Te bin mukʼxan skʼoplal ya yal te Biblia smakojbey skʼoplal te Wentainel yuʼun te Diose. Ta swenta te Wentainel ini, te Jehová ya skʼotes ta pasel te bin snopoj ta nailal ta swenta te Balumilal. ¿Bin-a te Wentainele? ¿Bin-utʼil ya jnaʼtik te jajchix ta aʼtele? ¿Bin spasojix? ¿Bin ya spas ta pajel chaʼbej? Te jojkʼoyeletik ini ya yichʼ akʼbeyel sujtib ta lección ini sok ta chebxan lección te ya xtale.

1. ¿Bin-a te Wentainel yuʼun te Dios, sok machʼa-a te Ajwalil yuʼune?

Te Wentainel yuʼun te Dios jaʼ jun gobierno te jaʼnix la yakʼ te Jehová. Te Ajwalil yuʼune jaʼ te Jesucristo, sok ya xwentainwan kʼalalto ta chʼulchan (Mateo 4:17; Juan 18:36). Te Biblia jich ya yal ta stojol te Jesús: «Sbahtel qʼuinal [...] te cuentahinel yuʼune» (Lucas 1:32, 33). Te bitʼil jaʼ Ajwalil yuʼun te Wentainel yuʼun te Dios, ya swentain spisil te ants winiketik ta Balumilal.

2. ¿Machʼatik ya xwentainwanik sok te Jesús?

Te Jesús ma stukeluk ya xwentainwan. Bayal «ta chahp tsʼumbaliletic, cʼopiletic, pueblohetic soc nacionetic [...] ya me yaʼiyic cuentahinwanej» (Apocalipsis 5:9, 10). ¿Jaytul ya xbajtik ta wentainwanej sok te Cristo? Te kʼalal xtaluk ta Balumilal te Jesús, bayal millón ta tul ants winiketik ochemik ta jnopojel yuʼun Cristo. Pero jaʼnax 144 mil ta tul ya xwentainwanik sok te Jesús ta chʼulchan (kʼopona Apocalipsis 14:1-4). Spisil te yantik jnopojeletik ya xkuxinik liʼ ta Balumilal sok ya yichʼik wentainel kʼalalto ta chʼulchan (Salmo 37:29).

3. ¿Bin yuʼun te jaʼ kʼax lekil gobierno te Wentainel yuʼun te Diose?

Manchukme ay ajwaliletik te ya skʼan ya spasik te bintik leke, ma xjuʼ yuʼunik spasel spisil. Ta patil ya x-och yan te maniwan ya skoltay te ants winiketike. Yan stukel te Jesús, te Ajwalil yuʼun te Wentainel yuʼun te Dios, maʼyuk machʼa ya xlokʼesot yuʼun. Te Dios la yakʼ ochel «jtuhl ajwalil te mayuc bin ora ya xlaj» (Daniel 2:44). Te Jesús ya xwentainwan ta swolol Balumilal sok lek ya yil spisil te ants winiketik. Ay skʼuxul yoʼtan, slekil yoʼtan sok toj yoʼtan, sok ya snojptes-euk te ants winiketik yuʼun jich stalelik-euk (kʼopona Isaías 11:9).

4. Jtul Ajwalil te bayal yuʼel ya swentain te Balumilal

Te Jesucristo kʼax bayal yuʼel sok ya snaʼ wentainwanej ta lek, maʼyuk yan ajwalil jich kʼaxem ta Balumilal. Kʼoponaik Mateo 28:18 sok albeyaik skʼoplal ini:

• ¿Bin yuʼun te jaʼ mukʼxan yaʼtel te Jesús te bin-utʼil te ajwaliletik ta Balumilal?

Te ajwaliletik maba ya swentainik swolol te Balumilal sok maba ya xjalajik ta wentainwanej. ¿Jichbal-euk te Wentainel yuʼun te Diose? Kʼoponaik Daniel 7:14 sok albeyaik skʼoplal ini:

• ¿Bin lekilal ya yichʼ tael yuʼun te maba ya yichʼ lajinel te Wentainel yuʼun te Diose?

• ¿Bin lekilal ya yichʼ tael yuʼun te bitʼil ya xwentainwan ta swolol Balumilal?

