LECCIÓN 59
Yame xkujch awuʼun te tulan kontrainel
Te j-abatotik yuʼun Dios ya sta yorail te ya kichʼtik kontrainel. ¿Yabal skʼan ya jxiʼtik?
1. ¿Bin yuʼun ma chajpuk ya kaʼiytik-a te ya kichʼtik kontrainele?
Te Biblia ya yal te «ya me xcʼax swocolic ta utsʼinel spisil te machʼatic ya scʼan ya yoʼtantayic schʼuhunel te Cristo Jesús» (2 Timoteo 3:12). Te Jesús la yichʼ kontrainel ta skaj te maba la spas te bin ya skʼan te balumilal yuʼun Satanás. Jaʼnix jich te joʼotike ma jpastik te bintik yuʼun te balumilal, jaʼ yuʼun ya skontrainotik te ajwaliletik sok te religionetike (Juan 15:18, 19).
2. ¿Bin-utʼil ya jchajpan jbatik yuʼun te kontrainele?
Ya skʼan ya kakʼbeytik stsakxan yip te smukʼul koʼtantik ta stojol te Jehová. Jich ya jpastik kʼalal ya jlokʼestik tiempo ta jujun kʼajkʼal ta skʼoponel Dios, ta skʼoponel te Biblia sok te ma jchʼaytik ni junuk tsoblej. Teme jich ya jpastike, ayxan yip koʼtantik ta sitintayel spisil te kontrainel ya xtale manchukme jaʼ jfamiliatik te ya skontrainotike. Te jpuk-kʼop Pablo, te bayal la yichʼ kontrainel, maba xiw, jich la yal: «Ha jcoltaywanej cuʼun te [Jehová]» (Hebreos 13:6).
Yanxan te bin ya yakʼ yip koʼtantik jaʼ te spisil-ora ya jcholtik te skʼop Dios, melel jich ya smukʼulinxan koʼtantik te Jehová sok ya xchʼay te xiwel ta stojol te ants winiketik (Proverbios 29:25). Teme ay yip awoʼtane, maba ya xiwat ta scholel skʼop Dios te kʼalal ya skomotik te ajwaliletike (1 Tesalonicenses 2:2).
3. ¿Bin ya jtatik teme ya xkujch kuʼuntik te kontrainele?
Melelnix-a te ma jmulantik te kontrainele. Pero, teme ya xkujch kuʼuntik, ya xtulanubxan te schʼuunel koʼtantik sok nopolxan ya kaʼiy jbatik ta stojol te Jehová, melel ya kiltik bin-utʼil ya skoltayotik te kʼalal ma xjuʼix kuʼuntik ya kaʼiytike (kʼopona Santiago 1:2-4). Te Jehová kʼux ya yaʼiy te kʼalal ya xkʼax jwokoltike, pero tseʼel yoʼtan teme ma xchebaj koʼtantike. Te Biblia jich ya yal: «Teme yac acʼases awocolic yuʼun spasel te bin leque, ha lec yoʼtan Dios yuʼun» (1 Pedro 2:20). Spisil te machʼa ya xkujch yuʼun sok jun yoʼtan ta stojol te Jehová, ya xkuxin ta sbajtelkʼinal te banti maʼyukix machʼa ya xkontrainwan yuʼun te ya kichʼtik ta mukʼ te Diose (Mateo 24:13).
JNOPTIKXAN TA LEK
Kiltik bin-utʼil ya jnaʼtik te ya xjuʼ te jun koʼtantik ta stojol te Jehová manchukme ay kontrainel. Sok kiltik bin majtanil ya jtatik yuʼun.
4. Yame xkujch awuʼun te kontrainel yuʼun te afamilia
Te Jesús jamal la yal te ya xjuʼ ya skontrainotik te jfamiliatik ta skaj te ya kichʼtik ta mukʼ te Jehová. Kʼoponaik Mateo 10:34-36 sok albeyaik skʼoplal ini:
Te kʼalal ay machʼa ya xjajch yichʼ ta mukʼ te Jehová, ¿binwan ya xjuʼ ya yalik te sfamiliaike?
Kiltik chaʼtul te machʼa jich kʼax ta stojolike, ilawilik te VIDEO sok albeyaik skʼoplal ini:
¿Bin ya apas teme jtul afamilia o awamigo ya skʼan ya skomat ta yichʼel ta mukʼ te Jehová?
