Sbabial carta ta stojol te Corintioetik

2 Jich yuʼun, kermanotak, te kʼalal kʼoon te banti ayexe, maba la kalbeyex awaʼiyik sok chujkul kʼopetik o ta swenta pʼijil kʼopetik te bin mato yakʼoj ta naʼel-a te Diose. 2 Melel te kʼalal jokinojex-ae, jaʼnax bajt ta koʼtan yalbeyel skʼoplal te Jesucristo, sok te la yichʼ jijpanel ta teʼe. 3 Maʼyuk kip la kaʼiy jba te kʼalal boon ta atojolike, ayon ta xiwel sok yak ta nijkel koʼtan-a. 4 Te kʼalal la jkʼoponex sok te la jcholbeyex te skʼop Diose, maba kʼopojon ta spʼijil kʼop yuʼun te ants winiketik, kʼopojon ta swenta chʼul espíritu* sok ta swenta yuʼel te Diose, 5 yuʼun jich maba ya awakʼ schʼuunel awoʼtanik ta swenta te spʼijil kʼop te ants winiketik, jaʼnax ta swenta yuʼel te Diose.

6 Ya kalbeykotik skʼoplal pʼijil kʼop ta yolil te machʼatik tulan schʼuunel yoʼtanik, pero mame jaʼuk te pʼijil kʼop yuʼun te balumilal ini, ni jaʼuk te spʼijil yoʼtan te ajwaliletik ta balumilal ini te ya xlaj skʼoplal. 7 Jaʼ ya kalbeykotik skʼoplal te spʼijil yoʼtan te Dios te ya xchiknaj ta ilel ta swenta te bin mato yakʼoj ta naʼele, jaʼ te pʼijilal te nakʼbil te la yalbey skʼoplal te Dios ta swenta kutsilaltik te kʼalal mato ayuk-a te chopol balumilal ini. 8 Jaʼ te pʼijilal-abi te maba la snaʼbeyik skʼoplal ni jtuluk te ajwaliletik ta balumilal ini, melel te lajuk snaʼbeyik skʼoplale maba la smilik te Kajwaltik te ay yutsilal te jichuke. 9 Pero, jich te bin-utʼil tsʼibaybile: «Maʼyuk machʼa yiloj sok maʼyuk machʼa yaʼiyoj ni jtuluk ants winik kʼaxem ta yoʼtan spisil te bin schajpanoj Dios ta stojol te machʼatik kʼux ya x-aʼiyot yuʼune». 10 Melel joʼotik te la yakʼbotikix jnaʼtik te Dios ta swenta te schʼul espiritue,* melel te chʼul espíritu ya stsajtay* yil spisil te bintik aye, jaʼnix jich ya stsajtay yil te spʼijil yoʼtan te Dios te kʼax kʼubul aye.

11 ¿Machʼa ya xjuʼ ya snaʼ te bin ay ta yoʼtan te jtul ants winike? ¿Mabal jaʼuknax ya snaʼ te bin ay ta yoʼtane? Jaʼnix jich-euk, maʼyuk machʼa ya snaʼ te bintik yuʼun te Diose, jaʼnax te chʼul espíritu* yuʼun te Diose. 12 Jich yuʼun, te joʼotike maba la kichʼtik te espíritu yuʼun te balumilal, jaʼ la kichʼtik te chʼul espíritu* yuʼun Dios yuʼun jich ya jnaʼtik te bintik yakʼojbotik te Dios sok slekil yoʼtan. 13 Jaʼnix jich ya kalbeytik skʼoplal spisil ini, pero maba ya jtuuntestik kʼopetik te ya yakʼik ta nopel te pʼijil ants winiketik, jaʼ ya jtuuntestik te kʼopetik te ya yakʼ ta nopel te chʼul espiritue.* Jich yuʼun ya jtuuntestik kʼopetik te talem ta stojol te chʼul espíritu te kʼalal ya jcholbeytik skʼoplal te Diose.

14 Te machʼa ya spas te bin ya skʼan te bakʼete maba ya skʼan te bintik swenta chʼul espíritu* yuʼun Dios, melel ya skuy ta jowilkʼopnax. Jaʼnix jich ma xyichʼbey swentail te bin ya yale, jaʼ ya skʼan te yichʼojuk te chʼul espíritu yuʼun ya snaʼbey swentail-a. 15 Pero, te machʼa yichʼoj te chʼul espiritue* ya stsajtay* yil spisil te bintik aye, pero maʼyuk jtul ants winik te ya xjuʼ ya snaʼ te bin ay ta yoʼtan te machʼa yichʼoj te chʼul espiritue. 16 «¿Machʼa ya snaʼbey te snopojibal yuʼun te Jehová* yuʼun ay bin ya yakʼbey snop?». Yan te joʼotike kichʼojbeytik te snopojibal yuʼun te Cristoe.