Mukʼubukxan te skʼuxul koʼtantik

 1. ¿Bintik la anopbey skʼoplal te kʼalal la awichʼ nojptesel ta Biblia?

¿YATOBAL xjul ta awoʼtan te bintik la anop te kʼalal la awichʼ nojptesel ta Biblia? Chamnaxwan awoʼtan te kʼalal la anop te ay sbiil te Diose. Sok laniwan yakʼbat slamalil awoʼtan te kʼalal la anop te maʼyuk infierno te banti ya xwoklaj te ants winiketik. Jaʼnix jich laniwan yakʼbat stseʼelil awoʼtan snopel te ya xjuʼ ya xchaʼkuxajik te machʼatik lajem awuʼun sok te ya xjuʼ ya ajokin ta Nichimal Kʼinal.

 2. Jaʼnix jich te kʼalal jajch anop te bin ya yal te Biblia, ¿bintik-utʼil la awakʼ ta ilel te yak ta mukʼubelxan te schʼuunel awoʼtane? (Efesios 5:1, 2).

² Te kʼalal yakat ta snopel-a te Biblia, mukʼubxan te skʼuxul awoʼtan ta stojol te Jehová, sok jaʼ la stijbat awoʼtan yuʼun ya apas ta akuxlejal te bintik yakat ta snopele. Jajch apas te bintik lek ya yalbey skʼoplal te Biblia. Jaʼnix jich la ajelontes te snopojibal awuʼun sok jajch apas te bin ya smulan te Diose. Jich bitʼil jtul chʼin kerem te ya skʼayinbey stalel te spapa, jajch akʼayinbey stalel-euk te aTat te ay ta chʼulchane (kʼopona Efesios 5:1, 2).

 3. ¿Bintik jojkʼoyeletik ya xjuʼ ya jpasbey jbatik?

³ Ya xjuʼ ya jojkʼoybey jbatik ini: «¿Yichʼojxanbal yip te skʼuxul koʼtan ta stojol te Jehova? ¿Pajalbal jtalel sok te Jehová kʼaxtoxan-a te kʼalal ya kakʼbey yil skʼuxul koʼtan te hermanoetik?». Mame xchebaj koʼtantik teme pejkʼajem yip te skʼuxul koʼtantike. Melel jich kʼax ta stojolik-euk te jchʼuunjeletik ta sbabial siglo. Pero te Jesús ma la snop te chʼayemik ta jkʼaxel, jichnix ya snop ta jtojoltik (Apoc. 2:4, 7). Snaʼoj te ya xjuʼ ya xchaʼyichʼ yip te skʼuxul koʼtantik jichnix te bitʼil ay ta sjajchibal-ae.

 4. ¿Bin ya xbajt kilbeytik skʼoplal ta artículo ini?

⁴ Ta artículo ini, nail ya kiltik te bin ya skʼan ya jpastik yuʼun ya stsakxan yip te skʼuxul koʼtantik ta stojol te Jehová sok ta stojol te jpatxujktike. Ta patil ya kalbeytik skʼoplal te bin lekilal ya jtatik sok te bin lekilal ya staik te ants winiketik te kʼalal jich ya jpastike.

5, 6. 1) ¿Bintik wokolil la sitintay te jpuk-kʼop Pablo te kʼalal la spasbey yaʼtel te Dios? 2) ¿Bin tijbot yoʼtan yuʼun ya x-abatinxan ta stojol te Jehová?

⁵ Te jpuk-kʼop Pablo la sta bayal stseʼelil yoʼtan te kʼalal la spasbey te yaʼtel te Diose, pero aynix la yil swokol. Namal te lugaretik te banti been te Pablo, sok wokol la yil ta skaj te ya xkʼax ta «mukʼul jaʼetik» sok ta skaj te «j-elekʼetik». Sok aynix baeltik la yichʼ utsʼinel yuʼun te skontratak (2 Cor. 11:23-27). Ma jaʼuknax-abi, jaʼnix jich te hermanoetik ma mukʼ skʼoplal la yilik te bin la spas te jpuk-kʼop Pablo ta stojolik (2 Cor. 10:10; Filip. 4:15).

