Jkoltaytik te estudiante yuʼun ya yichʼ jaʼ

 1. ¿Bin albotik te ants winiketik kʼalal la sjojkʼoyik te bin ya spasik?

TA JUN buelta bayal ta tul ants winiketik bajtik ta Jerusalén. Te yanyantik slumalik-a sok te ma pajaluk te skʼopike. Ta kʼajkʼal-abi ay bin kʼot ta pasel ta stojol te judioetik, kajik ta kʼop jich bitʼil ya xkʼopojik te yantike. Te bin yan-nax ta ilel-ae jaʼ te bin la yal te judioetik sok te bin albotik yuʼun te Pedro, ma jaʼuk te jajchik ta kʼop ta yan kʼopile. Albotik te ya xjuʼ ya xkolik teme ya yakʼ schʼuunel yoʼtanik ta stojol te Jesucristo. Kʼot ta yoʼtanik te bin la yale, jaʼ yuʼun jich la sjojkʼoyik: «¿Bin ya scʼan ya jpascotic?». Pedro jich la yal: «Acʼa abahic ta aʼbeyel awichʼic haʼ ta tuhlutuhl» (Hech. 2:37, 38).

 2. ¿Bin ya kilbeytik skʼoplal ta artículo ini? (Ilawil te foto ta yelaw te revista).

² Ta skʼajkʼalel-abi la yichʼik jaʼ 3,000 ta tul ants winiketik sok ochik ta jnopojeletik yuʼun te Jesús. Jich jajch ta pasel te mukʼul aʼtelil la yakʼ jilel te Jesús sok yakto ta pasel ta ora ini, melel ma orauknax ya yichʼ jaʼ jtul estudiante. Yabal xjuʼ ya xjalaj bayal u o jun jaʼbil o kʼaxem-a. Te machʼatik ya yakʼik nojptesel ta Biblia snaʼojik te ma kʼunuk ta pasel te yotsesel jnopojeletik. Ta artículo ini ya kiltik bin ya skʼan ya jpastik yuʼun ya jkoltaytik te estudiante yuʼun ya yichʼ jaʼ.

 3. Jich bitʼil ya yal te Mateo 28:19, 20, ¿bin ya skʼan ya spas te estudiante yuʼun ya yichʼ jaʼ?

³ Te estudiante ya skʼan ya spas ta skuxlejal te bin yak ta snopel te kʼalal mato yichʼoj jaʼ-ae (kʼopona Mateo 28:19, 20). Te kʼalal jich ya spase jich kʼoem bitʼil jtul «pʼijil winic» te la yalbey skʼoplal te Jesús te la spas sna ta sba mukʼul ton te tulan yichʼoj yip (Mat. 7:24, 25; Luc. 6:47, 48). Ta ora ini ya kiltik oxchajp te bin-utʼil ya jkoltaytik te estudiante yuʼun ya spas ta skuxlejal te bin yak ta snopel.

 4. ¿Bin-utʼil ya jkoltaytik te estudiante yuʼun ya yichʼ jaʼ? (Ilawil te recuadro «Jkoltaytik te estudiante yuʼun ayuk bin ya snop spasel ta stojol Dios»).

⁴ Jkoltaytik te ayuk bin ya spas ta skuxlejal. ¿Bin yuʼun te mukʼ skʼoplale? Kiltik jun ejemplo, jnop kaʼiytik te ya xbootik ta viaje, pero ya jtejkʼantik te carro te banti tʼujbil lugaretik ya kiltik, yuʼun jich ma kʼax namal ya kaʼiytik-a te ban ya xbootike. Jaʼ pajal kʼoem sok te kʼalal te estudiante ay bin ya xjajch spas ta skuxlejal, pero te kʼalal ya yil te juʼ yuʼun spasele jichniwan ya sta ta nopel te ya xjuʼ yuʼun-euk te ya yichʼ jaʼe. Ya xjuʼ ya jtuuntestik te recuadro «Pasa awil ini» yuʼun te libro Mulana yuʼun ya jkoltaytik-a te estudiante yuʼun ya xchʼixan te schʼuunel yoʼtan. Ta slajibal te jujun lección jcholbeytik yaʼiy te bin-utʼil ya xkoltayot te bin lajelto snopel yuʼun ya skʼotes ta pasel te bin snopoj ya spas ta stojol Dios. Teme ya jkʼantik te ay binxan ya spas ta stojol te Dios, ya xjuʼ ya jtsʼibaytik te banti ya yal «Pasaxan awil ini». Te kʼalal ya kakʼbeytik estudio kilbeytikxan skʼoplal te bintik snopoj spasel ta oranax o ta patilto ta stojol Dios.

