¿Bin yuʼun ya skʼan ya jtsob jbatik ta yichʼel ta mukʼ te Diose?

1-3. 1) ¿Bin-utʼil ya jnaʼtik te spisil-ora tulan skʼoplal ta yoʼtanik te tsoblejetik te sbabial jchʼuunjeletike? (Ilawil te lokʼomba ta sjajchibal te articulo.) 2) ¿Bin ya jnopbeytik skʼoplal ta articulo ini?

TE Corinna ay 17 yaʼbilal-a te kʼalal la yichʼ tsakel bael te smeʼ sok la yichʼ akʼel ta chukel te banti kʼax namal yiloj sba sok te sna swenta tey la yichʼ akʼel spas tulan aʼtelil-a. Ta patil jaʼnix jich la yichʼ ikʼel bael-euk te Corinna ta lum Siberia te ay bayal mil kilometro snamalil yiloj sba sok te snae. Tey jajchik ta aʼtel ta jun mukʼul granja sok tey la yichʼ mosoinel-a. Ay baeltik la yichʼ akʼel aʼtejuk ta jamalal te banti ay bayal sik sok ay maʼyuk bayal skʼuʼ-a. Manchukme jich-abi, te Corinna sokxan jtul ants te jaʼ testigo yuʼun Jehová la staik ta nopel te ya xbajtʼik ta tsoblej ta jun kongregasion te namal yiloj sba sok te granjae.

² Ta schebalik lokʼik bael ta jun tibiltik sok beenik 25 kilometro jaʼto te kʼalal kʼotik te banti ya xchojtaj te trene. Te Corinna jich la yal: «Te tren lokʼ bael ta cheb ora sakubel kʼinal sok jalaj wakeb ora te beele. Te kʼalal kootik jilel ta trene, beenotikxan 10 kilometro jaʼto te kʼalal kʼootik te banti ya stsob sbaike». Te Corinna ma sujt yoʼtan ta swenta te kʼotik ta tsobleje. Jich la yalxan: «Tey ta tsoblej la jnoptik te revista Te J-ilkʼinal ta toyol sok la jkʼayojtaytik kʼayojiletik ta swenta te Ajwalinel yuʼun Dios. Bayal bintik la jmulantik te jaʼ la yakʼbey yip te schʼuunel koʼtantike». Oxeb kʼajkʼal ta patil sujtik talel ta granja. Te yajwal granjae maʼyuk bin-ora la snaʼ stojol te ay lokʼemik baele.

³ Te tsoblejetike spisil-ora bayal skʼoplal ta stojol te j-abatetik yuʼun Diose. Jich bitʼil, te sbabial jchʼuunjeletike bayal la smulanik te ya stsob sbaik yuʼun ya yichʼik ta mukʼ sok ya snopbeyik skʼoplal te Jehovae (Hechos 2:42). Ta melel jpisiltik ya jmulantik te ya xkʼootik ta tsoblejetike. Jaʼukmeto ayniwan wokol ya kaʼiytik te ya xkʼootik ta spisil te tsoblejetike. Ayniwan ya skʼan ya x-aʼtejotik bayal ora, te bayal bintik ya jpastik o kʼax lujbenotik. ¿Bin ya skoltayotik swenta maba ya jkom jbatik ta tsoblejetik?^[1] (Ilawil te nota ta slajibal te articulo.) ¿Bin-utʼil ya xjuʼ ya jtijbeytik yoʼtan te machʼatik ya kakʼbeytik snopik te Biblia sok te yantik ants winiketik swenta ya xbajtʼik ta tsoblejetik? Ta articulo ini ay oxchajp te bin ya jnopbeytik skʼoplale. Sbabial, ¿bin yuʼun tulan skʼoplal te ya xkʼootik ta tsoblejetike? Schebal, ¿bin yuʼun ya sta slekilalik te yantik ta swenta te ya xkʼootik ta tsoblejetike? Yoxebal, ¿bin yuʼun ya smulan Jehová te ya xkʼootik ta tsoblejetike?^[2] (Ilawil te nota ta slajibal te articulo.)

 4. ¿Bin-utʼil ya skoltayotik ta snaʼbeyel sba ta lek Jehová te tsoblejetike?

