2. Wiʼnal

«Ya xtal wiʼnal» (MARCOS 13:8).

● Jtul winik bajt ta kuxinel ta aldea yuʼun Quaratadji, Niger. Jaʼnix jich la spasik-euk te sprimotak sok te yermanotak ta skaj te wiʼnal. Ya sjawan sba ta spojp. ¿Binwan yuʼun? «Jaʼ yuʼun te ma xjuʼ ya smakʼlin te sfamilia», jich la yal te Sidi te jwolwanej yuʼun te aldea.

TE BIN KʼOT TA PASEL. Teme ay juktul ants winiketik, jtul te ma xweʼe. Jaʼ kʼaxemtoxan-a te ta África Subsahariana, teme ay oxtul ants winiketik jtul te kʼax yauben ta kʼaxele. Yuʼun ya xkʼot ta koʼtantik-a jnop kaʼiytik te ay jun familia te tey-a te tatil, te mamail sok jtul alal. Teme jaʼnax ay weʼelil te ban ya xjuʼ ya xweʼik cheb, ¿machʼawan ma xweʼ? ¿Jaʼbal te tatil o te mamail? Jaʼ te bin ya xkʼax ta stojolik te familiaetik ta jujun kʼajkʼal.

TE BIN YA YALIK YUʼUN. Ta lum kʼinal ya xjuʼ ya yakʼ bayal weʼelil. Jaʼnax ya skʼan ya jnaʼtik stuuntesel ta lek.

¿YUʼUN-NIXBAL JICH-A TE BIN YA YICHʼ ALELE? Melelnix-a te maʼyuk bin-ora yichʼoj pukel bayal weʼelil ta Balumilal, jich bitʼil ta ora ini jaʼ te bin ya skʼan ya spas te gobiernoetik yuʼun ya xlaj skʼoplal-a te wiʼnal. Pero manchukme spasojik tulan, ma juʼem yuʼunik slajinel.

¿BIN YA AWAL TE JAʼATE? ¿Melelbal te bin ya yal te Marcos 13:8? Manchukme ayix bayal te bin ya xjuʼ ya yichʼ pasel, ¿yakatobal ta lajel ta wiʼnal te ants winiketik?

[Te bin ya yal]

«Te achʼix keremetik te ya xlajik ta neumonía, ta jachʼujt o yantik chameletik ma xlajik te ayuk sweʼelike» (ANN M. VENEMAN, EXDIRECTORA EJECUTIVA YUʼUN UNICEF).