«Bahanic, otsesahic ta jnopojel spisil te nacionetic»

1, 2. Te kʼalal ya jkʼopontik te sjun Mateo 24:14, ¿bintik ya jojkʼoybey jbatik yuʼun?

TE Jesús la yal jilel te ya yichʼ pukbeyel ta spisil ants winiketik te lek yachʼil kʼop ta swenta te Ajwalinel yuʼun Dios te kʼalal ayotikix ta slajibal kʼajkʼal-ae (Mateo 24:14). Ta ora ini, te stestigotak Jehová naʼbil jbakotik ta swolol Balumilal ta swenta te ya jcholkotik te skʼop Diose. Ay machʼatik ya smulanik yaʼiyel te lek yachʼil kʼope. Ay yantik te maba ya smulanike, jaʼukmeto ya yichʼik ta mukʼ te aʼtelil ya jpaskotike. ¿Yabal xjuʼ ya yichʼ alel te jaʼiknax te Testigoetik ya spasik te aʼtelil te la yalbey jilel skʼoplal te Jesuse? ¿Bin yuʼun te jich jamal ya yichʼ alele?

² Bayal relijionetik ya yalik te ya scholik-euk te lek yachʼil kʼop te la scholbey skʼoplal te Jesuse. Ya skuyik te jaʼ jich ya spasik-a te kʼalal ya scholik skʼop Dios ta yutil iglesia, ta telebision o ta Internet. Ay yantik te ya skuyik te jaʼ yakik ta scholel skʼop Dios-a te kʼalal ya scholbeyik yantik te bin-utʼil la snopbeyik skʼoplal te Jesuse, o te kʼalal ya xkoltaywanik jich bitʼil ta doktoril, enfermerail o ta maestroil. Jaʼukmeto, ¿jichbal la yal te Jesús ta stojol te jnopojeletik yuʼun te jich ya skʼan ya scholik te skʼop Diose?

 3. Jich bitʼil ya yal ta sjun Mateo 28:19, 20, ¿bin chanchajp ya skʼan ya spasik te jnopojeletik yuʼun te Jesuse?

³ ¿Jaʼbal la skʼan Jesús te stukel ya xtalik te ants winiketik ta stojol te jnopojeletik yuʼune? Maʼuk, melel te kʼalal chaʼkuxajemix tal-ae jich la yalbey te jnopojeletik yuʼune: «Bahanic, otsesahic ta jnopojel spisil te nacionetic, acʼticlambeyahic yichʼic haʼ [...], soc acʼticlambeya snopic te ya me schʼuhunic spasel spisil bintic la jpasex ta mandar» (Mateo 28:19, 20). Jich bitʼil ya kiltike, te jnopojeletik ya skʼan te ya yotsesik ta jnopojel te ants winiketik, ya skʼan ya yakʼbeyik yichʼ jaʼ sok ya snojptesik. Jaʼukmeto, nail ya skʼan ya xbajtʼik ta sleel te ants winiketik chikan bayuk ayik, maʼyuk skʼoplal teme ya skʼan ya xkʼaxik bael ta yan kaye o ta mukʼul mar (Mateo 10:7; Lucas 10:3).

 4. ¿Bin ya skʼan ya jpastik swenta «jtsob-ants-winiquetic» ya xkʼootik?