⁴ Jaʼ yuʼun te ya spʼijubtesotike. Te tsoblejetike ya skoltayotik swenta ya jnaʼbeytik sba ta lek te Jehovae. ¿Bin-utʼil? Jich bitʼil te jteb ma spisiluk te kongregasionetik snopojikix te libro Acerquémonos a Jehová ta Snopel sKʼop Dios ta Kongregasion. ¿Bin la kaʼiy ta koʼtantik te kʼalal yakotik ta snopbeyel skʼoplal te lekil taleliletik yuʼun te Diose? ¿Sok te kʼalal la kaʼiytik te bin ya yalik te hermanoetik ta swenta te bin ya yaʼiy ta yoʼtanik ta stojol te Diose? Ta melel la kaʼiytik te ay bayal skʼuxul koʼtantik ta stojol te Jehovae. Jaʼnix jich ya jnoptikxan ta swenta Biblia te kʼalal ya jchʼam kaʼiytik ta lek te discursoetik, te bintik ya yichʼ akʼel ta ilel sok te textoetik yuʼun Biblia te ya jkʼopontike (Nehemías 8:8). Ta jujun semana ay bayal bintik tulan skʼoplal ya jnoptik te kʼalal ya jchajpan jbatik ta swenta te skʼoponel Biblia yuʼun jujun semana sok te kʼalal ya kaʼiytik skomentarioik te kermanotaktike.

 5. ¿Bintik-utʼil skoltayejat te tsoblejetik ta scholel skʼop Dios sok ta spasel ta akuxlejal te bintik anopoj ta Bibliae?

⁵ Te tsoblejetik ya snojptesotik ta spasel ta jkuxlejaltik te bin ya jnoptik ta Bibliae (1 Tesalonicenses 4:9, 10). Jich bitʼil, ayniwan la jnoptik junuk articulo yuʼun Te J-ilkʼinal ta toyol te la stijbotik koʼtantik ta spaselxan yaʼtel te Jehovae, ta slekubteselxan te bin-utʼil ya jkʼopontik Dios o ta spasbeyel perdon jtul hermano te ay bin ma lek la spasbotike. Te yantikxan tsoblej ta semana ya snojptesotik te bin-utʼil ya jcholtik skʼop Dios sok ta snojptesel te yantik ants winiketik ta snaʼbeyel sba te smelelil kʼop yuʼun te Bibliae (Mateo 28:19, 20).

 6. ¿Bin-utʼil ya yakʼ yip sok smukʼul koʼtantik te tsoblejetike?

⁶ Jaʼ yuʼun te ya yakʼ yip koʼtantike. Te balumilal yuʼun te Satanás ya skʼan ya spejkʼantes te schʼuunel koʼtantike sok ya schebajtes koʼtantik. Jaʼukmeto te tsoblejetike ya yakʼ smukʼul koʼtantik sok yip koʼtantik ta spasbeyelxan yaʼtel te Jehovae (kʼopona te sjun Hechos 15:30-32). Bayal buelta, ta tsoblejetik ya kalbeytik skʼoplal te bin-utʼil kʼoem ta pasel te bintik albil jilel skʼoplal ta Bibliae. Jaʼ-abi ya skoltayotik yuʼun ya schʼuun ta lek koʼtantik te yuʼun-nix ya xkʼot ta pasel-a te bin yaloj te Jehovae. Jaʼnix jich ya yakʼ yip koʼtantik kʼalal ya skʼases sdiscursoik te hermanoetik, te kʼalal ay bin ya yakʼik ta ilel, te kʼalal ya yakʼ skomentarioik sok te ya skʼayojtayik te Jehová sok spisil yoʼtanike (1 Corintios 14:26). Te bin yanxan ya yakʼ yip koʼtantike jaʼ te ya xkʼopojotik sok te kermanotaktik kʼalal ya xkʼootik sok kʼalal ya xlaj koʼtantik ta tsoblej, ya kiltik te ay bayal kamigotaktik te ay jkʼoplaltik ta yoʼtanike (1 Corintios 16:17, 18).

 7. ¿Bin yuʼun kʼax tulan skʼoplal te tsoblejetike?

