Te lek yachʼil kʼop ya yal te Mateo

5 Kʼalal te Jesús la yil te bayal ta tul ants winiketike, mo bael ta wits sok la snajkan sba tey-a, jich te jnopojeletik yuʼune noptsajik* tal ta stojol. 2 Jich jajch ta nojpteswanej te Jesús:

3 «Tseʼelnaxme yoʼtanik te machʼatik ya snaʼik te ya skʼan ya sleik te koltayel yuʼun te Diose, melel yame yichʼik te Wentainel* yuʼun te chʼulchane.

4 »Tseʼelnaxme yoʼtanik te machʼatik ya x-okʼik yuʼun mel-oʼtan, melel yame yichʼik mukʼubtesbeyel kʼinal yaʼiyik.

5 »Tseʼelnaxme yoʼtanik te machʼatik manso yoʼtanik, melel yame x-akʼbot yuʼuninik te balumilale.

6 »Tseʼelnaxme yoʼtanik te machʼatik ya skʼanik* te jaʼuk ya yichʼ pasel te bin toj ta pasele, melel yame xkʼot ta pasel te bin stojil ta pasele.

7 »Tseʼelnaxme yoʼtanik te machʼatik ya snaʼbey yoʼbolil sba te yantike, melel yame yichʼik naʼbeyel yoʼbolil sbaik-euk.

8 »Tseʼelnaxme yoʼtanik te machʼatik sak yoʼtanik, melel yame yilbeyik sit te Diose.

9 »Tseʼelnaxme yoʼtanik te machʼatik ya yakʼ lamajuk kʼinal, melel yal snichʼnab Dios ya xkʼotik.

10 »Tseʼelnaxme yoʼtanik te machʼatik yichʼojik kontrainel ta swenta te ya spasik te bin toj ta pasele, melel jaʼ yuʼunik ya xkʼot te Wentainel* yuʼun te chʼulchane.

11 »Tseʼelukme awoʼtanik teme joʼon ta jwenta te ya sbolkʼoptayex, ya skontrainex sok bayal bintik ya yalik ta atojolik te ma smeleliluke. 12 Chiknajuk ta ilel te kʼax tseʼel awoʼtanik, melel kʼax mukʼ te amajtanik ta chʼulchane, yuʼun jich la yichʼik kontrainel-euk te j-alwanejetik ta nameye.

13 »Jaʼex yatsʼamulex te balumilal. Pero, teme chʼay schiʼil te atsʼame, maba ya xchaʼchiʼubxan. Jkʼaxel ma xtuunix sok ya yichʼ buskʼinel lokʼel yuʼun ya yichʼ tsʼoʼel* ta tekʼel yuʼun te ants winiketike.

14 »Jaʼex sakal kʼinalex yuʼun te balumilal. Ma xjuʼ ta nakʼel jpam lum te ay ta toyol wits. 15 Maʼyuk machʼa ya stsum kʼajkʼ te ya snujanbey moch ta sba, te bin ya yichʼ pasele, jaʼ te ya yichʼ akʼel ta yawil yuʼun jich ya yilik kʼinal te machʼatik ayik ta yutil nae. 16 Jaʼnix jichex-euk chiknajuk ta ilel ta stojol te ants winiketik te sakal kʼinalexe. Akʼa yilik te lekil aʼtelil yakex ta spasel yuʼun jich ya yalbeyik yutsil skʼoplal te aTatik te ay ta chʼulchane.