⁴ ¿Jaʼbal la skʼan Jesús te ya scholik skʼop Dios ta stukelik te jnopojeletik yuʼune? ¿O jaʼbal la skʼan te chajpanbiluk ta lek te bin-utʼil ya scholik te skʼop Dios ta spisilike? Ta melel ya jnaʼtik te jtul jchʼuunjele ma xjuʼ yuʼun te stukel ya scholbey skʼop Dios te ants winiketik ta «spisil te nacionetic». Jaʼ yuʼun ya skʼan chajpanbil ta lek te bitʼil ya skʼan ya scholik skʼop Dios te j-abatetike. Te Jesús jaʼ la skʼan la yalbey skʼoplal te kʼalal jich la yalbey te jnopojeletik yuʼune: «Ya caqʼuex ta jtsob-ants-winiquetic» (kʼopona te sjun Mateo 4:18-22). ¿Bin la skʼan la yal yuʼun-abi? Ma jaʼuk la skʼan la yal te jujuntul te jnopojel yuʼun jich ya xkʼot te bitʼil machʼa stukel ya stsak chay sok te ya smaliy te stukel ya xtal te chayetik yuʼun ya xtal stsakik te anzueloe. Jaʼ yak ta yalbeyel skʼoplal te machʼatik ya stuuntesik te stsakojibal chay swenta ya stsakik-a te chayetike. Ta swenta te aʼtelil-abi, ya skʼan tulan ya x-aʼtejik bayal ants winiketik, te junuknax ayik sok chajpanbiluk ta lek (Lucas 5:1-11).

 5. ¿Bin chaneb jojkʼoyeletik ya skʼan ya kakʼbeytik sujtib sok bin yuʼun?

⁵ Teme ya jkʼan ya jnaʼtik machʼatik-a te yakik ta scholel te lek yachʼil kʼop yuʼun te Ajwalinel yuʼun Diose, ya skʼan ya kakʼbeytik sujtib te jojkʼoyeletik ini:

• ¿Bin ya scholbeyik skʼoplal te j-abatetik yuʼun Diose?

• ¿Bin ya skʼan ya xtijbot yoʼtanik ta scholel te skʼop Diose?

• ¿Bintik-utʼil ya scholik te skʼop Diose?

• ¿Bantito kʼalal ya skʼan ya xkʼot te scholel skʼop Dios sok jayebto tiempo ya xjalajxan ta pasel?

Te sujtib te jojkʼoyeletik-abi ya skoltayotik ta snaʼel machʼatik-a te yakik ta spasel te aʼtelil te ya yakʼ xkol jilel skuxlejal te ants winiketike. Sok jaʼ ya yakʼxan yip koʼtantik ta scholel te skʼop Diose (1 Timoteo 4:16).

 6. ¿Bin yuʼun kʼoem lek ta koʼtantik te jaʼik te stestigotak Jehová yakik ta spukel te lek yachʼil kʼop la yal jilel ta mantal te Jesuse?

⁶ (Kʼopona te sjun Lucas 4:43.) Te Jesús la schol «te lec yachʼil cʼop scʼoblal te cuentahinel yuʼun Dios». Sok jaʼnix jich ya skʼan ya spasik te jnopojeletik yuʼune. ¿Bin relijionil te jaʼnax yak ta scholel te lek yachʼil kʼope? Jaʼ te stestigotak Jehová. Jaʼ-abi snaʼojik-euk te machʼatik maba lek ya yilotike. Jich bitʼil ya kiltik te bin albot jtul Testigo yuʼun jtul winik te kʼax ta misioneroil sok ta sacerdoteile. Te winik la schol te aylaj kuxinem ta yantik nasion sok yalaj sjojkʼoybey te stestigotak Jehová ta jujun nasion bin-a te ya scholbeyik skʼoplale. Te winike jich la yal: «Chʼayemik ta jkʼaxel ta swenta te spisilik jich ya yalik jaʼlaj ya spukbeyik skʼoplal: “Te lek yachʼil kʼop yuʼun te Ajwalinel yuʼun Diose”». Jaʼ-abi ya yakʼ ta ilel te manix chʼayemotik-ae, melel jun-nax ayotik ta skaj te smelelil j-abatotik yuʼun te Diose (1 Corintios 1:10). Jaʼnix jich te revista ini, ya scholbey skʼoplal te Ajwalinel yuʼun Diose. Te sbiile jaʼ, Te J-ilkʼinal ta toyol. Ya spukbey skʼoplal te Ajwalinel yuʼun Jehová. Yak ta lokʼesel ta 254 ta chajp kʼopil sok yak ta lokʼesel 59 miyon revistaetik. Te J-ilkʼinal ta toyol jaʼ jun revista te bayal ya yichʼ pukel ta swolol Balumilal.

