Carta ta stojol te Romanoetik

7 Kermanotak, jaʼ yak jkʼoponbelex (jaʼex te ya anaʼik te bin ya yal te leye), ¿yuʼunbal maba anaʼojik te wentainbil yuʼun te Ley te ants winik te jayeb kʼajkʼal kuxule? 2 Jaʼ jich bitʼil te ants te nujpuneme, wentainbil yuʼun te ley yuʼun te smamalal te jayeb kʼajkʼal kuxule; pero teme laj te smamalale, libre ya xjil yuʼun te ley yuʼun te smamalale. 3 Jich yuʼun, teme ya xnujpun sok yan winik te kʼalal kuxulto te smamalale, yakme ta yakʼbel sba ta antsinel. Pero, teme laj te smamalale, libre ya xjil yuʼun te ley yuʼun te smamalale, jich yuʼun teme nujpun sok yan winik, maba yakix ta yakʼbel sba ta antsinel-abi.

4 Jaʼnix jichex, kermanotak, ta swenta te sbakʼetal te Cristo libre jilexix yuʼun te Ley yuʼun Moisés swenta jaʼ ya yuʼuninex te Cristo, te la yichʼ chaʼkuxajtesel ta yolil te machʼatik lajemike, yuʼun jich ya xjuʼ ya x-abatinotik ta stojol te Diose. 5 Te kʼalal jaʼ ya jpastik-a te bintik ya smulan te bakʼete, te Ley jaʼ la stijbotik te koʼtantik ta spasel te bin ya smulan te jbakʼetaltik te jaʼnax ya yikʼotik bael ta lajele. 6 Pero, ta ora ini la kichʼtikix akʼel ta libre ta swenta te Leye, melel lajemotikix ta swenta te bin wentainbilotik-ae, yuʼun jich yachʼil ya xkʼootik ta abatinel ta stojol Dios ta swenta te chʼul espiritue,* ma jaʼuk ta swenta te antiguo Ley tsʼibaybile.

7 Jich yuʼun, ¿bin ya kaltikix-a? ¿Jaʼbal mulil te Leye? ¡Maʼuk! Ta melel, ma jnaʼojuk bin-a te mulil te manchuk ayuk te Leye. Maba la jnaʼ teme mulil te bikʼtal oʼtanil te manchuk jich ya yal te Ley «Mame ayuk sbikʼtal awoʼtan», te xchie. 8 Pero, te mulil la stuuntes te mantalil yuʼun ya sjachbon ta koʼtan spisil ta chajp bikʼtal oʼtanil. Melel te manchuk ayuk te ley, lajem te mulil te jichuke. 9 Kuxulon-a te kʼalal mato ayuk-a te leye. Pero, te kʼalal jul te ley, chaʼkuxaj te mulile sok joʼon lajon. 10 Te mantalil te la jkuy te yak ta yikʼbelon bael ta kuxlejalile, ta melel jaʼ yak ta yikʼbelon bael ta lajel. 11 Te mulil la stuuntes te mantalil yuʼun la sloʼlayon sok la smilon. 12 Chʼultesbil stukel te Leye, jaʼnix jich te mantalil chʼultesbil, toj sok lek.

13 Jich yuʼun, ¿yuʼunbal jaʼ la yakʼon ta lajel te bin leke? ¡Maʼuk! Jaʼ la yakʼon ta lajel te mulile. Lek stukel te leye, jamal chikan ta ilel te jaʼ te mulil te la yakʼon ta lajele. Te mantalil la yakʼ ta ilel te kʼax chopol* te mulile. 14 Melel jnaʼojtik te talem ta stojol Dios te Ley ta swenta te chʼul espíritu,* yan te joʼone chʼichʼbakʼeton, la kichʼ chonel ta stojol te mulile. 15 Ma xkʼot ta koʼtan te bin yuʼun te jich ya jpase, melel ma jaʼuk ya jpas te bin ya jkʼane, jaʼ ya jpas te bin ya jpʼaje. 16 Pero, teme jaʼ ya jpas te bin ma jkʼane, jich ya jnaʼ stojol te lek te bin ya yal te Leye. 17 Pero, ta ora ini ma joʼukonix te machʼa ya spas te bintik ma leke, jaʼ te mulil te ay ta jbakʼetale. 18 Melel jnaʼoj te maʼyuk bin lek ay ta jbakʼetale, manchukme jaʼ ya jkʼan ya jpas te bin leke, ma xjuʼ kuʼun spasel. 19 Melel te bintik lek ya jkʼan ya jpase, ma jaʼuk ya jpas; jaʼ ya jpas te bintik ma lek te ma jkʼan ya jpase. 20 Jich yuʼun, teme jaʼ ya jpas te bin ma jkʼane, ma joʼukonix te ya jpase, jaʼix te mulil te ay ta jbakʼetale.

21 Jich ya jnaʼ te wentainbilon yuʼun te ley ini: te kʼalal jaʼ ya jkʼan ya jpas te bin leke, jaʼ ay ta jtojol te bin ma leke. 22 Te koʼtane jaʼ ya smulan ta smelelil te ley yuʼun te Diose, 23 pero ya kil te ay yan ley ta jbakʼetal te ya skontrain te ley yuʼun te snopojibal kuʼun sok jaʼ ya schukon bael ta stojol te ley yuʼun te mulil te ay ta jbakʼetale. 24 ¡Oʼbolxanix jba! ¿Machʼa ya skoltaybon te jbakʼetal te yak ta lajele? 25 ¡Jaʼ ya kalbey wokol te Dios ta swenta te Kajwaltik Jesucristo! Te snopojibal kuʼune jaʼ j-abat yuʼun te ley yuʼun te Diose, yan stukel te jbakʼetale mosoinbil yuʼun te ley yuʼun te mulile.