 5. Jich bitʼil ya yal te Marcos 10:17-22, ¿bin la yalbey te Jesús te jkʼulej winik, sok bin yuʼun?

⁵ Jkoltaytik te estudiante ta sjelontesel te skuxlejal (kʼopona Marcos 10:17-22). Te Jesús la yalbey jtul jkʼulej winik te akʼa schon spisil te bintik ay yuʼune, manchukme snaʼoj te wokol ya yile (Mar. 10:23). ¿Bin yuʼun te jich la yalbeye? Jaʼ yuʼun te kʼux ta yoʼtane. Ayniwan ma xkalbeytik te estudiante te akʼa spas ta skuxlejal te bin yak ta snopele, melel yaniwan jkuytik te matoba chapale. Yaniwan yichʼ bael bayal tiempo yuʼun ay machʼa ya yijkitay te spokoʼ talele (Col. 3:9, 10). Pero teme ya kalbeytik skʼoplal ta oranax, yaniwan xjajch sjelontes te bin ma lek ya spas ta skuxlejal. Teme jich ya jpastike ya kakʼtik ta ilel te kʼux ta koʼtantik (Sal. 141:5; Prov. 27:17).

 6. ¿Bin yuʼun mukʼ skʼoplal te ya jpastik jojkʼoyeletik?

⁶ Mukʼ skʼoplal te yakuk jpasbeytik jojkʼoyeletik te estudiante yuʼun jich ya jnaʼtik-a te bin kʼoem ta yoʼtan sok te bin schʼuuneje. Teme jich kʼayemotik ta spasel maba wokol ya kiltik teme ay bin chujkultik ya kalbeytik skʼoplal. Te libro Mulana bayal jojkʼoyeletik yichʼoj tal. Jich bitʼil ta lección 4 ya jtatik te jojkʼoyel ini: «¿Binwan-utʼil ya yaʼiy sba te Jehová te kʼalal ya atuuntesbey te sbiile?». Jaʼnix jich ta lección 9 ya jtatik te jojkʼoyel: «¿Bintik ya akʼan ya awalbey te Diose?». Ta nail yaniwan skʼan ya kakʼbeytik tiempo te estudiante yuʼun ya sutbotik te jojkʼoyeletike sok akʼa snop ta yoʼtan te bin ya yal te textoetik sok te fotoetik te ya xchiknaj ta lección.

 7. ¿Bin-utʼil ya xjuʼ ya jtuuntestik experienciaetik yuʼun ya jkoltaytik-a te estudiante?

⁷ Teme kʼoemix ta yoʼtan-a te estudiante te bin ya skʼan ya spase, akʼa jtijbeytik yoʼtan yuʼun akʼa skʼayinbey te slekil talel te yantik hermanoetik. Teme wokol ya yaʼiy yuʼun ya xbajt ta tsoblejetik, ya xjuʼ ya kakʼbeytik yil te video Ay jkʼoplal ta yoʼtan te Jehová, te ya xchiknaj ta sección «Ya xjuʼ ya anopxan ini» te ay ta lección 14. Bayal leccionetik yuʼun te libro Mulana yichʼoj tal experienciaetik ta sección «Jnoptikxan ta lek» o «Ya xjuʼ ya anopxan ini».b Mame jpajbeytik skʼoplal te estudiante sok te yantik, ma skʼan te jich ya kalbeytik: «Teme ya xjuʼ yuʼune, ya xjuʼ awuʼun-euk». Jaʼuknix akʼa lokʼuk ta yoʼtan spasel. Kalbeytik skʼoplal te bin koltayot te machʼa ya xchiknaj ta video kʼalal la spas ta skuxlejal te nojpteseletik yuʼun te Biblia, jich bitʼil jun texto o te ay bin la sjelontes ta skuxlejal sok akʼa kalbeytik te bin-utʼil koltayot yuʼun te Jehová.

