Te lek yachʼil kʼop ya yal te Lucas

12 Ta jun buelta, la stsob sbaik tal bayal ta mil ants winiketik te stenten-nax sbaike. Jajch ta kʼop* te Jesús, jich nail la yalbey te jnopojeletik yuʼune: «Tsajtayame* abaik ta swenta te levadura yuʼun te fariseoetik, jaʼ te chaʼlam-oʼtanile.* 2 Melel maʼyuk bin nakʼbil te ma xjuʼ ya yichʼ akʼel ta naʼel sok maʼyuk bin muken ay te ma xjuʼ ta naʼbeyel swentaile. 3 Jich yuʼun, spisil te bin ya awalik ta ijkʼal kʼinal yame yichʼ aʼiyel ta sakal kʼinal, te bin ya awalik ta muken ta yutil na yame yichʼ aʼiyel ta ba naetik. 4 Kamigotak, jaʼnix jich ya kalbeyex: mame xa axiʼik te machʼatik ya xjuʼ ya smilexe, melel maʼyuk bin ya xjuʼ ya spasbeyexix ta patil. 5 Joʼon ya kalbeyex te machʼa ya skʼan ya axiʼike. Jaʼ xa axiʼik te machʼa ya xjuʼ ya smilex sok te ya xjuʼ ya stikunex bael ta Gehena.* Ta melel, jaʼme xa axiʼik stukel. 6 ¿Mabal jichuk te ya yichʼ chonel joʼkojt chʼin jaʼmal mutetik ta chaʼsejp takʼin te maʼyuk lek skʼoplale?* Manchukme jich-abi, te Dios maba ya xchʼay ta yoʼtan jkojtuk te chʼin mutetik ini. 7 ¡Jaʼuktobalix-a te jaʼex te bitʼil ajtaybil yuʼun te jayeb ta lijkʼ te stsotsel ajolike! Mame xiwex, melel jaʼ bayalxan akʼoplalik-a te bin-utʼil bayal ta kojt chʼin mutetike.

8 »Jamal ya kalbeyex, te machʼa ya yalbey te ants winiketik te ya snaʼbon jbae, jaʼnixme jich te sNichʼan te Winik* ya yal ta stojol te chʼul-abatetik yuʼun Dios te ya snaʼbey sba-euke. 9 Pero, te machʼa ya spʼajon ta stojol te ants winiketike, jaʼnixme jich ya yichʼ pʼajel ta stojol te chʼul-abatetik yuʼun te Diose. 10 Spisil te machʼa ya sbolkʼoptay te sNichʼan te Winik* ya xjuʼ ya sta perdón stukel; pero te machʼa ya sbolkʼoptay te chʼul espiritue* maba ya sta perdón stukel. 11 Te kʼalal ya awichʼik ikʼel bael ta stojol te banti ya stsob sbaik te ants winiketik,* te machʼatik yichʼoj yaʼtelik ta stojol ajwalil sok te machʼatik mukʼ yaʼtelik, mame x-ochex ta mel-oʼtan ta snopilanel te bin-utʼil ya akoltay abaik o te bin ya awalike, 12 melel jaʼme ya yakʼbeyex anaʼik te chʼul espíritu* te bin ya awalik ta yorail-abi».

13 Ay jtul winik ta yolil te ants winiketik te jich la yalbey te Jesuse: «Maestro, albeya te jbankil te akʼa yakʼbon-euk te bin la yijkitay jilel te jtate». 14 Jich albot yuʼun te Jesús: «Winik, ¿machʼa la yakʼbon kaʼtel ta juez o te ay bin ya jpukbeyexe?». 15 Jaʼ yuʼun, jich la yal: «Wikʼilukme ta lek asitik, mame ayuk bin ya awakʼ xbikʼtaj awoʼtanik yuʼun, manchukme bayal bin ay awuʼunik ma jaʼuk ya yakʼbeyex akuxlejalik». 16 Jich yuʼun, te Jesús la yal te lokʼombakʼop ini: «Ay jtul jkʼulej winik te bayal sitin te bin la stsʼune. 17 Jaʼ yuʼun, jich jajch snop ta yoʼtan: ‹¿Bin ya jpasix-a? Melel maʼyuk banti ya xjuʼ ya jkʼej te sit awal tsʼunubil kuʼune›. 18 Jaʼ yuʼun, jich la yal: ‹Jaʼ ya jpas ini: ya jin spisil te snail te kawal tsʼunube, ya jpas yantik te mukʼikxane, tey ya jkʼej spisil-a te sit kawal tsʼunub sok te bintikxan ya xlokʼ kuʼune. 19 Patil jich ya kalbey jba: «Bayal jaʼbil ya xtuun awuʼun te bintik lek kʼejbil awuʼune; junuk awoʼtan, weʼan, uchʼan, mulanbeya yutsilal te akuxlejale»›. 20 Pero, jich albot yuʼun te Diose: ‹Ma xa anaʼ kʼinal, te ajkʼabal ini ya xlajat, ¿machʼa ya yichʼbat jilel spisil te bintik la akʼeje?›. 21 Jich ya xkʼot ta stojol te machʼa jaʼnax baem ta yoʼtan stsobel skʼulejal te ya xtuun yuʼun stukel, pero maʼyuk skʼulejal ta stojol te Diose».