⁶ ¿Bin tijbot yoʼtan te Pablo yuʼun ya x-abatinxan ta stojol te Diose? Jaʼ te bintik la snop ta Biblia ta swenta te taleliletik yuʼun te Jehová sok te bintik kʼaxem ta stojole. Sok kʼoem ta yoʼtan te kʼux aʼiybil yuʼun te Jehová (Rom. 8:38, 39; Efes. 2:4, 5). Jaʼnix jich te Pablo kʼax kʼux la yaʼiy ta yoʼtan te Jehová, sok la yakʼ ta ilel kʼalal abatin ta stojol te machʼatik chʼultesbilik sok maba la skom sba ta spasel (Heb. 6:10).

 7. ¿Bin ya yakʼ te ya xchʼixan te skʼuxul koʼtantik ta stojol te Jehová?

⁷ Yuʼun ya xmukʼubxan te skʼuxul koʼtantik ta stojol te Dios, ya skʼan ya jkʼopontik te Biblia. Te kʼalal jich ya jpastike, ya skʼan ya kiltik te bin ya snojptesotik ta swenta te Jehová. Ya skʼan te jich ya jojkʼoybey jbatik: «¿Bin-utʼil ya yakʼ ta ilel te versiculoetik ini te kʼuxon ta yoʼtan te Jehovae? ¿Sok bin ya stijbon koʼtan yuʼun kʼuxuk ta koʼtan ya kaʼiy te Jehová?».

 8. ¿Bin-utʼil ya xkoltaywan te skʼoponel Dios yuʼun ya xchʼixan te skʼuxul koʼtantik ta stojol te Jehová?

⁸ Te binxan ya skoltayotik yuʼun ya xmukʼubxan te skʼuxul koʼtantik ta stojol te Jehová, jaʼ te yakuk kalbeytik ta jamal te bin ay ta koʼtantike (Sal. 25:4, 5). Jich te Jehová yame yakʼbey sujtib te kʼalal ya jkʼopontike (1 Juan 3:21, 22). Jtul hermana te kuxinem ta Asia te Khanhb sbiil, jich la yal: «Ta nail, jaʼnax kʼux ta koʼtan-a te Jehová ta swenta te bin kaʼiyoj ta stojole, pero mukʼubxan bael te skʼuxul koʼtan kʼalal la kil te ya sjakʼbon te jkʼope sok jaʼ la stijbon koʼtan ta spasbeyel te bin ya smulane».

 9. ¿Bin-utʼil la yakʼ ta ilel skʼuxul yoʼtan ta stojol te hermanoetik te Timoteo?

⁹ Cheʼoxeb jaʼbil ta patil te kʼalal och ta jchʼuunjel te Pablo, la snaʼbey sba jtul jchʼiel kerem te Timoteo sbiil. Te kʼux ta yoʼtan te Jehová sok te ants winiketik. Ta patil te Pablo jich la yalbey te filipenseetik ta swenta te Timoteo: «Maʼyuk machʼa yan ay kuʼun te pajal yoʼtan soke, te bin-utʼil ay akʼoplalik ta yoʼtan ta smelelile» (Filip. 2:20). Te Pablo ma jaʼuk la yalbey skʼoplal te bin ya snaʼ spasel te Timoteo o te bitʼil leknax ya skʼases te discursoetike. Jaʼ bajt ta yoʼtan yilel te bitʼil kʼux ta yoʼtan te hermanoetik. Jaʼ yuʼun te hermanoetik, yoʼtanukik te ya yichʼikix ulaʼtayel yuʼun te Timoteo (1 Cor. 4:17).

