LECCIÓN 17
¿Bin yilel stalel te Jesuse?
Kʼalal ya jnoptik te bin la spas sok la yal te Jesús te kʼalal liʼ ay ta Balumilal-ae, tey ya jtatik ta ilel te tʼujbil taleliletik yuʼun soknix te tʼujbil taleliletik yuʼun te Jehová. ¿Bintik taleliletik? ¿Bin ya xjuʼ ya jpastik yuʼun jichuknix jtaleltik te bitʼil te Jesuse?
1. ¿Bin-utʼil pajal sok sTat te Jesuse?
Te Jesús bayal bin snopoj ta swenta te sTate, melel kʼax bayal jaʼbil sjokinoj ta chʼulchan. Jaʼ yuʼun, pajal te bin ya snopike sok pajal te bin ya spasike (kʼopona Juan 5:19). Te Jesús mero jich stalel te bitʼil te sTate, jaʼ yuʼun jich la yal: «Te machʼa yilojonix, ha nix yilojix te Tatile» (Juan 14:9). Jich yuʼun, teme ya anaʼbey sba ta lek te Jesús, ya anaʼbey sba ta lek te Jehová. Te bitʼil la snaʼbey yoʼbolil sba te ants winiketik te Jesuse, jich ya yakʼ ta ilel te ya snaʼbat yoʼbolil aba-euk te Jehovae.
2. ¿Bin-utʼil la yakʼ ta ilel te Jesús te kʼux ta yoʼtan te sTate?
Te Jesús la yal: «Ya jpas te bin la spason tal ta mandar te Tatil scuenta yuʼun ya snaʼic te machʼatic ayic ta bahlumilal te cʼux ta coʼtan te Tatile» (Juan 14:31). Te kʼalal kʼax ta Balumilal te Jesuse, la yakʼ ta ilel te kʼux ta yoʼtan te sTate, melel la schʼuunbey skʼop manchukme ay swokol-a. Jaʼnix jich te Jesús la smulan yalbeyel skʼoplal te sTate sok la skoltay te yantik swenta yuʼun ya yamigoinik te Diose (Juan 14:23).
3. ¿Bin-utʼil yakʼoj ta ilel te Jesús te kʼux ta yoʼtan te ants winiketike?
Te Biblia ya yakʼ jnaʼtik te kʼux ta yoʼtan te ants winiketik te Jesuse (Proverbios 8:31). Jich la yakʼ ta ilel te kʼalal sok spisil yoʼtan la skoltay sok la yakʼbey smukʼul yoʼtan te ants winiketik. Te milagroetik la spase ma jaʼuknax la yakʼ ta ilel te ay yuʼele, jaʼnix jich te ya snaʼbey yoʼbolil sba te yantike (Marcos 1:40-42). Lek yoʼtan sok pajal lek la yil spisil te ants winiketik. Te bintik la yale la yakʼbey smukʼul yoʼtan te machʼatik la yaʼiybeyik te skʼope. Ta swenta te kʼux ta yoʼtan spisil te ants winiketike la stsʼik te swokole sok la yakʼ sba ta lajel ta stojolik. Pero jaʼ kʼux-xan ta yoʼtan te machʼatik ya schʼuunik spasel te bin ya yale (kʼopona Juan 15:13, 14).
JNOPTIKXAN TA LEK
Jnoptik ta lek te tʼujbil stalel te Jesús sok kiltik bin-utʼil ya jnopbeytik te ejemplo yuʼun ta swenta te skʼuxul yoʼtan sok te bayal slekil yoʼtane.
4. Te Jesús kʼux ta yoʼtan te sTate
Te Jesús la yakʼbotik kiltik bin-utʼil ya xjuʼ kakʼbeytik yil te Dios te kʼux ta koʼtantike. Kʼoponaik Lucas 6:12 sok Juan 15:10 soknix 17:26. Te kʼalal la akʼoponikix-a te jujun textoe, albeyaik skʼoplal ini:
¿Bin-utʼil ya xjuʼ kakʼbeytik yil te kʼux ta koʼtantik te Jehová jich bitʼil la spas te Jesuse?