 8. ¿Bin-utʼil ya jkoltaytik te estudiante yuʼun kʼuxuk ta yoʼtan te Jehová?

⁸ Jkoltaytik te estudiante yuʼun kʼuxuk ta yoʼtan te Jehová. Jlebeytik yorail yuʼun ya kalbeytik skʼoplal te taleliletik yuʼun te Jehová sok jkoltaytik te estudiante yuʼun akʼa yil te spisil-ora ya skoltayotik te Jehová teme kʼux ta koʼtantike (1 Tim. 1:11; Heb. 11:6). Akʼa kalbeytik te bin lek ya xlokʼ yuʼun-a teme ya spas ta skuxlejal te bin yak ta snopel sok te jaʼ jich ya x-akʼbot yil te skʼuxul yoʼtan te Jehová ta stojol (Is. 48:17, 18). Teme ya xmukʼubxan te skʼuxul yoʼtan ta stojol te Jehová, jich ya skʼan ya sjeltayxan te skuxlejal (1 Juan 5:3).

 9. Jich bitʼil ya yal te Marcos 10:29, 30, ¿bin ya spas tul estudiante yuʼun ya yichʼ jaʼ?

⁹ Yuʼun ya yichʼ jaʼ te estudiante ay bintik ya skʼan ya yijkitay spasel. Jich bitʼil la kilbeytik skʼoplal te jkʼulej winik ta párrafo 5, ayniwan estudianteetik te ya skʼan ya yijkitayik te bintik ay yuʼunik. Ayniwan ya yijkitay yaʼtelik teme ya yilik te ya skontrain te bin ya yal te Biblia sok ya yijkitayik ta yamigoinel te machʼatik ma kʼuxuk ta yoʼtanik te Jehová. Ay yantik te ya xpʼajotik yuʼun te sfamiliaik te ya skontrainik te testigoetik yuʼun Jehová. Te Jesús la yal te ay wokol ya yilik. Pero te Jehová la yal te ya yakʼbey bendición te jnopojeletik yuʼun sok te ya yakʼbey jun familia te pajal schʼuunel yoʼtanik sok (kʼopona Marcos 10:29, 30). ¿Bin-utʼil ya jkoltaytik te estudiante yuʼun ya sta te bendicionetik ini?

10. ¿Bin ya yakʼ jnoptik te bin ya yal te Manuel?

¹⁰ Kamigointik te estudiante. Ya skʼan ya kakʼtik ta ilel te mukʼ skʼoplal ta koʼtantik. ¿Bin yuʼun? Kiltik bin ya yal jtul hermano te ay ta México te Manuel sbiil, te kʼalal yak ta snopel-a te Biblia: «Te kʼalal mato xjajch-a te nojptesel ta Biblia, te machʼa ya snojptesone ya sjojkʼoybon te bin kilele. Jaʼ ya skoltayon yuʼun ya kalbey te bin yaʼiyel ya kaʼiy jbae. Jich ya kaʼiy te ay jkʼoplal ta yoʼtane».

11. ¿Bin yuʼun mukʼ skʼoplal te ya jkʼasestik tiempo sok te estudiante?

¹¹ Jich bitʼil la spas te Jesús, akʼa jkʼasestik tiempo sok te j-estudiantetik (Juan 3:22). Teme yak ta chʼiel te schʼuunel yoʼtan sok teme jich lek ya kiltik, akʼa kikʼtik ta uchʼ café o ta weʼel ta jnatik o ya kiltik te Broadcasting. Yaniwan yal wokol yuʼun teme ya kikʼtik ta jnatik te kʼalal ya spasik kʼinetik te ants winiketik, yuʼun jich ma stukeluk ya yaʼiy sba-a. Te Kazibwe, te ay ta Uganda, jich ya yal: «Te bitʼil la jkʼases tiempo sok te machʼa la snojptesone bayal bin la yakʼbon jnop ta swenta te Jehová. La kil te mukʼ skʼoplal ta yoʼtan Jehová te j-abatetik yuʼun sok te ay stseʼelil yoʼtanik. Jaʼ te bin yakon ta sleel-ae».