10. ¿Bin-utʼil la yakʼik ta ilel te Anna sok te smamalal te kʼux ta yoʼtanik te hermanoetike?

¹⁰ Jaʼnix jich te joʼotik ya jletik te bin-utʼil ya xjuʼ ya jkoltaytik te hermanoetik (Heb. 13:16). ¿Yatobal xjul ta awoʼtan te Anna, te la kalbeytik skʼoplal ta yan artículo? Te kʼalal kʼax tulan yikʼal jaʼal, te Anna sok te smamalal bajt yulaʼtayik jun familia yuʼun Testigoetik. Tey la yilik-a te chʼay koel te sba snaik, sok ma xjuʼ ya sakʼ te skʼuʼ spakʼik, jaʼ yuʼun, maʼyuk bin ya slapik te hermanoetike. Te Anna jich la yal: «La kichʼbeytik bael te skʼuʼ spakʼik, la jsakʼtik, la jtentik sok pakbilix-a te jsutbeytike. Ma bayaluk te bin la jpastike, pero ta swenta-abi, leknax ya kil jbatik sok te familia ta ora ini». Te kʼuxul oʼtanil, jaʼ te bin tijbot yoʼtan te Anna sok te smamalal yuʼun ya yakʼbeyik koltayel te hermanoetike (1 Juan 3:17, 18).

11. 1) ¿Bin lekilal ya yichʼ tael te kʼalal ya kakʼtik ta ilel skʼuxul koʼtantik? 2) Jich bitʼil ya yal te Proverbios 19:17, ¿bin yaʼiyel ya yaʼiy sba te Jehová kʼalal ya kakʼbeytik yil skʼuxul koʼtantik te jpatxujktike?

¹¹ Kʼalal ya kakʼtik ta ilel skʼuxul koʼtantik sok yutsil koʼtantik ta stojol te yantike, jich yakotik ta skʼayinbeyel talel te Jehová. Sok ya staik ta ilel te yantike. Maniwan ya jnaʼtik te kʼax mukʼ skʼoplal ta yoʼtanik te yantik te bin ya jpastik ta stojolike. Te Khanh, te hermana te la kalbeytik skʼoplal ta párrafo 8, ya xjul ta yoʼtan te machʼatik koltayot yuʼune, jich ya yal: «Ya kalbey bayal wokol te hermanaetik te la skoltayonik ta scholel skʼop Dios. Bayal skʼuxul yoʼtanik ta jtojol. Ya xtal sleonik, ya yikʼonik bael ta weʼel sok ya xkʼax yijkitayonik ta jna. Ya xkʼotix ta koʼtan te la spasik tulan, pero la spasik sok skʼuxul yoʼtanik». Melelnix-a te ma spisilukik ya yalbotik wokol yuʼun te bin ya jpastik ta stojolik. Jaʼ yuʼun te Khanh jich ya yal: «Koʼtanuk te ya kalbeyik wokol te machʼatik la skoltayonike, pero ta ora ini ma jnaʼ te banti nainemike. Pero te Jehová ya snaʼ stukel sok ya jkʼanbey te yakuk skoltaylane». Jich, te Jehová ya yil te bin lek ya jpastik ta stojol te yantik, manchukme ma bayaluk, jich ya yil bitʼil jun mukʼul majtanil sok jich ya yaʼiy te ay sbet ta jtojoltik (kʼopona Proverbios 19:17).

12. ¿Bin-utʼil ya yakʼik ta ilel te skʼuxul yoʼtanik ta congregación te hermanoetik te yichʼojikix jaʼe? (Jaʼnix jich ilawil te fotoetike).

