SCHANEBAL LECCIÓN

Te bin utʼil ta tuuntesel te takʼine

«Te bintic ya yichʼ chapel, tulan ya xcʼoht yuʼun lequil jʼacʼ-oʼtanil.» (Proverbios 20:18)

Jpisiltik ya xtuun kuʼuntik takʼin yuʼun ya kakʼbeytik te bin ya xtuun yuʼun te machʼatik ay kuʼuntike (Proverbios 30:8). Melel jaʼnix jich, «ha mahquilal te taqʼuine» (Eclesiastés 7:12). Ay baeltik te tulan ya kaʼiytik yalbeyel skʼoplal te bin utʼil ta tuuntesel te takʼin ta yutil jnatike, jaʼukmeto mame xawakʼ te jaʼ ta skaj ya xjajch kʼop yuʼun te bitʼil nujpunemexe (Efesios 4:32). Ya skʼan te pajal ya smukʼulin aba awoʼtanik sok pajal ya anopik te bin utʼil ya alajin te atakʼinike.

1 CHAPA TA LEK TE BINTIK YA ANOP SPASELE

TE BIN YA YAL TE BIBLIAE: «¿Machʼahex a te yac acʼan yac apasic toyol ilo-qʼuinal, te ma nahiluc yac ahuhcan abahic ta spasel cuenta teme ticʼ ya xhuʼ a te jayeb ay awuʼune?» (Lucas 14:28). Kʼax tulanme skʼoplal te pajal ya achapik te bin utʼil ya atuuntesik te atakʼinike (Amós 3:3). Chapaik te bintik ya skʼan ya amanike sok te jayebnax ya alajinik te atakʼinike (Proverbios 31:16). Teme ay te atakʼinike, maba ya skʼan ya yal te ya amanik spisil te bin ya akʼanike. Pasaik tulan yuʼun ma xale abetik, jaʼnax lajinaik te jayeb ay awuʼunike (Proverbios 21:5; 22:7).

TE BIN YA XJUʼ YA APASE:

Teme la spas sobrail te atakʼinik te kʼalal ya xlaj te jujun ue, nopame sok te ajoy te bin ya alajinik-ae
Teme ay abetike, chapaik ta lek bin utʼil ma xpʼol. Jich bitʼil yaniwan xjuʼ ya apas aweʼelik ta anaik ma jaʼuk te ya xlokʼ amanik weʼelil te chajpambilixe

Jtul winik sok te yinam yakik ta snopel te jayeb takʼin slajinojike

2 SMELILME XKʼOPOJAT SOK NAʼA TE AY BINTIK MA XJUʼ YA APASE

TE BIN YA YAL TE BIBLIAE: Smelelilukme xkʼopojat, «ma haʼuc nax ta stojol Cajwaltic, ha nix hich ta stojol te ants-winiquetique» (2 Corintios 8:21). Albeya ta smelelil te ajoy te jayeb ya awichʼ tojele sok te jayeb ya alajine.

Jojkʼoybeyame nailuk te awinam o amamlal te kʼalal ay bin mukʼ skʼoplal ya apas ta swenta te takʼine (Proverbios 13:10). Teme jich ya apasike, yame ataik lamal kʼinal ta achebalik. Ayukme ta awoʼtan te ma jaʼuknax awuʼun atukel te atakʼine, jaʼme yuʼun euk te afamiliae (1 Timoteo 5:8).

Jtul winik sok te yinam ya yilik te lista yuʼun te bintik ya smanike

TE BIN YA XJUʼ YA APASE:

Chapbeyaik skʼoplal nailuk ta achebalik te jayeb takʼin ya xjuʼ ya alajinik ta jujuntule, yuʼun ma spisiluk ora ya ajojkʼoybey abaik
Mame jaʼukto ya x-och achajpanik te kʼalal ayix awokolik yuʼun-a te takʼine