22 Jich la yalbey te jnopojeletik yuʼun: «Jaʼ yuʼun ya kalbeyex te mame xa amel awoʼtanik yuʼun te bin-utʼil ya xkuxinex, jaʼ te bin ya aweʼik; o te abakʼetalik, jaʼ te bin ya alapike. 23 Melel jaʼ bayalxan skʼoplal te akuxlejalik te bitʼil te aweʼelike sok jaʼ bayalxan skʼoplal te abakʼetalik te bitʼil te akʼuʼ apakʼike. 24 Ilawilik te jojetik:* maba ya stsʼunbajik, maba ya yaʼiyik kʼajoj sok maba ya stsobik ta yawil te yawal stsʼunubike, pero jaʼ ya xmakʼlinotik yuʼun te Diose, ¿mabal jaʼuk bayalxan akʼoplalik-a te bin-utʼil te jaʼmal mutetike? 25 ¿Machʼa ya xjuʼ ya snajtubtes jun xujkʼubil te skuxlejal ta skaj te bayal bintik ya snaʼulan yoʼtane? 26 Teme ma xjuʼ awuʼunik spasel-abi, ¿bin yuʼun ya amel awoʼtanik yuʼun te bintik ya xtuun awuʼunike? 27 Ilawilik te bin-utʼil ya xchʼi te nichimetike. Maba tulan ya x-aʼtejik sok maba ya yaʼiyik jalab;* pero ya kalbeyex te maʼyuk la spajbey stʼujbilal junuk nichim te skʼuʼ spakʼ te ajwalil Salomone. 28 Teme jich la yakʼbey stʼujbilal te jaʼmal nichimetik te Diose, te jun-nax kʼajkʼal kuxul sok te pajel ya yichʼ chikʼele, ¿mabal kʼaxemuktoxan jich ya yakʼbeyex akʼuʼ apakʼik-a, jaʼex te maʼyuk lek schʼuunel awoʼtanike? 29 Jich yuʼun, mame jaʼuk ya xbajt ta awoʼtanik sleel te bin ya aweʼik, te bin ya awuchʼik sok mame kʼaxemukto ya amel awoʼtanik. 30 Melel te nacionetik yuʼun te balumilale jaʼ baem ta yoʼtanik sleel spisil ini, pero te aTatik te ay ta chʼulchan ya snaʼ te ya xtuun awuʼunik spisil ini. 31 Jaʼ yuʼun, jaʼme xa aleik te Wentainele,* jichme ya awichʼik akʼbeyel spisil ini.

32 »Mame xiwex, tuminchijex te ma bayalexe, melel te aTatik te ay ta chʼulchan ya skʼan ya yakʼbeyex te Wentainel* yuʼune. 33 Chonaik te bintik ay awuʼunik sok akʼbeyaik te machʼatik maʼyuk bin ay yuʼunike, pasa yawil atakʼinik te ma xpokoʼube, tsoba akʼulejalik ta chʼulchan te ma xlaje, te banti ma xjuʼ ya x-och te j-elekʼetik sok te banti ma xjochʼobe. 34 Melel te banti ay te akʼulejalike, tey ay-a te awoʼtanike.

35 »Chapalukexme sok alapojukme te akʼuʼike, jaʼnix jich tsumbilukme te akʼajkʼike; 36 jichukexme te bitʼil winiketik te ya smaliyik te yajwalik te kʼalal ya sujt tal ta ilnujpunel swenta jich ya sjambeyik ta oranax te tiʼnail te kʼalal ya stije. 37 ¡Bin-nax yutsil te j-abatetik te wikʼil sitik te kʼalal ya xjul te yajwalike! Jamal ya kalbeyex te kʼalal ya xjul te yajwalike, yame schajpan sba yuʼun ya yakʼ sba ta abatinel ta stojol te j-abatetik yuʼune, yame yakʼ xnajkajik ta weʼel sok yame yakʼ sba ta abatinel ta stojolik. 38 Teme ya xjul ta nopol* olil ajkʼabal* o ta nopol oxeb ora sakubel kʼinal,* ¡bin-naxme yutsil te j-abatetik teme chapalik ya xjul ta taele! 39 Naʼaikme ini: te yakuk snaʼ te yajwal na te jayeb ora ya xtal te j-elekʼ, maba ya yakʼ ochel ta sna te jichuke. 40 Te jaʼexe, jaʼnix jich chapalukexme ta spisil-ora, melel ma naʼbiluk awuʼunik te bin-ora ya xtal te sNichʼan te Winike».*