¹² Teme hermanoate, ¿bin-utʼil ya xjuʼ ya awakʼ ta ilel skʼuxul awoʼtan ta stojol te hermanoetike? Jaʼ te yakuk xkoltaywanate. Jtul jchʼiel kerem te Jordan sbiil la sjojkʼoybey jtul anciano te bin ya xjuʼ ya spas yuʼun ya skoltayxan-a te hermanoetike. Albot yutsil skʼoplal yuʼun te ancianoe ta swenta te bintik spasojix tale sok albot te bintik ya xjuʼ ya spasxane. Jich bitʼil te sabuk ya xkʼot ta sNail Tsoblej, te yakuk spatbey yoʼtan te yantik, ta yakuk yakʼ scomentario, te yakuk xlokʼ ta scholel skʼop Dios sok te yakuk sle bin-utʼil ya xjuʼ ya skoltay te hermanoetik. Te bitʼil jich la spas te Jordan ma jaʼuknax yuʼun ya yichʼxan yaʼtel, jich mukʼubxan te skʼuxul yoʼtan ta stojol te hermanoetike. Sok kʼot ta yoʼtan, te jtul hermano te ya yichʼ yaʼtel ta siervo ministerial, ma teyukto ya xjajch skoltay-a te yantike, ya skʼan te kʼayemukix ta spasel sok te yakuk spasxane (1 Tim. 3:8-10, 13).

13. ¿Bin koltayot te Christian yuʼun ya xchaʼoch ta anciano?

¹³ ¿Ayatbal ta ancianoil o siervo ministerial-a? Te Jehová ma xchʼay ta yoʼtan te bintik apasoj sok te skʼuxul awoʼtan la awakʼ ta ilele (1 Cor. 15:58). Sok yak ta yilel te skʼuxul awoʼtan yakat ta yakʼelxan ta ilele. Jtul hermano te Christian sbiil, kʼax ma lek la yaʼiy sba kʼalal lokʼ ta anciano. Pero maba chebaj yoʼtan, melel jich la yal: «La jnop te manchukme ma ayonix ta anciano, ya jpas te bin ya xjuʼ kuʼun spasel, melel kʼux ta koʼtan te Jehová». Ta patil la schaʼyichʼ yaʼtel ta anciano. Te Christian jich la yal: «Bayal la jnop teme ya xjuʼ kuʼun spasele. Pero jul ta koʼtan teme ta swentanax skʼuxul yoʼtan te Jehová te ya xchaʼochon ta anciano, la kal te ya xjuʼ kuʼun spasel ta swentanax te kʼux ta koʼtan te Jehová sok te hermanoetike».

14. ¿Bin ya yakʼ jnoptik ta swenta te bin la yal jtul hermana yuʼun Georgia?

¹⁴ Te j-abatotik yuʼun Jehová jaʼnix jich ya kakʼbeytik yil skʼuxul koʼtantik te machʼatik ma Testigouk (Mat. 22:37-39). Jich bitʼil te Elena, jtul hermana te kuxinem ta Georgia, jich ya yal: «Ta sjajchibal, jaʼnax ya xlokʼon ta scholel skʼop Dios ta swenta te kʼux ta koʼtan te Jehová, pero te bitʼil mukʼubxan te skʼuxul koʼtan ta stojol te jTat te ay ta chʼulchan, jaʼnix jich mukʼubxan te skʼuxul koʼtan ta stojol te ants winiketik. Ya jnop kaʼiy te bin wokolil yak ta kʼaxel ta stojolik yuʼun jich ya jnaʼ-a te bintik ya xjuʼ ya kaltiklanbey. Te kʼalal jich la jpase, la jkʼan la jkoltayxan te ants winiketike» (Rom. 10:13-15).

15, 16. Jich bitʼil ya xchiknaj ta fotoetik, ¿bintik lekilal ya yichʼ tael kʼalal ya kakʼtik ta ilel kʼuxul koʼtantik ta stojol te yantike?