⁷ Jaʼ yuʼun te ya skoltayotik te Dios ta swenta te schʼul espiritue. Te Jesús ya stuuntes te chʼul espiritu yuʼun Dios swenta ya swol te kongregasionetike. La yal te ya skʼan ya jchʼam kaʼiytik «te bin ya xhalbot yuʼun te Espíritu» te kongregasionetike (Apocalipsis 2:7). Te schʼul espiritu te Diose ya xjuʼ ya skoltayotik kʼalal ya jtatik sujel ta mulil, te maba ya xiwotik ta scholel skʼop Dios sok te ya jtatik ta nopel ta lek te bin ya jpas ta jkuxlejaltike. Jaʼ yuʼun kʼax tulan skʼoplal te ya jpastik tulan te yakuk xkʼootik ta spisil te tsoblejetike. Jichme ya jtatik te koltayel yuʼun Dios ta swenta te schʼul espiritue.

 8. ¿Bin-utʼil ya xkoltayot yantik te kʼalal ya kil jbatik ta tsoblejetike, te kʼalal ya yaʼiyik te ya kakʼ jkomentariotik sok te jun-nax ya xkʼayojinotike? (Jaʼnix jich ilawil te recuadro «Spisil-ora lek ya yaʼiy sba-a te kʼalal ya sujt tal ta tsobleje».)

⁸ Jaʼ yuʼun te ya kakʼbeytik yil te kʼux ta koʼtantik te kermanotaktike. Bayal ta tul hermanoetik yakik ta skʼasesel tulan wokoliletik ta skuxlejalik. Te jpuk-kʼop Pablo jich la stsʼibay: «Acʼa jnoptic te bin utʼil talel cʼaxel ya juc jbahtic» (Hebreos 10:24, 25). Ta swenta te bin la yale, jaʼ la skʼan la yal te talel kʼaxeluk ya kichʼ jbatik ta wentae. Te bin-utʼil ya xjuʼ ya jpastike, jaʼ te kʼalal ya kakʼbey jba yip koʼtantik ta tsobleje. Kʼalal ya xkʼootik ta jujun tsobleje, ya kakʼtik ta ilel te ya jkʼan ya x-ayinotik sok te kermanotaktike, te ya xkʼopojotik soke sok te ya jojkʼoybeytik bin-utʼil ayike. Jaʼnix jich ya kakʼbeytik yip yoʼtanik kʼalal ya kakʼ jkomentariotik sok kʼalal ya jkʼayojtaytik te Jehová sok spisil koʼtantik (Colosenses 3:16).

9, 10. 1) Chola te bin yuʼun ya skoltayotik te bin la yal te Jesús ta Juan 10:16 swenta ya xkʼot ta koʼtantik te bin yuʼun tulan skʼoplal te ya xkʼootik ta tsoblejetike. 2) ¿Bin-utʼil ya xkoltayot te machʼatik pʼajbilik yuʼun te sfamilia te ya xkʼootik ta tsoblejetike?

⁹ Jaʼ yuʼun te ya xkoltaywanotik swenta jun-nax ya x-ayin te kongregasione (kʼopona te sjun Juan 10:16). Te Jesuse la spaj sba sok jtul jkanantuminchij sok jaʼ jtsojb tuminchijetik kʼoem te jnopojeletik yuʼune. Te jtsojb tuminchijetike spisil-ora jun-nax ayik sok jaʼ ya stʼunik te jkanantuminchij yuʼunike. Teme ay chaʼkojt tuminchijetik te ayik ta wits, te chaʼkojtxane ayik ta spamlej, te jkojtxane ay ta yan lugar, ¿yabal xjuʼ ya kaltik te jun-nax ayike? Maʼuk. Pajal kʼoem sok teme ya jkʼantik te «jtsohb nax» ya xkʼootik sok te «jtuhl nax jcanan» kuʼuntike, yame skʼan te spisil-ora ya xkʼootik ta tsoblejetik swenta jich jun ya x-ayinotik sok te kermanotaktike.

¹⁰ Te tsoblejetik ya skoltayotik swenta jun-nax ya x-ayinotik sok jich ya xkʼootik bitʼil jun familia te kʼux ya kaʼiy jbatike (Salmo 133:1). Ay chaʼoxtul hermanoetik yichʼojik pʼajel yuʼun te smeʼ statik o yuʼun te sbankil yijtsʼinabik ta skaj te ochemik ta testigo yuʼun Jehová. Jaʼukmeto te Jesús la yal te ya x-akʼbot sfamiliaik te ya yichʼik kanantayel sok kʼuxultayel yuʼune (Marcos 10:29, 30). Teme ma jchʼaytik junuk te tsoblejetike, te hermanoetik-abi jich ya yilotik te bitʼil jtul meʼil tatil o sbankil yijtsʼinotik te ya kakʼbeytik yip yoʼtanike. Teme ya jnoptik ta swenta-abi, yame jpastik tulan yuʼun ya xkʼootik ta spisil te tsoblejetike.

