LECCIÓN 20

¿Bin-utʼil chajpanbil te congregación?

Partitura

Te Jehová ya smulan te chajpanbil ta lek spisile (1 Corintios 14:33). Jaʼ yuʼun snujpʼ te chajpanbil ta lek te lum yuʼune. ¿Bin-utʼil chajpanbil te congregacione? ¿Bin ya xjuʼ ya jpastik swenta chajpanbiluk ta lek?

1. ¿Machʼa-a te jolal ta congregación?

«Te Cristo ha jolal» ta congregación (Efesios 5:23). Te Jesús kʼalalto ta chʼulchan ya swentain te aʼtelil ya spasik te lum yuʼun Jehová ta swolol Balumilal. La stsa te «aʼbat te jun yoʼtan soc pʼij» te jaʼ jtsob ancianoetik te pʼijubenik ta lek te jaʼnix jich naʼbil sbaik bitʼil Cuerpo Gobernante (kʼopona Mateo 24:45-47). Te Cuerpo Gobernante akʼbot yaʼtel ta swentainel te congregacionetik ta swolol Balumilal, jich bitʼil la spasik te jpuk-kʼopetik sok te ancianoetik ta Jerusalén ta sbabial siglo (Hechos 15:2). Pero ma jaʼukik te jolaletike, melel ya sleik te tojobtesel ya yakʼ te Jehová sok te Biblia, sok ya yakʼ sbaik ta wentainel yuʼun te Jesuse.

2. ¿Bin aʼtelil ya spasik te ancianoetike?

Te ancianoetik ya stuuntesik te Biblia te kʼalal ya xnojpteswanik, ya skanantayik te congregación, ya skoltaylanik sok ya yakʼbeyik smukʼul yoʼtan. Ma xyichʼik tojel sok «ma ba ta scuenta sujel» ya spas yaʼtelik ni «haʼuc ta scuenta stahel taqʼuin te ma stojiluc» ya spasik sok spisil yoʼtanik (1 Pedro 5:1, 2). Te ancianoetik ya xkoltayotik yuʼun te siervo ministerialetik te jaʼnix jich ya xjuʼ ya x-ochik ta anciano.

Te Cuerpo Gobernante ya stsa chaʼoxtul ancianoetik swenta ya x-ochik ta superintendente yuʼun circuito. Te hermanoetik ini ya yulaʼtayik bayal congregacionetik swenta ya yakʼbeyik tojobtesel sok smukʼul yoʼtanik. Jaʼnix jich, ya yakʼbeyik yaʼtel ta anciano sok siervo ministerial te machʼatik yakik ta spasel ta skuxlejalik te bin ya xkʼanbotik yuʼun te Bibliae (1 Timoteo 3:1-10, 12; Tito 1:5-9).

3. ¿Bin ay ta swentaik spasel ta jujuntul te Testigoetike?

Ta spisilik ta congregación ya yalbeyik «yutsil scʼoblal te sbihil te Jehová» ta tsoblejetik. Jaʼnix jich ya spasik te kʼalal ya scholik te skʼop Dios jaʼ chikan te ban kʼalal ya xjuʼ yuʼunik ta jujuntul (kʼopona Salmo 148:12, 13).

JNOPTIKXAN TA LEK

Kiltik bin yilel stalel te Jesús te bitʼil jaʼ jwolwanej, bin-utʼil te ancianoetik ya xjuʼ ya stʼunbeyik te stalele sok bin-utʼil ya xjuʼ ya jchʼuunbeytik skʼop te Jesús soknix te ancianoetike.

4. Te Jesús jaʼ jtul jwolwanej te lamalnax yoʼtane

Te Jesús ay bin tʼujbil ya yalbotik. Kʼoponaik Mateo 11:28-30 sok albeyaik skʼoplal ini:

¿Bin yilel stalel ta jwolwanej te Jesús? ¿Binwan-utʼil ya yaʼiy sbaik te machʼatik ya xwentainotik yuʼun te Jesuse?