¹⁵ Te kʼalal ya kakʼbeytik yil skʼuxul koʼtantik te hermanoetik, te yantik ants winiketik ya sta slekilalik-euk. Ta yorail te chamel COVID-19, te Paolo sok te yinam la skoltayik bayal hermanaetik te ayix yaʼbilalik ta stuuntesel te celularik yuʼun ya scholik skʼop Dios. Ay jtul hermana te kʼax wokol ya yil ta stuuntesel, pero ta patil la snop sok jich la yikʼtiklan te sfamilia ta Snaʼojibal slajel te Jesuse. Ta spisilik, kʼotik 60 ta tul ta Zoom. Ta swenta te bin la spas te Paolo sok te yinam, ma jaʼuknax la sta slekilal te hermanaetik te ayix yaʼbilalik, jaʼnix jich te sfamiliaike. Te hermana jich la stsʼibaybey te Paolo: «Wokolawal yuʼun te la akoltayotik te bitʼil ayix kaʼbilaltik. Maʼyuk bin-ora ya xbajt chʼayuk ta koʼtan te skʼuxul yoʼtan la yakʼ ta ilel ta jtojoltik te Jehová sok te ay slamalil awoʼtanike».

¹⁶ Ta swenta te bin kʼax ta stojol te Paolo, ay bin mukʼ skʼoplal la snop-a, te jaʼ mukʼ skʼoplal te yakʼel ta ilel te kʼuxul oʼtanil ma jaʼuk te ay bin ya jnaʼtik spasele. Jich ya yal: «Ayon ta superintendente yuʼun circuito-a, te hermanoetik maniwan xtalix ta yoʼtanik te discursoetik la kakʼe, pero ya xtal ta yoʼtanik te koltayel la kakʼbeyik».

17. ¿Machʼatikxan ya sta slekilalik yuʼun te kʼalal ya kakʼtik ta ilel kʼuxul oʼtanil?

¹⁷ Te kʼalal ya kakʼtik ta ilel kʼuxul oʼtanil, joʼotiknix ya jta jlekilaltik. Jich kʼax ta stojol te Jonathan te kuxinem ta Nueva Zelanda. Te kʼalal la yil jtul precursor te stukel yak ta scholel skʼop Dios ta olil kʼajkʼal ta sábado manchukme kʼux kʼajkʼal-a, jaʼ yuʼun la skʼan la sjokin ta jujun sábado ta tibiltik. Ta yorail-abi, ma snaʼoj-a te bin lekilal ya xbajt sta yuʼun te jich la spase. Te Jonathan jich ya yal: «Ma jmulan-a te scholel skʼop Diose, pero kʼalal la kil te bin-utʼil ya xnojpteswan te precursor sok te ya x-aʼiybot te bin ya yale, jajch ta mukʼubelxan te skʼuxul koʼtan ta swenta te scholel skʼop Dios. Jaʼnix jich la jta jtul lekil kamigo te skoltayejon ta bayal yuʼun ya xmukʼubxan te schʼuunel koʼtan, te yakuk jmulanxan te scholel skʼop Dios sok te yakuk kamigoinxan te Jehovae».

18. ¿Bin ya skʼan te Jehová te yakuk jpastik?

¹⁸ Te Jehová ya skʼan te yakuk xmukʼubxan te skʼuxul koʼtantik ta stojol sok ta stojol te jpatxujktik. Jich bitʼil la kiltikix, yuʼun ya xmukʼubxan te skʼuxul koʼtantik ta stojol te Jehová, ya skʼan ya jkʼopontik te Biblia, te yakuk jnopilan ta koʼtantik sok te yakuk jkʼopontik Dios. Yuʼun ya kakʼtik ta ilel te ay skʼuxul koʼtantik ta stojol te kermanotaktik, ya skʼan ya jkoltaytik. Kʼalal ya xmukʼubxan te skʼuxul koʼtantik ta stojol te Jehová, ya xnoptsajotikxan ta stojol sok ta stojol te hermanoetike. ¡Yame xjuʼ ya jmulantik yamigoinel te Jehová ta sbajtelkʼinal!