5. Te ajwaliletik yame yichʼik lokʼesel

¿Bin yuʼun jaʼ lek te ya yichʼik lokʼesel te ajwaliletik ta Balumilal yuʼun jaʼ ya xwentainwan te Wentainel yuʼun te Diose? Ilawilik te VIDEO sok albeyaik skʼoplal ini:

VIDEO: ¿Bin-a te Wentainel yuʼun te Diose? (jmajkʼnax) (1:41)

• ¿Bintik wokolil yakʼoj te ajwaliletik ta Balumilal?

Kʼoponaik Eclesiastés 8:9 sok albeyaik skʼoplal ini:

• ¿Yabal skʼan ya yichʼ lokʼesel te ajwaliletik yuʼun jaʼ ya xwentainwan te Wentainel yuʼun te Diose? ¿Bin yuʼun?

6. Te ajwaliletik yuʼun te Wentainel yuʼun Dios ya xkʼot ta yoʼtanik te jwokoltik

Te Jesús, te Ajwalil kuʼuntike, kuxin jich bitʼil chʼichʼbakʼet ta Balumilal, jaʼ yuʼun ya «snaʼbotic yoʼbolil jbahtic yuʼun te mayuc quiptic» (Hebreos 4:15). Te Jehová stsaoj 144 mil ta tul ants winiketik te jun yoʼtanik ta stojol yuʼun ya xwentainwanik sok te Jesús. Te ants winiketik ini talemik ta «spisil ta chahp tsʼumbaliletic, cʼopiletic, pueblohetic soc nacionetic» (Apocalipsis 5:9).

• ¿Yabal yakʼbat smukʼul awoʼtan te bitʼil ya xkʼot ta yoʼtanik te jwokoltik te Jesús sok te machʼatik ya xwentainwanik soke? ¿Bin yuʼun?

7. Jaʼ lekxan te leyetik yuʼun te Wentainel yuʼun te Diose

Te ajwaliletik ta Balumilal ya schajpanik leyetik yuʼun ya skoltay sok ya skanantay te ants winiketik. Te Wentainel yuʼun te Dios jaʼnix jich ay leyetik yuʼun, sok ya skʼan ya schʼuunik spasel te ants winiketik te wentainbilik yuʼune. Kʼoponaik 1 Corintios 6:9-11 sok albeyaik skʼoplal ini:

• ¿Bin yilel stalel ya xkʼot te ants winiketik kʼalal jaʼ ya schʼuunikix-a te mantaliletik yuʼun te Diose?a

• ¿Snujpʼbal te ya schʼuunbeyik smantal te Jehová spisil te machʼatik ya yichʼik wentainel yuʼune? ¿Bin yuʼun te jich ya awal?

• ¿Bin-utʼil ya jnaʼtik te ya xjuʼ ya sjeltay stalelik te ants winiketik te ma schʼuunbeyik smantal te Dios ta kʼajkʼal ini? (Ilawilik te versículo 11).

¿BINTIK LA JNOPTIK?

Te Wentainel yuʼun te Dios jaʼ jun gobierno te ay ta chʼulchan te ya xbajt swentain swolol te Balumilal.

¿Jilbal ta awoʼtan into?

• ¿Machʼatik-a te ajwaliletik ta Wentainel yuʼun te Diose?

• ¿Bin yuʼun te jaʼ lekxan te Wentainel yuʼun Dios te bin-utʼil te ajwaliletik ta Balumilal?

• ¿Bin ya skʼan te Jehová te akʼa spasik te machʼatik yakʼoj sbaik ta Wentainel yuʼune?

YA XJUʼ YA ANOPXAN INI

Ilawil banti ay te Wentainel te la yal te Jesuse.

«¿Jaʼnaxbal ay ta koʼtantik te Wentainel yuʼun te Diose?» (Ay ta jw.org)

¿Bin yuʼun te testigoetik yuʼun Jehová jaʼ jun yoʼtan ya yakʼ sbaik ta stojol te Wentainel yuʼun te Diose ma jaʼuk ta stojol te ajwaliletik ta Balumilale?

Jun yoʼtanik ta stojol te Wentainel yuʼun Dios (1:43)

Ilawil bin ya yal te Biblia ta swenta te 144 mil ta tul ants winiketik te tsabilik yuʼun Jehová te ya xwentainwanik sok te Jesús.