Te Jesús kʼux ta yoʼtan te sTate sok spisil-ora la skʼopon.
5. Te Jesús la skoltay te machʼatik ayik ta wokol
Te Jesús bayal skʼoplal ta yoʼtan skoltayel te yantike. Manchukme lujben-a la yakʼ stiempo ta koltaywanej. Kʼoponaik Marcos 6:30-44 sok albeyaik skʼoplal ini:
¿Bin-utʼil la yakʼ ta ilel te Jesús te bayal skʼoplal ta yoʼtan te yantike? (Ilawilik te versículo 31, 34, 41 sok 42).
¿Bin yuʼun la skoltay te ants winiketike? (Ilawilik te versículo 34).
Te Jesús mero jich stalel te bitʼil te sTate, ¿bin ya yakʼbat anop ta swenta Jehová te taleliletik la yakʼ ta ilel te Jesuse?
¿Bin-utʼil ya xjuʼ kakʼtik ta ilel te ay skʼoplal ta koʼtantik te yantik jich bitʼil la spas te Jesuse?
6. Te Jesús la yakʼ ta ilel slekil yoʼtan
Te Jesús la yakʼ ta ilel slekil yoʼtan manchukme maʼyuk bayal bin ay yuʼun-a sok la yakʼ kiltik te jich ya skʼan ya jpastik-euke. Kʼoponaik Hechos 20:35 sok albeyaik skʼoplal ini:
¿Bin-a te ya yakʼ stseʼelil koʼtantik jich bitʼil la yal te Jesuse?
Ilawilik te VIDEO sok albeyaik skʼoplal ini:
¿Bintik ya xjuʼ ya kakʼtik manchukme maʼyuk bayal bin ay kuʼuntik?
¿Anaʼojbal-a?
Te Biblia ya yakʼ jnoptik te kʼalal ya jkʼopontik te Jehová ya skʼan ya jkʼopontik ta swenta sbiil te Jesuse (kʼoponaik Juan 16:23, 24). Jich ya kakʼtik ta ilel te mukʼ skʼoplal ta koʼtantik te bin la spas te Jesús swenta ya kamigointik te Jehová.
AY MACHʼATIK JICH YA YALIK: «Te Dios maʼyuk skʼoplal ta yoʼtan te jwokoltike».
Te Jesús mero pajal stalel sok te sTate. ¿Bintik la spas te Jesús te la yakʼ ta ilel te ay jkʼoplaltik ta yoʼtan te Jehovae?
¿BINTIK LA JNOPTIK?
Te Jesús kʼux ta yoʼtan te Jehová sok te ants winiketike. Te Jesús mero pajal stalel sok te sTate, jaʼ yuʼun te kʼalal ya anaʼbey sba te Jesuse ya anaʼbeyxan sba ta lek te Jehovae.
¿Jilbal ta awoʼtan into?
¿Bin-utʼil ya xjuʼ ya kakʼtik ta ilel te kʼux ta koʼtantik te Jehová jich bitʼil la spas te Jesuse?
¿Bin-utʼil ya kakʼtik ta ilel te kʼux ta koʼtantik te ants winiketik jich bitʼil la spas te Jesuse?
¿Bin talelil ay yuʼun te Jesús te ya amulane?
YA XJUʼ YA ANOPXAN INI
Ilawil bintik talelil ay yuʼun te Jesús te ya xjuʼ ya kakʼtik ta ilel-euke.
«Jnopbeytik stalel te Jesús» (Te Jesús: jaʼ be, jaʼ smelelil kʼop sok jaʼ kuxlejalil)
Nopa bin yuʼun ya skʼan ya jkʼopontik Dios ta swenta sbiil te Jesuse.
¿Yabal yal te Biblia bin yilel sit yelaw-a te Jesuse?
¿Bin ya jnoptik ta swenta te bin yilel la yil te antsetik te Jesuse?
«Te Dios mukʼ skʼoplal ya yil te antsetike» (Te J-ilkʼinal ta toyol, 1 yuʼun septiembre 2012)