Te lek yachʼil kʼop ya yal te Marcos

15 Te kʼalal yakix ta sakubel-a te kʼinale, te jwolwanej sacerdoteetik, te jwolwanejetik yuʼun te judioetik sok te escribaetik —te jaʼik te machʼatik yichʼoj yaʼtelik ta Sanedrín— la stsob sbaik ta schapel te bin ya spasike; te kʼalal schukojikix-a te Jesuse, la yikʼik bael sok la yakʼbeyik ta skʼab te Pilatoe. 2 Te Pilato jich la sjojkʼoybey te Jesús: «¿Jaʼatbal te ajwalilat yuʼun te judioetike?». Jich la yal te Jesús: «Jaʼ, jaʼatnix yakat ta yalel». 3 Pero, te jwolwanej sacerdoteetike bayal yakik ta slebeyel smul-a te Jesuse. 4 Te Pilato jich la sjojkʼoybeyxan te Jesuse: «¿Bin yuʼun te ma xa asute? Aʼiya awaʼiy te jayebto amul yakik ta yalel ta atojole». 5 Pero, te Jesús maba la sjakʼix jpʼaluk. Ta swenta-abi chamnax yoʼtan* yuʼun te Pilatoe.

6 Ta yorail jujun kʼin, kʼayem-a te Pilato te ya skoltay lokʼel jtul jchukel, jaʼ chikan te machʼa ya skʼan te ants winiketike. 7 Ta yorail-abi ay jtul winik te ochem ta chukel te Barrabás sbiile, pajal la yichʼ chukel sok te jachkʼopetik te la yaʼiyik milaw ta skontrainel te machʼatik yichʼojik mukʼ yaʼtelike. 8 Jich yuʼun, bayal ta tul ants winiketik bajtik ta stojol te Pilato sok jajch skʼanbeyik te yakuk spas te bin kʼayem ta spasele. 9 Jich la yal te Pilato: «¿Jaʼbal ya akʼanik te ya jkoltay bael te ajwalil yuʼun te judioetike?». 10 Melel te Pilato la sta ta ilel te jaʼ ta skaj sbikʼtal yoʼtanik te jwolwanej sacerdoteetik te la yakʼik ta kʼabal te Jesuse. 11 Pero, te jwolwanej sacerdoteetik la stijbeyik yoʼtan te ants winiketik te jaʼuk ya skʼanik te ya yichʼ koltayel lokʼel ta chukel te Barrabás. 12 Jich chaʼjojkʼoybotik yuʼun te Pilatoe: «¿Bin ya jpasix ta stojol-a te winik ini te ya awalik te jaʼ ajwalil yuʼun te judioetike?». 13 Jich la yalikxan ta aw: «¡Akʼa yichʼ jijpanel ta teʼ!». 14 Jich albotik yuʼun te Pilato: «Pero, ¿bin yuʼun? ¿Yuʼunbal ay bin ma lek spasoj?». Manchukme jich albotik, tulanxan jajchik ta aw: «¡Akʼa yichʼ jijpanel ta teʼ!». 15 Te Pilato la skʼan te lekuk ya x-ilot yuʼun te ants winiketike, jich yuʼun la skoltay lokʼel ta chukel te Barrabás. Te kʼalal stikunojix ta akʼbeyel nujkul-a* te Jesuse, la yakʼ ta kʼabal yuʼun ya sjijpanik ta teʼ.

16 Tey-abi, te soldadoetik la yikʼik bael te Jesús ta yamakʼul spalacio te gobernador sok la stsobik tal spisil te soldadoetike. 17 La yakʼbeyik slap kuxul morado pakʼ, la spasbeyik scoronain chʼix sok la xojbeyik ta sjol. 18 Jich jajch yawtayik: «¡Talonme, ajwalil yuʼun te judioetik!». 19 La smajbeyik sjol sok jalal* soknix la stubatayik. Jaʼnix jich la skejan sbaik sok la snijan sbaik ta stojol. 20 Te k’alal laj yoʼtanik ta slabanel te Jesuse, la slokʼesbeyik te kuxul morado pakʼ sok la schaʼyakʼbeyik slap te skʼuʼe. Ta patil la yikʼik bael yuʼun ya sjijpanik ta te’. 21 Tey-abi yak ta kʼaxel jtul winik te baem ta skʼinale —Simón sbiil te talem ta Cirene te jaʼ statik te Alejandro sok te Rufo—, la sujik yuʼun ya skuch bael te teʼ yuʼun wokolile.*