11. ¿Bin-utʼil ya skoltayotik te tsoblejetik yuʼun ya kakʼbeytik te bin ya skʼan akʼbeyel te Jehovae?

¹¹ Jaʼ yuʼun te jaʼ ya kakʼbeytik te bin ya skʼan akʼbeyel te Jehovae. Jich bitʼil te jaʼ la spasotike, ya skʼan ya jnaʼtik yalbeyel wokol, te yakuk kichʼtik ta mukʼ sok te ya kalbeytik yutsil skʼoplale (kʼopona te sjun Apocalipsis 7:12). Spisil ini ya jpastik tey ta tsoblejetik te kʼalal ya jkʼopontik jujun buelta te Diose, kʼalal ya xkʼayojinotik sok kʼalal ya kalbeytik skʼoplal te Jehová. Ta jujun semana ay kuʼuntik te mukʼul majtʼanil te yichʼel ta mukʼ te Jehovae.

12. ¿Bin-utʼil ya yaʼiy sba te Jehová te kʼalal ya jchʼuunbeytik te mantal ta swenta te ya xkʼootik ta tsoblejetike?

¹² Jich bitʼil te jaʼ la spasotik te Jehovae, jaʼ nix jich ay ta jwentatik schʼuunbeyel te skʼope. Ya yalbotik ta mantal te ya skʼan ya jtsob jbatik ta spisil-ora, kʼaxtoxan-a te bitʼil nopolix ya xtal te slajibal te bintik chopole. Te Jehová tseʼelnax yoʼtan ya yaʼiy sba te kʼalal ya jchʼuunbeytik te smantale (1 Juan 3:22). Jaʼ nix jich ya yil te jayebto ya jpastik tulan yuʼun ya xkʼootik ta tsoblejetik sok mukʼ skʼoplal ya yil (Hebreos 6:10).

13, 14. ¿Bin-utʼil ya skoltayotik te tsoblejetik yuʼun ya xnoptsajotik ta stojol te Jehová sok te Jesuse?

¹³ Jaʼ yuʼun te jich ya kakʼbeytik yil Jehová te ya jkʼantik nopol ya kakʼ jbatik ta stojol sok ta stojol te sNichʼane. Ta tsoblejetik ya jnoptik te Biblia sok ya jnoptik ta swenta te bin ya skʼanbotik te Jehovae (Isaías 30:20, 21). Ay chaʼoxtul ants winiketik te ma x-abatinik ta stojol te Jehová te ya xkʼotik ta tsoblejetike, ya yilik te ya kichʼtik tojobtesel yuʼun te Jehovae (1 Corintios 14:23-25). Jich bitʼil te jaʼ ya swol te tsoblejetik te Jehová sok te schʼul espiritue, te bin ya jnoptik tey-ae talem ta stojol. Jaʼ yuʼun te kʼalal ya xkʼootik ta tsoblejetike, ya jchʼam kaʼiytik te bin ya yal te Diose sok ya kaʼiybeytik te smukʼul skʼuxul yoʼtan ta jtojoltike. Jich ya xnoptsajotikxan ta stojol.

¹⁴ Te Jesús jaʼ te machʼa ya swol te kongregasionetike. Jich la yal: «Te banti ay stsoboj sbahic chaʼoxtuhl ta scuenta jbihil, tey ayon ta yohlilic a» (Mateo 18:20). Te Biblia ya yakʼ ta nopel te ay ta yolil kongregasionetik te Jesuse (Apocalipsis 1:20–2:1). Jaʼ-abi ya skʼan ya yal te jaʼ ya swol te kongregasionetike. Jaʼ yuʼun te kʼalal ya xkʼootik ta tsoblejetik ya xnoptsajotikxan ta stojol te Jesuse. Ta melel te Jehová sok te Jesús sjokinejotik sok ya yakʼbotik yip koʼtantik te kʼalal ayotik ta tsobleje. ¿Binwan yaʼiyel ya yaʼiy sba te Jehová te kʼalal ya yil te ya jpastik tulan te ya xnoptsajotik ta stojol sok ta stojol te sNichʼane?

15. ¿Bin ya kakʼbeytik yil Jehová te kʼalal ya xkʼootik ta tsoblejetike?