 7. ¿Bin yuʼun ya kaltik te ma scholik te lekil yachʼil kʼop te jwolwanejetik yuʼun relijionetike?

⁷ Te jwolwanejetik yuʼun relijionetik maba ya scholbeyik skʼoplal te Ajwalinel yuʼun Diose. Teme ay ya yalbeyik skʼoplale, bayal ya yalik te kichʼojtiklaj ta yutil koʼtantike (Lucas 17:21). Maba ya yakʼik ta nopel te ay ta chʼulchan te Ajwalinel yuʼun Diose sok te jaʼ tsabil ta Ajwalil yuʼun Dios te Jesuse. Jaʼnax ya yalbeyik skʼoplal te Jesús kʼalal ya spasbeyik skʼinul te bin-ora ayin o ta skʼinul Kuxibal. Maba ya yakʼik ta nopel te jaʼ ya schajpan wokoliletik te Ajwalinel yuʼun Dios sok te ya slajinbey skʼoplal te chopolil ta Balumilale (Apocalipsis 19:11-21). Chikan ta ilel te ma snaʼik te bin ya spas ta pajel chaʼbej te Jesús jich bitʼil te Ajwalilix yuʼun te Ajwalinel yuʼun Diose. Ta swenta te maba ya snaʼbeyik swentail bin-a te la scholbey skʼoplal te Jesuse, jaʼnix jich ma snaʼbeyik swentail bin yuʼun te ya skʼan ya scholik te skʼop Diose.

 8. ¿Bin maba ya skʼan ya stij koʼtantik te kʼalal ya jcholtik skʼop Diose?

⁸ Te jnopojeletik yuʼun te Jesuse maba ya scholik skʼop Dios swenta ya spasik ganar takʼin o ya spasik mukʼul naetik te yaniknax ta ilele. Te Jesús la ta mantal ini: «Ta mahtanil la awichʼic, hich ni me ta mahtanil yac awaqʼuic» (Mateo 10:8). Jich yuʼun ma lekuk te ya jpastik ganar takʼin ta swenta te scholel skʼop Diose (2 Corintios 2:17, nota, TNM). Te jnopojeletik maba ya skʼan stojolik ta swenta te ya scholik skʼop Diose (kʼopona te sjun Hechos 20:33-35). Manchukme jamal la yal te Jesús ta swenta te bin ya skʼan pasele, jteb ma spisiluk te relijionetik jaʼ baem yoʼtanik ta skʼanel te takʼin swenta ya slekubtesikxan te iglesia yuʼunik sok ya stojik-a te jwolwanej yuʼunik sok te j-aʼteletik yuʼunike. Ta swenta-abi, bayal ta tul te jwolwanejetik yuʼun relijionetik staoj bayal skʼulejalik (Apocalipsis 17:4, 5).

 9. ¿Bin-utʼil ya yakʼik ta ilel te stestigotak Jehová te lek te bin ya xtijbot yoʼtanik yuʼun ta scholel skʼop Diose?

