LECCIÓN 30
¡Ya xjuʼ ya xchaʼkuxajik te machʼatik lajem awuʼune!
Te lajel ya yakʼ bayal mel-oʼtan sok wokol. Jaʼ yuʼun te Biblia ya yal te jaʼ jkontratike (1 Corintios 15:26). Ta lección 27 la anopix te ya xbajt slajin te jkontratik te Jehovae. Pero ¿bin ya xkʼot ta pasel ta stojol te machʼatik lajemike? Ta lección ini yame anop te nopol ya xkʼot ta pasel te bin yaloj te Jehová: jaʼ te ya schaʼkuxajtes bayal ants winiketik yuʼun ya xkuxinik ta sbajtelkʼinal. ¿Yuʼun-nixbal jich ya xkʼot ta pasel-a? ¿Yabal xchaʼkuxajik ta chʼulchan, o ta Balumilal?
1. ¿Bin ya skʼan ya spas te Jehová ta stojol te machʼatik lajem kuʼuntike?
Te Jehová yoʼtanukix ya schaʼkuxajtes te machʼatik lajemikixe. Jtul winik te Job sbiil bayal schʼuunel yoʼtan-a sok schʼuunej ta lek te kʼalal ya xlaj sok ayix ta mukenal-ae, ma xchʼayot ta oʼtanil yuʼun te Diose. Jich la yalbey te Diose: «Ta hich ora ya xcʼopojat, hoʼon ya jacʼbat» (kʼopona Job 14:13-15).
2. ¿Bin-utʼil ya jnaʼtik te ya xchaʼkuxajik tal te machʼatik lajemikixe?
Kʼalal kʼax ta Balumilal te Jesuse, akʼbot yuʼel yuʼun te Dios swenta ya schaʼkuxajtes te machʼatik lajemikixe. La schaʼkuxajtes jtul chʼin achʼix te 12 yaʼbilal-ae sok te skerem-al jtul meʼba ants (Marcos 5:41, 42; Lucas 7:12-15). Ta patil, laj te Lázaro te yamigo te Jesús. Manchukme ayix chaneb kʼajkʼal slajel-a, te Jesús la schaʼkuxajtes. Kʼalal laj skʼoponbel Dios, la yil te mukenal sok jich tulan la yal: «¡Lázaro, locʼan talel!». «Hich locʼ talel te chamen winique», ¡chaʼkuxajemix-a! (Juan 11:43, 44). Nopanax awaʼiy te kʼax tseʼel yoʼtan te sfamilia sok te yamigotak te Lazaroe.
3. ¿Yabal xchaʼkuxajik te machʼatik lajem awuʼune?
Te Biblia jamal ya yal te «ay chaʼcuxajel yuʼun te machʼatic chamenic» (Hechos 24:15). Te machʼatik la schaʼkuxajtes te Jesús maba bajtik ta chʼulchan (Juan 3:13). Kʼax tseʼel yoʼtanik yuʼun te chaʼkuxajtesotik liʼ ta Balumilale. Jich bitʼil kʼot ta pasel ta nameye, te Jesús nopol ya schaʼkuxajtes bayal ants winiketik yuʼun ya xkuxinik liʼ ta Balumilal. Te Jesús la yal te ya xchaʼkuxajik tal spisil te machʼatik ma chʼaybilik ta oʼtanil yuʼun te Dios sok te machʼatik ma la yichʼik naʼbeyel sba yuʼun te yantike (Juan 5:28, 29).
JNOPTIKXAN TA LEK
Nopa ta Biblia te bin yuʼun ya xjuʼ ya jchʼuuntik te yuʼun-nix ya xchaʼkuxajik-a te machʼatik lajemike. Sok kiltik bin-utʼil te chaʼkuxajel ya yakʼbotik smukʼul koʼtantik sok te ay bin ya jmaliytik ta pajel chaʼbeje.
4. Te Jesús la yakʼ ta ilel te ya xjuʼ schaʼkuxajtes te machʼatik lajemik
Nopaxan te bin la spas te Jesús ta stojol te yamigo Lázaro. Kʼoponaik Juan 11:14 sok 38-44, sok albeyaik skʼoplal ini:
¿Bin-utʼil ya jnaʼtik te lajemix-a te Lazaroe? (Ilawilik te versículo 39).