41 Te Pedro jich la sjojkʼoybey te Jesús: «Kajwal, ¿jaʼnaxbal ya awal ta jtojolkotik te lokʼombakʼop ini, o jaʼnix jich ta stojol te yantike?». 42 Jich la yal te Kajwaltik: «¿Machʼanix ta smelelil-a te j-abat te jun yoʼtan sok pʼij te ya x-akʼbot yuʼun te yajwal ta swentainel te yantik j-abatetik swenta spisil-ora ya smakʼlin ta yorail? 43 ¡Tseʼelnaxme yoʼtan te j-abat-abi teme jich yak ta spasel te kʼalal ya xjul tal te yajwale! 44 Jamal ya kalbeyex te yame x-akʼbot swentain spisil te bintik ay yuʼun te yajwale. 45 Pero, teme ay bin-ora jich ya yal ta yoʼtan te j-abat ini ‹Maba ya xtal ta ora te kajwale›, jich ya xjajch smajtiklan te j-abatetik sok te j-abat antsetik, sok ya x-och ta weʼel, ta uchʼajel soknix ta yakubel, 46 yame xtal te yajwal ta jun kʼajkʼal te ma naʼbiluk yuʼun te j-abat sok te bin-ora ma na’biluk yuʼun-ae, yame x-akʼbot kʼax tulan castigo sok yame x-akʼbot sjokin te machʼatik maba jun yoʼtanik ta stojol Dios. 47 Te j-abat te kʼot ta yoʼtan te bin ya skʼan te yajwale, pero maba la schajpan sba sok maba la spas te bin kʼanbot yuʼune, yame yichʼ bayal majel. 48 Yan te j-abat te maba kʼot ta yoʼtane, manchukme ay bin la spas te snujpʼ te ya yichʼ majel yuʼune, jtebnax majel ya yichʼ. Ta melel, te machʼa bayal bin ya yichʼ akʼbeyele bayal bin ya yichʼ kʼanbeyel, te machʼa bayal bin ya x-akʼot swentaine kʼaxtoxan ya yichʼ kʼanbeyel-a te bin ya skʼan pasele.

49 »Tal kakʼ tiluk kʼajkʼ ta balumilal, ¿binxan ya jpas? Melel tilemix te kʼajkʼe. 50 Pero, ay jun ichʼjaʼ* te ya skʼan ya kichʼe, ¡kʼax wokol ya kaʼiy jaʼto te kʼalal ya stsʼakaj ta pasele! 51 ¿Yuʼunbal ya akuyik te tal kakʼ lamalkʼinal ta balumilale? Jkʼaxel ma jichuk, maba tal kakʼ lamalkʼinal, tal kakʼ skontrain sbaik te ants winiketike. 52 Melel ta ora bael ini, te machʼatik ay joʼtul ta yutil na yame xat sbaik, te oxtul ya skontrain te chaʼtule, te chaʼtul ya skontrain te oxtule. 53 Te tatil ya skontrain te skereme, te kerem ya skontrain te state, te nanil* ya skontrain te yachʼixe, te achʼix ya skontrain te snane, te alibal meʼel* ya skontrain te yalibe, te alibal ya skontrain te yalib meʼele».*

54 Te Jesús jich la yaltiklanbey-euk te ants winiketike: «Te kʼalal ya awilik te ya xjajch tal tokal ta smalib kʼajkʼal, jich ya awalik ta oranax: ‹Ya xtal tulan yikʼal jaʼal›, jich ya xkʼot ta pasel. 55 Te kʼalal ya awilik te ya xtal te ikʼ ta stojol sur, ya awalik: ‹Kʼux kʼajkʼal yoʼtik›, sok jich ya xkʼot ta pasel. 56 Jchaʼlam-oʼtanex,* ya anaʼik yilel te bitʼil ay te kʼinal sok te chʼulchane, ¿bin-utʼil ay-a te ma xa anaʼbeyik swentail te bintik yak ta kʼoel ta pasel ta ora ini? 57 ¿Bin yuʼun te ma jaʼukexnix ya awilik te bin toj ta pasele? 58 Jich bitʼil te kʼalal ay jtul akontra te ya yikʼat bael ta stojol te machʼatik yichʼoj tulan yaʼtelik, pasa tulan ta schajpanel te kʼop jajchem awuʼunik te kʼalal ayex bael ta be-ae, yuʼun jich maba ya yakʼat ta skʼab te juez, jich te juez maba ya yakʼat ta skʼab te jkananchukojibal, jich te jkananchukojibal maba ya yakʼat ta chukel. 59 Jamal ya kalbat te maba ya xlokʼat ta chukel jaʼto teme la atoj te slajibal centavoe».*