Apocalipsis

6 La kil te k’alal te Jkolel* Tuminchij la sjam junuk ta sjukebal te selloetike sok la kaʼiy te kʼopoj jtul ta schanebal te querubinetik* te jich kʼopoj te bin-utʼil skʼop chawuk: «¡Laʼ!», xchi. 2 Sok la kil jkojt sakal caballo. Te machʼa kajal tey-ae yichʼoj jun tʼimalteʼ. La yichʼ akʼbeyel scorona, lokʼ bael ta tsalaw yuʼun ya stsʼakajtes te tsalaw yuʼune.

3 Kʼalal la sjam te schebal sello te Jkolel* Tuminchije, la kaʼiy te jich la yal te schebal querubine:* «¡Laʼ!», xchi. 4 Lokʼ tal yan caballo te jich sbonil te bin-utʼil te kʼajkʼe. Te machʼa kajal tey-ae la yichʼ akʼbeyel ta skʼab te yakuk slajin te lamalkʼinal ta balumilal, yuʼun jich talel kʼaxel ya smil sbaik te ants winiketike sok la yichʼ akʼbeyel jun mukʼul espada.

5 Kʼalal la sjam te yoxebal sello te Jkolel* Tuminchije, la kaʼiy te jich la yal te yoxebal querubine:* «¡Laʼ!», xchi. Sok la kil jkojt ijkʼal caballo. Te machʼa kajal tey-ae yichʼoj ta skʼab jun balanza. 6 Ta yolil te chantul querubinetik,* la kaʼiy te ay machʼa jich yak ta yalele: «Jun denario* stojol te jun litro trigo sok jun denario stojol te oxeb litro cebada; ma xa awixlan te aceite yuʼun oliva sok te vino».

7 Kʼalal la sjam te schanebal sello te Jkolel* Tuminchije, la kaʼiy te jich la yal te schanebal querubine:* «¡Laʼ!», xchi. 8 La kil jkojt caballo te sakpakʼpakʼtike. Te machʼa kajal tey-ae Lajel te sbiile, sok nopol* ay tal ta spat te Mukenale.* La yichʼik akʼbeyel swentainik jxejtʼuk ta schanxejtʼel te balumilale yuʼun ya xmilawanik ta jun najtil espada, ta wiʼnal, ta tulan chamel te ya xmilawan sok ta jtiʼawal chambalametik te ayik ta balumilale.

9 Kʼalal la sjam te yoʼebal sello te Jkolel* Tuminchije, la kilbey schʼichʼel ta yeʼtal te skajtajib chikʼbil majtanil te machʼatik la yichʼik milel ta skaj te jun yoʼtanik ta stojol te skʼop te Dios soknix te la scholik te skʼop Diose. 10 Jich tulan yakik ta yalel: «Kajwal, Mukʼul Ajwalil, chʼul Diosat sok te smelelil Diosate, ¿binto-ora ya awichʼ ta kʼop yuʼun ya awakʼbey stoj te machʼatik la smal jchʼichʼelkotik te nainemik ta balumilale?». 11 Ta spisilik la yichʼik akʼbeyel sakal najtil kʼuʼul. Jaʼnix jich la yichʼik albeyel te yakuk skux yoʼtanik jtebuk jaʼto te kʼalal ya xtsʼakaj te yajtalul te sjoʼtakik ta abatinel sok te yermanotakik te nopol* ya yichʼikix milel-euk jichnix te bin-utʼil la yichʼik milel.

12 Sok la kil te kʼalal la sjam te swakebal sello te Jkolel* Tuminchije. Tal tulan nijkel, ijkʼub te kʼajkʼal jich te bin-utʼil ijkʼal chʼixal pakʼ* te pasbil ta stsotsel chambalam,* tsajub swolol te u jich te bin-utʼil stsajal te chʼichʼe 13 sok te ekʼetik te ay ta chʼulchan chʼayik koel tal ta balumilal jich te bin-utʼil ya xchʼay koel tal ta steʼel te yaxal higoetik te kʼalal ya xyukʼilanot yuʼun te tulan ikʼe. 14 Te chʼulchan la sbal sba bael jich te bin-utʼil ya sbal sba te balbil june, spisil te witsetik sok spisil te sejp kʼinal te ayik ta yolil mar la yichʼik bultiklanel lokʼel ta yawilik. 15 Jich yuʼun, te ajwaliletik ta balumilal, te machʼatik yichʼoj mukʼ yaʼtelik, te comandanteetik yuʼun soldadoetik, te jkʼulejetik, te machʼatik mukʼ skʼoplalik, spisil te mosoetik sok spisil te machʼatik libre ayik la snakʼ sbaik ta yutil chʼenetik sok ta yolil te mukʼul tonetik te ay ta witsetik. 16 Jich ya yalulanbeyik te witsetik sok te mukʼul tonetik: «Nakʼawotik sok makawotik ta sit yelaw te machʼa nakal ta mukʼul naktajibal sok ta stojol te yilinba te Jkolel* Tuminchij, 17 melel kʼotix te smukʼul kʼajkʼalel te yilinbaike, sok ¿machʼa ya xjuʼ yuʼun te ya skoltay sba ta stojolike?».