«¿Machʼatik-a te ya xbajtik ta chʼulchan?» (Ay ta jw.org)

Ilawil bin-utʼil kʼot ta yoʼtan jtul ants te ay ta cárcel-ae te jaʼnax te Dios ya xjuʼ ya schajpan te bin ma stojiluk ya yichʼ pasele.

«La jnop bitʼil ya xchajpaj te bin ma stojil ta pasel» (¡Wikʼame asit!, noviembre 2011)

Te Jesús jich la yalbey te jnopojeletik: «Ma yuʼunuquex te bahlumilal» (Juan 15:19). Jaʼ-abi ya skʼan ya yal te maba ya schʼik sbaik ta política ni ta guerraetik. Pero maba kʼun ta pasel-abi, melel ya xjuʼ ya kichʼtik labanel. ¿Bin-utʼil maba ya jchʼik jbatik ta política sok te jun koʼtan ya kakʼ jbatik ta stojol te Jehová?

1. ¿Bin yilel ya kiltik te ajwaliletik ta Balumilal?

Te j-abatotik yuʼun Dios ya kichʼtik ta wenta te ajwaliletike. Te Jesús jich la yal: «Aʼbeyahic César te bintic yuʼun César». Jaʼme jich ya jpastik: ya jchʼuuntik te leyetik te ya yakʼik te ajwaliletik jich bitʼil te stojel te jpatantike (Marcos 12:17). Te Biblia ya yal te jaʼnix te Jehová yakʼoj te ajwaliletike (Romanos 13:1). Jaʼ yuʼun ya xkʼot ta koʼtantik te jaʼ pekʼelxan yaʼtelik te bitʼil te Diose. Seguro ayotik te jaʼnax te Wentainel yuʼun Dios ya xbajt slajin spisil te wokoliletik te ay ta Balumilale.

2. ¿Bin-utʼil ya kakʼtik ta ilel te maba ya jchʼik jbatik ta política?

Jich bitʼil te Jesuse, maba ya jchʼik jbatik ta política. Kʼalal te ants winiketik la yilik te milagro la spas te Jesús, kʼan yotsesik ta ajwalil, pero maba la skʼan stukel (Juan 6:15). ¿Bin yuʼun? Jich la yal: «Te banti ay te cuentahinel cuʼun, ma haʼuc liʼ ta bahlumilali» (Juan 18:36). Te jchʼuunjelotik yuʼun Jesús bayal bitʼil ya kakʼtik ta ilel te maba ya jchʼik jbatik ta política. Jich bitʼil te maba ya xbootik ta guerra (kʼopona Miqueas 4:3). Manchukme ya kichʼtik ta wenta te bandera, maba ya jpastik saludar sok maba ya jkʼayojtaytik, melel teme jich ya jpastike jich kʼoem te yakotik ta yichʼel ta mukʼ jun lokʼomba (1 Juan 5:21). Jaʼnix jich maba ya jkoltaybeytik skʼoplal sok ma jkontraintik jun partido político ni jaʼuk te machʼa tsabil yuʼun ya x-och ta yaʼtel. Jaʼ ini jaʼnaxme chaʼoxchajp te bitʼil ya kakʼtik ta ilel te jun koʼtantik ta stojol te Wentainel yuʼun te Diose.

JNOPTIKXAN TA LEK

3. Te j-abatetik yuʼun Dios ma schʼik sbaik ta política

La yakʼbotik jilel lekil ejemplo te Jesús sok te jnopojeletik yuʼune. Kʼoponaik Romanos 13:1, 5-7 sok 1 Pedro 2:13, 14. Ta patil ilawilik te VIDEO sok albeyaik skʼoplal ini:

VIDEO: Te j-abatetik yuʼun Dios ma schʼik sbaik ta política (parte 1) (4:28)

• ¿Bin yuʼun ya skʼan ya kichʼtik ta wenta te j-aʼtel patanetike?

• ¿Bin-utʼil ya kakʼtik ta ilel te ya kakʼ jbatik ta wentainel yuʼune?