22 La yikʼik bael te Jesús ta jun lugar te Gólgota sbiil te ya skʼan ya yal «yawil bakel jolal». 23 Tey kʼan yakʼbeyik yuchʼ vino-a te kapbil ta mirra,* pero ma la skʼan la yuchʼ te Jesuse. 24 La sjijpanik ta teʼ te Jesuse sok jajch stsal sbaik ta tajimal ta swenta suerte* yuʼun jich ya snaʼik te machʼa ya yichʼbey jilel te skʼuʼe. 25 Ta baluneb ora sakubel kʼinal la yichʼ jijpanel ta teʼ te Jesuse. 26 Jich tsʼibaybil ta letrero te bin smulinoj te Jesuse: «Te ajwalil yuʼun te judioetike». 27 Jaʼnix jich ay chaʼtul j-elekʼetik te pajal la yichʼik jijpanel ta teʼ sok te Jesuse, jtul ta swaʼel kʼab sok jtul ta skʼexam kʼab. 28 * 29 Te machʼatik kʼaxik tey-ae la sjimulan sjolik ta sbolkʼoptayel sok jich la yalik: «¡Eee! Jaʼat te kʼan ajin te temploe sok te oxebnax kʼajkʼal ya apas ta akʼope, 30 koan tal ta teʼ yuʼun wokolil,* koltaya aba kiltik». 31 Te jwolwanej sacerdoteetik sok te escribaetik jaʼnix jich la slabanik-euk te Jesuse, jich la yalbey sbaik: «¡La skoltay yantik, pero ma xjuʼ ya skoltay sba stukel! 32 Akʼa kouk tal kiltik ta teʼ yuʼun wokolil* te Cristo, te ajwalil yuʼun Israel. Jichme ya jchʼuuntik». Jaʼnix jich, te j-elekʼetik te pajal jipilik ta teʼ sok te Jesuse la sbolkʼoptayik-euk.

33 Ta nopol* olil kʼajkʼal ijkʼub spamal te kʼinale, jaʼto sakubxan kʼinal ta nopol oxeb ora ta mal kʼajkʼal. 34 Ta oxeb ora ta mal kʼajkʼal, jich tulan awun te Jesuse: «Éli, Éli, ¿láma sabakhtháni?» te ya skʼan ya yal «Dios kuʼun, Dios kuʼun, ¿bin yuʼun te la awijkitayone?». 35 Ay chaʼoxtul te machʼatik nopol* tey ayik-ae, te kʼalal la yaʼiyik stojol ini, jich la yalik: «¡Aʼiya awaʼiyik, yak ta yikʼel tal te Eliase!». 36 Ay jtul te animalnax bajt smul ta pajal vino jun esponja, la skajan ta niʼ jalal* sok noptsaj* bael ta stojol te Jesús yuʼun ya yakʼbey stsʼub. Jich la yal: «¡Ijkitayaik! Kiltik teme ya xtal ta koltayel yuʼun te Eliase». 37 Pero, tulan awun te Jesuse, jich laj. 38 Jats ta olil te pakʼ te ay ta yutil te templo, ta sba kʼalalto ta yeʼtal. 39 Te capitán yuʼun soldadoetik te tekʼel ta stojol te Jesuse, jich la yal te kʼalal la yil te bin-utʼil laje: «Melelnix-a te jaʼ sNichʼan Dios te winik ini».

40 Ay chaʼoxtul antsetik te namalto* yakik ta yilel te bin yak ta kʼoel ta pasele, tey ayik-a te María Magdalena, María te snan* te Santiago te Ijtsʼinal* sok te Josés soknix te Salomé. 41 Te antsetik ini jaʼik te machʼatik la stʼunik te Jesús sok te la yakʼ sbaik ta abatinel ta stojol te kʼalal ay ta Galilea-ae. Sok ay yantik antsetik te pajal moik bael ta Jerusalén sok te Jesuse.

42 Te kʼalal yakix ta ijkʼubel-a te kʼinale, jaʼix skʼajkʼalel-a te ya schajpan sbaike, melel jaʼ yakikix ta smaliyel-a te skʼajkʼalel sabadoe, 43 te José te talem ta Arimatea —jaʼ jtul winik te yichʼoj mukʼ yaʼtel ta Sanedrín, jaʼnix jich yak ta smaliyel-a te Wentainel* yuʼun te Diose— maba xiw yoʼtan te kʼalal bajt ta stojol te Pilato yuʼun ya skʼanbey te sbakʼetal te Jesuse. 44 Pero, te Pilato la skʼan snaʼ teme lajemix te Jesuse, jich yuʼun la stikun ta ikʼel te capitán yuʼun te soldadoetik, la sjojkʼoybey teme lajemix te Jesuse. 45 Te kʼalal albot yuʼun te capitán yuʼun te soldadoetik te lajemixe, jich te Pilato la yalbey te José te talem ta Arimatea te ya xjuʼ ya yichʼbey bael te sbakʼetal te Jesuse. 46 La sman lekil lino-pakʼ sok la skojtesbey tal te sbakʼetal te Jesuse. La spots-a te lekil lino-pakʼ la smane, bajt smuk jilel ta mukenal te banti jutbil* ochel te mukʼul ton; patil la stselkʼun tal ton yuʼun ya smakbey-a te stiʼil te mukenale. 47 Pero, te María Magdalena sok te María te snan* te Josés yakik ta yilel te banti la yakʼbeyik te sbakʼetal te Jesuse.