17 »Mame xa akuyik te tal jlajinbey skʼoplal te bin ya yal te Leye o te bin la yal te J-alwanejetike. Maba tal jlajinbey skʼoplal, tal jkʼotes ta pasel. 18 Jamal ya kalbeyex, ya xjuʼ ya xlaj skʼoplal te chʼulchan sok te balumilal, pero ma xchʼay ni junuk jota sok ni junuk smajkʼalel jun letra yuʼun te Ley te ma xkʼot ta pasele. 19 Jaʼ yuʼun, te machʼa ya skʼaxuntay junuk te mantalil te ma mukʼuk skʼoplal sok te jich ya yakʼbey snop te yantike, pekʼelme skʼoplal ya xkʼot ta stojol te Wentainel* yuʼun te chʼulchan. Yan stukel te machʼa ya schʼuun spasel te mantaliletik sok te jich ya yakʼbey snop te yantike mukʼ skʼoplal ya xkʼot ta stojol te Wentainel yuʼun te chʼulchane. 20 Jamal ya kalbeyex, teme jich atalelik bitʼil te escribaetik sok te fariseoetike, maʼyuk bin-ora ya x-ochex ta Wentainel* yuʼun te chʼulchane.

21 »Awaʼiyojik te jich la yichʼik albeyel te antiguo ameʼ atatike: ‹Mame xa awaʼiy milaw, spisil te machʼa ya xmilawan yame yichʼ ichʼel ta kʼop ta stojol te juecetike›. 22 Pero, joʼon ya kalbeyex: spisil te machʼa ya yilintay te yermanoe yame yichʼ ichʼel ta kʼop ta stojol te juecetike. Spisil te machʼa ya yut sok slab yoʼtan te yermanoe yame yichʼ ichʼel ta kʼop ta stojol te Mukʼul Jchajpanwanejetike.* Pero, spisil te machʼa ‹¡Kʼax bolat!› ya yut te yermanoe, yame yichʼ akʼel ta Gehena* te banti yak ta tilel te kʼajkʼe.

23 »Jaʼ yuʼun, teme yakat ta yichʼel bael te smajtan Dios ta skajtajib chikʼbil majtanil, pero teme jul ta awoʼtan tey-a te ma lekuk yoʼtan ta atojol te awermanoe, 24 ijkitaya jilel te majtanil awuʼun ta stojol te skajtajib chikʼbil majtanil. Baan sok nail lekubtesbeya yoʼtan te awermanoe, patil sujtan ta yakʼel te majtanil awuʼune.

25 »Teme ay jtul akontra ya yikʼat bael ta stojol juez, pasa tulan ta schajpanel ta oranax te kʼop jajchem awuʼunik te kʼalal yakex ta bael ta stojol-a te juece, melel teme maʼuke yame yakʼat ta skʼab te juez, jich te juez yame yakʼat ta skʼab te jkananchukojibal yuʼun jich ya xjilat ta chukel. 26 Jamal ya kalbat te maba ya xlokʼat ta chukel jaʼto teme la atoj te slajibal centavoe.*

27 »Awaʼiyojik te jich albil skʼoplale: ‹Mame xa awaʼiy antsiwej sok mame xa awakʼ aba ta antsinel›. 28 Pero, joʼon ya kalbeyex: spisil te machʼa ya yilulan jtul ants te ya xbikʼtaj yoʼtan yuʼun ya skʼan ya sjokin ta wayel, la yantsinix ta yoʼtan-abi. 29 Jaʼ yuʼun, teme ya yakʼbat ale amul te swaʼel asite, lokʼesa sok chʼoja bael ta namal.* Jaʼ lekxan te ya achʼay jpʼijuk asit, ma jaʼuk te spisil abakʼetal ya yichʼ chʼojel bael ta Gehena.* 30 Jaʼnix jich, teme ya yakʼbat ale amul te swaʼel akʼabe, boja lokʼel sok chʼoja bael ta namal.* Jaʼ lekxan te ya achʼay jchʼixuk akʼab, ma jaʼuk te spisil abakʼetal ya yichʼ chʼojel bael ta Gehena.*

31 »Jaʼnix jich la yichʼ alel: ‹Spisil te machʼa ya yijkitay te yinam, akʼa yakʼbey sjunil te banti ya yal te ya slajinbey skʼoplal te snujpunele›. 32 Pero, joʼon ya kalbeyex te spisil te machʼa ya yijkitay yinam —teme ma ta skajuk mulwej—* yame xjuʼ xbajt ta antsinel yuʼun, sok machʼauk-a te ya yikʼ te ants te ijkitaybile, yakme ta antsiwej.