¹⁵ Jaʼ yuʼun te jich ya kakʼbeytik yil Jehová te ya jkʼan ya jchʼuunbeytik te skʼope. Maba ya sujotik ta schʼuunel te mantalil ta swenta te ya jtsob jbatike (Isaías 43:23). Jich yuʼun, ¿bin ya jpastik teme bayal ya stenotik ta aʼtel te yajwal kaʼteltik te jich ma xjuʼix kuʼuntik te ya xkʼootik ta tsoblejetike? ¿Bin ya jpastik teme ya yalbotik te ajwaliletik te ya jtojtik multa, ya kichʼtik chukel o ya kichʼtik utsʼinel ta skaj te ya xkʼootik ta tsoblejetike? ¿Bin ya jpastik teme ay ya jnoptik te ma xkʼootik ta tsoblej ta skaj te ay bin yan ya jpastike? Kʼalal jich ya xkʼaxe yame skʼan ya jnoptik te bin ya jpastike (Hechos 5:29). Teme la jtatik ta nopel te ya jchʼuunbeytik smantal te Jehovae sok te ya xkʼootik ta tsoblejetike, ya kakʼbeytik yil te kʼux ta koʼtantik sok te ya jnaʼtik te jaʼnix ay ta swenta yalel te bin ya skʼan ya jpastike (Romanos 6:17). Teme jich ya jpastike ya x-akʼbot stseʼelil yoʼtan yuʼun te Diose (Proverbios 27:11).

16, 17. 1) ¿Bin-utʼil ya jnaʼtik te kʼax tulan skʼoplal te tsoblejetik ta yoʼtanik te jchʼuunjeletik ta sbabial sigloe? 2) ¿Bin yaʼiyel la yaʼiy sba te hermano George Gangas ta swenta te tsoblejetike?

¹⁶ Te kʼalal kʼaxemix-a te kʼin yuʼun Pentecostés ta yaʼbilal 33, te jchʼuunjeletike «la yoʼtantayic snopel te pʼijubtesel yuʼun te jpuc-cʼopetic, soc la yoʼtantayic te la sjoquin sbahic» (Hechos 2:42). Jaʼ-abi ya skʼan ya yal te spisil-ora la stsob sbaik ta yichʼel ta mukʼ te Jehovae. Manchukme la yichʼik utsʼinel yuʼun te ajwalil romano sok te jwolwanejetik yuʼun te judioetik, maʼyuk bin-ora la skom sbaik ta tsoblejetik. Manchukme wokol la yilik, la spasik tulan ta stsobilanel sbaik.

¹⁷ Ta ora ini, te j-abatotik yuʼun Jehová ya kaltik bayal wokol yuʼun te ya xjuʼ ya jtsob jbatike. Akʼa jnop kaʼiytik te bin kʼax ta stojol te hermano George Gangas, te och ta Jtsojb Jwolwanej kʼaxem ta 22 jaʼbil. La yal te bitʼil ya stsob sba sok te hermanoetike, jaʼ ya x-akʼbot yip yoʼtan sok jaʼlaj te «bin kʼax ya smulan ta skuxlejale». Spisil-ora te kʼalal jich ya xjuʼ yuʼune, ya smulan te jaʼ nail ya xkʼot ta sNail Tsoblej sok jaʼ slajibalix ya xlokʼ bael. Ya x-akʼbot bayal stseʼelil yoʼtan kʼalal ya xkʼopoj sok te hermanoetik, jaʼ yuʼun jich la yal: «Jich ya kaʼiy jba te ayon ta jna sok te jfamilia te kʼalal ya jokin jba sok te hermanoetik, jaʼ te banti ya yakʼ lamal kʼinal te Diose». Sok la yalxan te bin kʼax ya smulane jaʼ te ya stsob sba sok te yermanotake.

18. 1) ¿Bin yaʼiyel ya awaʼiy aba ta swenta te tsoblejetike? 2) ¿Bin anopoj ya apas?

¹⁸ Jaxan te jaʼate, ¿jichbal ya awaʼiy aba te bitʼil hermano George Gangas? Teme jiche, pasa tulan ta stsobilanel aba sok te awermanotak manchukme ay wokol ta pasel. Akʼbeya yil Jehová te jichnix ya awaʼiy aba te bitʼil te ajwalil David te la yal te kʼaxto la smulan te na te banti la yichʼ ta mukʼ te Jehovae (Salmo 26:8).