Sbabial carta ta stojol te Corintioetik

13 Teme ya jnaʼbey skʼop te ants winiketik sok te chʼul-abatetik, pero teme maʼyuk skʼuxul koʼtan, jaʼ jich kʼoemon te bin-utʼil campana te xkankun ta kʼop o te bin-utʼil sepsep takʼin te stsintsun ta kʼope. 2 Teme kichʼoj te majtanil te ya xkʼopojon ta skʼop j-alwanej sok teme ya kichʼbey swentail te bintik mato yakʼoj ta naʼel te Diose sok teme ya jnaʼ spisil te bintik ay ta naʼel soknix teme bayal schʼuunel koʼtan yuʼun ya jelbey yawil te witsetik, pero teme maʼyuk skʼuxul koʼtan, ma xtuunon-abi. 3 Teme ya kakʼ spisil te bin ay kuʼun swenta ya kakʼbey sweʼel te yantik sok teme ya kakʼ jkuxlejal swenta lek ya kaʼiy jba yuʼun, pero teme maʼyuk skʼuxul koʼtan, maʼyuk bin ya xlokʼ kuʼun-a.

4 Te kʼuxul oʼtanil spisil ya xkujch yuʼun sok ay slekil yoʼtan. Te kʼuxul oʼtanil maʼyuk sbikʼtal yoʼtan. Ma stoy sba, ma xjelaw ta stojol yantik, 5 maba ya xbolkʼoptaywan, ma jaʼuknax ya sle yutsil slekil stukel, ma orauk ya x-ilin. Ma skʼej ta yoʼtan te bin ma lek ya xpasbote. 6 Ma tseʼeluk yoʼtan yuʼun te bin ma stojiluk ya yichʼ pasel, jaʼ tseʼel yoʼtan yuʼun te bin smelelile. 7 Spisil ya xkujch yuʼun, spisil ya schʼuun, spisil ya smaliy, spisil ya stsʼijk yuʼun.

8 Te kʼuxul oʼtanil maʼyuk bin-ora ya xlaj skʼoplal. Pero yame xlaj skʼoplal stukel te majtaniletik yuʼun ya xkʼopojotik ta skʼop j-alwanej; yame xlaj skʼoplal te majtaniletik te ay machʼatik ya xkʼopojik ta yantik kʼopiletik;* yame xlaj skʼoplal te majtaniletik te ay bin ya yichʼ naʼbeyel skʼoplal. 9 Melel ma tsʼakaluk te bin ya jnaʼbeytik skʼoplal sok ma tsʼakaluk te bitʼil ya xkʼopojotik ta skʼop j-alwanej. 10 Pero, te kʼalal ya xjul te bin tsʼakale, yame xlaj skʼoplal te bin ma tsʼakale. 11 Te kʼalal chʼin keremon-ae, jich ya xkʼopojon te bin-utʼil chʼin kerem, jich snopojibal kuʼun-a te bin-utʼil chʼin kerem sok jich jpensar-a te bin-utʼil chʼin kerem. Pero, jich bitʼil te winikonix, la kijkitayix jilel te talelil yuʼun te chʼin kereme. 12 Melel ta ora ini ma chikanuk ta ilel ta lek te bin ya kiltik ta espejo te pasbil ta takʼine, pero ta patil ya xjuʼ ya kiltik ta lek. Ta ora ini ma tsʼakaluk te bin ya jnaʼbey skʼoplale, pero ta patil tsʼakal ya xbajt jnaʼbey skʼoplal, jich te bin-utʼil ya snaʼbon jba ta lek te Diose. 13 Ay oxeb te bintik ma xlaj skʼoplal: jaʼ te chʼuunel oʼtanil, te bin ya jmaliytik sok te kʼuxul oʼtanile. Pero, te bin mukʼxan skʼoplal ta spisil jaʼ te kʼuxul oʼtanile.