33 »Jaʼnix jich awaʼiyojik te jich la yichʼik albeyel te antiguo ameʼ atatike: ‹Mame ayuk bin ya awal ta jamal te ma xa akʼotes ta pasel ta patile; kʼotesa ta pasel te bin awaloj ta jamal ta stojol te Jehová›.* 34 Pero, joʼon ya kalbeyex: mame ayuk bin ya awakʼik ta testigo. Mame xa awakʼik ta testigo te chʼulchane, melel jaʼ smukʼul naktajib te Diose; 35 ni jaʼuk ta stojol te balumilal, melel jaʼ skajtajib yok te Diose; ni jaʼuk ta stojol te Jerusalén, melel jaʼ te lum yuʼun te Mukʼul Ajwalile. 36 Jaʼnix jich mame xa awakʼ ta testigo te ajole, melel ma xjuʼ awuʼun skʼatpʼunel ta sak o ijkʼ jlijkʼuk te stsotsel ajole. 37 Jich yuʼun, teme ‹yak› xchiexe, yuʼun-nanix yak-abi, teme ‹maʼuk› xchiexe, yuʼun-nanix maʼuk-abi. Teme ma jichuk ya akʼotesik ta pasel te bitʼil la awalike, talem ta stojol te Satanase.*

38 »Awaʼiyojik te jich albil skʼoplale: ‹Teme ay machʼa la atʼusbey sit, yame awichʼ tʼusbeyel asit-euk, teme ay machʼa la alokʼesbey sbakel ye, yame awichʼ lokʼesbeyel sbakel awe-euk›. 39 Pero, joʼon ya kalbeyex: mame xa asutbey spakol te machʼa ay bin ma lek ya spasbate. Teme ay machʼa la smajbat te swaʼel acho, akʼbeya smajbat te yane. 40 Teme ay machʼa ya skʼan ya yikʼat bael ta stojol juez yuʼun ya spojbat te akʼuʼe, jaʼnix jich akʼbeya jilel te anajtil kʼuʼe. 41 Teme ay machʼa yichʼoj tulan te yaʼtel ya sujat ta skuchel ijkatsil junuk kilómetro,* kucha bael chebuk kilómetro. 42 Teme ay machʼa ay bin ya skʼanbate, akʼbeya. Teme ay machʼa ay bin ya skʼanbat ta majanele,* akʼbeya.

43 »Awaʼiyojik te jich albil skʼoplale: ‹Kʼuxukme ta awoʼtan te apatxujk* sok pʼaja te akontrae›. 44 Pero, joʼon ya kalbeyex: kʼuxukme ta awoʼtanik te akontraike sok kʼoponbeyaik Dios te machʼatik ya yutsʼinexe. 45 Jichme ya awakʼik ta ilel te jaʼ yal snichʼnabex te aTatik te ay ta chʼulchane, melel ya yakʼ xlokʼ tal kʼajkʼal ta stojol te machʼatik ma lek stalelik sok te machʼatik lek yoʼtanik, sok ya yakʼ tal jaʼal ta stojol te machʼatik toj yoʼtanik sok te machʼatik ma toj yoʼtanik. 46 Melel teme jaʼnax kʼux ya awaʼiy ta awoʼtanik te machʼatik kʼux ya yaʼiyexe, ¿bin majtanil ya ataik yuʼun? ¿Mabal jichuk ya spasik-euk te jkʼanpatanetike? 47 Teme jaʼnax ya apatbey yoʼtan te awermanotake, ¿yan-naxbal ta ilel-a? ¿Mabal jichuk ya spasik-euk te ants winiketik yuʼun te nacionetike? 48 Jich yuʼun, tojukexme jich bitʼil toj te aTatik te ay ta chʼulchane.