⁹ ¿Jaxan te stestigotak Jehovae? ¿Yabal skʼanik takʼin ta sNail Tsoblejetik yuʼunik o ta mukʼul tsoblejetik yuʼunik? Maʼuk. Ya xpastaj te aʼtelil ta swenta stakʼin te machʼatik jich yipal ya xlokʼ ta yoʼtanike (2 Corintios 9:7). Manchukme maba ya yichʼik tojel ta swenta te ya yakʼik nojptesel yuʼun Biblia, te jaʼbil kʼaxe jteb ma sta 2,000 miyon hora la scholik skʼop Dios sok la yakʼik nojptesel yuʼun Biblia kʼaxem ta nueve miyon ta jujun u. Sok stseʼelil yoʼtanik ya stuuntes te stakʼinik swenta ya spasik te aʼtelile. Ay jtul te machʼa ay bin ya stʼunbey skʼoplal la yal ta swenta te aʼtelil ya spasik te Testigoetike, jaʼlaj te scholel skʼop Dios sok te yakʼel nojptesel yuʼun Biblia. La yalxan te maʼyuk jwolwanejetik yuʼunik te ya stojike. Jich yuʼun teme maba ya yichʼik tojel te stestigotak Jehová, ¿bin ya stij koʼtankotik ta scholel te skʼop Dios? Jaʼ te kʼux ta koʼtankotik te Jehová sok te ants winiketike. Jaʼ jich yak ta kʼoel ta pasel te bin albil jilel skʼoplal ta sjun Salmo 110:3 (kʼopona).

10. ¿Bintik-utʼil la scholik skʼop Dios te Jesús sok te jnopojeletik yuʼune?

¹⁰ ¿Bintik-utʼil la scholik skʼop Dios te Jesús sok te jnopojeletik yuʼune? Bajtʼik te banti ay te ants winiketike. Jich bitʼil, la scholik skʼop Dios ta kayeetik, ta merkadoetik sok ta nanatik (Mateo 10:11; Lucas 8:1; Hechos 5:42; 20:20). Te kʼalal chajpanbilik te bitʼil ya xbajtʼik ta nanatike jich ya xjuʼ xkʼopojik sok spisil ants winiketik.

11, 12. ¿Bin yuʼun te maba pajalik te bin-utʼil ya spasik tulan te Testigoetik ta scholel skʼop Dios sok te bin-utʼil ya spasik te relijionetike?

¹¹ ¿Bin ya spasik te yantik relijionetike? ¿Yabal scholbeyik skʼoplal te lek yachʼil kʼop yuʼun te Ajwalinel yuʼun Dios jich bitʼil la spas te Jesuse? Jteb ma spisiluk jaʼ ya smulanik te ya stojik ta takʼin te jwolwanejetik yuʼunik swenta ya xcholbotik yaʼiyik te skʼop Diose. Jaʼukmeto te jwolwanejetike maba ya yotsesik ta jnopojel te ants winiketik jich bitʼil la spas te Jesuse. Jaʼnax ya skʼanik te ma xtupʼ te jchʼuunjeletik yuʼunike. Ay baeltik ya stijbey yoʼtan te jchʼuunjeletik yuʼunik te yakuk scholik-euk te skʼop Diose. Jich bitʼil ta yaʼbilal 2001, te papa Juan Pablo ll jich la yal ta jun karta ta stojol te catolicoetik te ya skʼan ya scholik skʼop Dios jich bitʼil la spas te jpuk-kʼop Pablo te jich la yal: «¡Obol jba teme ma ba ya jpuc ta halel te lec yachʼil cʼope!». Jaʼnix jich te papa la yal te ma jaʼuknax ya skʼan ya scholik te lek yachʼil kʼop te machʼatik chaʼoxtul pʼijubtesbilik ta spasel te aʼtelile, la yal te spisil te machʼatik ya xbajtʼik ta iglesia yalaj skʼan ya scholik-euk te skʼop Diose. Jaʼukmeto chaʼoxtulnax la schʼuunik.