¿Bin-utʼil ya snopbeyik stalel te Jesús te ancianoetike? Ilawilik te VIDEO.

VIDEO: Te koltayel la yakʼik te ancianoetik te kʼalal kʼax nijkel ta Nepal (4:56)

Te Biblia ya yal bin-utʼil ya skʼan ya spas yaʼtelik te ancianoetike.

Kʼoponaik Isaías 32:2 sok 1 Pedro 5:1-3, sok albeyaik skʼoplal ini:

Te Jesús la slamantesbey kʼinal yaʼiy te yantike, jaʼnix jich te ancianoetik ya spasik tulan ta spasel. ¿Bin-utʼil ya awaʼiy aba yuʼun?
¿Bin-utʼil ya snopbeyikxan stalel Jesús te ancianoetike?

5. Te ancianoetik ya yakʼik ta ilel lekil ejemplo

¿Bin-utʼil ya skʼan te Jesús te yakuk spas yaʼtelik te ancianoetike? Ilawilik te VIDEO.

VIDEO: Ancianoetik jaʼ nail akʼaik ta ilel te ejemplo (7:39)

Te Jesús la yal bintik talelil ya skʼan ya yakʼik ta ilel te machʼatik yichʼoj yaʼtelik ta congregación. Kʼoponaik Mateo 23:8-12 sok albeyaik skʼoplal ini:

Jich bitʼil ya yal te Bibliae, ¿bin yilel stalel ya skʼan ya yakʼik ta ilel te ancianoetike? ¿Jichbal stalelik ya akuy te sacerdoteetik sok te jwolwanejetik yuʼun religión?

A. Jtul anciano yak ta stulantesel te schʼuunel yoʼtan sok te sfamilia: 1. Yak ta skʼoponel Dios yuʼun ya snop te sBibliae. 2. Sjokinoj te yinam ta snojptesel te chʼin snichʼane.

B. Te anciano sok te yinam yakik ta yulaʼtayel jtul hermana te ay ta hospital te metsel ta wayibal.

Te ancianoetik ya stulantesik te schʼuunel yoʼtanik sok ya skoltayik-euk te sfamiliaike.
Te ancianoetik ya skanantayik te hermanoetik ta congregación.
Te ancianoetik ya scholik skʼop Dios.
Te ancianoetik ya xpʼijubteswanik sok ya spasik yantik aʼtelil ta sNail Tsoblej.

6. Ya jchʼuuntik te bin ya yal te ancianoetik

Te Biblia ya yalbotik bin yuʼun ya skʼan ya jchʼuuntik te bin ya yal te ancianoetik. Kʼoponaik Hebreos 13:17 sok albeyaik skʼoplal ini:

¿Bin yuʼun ya yal te Biblia te ya skʼan te ya jchʼuuntik sok spisil koʼtantik te bin ya yalik te machʼatik ya swentainotike? ¿Snujpʼbal te jich ya jpastik awaʼiye? ¿Bin yuʼun?

Kʼoponaik Lucas 16:10 sok albeyaik skʼoplal ini:

¿Bin yuʼun mukʼ skʼoplal te ya jchʼuuntik te bin ya yal te ancianoetik manchukme maʼyuk skʼoplal yilel?

AY MACHʼATIK JICH YA YALIK: «Ma puersauk ay jreligiontik».

¿Bin yuʼun jaʼ lek te ya kichʼtik ta mukʼ te Dios ta jun congregación?

¿BINTIK LA JNOPTIK?

Te Jesús jaʼ jolal ta congregación, te ancianoetik ya yakʼ sbaik ta wentainel yuʼun. Te joʼotik sok stseʼelil koʼtantik ya jchʼuuntik te bin ya yalik te ancianoetik, melel ya skanantayotik sok ya yakʼ kiltik lekil ejemplo.