Te kʼalal ya xjajch guerra, ay nacionetik te ya yalik te maba ya schʼik sbaik-a, pero aynix bitʼil ya skoltaybeyik skʼoplal. ¿Yuʼun-nixbal maba yak schʼikbel sbaik-a te kʼalal jich ya spasike? Kʼoponaik Juan 17:16. Ta patil ilawilik te VIDEO sok albeyaik skʼoplal ini:

VIDEO: Te j-abatetik yuʼun Dios ma schʼik sbaik ta política (parte 2) (3:11)

• ¿Bin smakojbey skʼoplal te maba ya jchʼik jbatik ta política?

Ayniwan bin ya yakʼ jpastik te j-aʼtel patanetik te ya skontrain te smantal te Diose. ¿Bin ya jpastik teme jich ya xkʼot ta jtojoltike? Kʼoponaik Hechos 5:28, 29. Ta patil ilawilik te VIDEO sok albeyaik skʼoplal ini:

VIDEO: Te j-abatetik yuʼun Dios ma schʼik sbaik ta política (parte 3) (1:18)

• Kʼalal te leyetik yuʼun te ajwaliletik ya skontrain te leyetik yuʼun te Diose, ¿bin ya skʼan ya jpastik?

• ¿Binwan-ora te j-abatetik yuʼun Dios ma skʼan ya schʼuunbeyik smantal te j-aʼtel patanetike?

4. Mame xa achʼik aba ta política sok ma xa akoltaybey skʼoplal ta awoʼtan

Kʼoponaik 1 Juan 5:21. Ta patil ilawilik te VIDEO sok albeyaik skʼoplal ini:

VIDEO: ¿Bin yuʼun ma skʼan ya xiwotik te j-abatotik yuʼun Dios? Te manchuk ya jchʼik jbatik ta kʼop (2:49)

• ¿Bin yuʼun te Ayenge maba la schʼik sba ta política sok maba la spas saludar te bandera?

• ¿Lekbal te bin la sta ta nopel spasele?

¿Bin yuʼun te ay wokol ya kaʼiytik te maba ya jchʼik jbatik ta politicae? Ilawilik te VIDEO sok albeyaik skʼoplal ini:

VIDEO: Te bintik la yakʼ jnoptik Te J-ilkʼinal ta toyol: Mame jchʼik jbatik ta política (5:16)

• ¿Bin-utʼil ya kakʼtik ta ilel te jun koʼtantik ta stojol te Jehová te kʼalal ya stsal sbaik ta tajimal bayal nacionetik?

• ¿Bin-utʼil ya kakʼtik ta ilel te maba ya jchʼik jbatik ta política kʼalal ay lek o ma lek te bin ya staik ta nopel te j-aʼtel patanetike?

• ¿Bin-utʼil ya stij koʼtantik te noticia o te ants winiketik yuʼun ya jchʼik jbatik ta política?

¿BINTIK LA JNOPTIK?

Te j-abatetik yuʼun Jehová ya spasik tulan yuʼun maba ya schʼik sbaik ta política sok ma skoltaybeyik skʼoplal ta yoʼtanik.

¿Jilbal ta awoʼtan into?

• ¿Bin ay ta jwentatik spasel ta stojol te ajwaliletik yuʼun te Balumilale?

• ¿Bin yuʼun te maba ya jchʼik jbatik ta política?

• ¿Bintik ya xjuʼ ya xkʼot ta pasel te jich wokol ya kaʼiytik te maba ya jchʼik jbatik ta politicae?

YA XJUʼ YA ANOPXAN INI

¿Bin wokolil ya xjuʼ ya ata ta swenta te maba ya achʼik aba ta politicae?

Maʼyuk bin-ora yijkitayojotik te Jehová (3:14)

¿Bin ya xjuʼ ya spasik te familiaetik yuʼun nailto ya schajpan sbaik yuʼun jun yoʼtan ya yakʼ sbaik ta stojol te Jehová?

Junukme koʼtantik ya kakʼ jbatik kʼalal ayotik ta komonsitil (4:25)

Bayal machʼatik jich ya yilik bitʼil majtanil te skoltaybeyel skʼoplal te snacionike, pero ¿melelbal-abi?

Spisil ya xjuʼ yuʼun spasel te Diose (5:19)

Kʼalal ya jle kaʼteltik, ¿bin-utʼil ya kakʼtik ta ilel te maba yuʼunotik te balumilal?

«Ta jtuhlutuhl ya scʼan ya scuch stuquel te yihcatse» (Te J-ilkʼinal ta toyol, 15 yuʼun marzo 2006)