¹² Te stestigotak Jehová jaʼiknax yakik ta scholbeyel skʼoplal te yakix ta mantalteswanej te Jesús jich bitʼil Ajwalil jaʼto tal ta yaʼbilal 1914. Te bin tulanxan skʼoplal ta yoʼtanik jaʼ te scholel skʼop Diose, jich bitʼil la yal ta mantal te Jesuse (Marcos 13:10). Ay jpajk libro te ya yalbey skʼoplal ta swenta relijionetike, la yal te jaʼ kʼax bayal skʼoplal ta yoʼtanik te scholel skʼop Dios te testigoetik yuʼun Jehovae. La yal te ya spasik tulan ta skoltayel te ants winiketik te ayik ta wiʼnal, te stukel ayik o te ayik ta chamele, jaʼukmeto ma xchʼay ta yoʼtanik te bin aʼtelil mukʼ skʼoplal yuʼunike, jaʼ te yalbeyel skʼoplal te slajibal te bintik chopole sok te bin ya skʼan pasel yuʼun jich ya sta skolelik. Yuʼun-nix jich-a. Te testigoonkotik maba ya jkom jbakotik ta scholbeyel skʼoplal-abi sok jich ya jkʼayinbeykotik stalel te Jesús sok te jnopojeletik yuʼun te bintik-utʼil la schol skʼop Diose.

13. ¿Bantito ya xkʼot te scholel skʼop Diose?

¹³ Te Jesús la yal te ya scholbeyik skʼoplal sok ya yakʼik ta nopel te lek yachʼil kʼop ta swenta te Ajwalinel yuʼun Dios «ta swohlol bahlumilal» te jnopojeletik yuʼune. Sok la yal ta mantal te ya yotsesik ta jnopojel «spisil nacionetic» (Mateo 24:14; 28:19, 20). Jaʼ yuʼun te j-abatetik yuʼun Diose ya skʼan ya scholbeyik skʼoplal te Ajwalinel yuʼun Dios ta swolol Balumilal (ilawil te recuadro «¿Bin ya skʼan ya yal?»).

14, 15. ¿Bin yuʼun ya kaltik te jaʼiknax te Testigoetik yakik ta skʼotesel ta pasel te scholel skʼop Dios ta swolol Balumilal te albil jilel skʼoplale? (Ilawil te lokʼomba ta sjajchibal te articulo.)

¹⁴ Jich bitʼil la kiltikixe, te Jesús la yalbey jilel skʼoplal te ya yichʼ pukbeyel skʼoplal te Ajwalinel yuʼun Dios ta swolol Balumilal. ¿Bin yuʼun ya kaltik te jaʼiknax te Testigoetik yakik ta skʼotesel ta pasel te bin albil jilel skʼoplal-abi? Ta Estados Unidos te yantik relijionetik ayniwan 600,000 jwolwanejetik yuʼunik. Jaʼukmeto ta lum-abi, jteb ma sta 1,200,000 Testigoetik te yakik ta scholbeyel skʼoplal te lek yachʼil kʼope. Jaʼnix jich ta swolol Balumilal ayniwan 400,000 sacerdoteetik yuʼun catolicoetik, jaʼukmeto ay kʼaxem ta ocho miyon Testigoetik te yakik ta scholel te skʼop Dios ta 240 nasionetik sok territorioetik. Jaʼ-abi jamal ya yakʼ ta ilel te yakik ta scholel skʼop Dios ta swolol Balumilal. Ta melel jich yak ta ichʼel ta mukʼ sok albeyel yutsilal te Jehová (Salmo 34:1; 51:15).

¹⁵ Te stestigotak Jehová yoʼtanukik te ya xkʼot ta stojol spisil te ants winiketik te lek yachʼil kʼop jich bitʼil te mato xtal slajibal te bintik chopole. Swenta ya xjuʼ ta pasel-abi, ay jkʼasesojtikix ta yantik kʼopil sok pukbil bayal miyon libroetik, revistaetik, tratadoetik sok sjunal ikʼel te kʼaxem ta 700 ta chajp kʼopil. Maʼyuk bin-ora ya jkʼanbeytik stojol te junetike. Te jaʼbil kʼaxe, la jlokʼestik 4,500 miyon junetik te lokʼemik ta Biblia. Jaʼnix jich la jlokʼestik kʼaxem ta 200 miyon ta pajk te Traducción del Nuevo Mundo de las Santas Escrituras te kʼaxem ta 130 ta chajp kʼopil. Ta pajina kuʼunkotik ta Internet ay kʼaxemix ta 750 ta chajp kʼopil. Te testigoonkotik yuʼun Jehová joʼonkotiknax te yakonkotik ta spasel jun aʼtelil te chajpnax ta ilele.

