta stojolik. 47 Spisil te machʼatik la yaʼiybeyik skʼop te Jesuse chamnax yoʼtanik* yuʼun te spʼijil yoʼtan sok te sujtib ya yakʼe. 48 Kʼalal te José sok te María la yilik te Jesuse, chamnax yoʼtanik* yuʼun, jaʼ yuʼun jich la yal te Mariae: «Kerem, ¿bin yuʼun te jich la apasbonkotike? Te joʼon sok te atate kʼaxix jwokoltik ta jlebelatkotik». 49 Jich albotik yuʼun te Jesuse: «¿Bin yuʼun te ya aleonike? ¿Yuʼunbal ma xa anaʼik te ya skʼan ya x-ayinon ta sna te jTate?». 50 Pero maba kʼot ta yoʼtanik te bin albotik yuʼune.

51 Jich te Jesús la sjokin bael te smeʼ stat ta Nazaret sok la yakʼxan sba ta wentainel yuʼunik.* Te snane* la skʼej lek ta yoʼtan spisil te bintik kʼot ta pasele. 52 Te Jesús jich jajch ta chʼiel sok ta staelxan bayal spʼijil yoʼtan, jaʼnix jich lek ilbil yuʼun te Dios sok te ants winiketike.