12. ¿Bin yuʼun jaʼ lek te ya kikʼtik bael yanyantik publicadoretik te kʼalal ya kakʼtik nojptesel?

¹² Kikʼtik bael yantik publicadoretik ta yakʼel te nojptesel. Jaʼniwan lek ya kaʼiytik teme jtukel ya xbootik o teme jtulnax te machʼa kʼayemotik yuʼun ya sjokinotik. Lekniwan ya kiltik joʼotik, pero te estudiante jaʼ ay bin lek ya xlokʼ yuʼun-a teme yanyantik hermanoetik ya kikʼtik bael. Te Dimitri te ay ta kuxinel ta Moldavia jich ya yal: «Te jujuntul publicador te ya yikʼ bael te machʼa ya snojptesone yanyantik-a te bin-utʼil ya xnojpteswanike. Jaʼ la skoltayon yuʼun yanyantik ya kil te bin-utʼil ya jpas te kuxlejal te bin ya jnope. Jaʼnix jich maba kʼexawonix te kʼalal boon ta tsoblej, melel ya jnaʼbeyix sba bayal hermanoetik sok hermanaetik».

13. ¿Bin yuʼun ya skʼan ya jkoltaytik te estudiante yuʼun ya xbajt ta tsoblejetik?

¹³ Jkoltaytik te estudiante yuʼun ya xbajt ta tsoblejetik. ¿Bin yuʼun? Melel jaʼ jun mantalil te yakʼoj te Jehová sok yuʼun jich ya kichʼtik ta mukʼ-a (Heb. 10:24, 25). Jaʼnix jich te hermanoetik yuʼun te congregación jaʼ jfamiliatik. Kʼalal jun-nax ayotik ta tsoblejetik jich kʼoem te yakotik ta smulanel jun lekil weʼelil. Kʼalal ya jkoltaytik te estudiante yuʼun ya xbajt ta tsoblejetik, jich yakotik ta skoltayel yuʼun ya yichʼ jaʼ ta patil. Pero ayniwan bin ya xmakot ta spasel. ¿Bin-utʼil ya xjuʼ ya jtuuntestik te libro Mulana yuʼun ya jkoltaytik-a?

14. ¿Bin-utʼil ya jtijbeytik yoʼtan yuʼun ya xbajt ta tsoblejetik te estudiante?

¹⁴ Ya xjuʼ ya jtuuntestik te lección 10 yuʼun te libro Mulana yuʼun ya jtijbeytik yoʼtan te estudiante te yakuk xbajt ta tsoblejetik. Te kʼalal mato lokʼem-a te libroe, la yichʼ kʼanbeyel chaʼoxtul publicadoretik te akʼa snopik te lección ini sok te estudiante yuʼunik, te kʼalal jich la spasike ay bintik lek lokʼ yuʼunik-a. Ma puersauk ya jmaliytik ya xkʼootik ta lección 10 yuʼun ya kikʼtik ta tsoblejetik te estudiantee. Akʼa kikʼtik ta oranax sok akʼa kalulanbeytik. Yanyantik-a te bin ya xkʼax ta skuxlejal jtul estudiante, jaʼ yuʼun akʼa kiltik te bin ya xtuun yuʼunik sok akʼa jnoptik te bin-utʼil ya jkoltaytik. Mame xchebaj koʼtantik te ma xbajt ta ora ta tsoblejetik, akʼa jnaʼtik smaliyel pero mame jkom jbatik ta yalulanbeyel.

15. ¿Bin ya xjuʼ ya xiw ta spasel te estudiante?