Kʼoponaik Salmo 27:10 sok Marcos 10:29, 30. Te kʼalal la akʼoponikix-a te jujun textoe, albeyaik skʼoplal ini:
¿Bin-utʼil ya xjuʼ ya skoltayat te texto ini ta sitintayel te kontrainel yuʼun te afamilia o awamigotak?
5. Mame xa awakʼ skomat te kontrainel
Ma skʼan ya xiwotik ta yichʼel ta mukʼ te Jehová manchukme ay machʼa ya skʼan ya skomotik. Ilawilik te VIDEO sok albeyaik skʼoplal ini:
¿Bin la awil ta video te ya yakʼbat yip awoʼtane?
Kʼoponaik Hechos 5:27-29 sok Hebreos 10:24, 25. Te kʼalal la akʼoponikix-a te jujun textoe, albeyaik skʼoplal ini:
¿Bin yuʼun kʼax mukʼ skʼoplal te ma jkom jbatik ta scholel skʼop Dios o ta tsoblejetik manchukme jich ya yalbotik te j-aʼtel patanetik?
6. Te Jehová ya skoltayat yuʼun ya xkujch awuʼun
Bayal testigoetik yuʼun Jehová te yanyantik yaʼbilalik sok slumalik jun yoʼtan yakʼoj sbaik ta stojol Jehová manchukme ay kontrainel. Swenta ya anaʼ bin-utʼil kujchem yuʼunik, ilawilik te VIDEO. Ta patil albeyaik skʼoplal ini:
¿Bin-utʼil kujch yuʼunik te tulan kontrainel te Testigoetik la kiltik ta video?
Kʼoponaik Romanos 8:35 sok 37-39, sok Filipenses 4:13. Te kʼalal la akʼoponikix-a te jujun textoe, albeyaik skʼoplal ini:
¿Bin-utʼil ya yakʼbat awil te texto ini te ya xjuʼ ya xkujch awuʼun te kontrainel?
Kʼoponaik Mateo 5:10-12 sok albeyaik skʼoplal ini:
¿Bin-utʼil ya xjuʼ tseʼel awoʼtan manchukme ay kontrainel?
Bayal j-abatetik yuʼun Jehová kujchem yuʼunik te tulan kontrainel. ¡Jaʼnix jich ya xkujch awuʼun!
AY MACHʼATIK JICH YA YALIK: «Mananix xkujch kuʼun-a te kontrainele».
¿Bintik texto ya xjuʼ ya akʼopon swenta ya awakʼbey yip yoʼtan te machʼatik jich ya yalike?
¿BINTIK LA JNOPTIK?
Te Jehová kʼax mukʼ skʼoplal ya yil te ya jpastik tulan ta yichʼel ta mukʼ manchukme ya kichʼtik kontrainel. ¡Ya xkujch kuʼuntik teme jaʼ ya skoltayotike!
¿Jilbal ta awoʼtan into?
¿Bin yuʼun ma chajpuk ya kaʼiytik-a te ya kichʼtik kontrainel?
¿Bin-utʼil ya xjuʼ ya achajpan aba ta ora ini te bitʼil mato talem te tulan kontrainel?
¿Bin yuʼun ya schʼuun awoʼtan te maʼyuk bin ya smakat ta abatinel ta stojol te Jehová?
YA XJUʼ YA ANOPXAN INI
Ilawil bin-utʼil te Jehová la skoltay jtul jchʼiel hermano te kʼalal ay ta cárcel ta skaj te ma la skʼan la spas te bin yuʼun te balumilale.
Ilawil bin-utʼil jtul hermano sok yinam abatinik ta stojol te Jehová manchukme bayal jaʼbil la sitintayik kontrainel.
Ilawil bin-utʼil ya xjuʼ ya asitintay te kontrainel.
«Jchajpan jbatik ta ora ini ta swenta te kontrainele» (Te J-ilkʼinal ta toyol, julio 2019)
¿Bin ya skʼan ya jnaʼtik ta swenta te kontrainel ya kichʼtik ta jfamiliatike? ¿Bin-utʼil ma jachtik kʼop sok jun koʼtantik ta stojol te Jehová?
«Te smelelil kʼop maba ya yakʼ lamalkʼinal, ya yakʼ guerra» (Te J-ilkʼinal ta toyol, octubre 2017)