LECCIÓN 25
¿Bin ya skʼan ya yakʼbotik te Diose?
Te Biblia ya yal te «com nax te scuxlejal [te ants winiketik] soc nojel ta wocol» (Job 14:1). Pero, ¿jichbal snopoj Dios te ya xkuxinotike? Teme maʼuke, ¿bin-a te ya skʼan ya yakʼbotik te Diose? ¿Yanixbal yakʼbotik-a? Ilawil bin-utʼil ya smukʼubtesbotik koʼtantik te Bibliae.
1. ¿Bin yilel jkuxlejaltik ya skʼan te Diose?
Te Jehová ya skʼan te ma xkʼax jwokoltike. Te kʼalal la spas te Adán sok Eva, la yakʼ ta tʼujbil nichimal kʼinal Edén. Te «Dios la yacʼticlambe bendición, hich la yalbe: Sitinan soc pʼohla abahic, nojesahic ta swohlol te bahlumilal, soc tuhunahic te qʼuinale» (Génesis 1:28). Te Jehová la skʼan te ya x-ayin yal snichʼnabik, te ya skʼatpʼunik ta nichimal kʼinal swolol te Balumilal sok te ya skanantayik te chambalametike. Te skʼanojel yoʼtane jaʼ te ma stsakotik ta chamel te ants winiketik sok te ya xkuxinik ta sbajtelkʼinal.
Manchukme ma jich kʼot ta pasel,a ma jelonem te bin snopoj ya spas te Diose (Isaías 46:10, 11). Jaʼ ya skʼan te lekuk ya xkuxinik ta sbajtelkʼinal te machʼatik ya schʼuunbot te skʼope (kʼopona Apocalipsis 21:3, 4).
2. ¿Bin-utʼil ya xjuʼ ya jmulantik te jkuxlejaltik ta ora ini?
Te Jehová jich la spasotik te ya skʼan ya jnaʼbeytik sba sok te ya kichʼtik ta mukʼ (kʼopona Mateo 5:3-6). Te Dios ya skʼan ya yamigoinotik, te ya xbeenotik ta «be yuʼun», te kʼuxuk ta koʼtantik sok te ya kakʼ jbatik ta abatinel ta stojol sok spisil koʼtantik (Deuteronomio 10:12; Salmo 25:14). Teme ya jpastik spisil-abi, tseʼel koʼtantik manchukme ay jwokoltik. Te kʼalal ya kichʼtik ta mukʼ te Jehová, lek ya kaʼiy jbatik sok ay swentail ya xkʼot te jkuxlejaltike.
JNOPTIKXAN TA LEK
Kiltik te bin-utʼil la yakʼ ta ilel skʼuxul yoʼtan te Jehová kʼalal la spas te Balumilal te banti kuxinemotik sok kiltik bin ya yal te Biblia ta swenta te bin yuʼun kuxulotike.
3. Te Jehová ya skʼan te kʼax lekuk te jkuxlejaltike
Ilawilik te VIDEO sok albeyaik skʼoplal ini:
¿Bin yuʼun te kʼax tʼujbil la spas te Balumilal te Diose?
Kʼoponaik Eclesiastés 3:11 sok albeyaik skʼoplal ini:
Jich bitʼil la yal te texto ini, ¿bin-a te skʼanojel yoʼtan Dios ta jtojoltik?
4. Ma jelonem te bin snopoj ya spas te Diose
Kʼoponaik Salmo 37:11, 29 sok Isaías 55:11, sok albeyaik skʼoplal ini:
¿Bin-utʼil ya jnaʼtik te ma jelonem te bin snopoj ya spas te Jehová ta jtojoltik?
Te na te ma lekukixe ya xjuʼ ta lekubtesel. Jaʼnix jich te Balumilale sjinojik te ants winiketik, pero te Dios ya slekubtes yuʼun ya yakʼbey te ants winiketik te kʼux ta yoʼtanike.
5. Te kʼalal ya kichʼtik ta mukʼ te Jehová ay swentail ya xkʼot te jkuxlejaltike
Ya yakʼ stseʼelil koʼtantik snaʼel bin swentail te jkuxlejaltike. Ilawilik te VIDEO sok albeyaik skʼoplal ini:
¿Bin-utʼil koltayot te Terumi te kʼalal la snaʼ te bin swentail te kuxlejalile?
Kʼoponaik Eclesiastés 12:13 sok albeyaik skʼoplal ini:
Te bitʼil bayal bin spasoj te Jehová ta jtojoltike, ¿bin ya skʼan ya jpastik swenta ya kakʼbeytik yil te ya kaltik wokole?
AY MACHʼATIK JICH YA SJOJKʼOYIK: «¿Bin yuʼun te kuxulotike?».
¿Bin ya asut te jaʼate?
¿BINTIK LA JNOPTIK?
Te Jehová ya skʼan te yakuk jmulantik te kuxinel ta sbajtelkʼinal liʼ ta Balumilal sok te manchuk ya xkʼax jwokoltike. Jaʼnix jich ta ora ini, ay swentail ya xkʼot te jkuxlejaltik te kʼalal ya kichʼtik ta mukʼ te Jehová ta spisil koʼtantik.
¿Jilbal ta awoʼtan into?
Kʼalal te Jehová la spas te Adán sok te Evae, ¿bin-utʼil ya skʼan-a te ya xkuxinike?
¿Bin-utʼil ya jnaʼtik te ma jelonem te bin ya skʼan Dios ta stojol te ants winiketike?
¿Bin ya skoltayat swenta ay stseʼelil awoʼtan?
YA XJUʼ YA ANOPXAN INI
Ilawil bin yuʼun ya kaltik te yuʼun-nix ayin-a te nichimal kʼinal Edén.
«¿Yuʼun-nixbal ayin-a te nichimal kʼinal Edén?» (Te J-ilkʼinal ta toyol, 1 yuʼun enero 2011)
Ilawil bin yuʼun jchʼuunejtik te maʼyuk bin-ora ya yichʼ lajinel te Balumilale.
Ilawil bin ya yal te Biblia ta swenta te bin yuʼun kuxulotike.
Ilawil bin-utʼil jtul winik te skuyoj-a te spisil ay yuʼune la sta ta ilel te manix jichuk-ae.
a Ta yan lección ya kiltik te bin yuʼun ma jichuk kʼot ta pasel.