16. ¿Bin yuʼun ya jnaʼtik te jaʼiknax te stestigotak Jehová yichʼojik te schʼul espiritu te Diose?

¹⁶ ¿Jayeb tiempo ya xjalaj te scholel kʼop Dios te la yalbey jilel skʼoplal te Jesuse? La yal te jaʼto-a te kʼalal ya xtal slajibal te bintik chopole (Mateo 24:14). Ta skaj te kichʼojtik te chʼul espiritu yuʼun te Diose, te Testigoonkotik yakonkotik ta scholel te skʼop Dios ta slajibal kʼajkʼal (Hechos 1:8; 1 Pedro 4:14). Ay machʼatik te ayik ta yantik relijione ya yalik te yichʼojiklaj-euk te chʼul espiritue. Jaʼukmeto, ¿yabal xjuʼ ya spasik jich bitʼil te stestigotak Jehová ta slajibal kʼajkʼal ini? Ay machʼatik kʼan skʼayinik te bitʼil ya spas te Testigoetike, jaʼukmeto maba juʼem yuʼunik spasel. Ay yantik ya yakʼ sbaik ta scholel skʼop Dios, jaʼukmeto cheʼoxebnax kʼajkʼal ya spasik. Ayxan yantik ya xbajtʼik ta nanatik, jaʼukmeto ma jaʼuk ya scholbeyik skʼoplal te Ajwalinel yuʼun Diose. Jich yuʼun maʼyuk yakik ta spasel te aʼtelil la sjach jilel te Jesuse.

17, 18. 1) ¿Bin yuʼun ya kaltik te jaʼiknax te stestigotak Jehová ya scholik te lek yachʼil kʼop ta swenta te Ajwalinel yuʼun Diose? 2) ¿Bin-utʼil ya xjuʼ kuʼunkotik spasel te aʼtelil-abi?

¹⁷ ¿Machʼatik yakik ta scholel te skʼop Dios ta ora ini? Jaʼiknax te stestigotak Jehová. ¿Bin yuʼun te jich ya kaltik ta jamale? Ta sbabial, melel yakik spukel te bin ya skʼan cholbeyel skʼoplale, jaʼ te Ajwalinel yuʼun Diose. Ta schebal, jaʼ te yakik ta spasel te bin-utʼil ya skʼan pasele, jaʼ te ya xbajtʼik ta sleel te ants winiketike. Yoxebal, jaʼ te lek te bin ya xtijbot yoʼtanik te ya scholik skʼop Diose, melel kʼux ta yoʼtanik te Jehová sok te ants winiketike. Schanebal, melel te aʼtelil yuʼunike yak ta pasel ta swolol Balumilal ta swenta te yakik ta scholbeyel skʼop Dios ta spisil nasionetik sok spisil ta chajp kʼopiletik. Yoʼebal, yame scholikxan te skʼop Dios jaʼto te kʼalal ya yichʼ lajinel te bintik chopole.

¹⁸ Chajpnax ta ilel te bin yak ta spasel te lum yuʼun Jehová swenta ya yichʼ cholel te lek yachʼil kʼop yuʼun te Ajwalinel yuʼun Dios te bitʼil ayotikix ta slajibal kʼajkʼale. ¿Bin-utʼil ya xjuʼ kuʼunkotik spasel? Te jpuk-kʼop Pablo la yal te jaʼnix ya x-aʼtej ta jtojolkotik te Dios, ya yakʼ ta koʼtankotik te ya jkʼankotik spasel sok ya yakʼ kipkotik (Filipenses 2:13). Jaʼ yuʼun yame jkʼanbeykotik kipkotik te Jehová swenta ya jpaskotik tulan te bantito kʼalal ya xjuʼ kuʼunkotik te scholel te sKʼope (2 Timoteo 4:5).