¹⁵ Teme ya xjul ta koʼtantik te kʼalal yakotik ta snopel-a te Biblia, ¿labal jxiʼtik te ochotik ta testigo yuʼun Jehová? Laniwan jnoptik te maʼyuk bin-ora ya xjuʼ kuʼuntik ya xlokʼotik ta scholel skʼop Dios ta nanatik o la jxiʼtik te ya skontrainotik te jfamiliatik sok te kamigotaktik. Teme jich la kaʼiy jbatike, ya xkʼot ta koʼtantik te bin yaʼiyel ya yaʼiy sba te estudiante. Te Jesús la yal te yuʼun-nix ay machʼatik jich ya yaʼiy sbaik-a. Pero la yalbey te jnopojeletik yuʼun te manchuk jaʼ ya xmakotik yuʼun te xiwel ta spasbeyel te yaʼtel te Jehová (Mat. 10:16, 17, 27, 28). ¿Bin-utʼil te Jesús la skoltay te jnopojeletik yuʼun ta stsalel te xiwelike? Sok ¿bin-utʼil jich ya skʼan ya jpastik-euk?

16. ¿Bin-utʼil ya xjuʼ ya jnojptestik te estudiante ta yalel te bin yak ta snopele?

¹⁶ Jnojptestik te estudiante ta yalel te bin yak ta snopele. Te jnopojeletik yuʼun te Jesús xiwikniwan te kʼalal tikunotik ta scholel skʼop Dios. Pero jaʼ albotik yuʼun te Jesús te machʼatik ya scholbeyik skʼop Dios sok te bin ya yalik (Mat. 10:5-7). ¿Bin-utʼil ya jkʼayinbeytik te stalele? Jaʼ te ya jkoltaytik te estudiante yuʼun ya kalbeytik te machʼatik ya scholbey skʼop Dios. Jojkʼoybeytik teme ay machʼa ya snaʼbey sba te ya skʼan ya snop te Bibliae. Patil jkoltaytik ta schajpanel te bin ya xjuʼ ya yale. Ya xjuʼ ya kakʼbeytik yil te bin ya yal te seccionetik «Ay machʼatik jich ya yalik» sok «Ay machʼatik jich ya sjojkʼoyik» yuʼun te libro Mulana. Te kʼalal yakotik ta snopel sok-ae, jnojptestik ta tuuntesel ta lek te Biblia yuʼun jamaluk ya scholbey skʼoplal sok slekil yoʼtan.

17. ¿Bin-utʼil ya xjuʼ ya jtuuntestik te Mateo 10:19, 20, 29-31 yuʼun ya jkoltaytik-a te estudiante?

¹⁷ Jkoltaytik te estudiante yuʼun yakuk smukʼulin yoʼtan te Jehová. Te Jesús la yalbey te jnopojeletik te ya xkoltayotik yuʼun te Jehová melel kʼux ya x-aʼiyotik yuʼun (kʼopona Mateo 10:19, 20, 29-31). Jultesbeytik ta yoʼtan te estudiante te maʼyuk bin-ora ya x-ijkitayot yuʼun te Jehová sok jnojptestik te yakuk yalbey te Jehová te bin snopoj ya spas ta stojole. Te Franciszek te kuxinem ta Polonia, jich ya yal: «Te kʼalal ya skʼopon Dios te machʼa la snojpteson, ya yalbey skʼoplal te bin jnopoj ya jpas ta stojol te Diose. Kʼalal ya kil te ya sutbot yuʼun te Jehová, jajchon ta skʼoponel-euk ta ora te Diose. Jich la kil te la skoltayon te Jehová kʼalal la jkʼan permiso ta kaʼtel yuʼun ya xboon ta tsoblejetik sok ta mukʼul tsoblejetik».

18. ¿Bin yaʼiyel ya yaʼiy sba Jehová ta stojol te machʼatik ya xnojpteswanik ta Biblia?

¹⁸ Teme maʼyuk machʼa ya jnojptestik ta Biblia, ¿yabal xjuʼ ya jkoltaytik te estudianteetik yuʼun ya yichʼik jaʼ? Yak. ¿Bin-utʼil? Jaʼ te ya jokintik yantik publicadoretik ta yakʼel te nojptesele. Chikan ta ilel te Jehová mukʼ skʼoplal ta yoʼtan te estudianteetik, jaʼnix jich mukʼ skʼoplal ya yil te bin ya jpastik ta stojolik sok kʼux ya yaʼiyotik yuʼun (Is. 52:7).