Te bajtuk ta chʼulchan te Lazaroe, ¿snujpʼbal ya awaʼiy te la schaʼyikʼ koel tal ta Balumilal te Jesuse?
5. ¡Bayal machʼatik ya xchaʼkuxajik!
Kʼoponaik Salmo 37:29 sok albeyaik skʼoplal ini:
¿Banti ya xkuxinik te bayal ta mil ta tul ants winiketik te ya xchaʼkuxajik talele?
Te Jesús ma jaʼuknax ya schaʼkuxajtes tal te machʼatik la yichʼik ta mukʼ te Jehová; jaʼnix jich ya schaʼkuxajtes tal bayalxan ants winiketik. Kʼoponaik Hechos 24:15 sok albeyaik skʼoplal ini:
Te kʼalal ya xkʼot yorail te chaʼkuxajele, ¿machʼa ya akʼan ya achaʼil?
Nopa awaʼiy ini: te Jesús ma wokol ya yaʼiy schaʼkuxajtesel te ants winiketik jich bitʼil jtul tatil te ma wokol ya yaʼiy te ya stij te snichʼane.
6. Te chaʼkuxajel ya yakʼ smukʼul koʼtantik
Te bin kʼax ta stojol te snichʼan te Jairo bayal yakʼojbey smukʼul yoʼtan sok yip yoʼtan te machʼatik ay machʼa lajem yuʼunike. Kʼoponaik te bin kʼax ta skuxlejal ta Lucas 8:40-42 sok 49-56.
Te kʼalal mato schaʼkuxajtesoj-a te snichʼane, te Jesús jich la yalbey te Jairo: «Ma me xiwat; ha nax chʼuhuna» (ilawilik te versículo 50). ¿Bin-utʼil ya yakʼbat smukʼul awoʼtan te chaʼkuxajel...
... te kʼalal ay machʼa ya xlaj awuʼune?
... te kʼalal ayat ta tulan wokol te ya xjuʼ ya xlajat yuʼune?
Ilawilik te VIDEO sok albeyaik skʼoplal ini:
¿Bin-utʼil akʼbilik smukʼul yoʼtanik sok yip yoʼtanik te chaʼkuxajel te smeʼ stat te Phelicity?
AY MACHʼATIK JICH YA YALIK: «Ma jchʼuun yaʼiyel te ya xjilik ta Balumilal te machʼatik ya xchaʼkuxajike».
¿Bin xchiat te jaʼate?
¿Bin texto ya xjuʼ ya atuuntes swenta ya awakʼ ta ilel te liʼ ya xchaʼkuxajik te ants winiketike?
¿BINTIK LA JNOPTIK?
Te Biblia jamal ya yal te ya xchaʼkuxajik tal bayal millón ta tul ants winiketik. Te Jehová yoʼtanuk te ya xchaʼkuxajik tal, jaʼ yuʼun jaʼ yakʼojbey yuʼel te Jesús yuʼun ya skʼotes ta pasel.
¿Jilbal ta awoʼtan into?
¿Bin-utʼil ya jnaʼtik te yuʼun-nix ya skʼan ya schaʼkuxajtesik tal-a te machʼatik lajemik te Jehová sok te Jesús?
¿Banti ya xkuxinik te bayal ta millón ta tul te ya xchaʼkuxajik: ta chʼulchan, o ta Balumilal? ¿Bin yuʼun jich ya awal?
¿Bin yuʼun ya schʼuun awoʼtan te yuʼun-nix ya xchaʼkuxajik-a te machʼatik lajem awuʼune?
YA XJUʼ YA ANOPXAN INI
Kʼopona bin ya xjuʼ ya jpastik swenta ya xkujch kuʼuntik te skʼuxul te kʼalal ay machʼa ya xlaj kuʼuntike.
«Koltayel ta stojol te machʼatik ay machʼa lajem yuʼunik» (¡Wikʼame asit!, núm. 3 2018)
¿Yabal xjuʼ ya xkoltayotik yuʼun te bin ya yal te Biblia te machʼatik ay machʼa lajem yuʼunike?
Ilawil bin-utʼil ya xjuʼ ya awakʼbey smukʼul yoʼtan jtul alnichʼan te ay machʼa lajem yuʼune.
¿Aybal machʼa ya xbajt ta chʼulchan? ¿Aybal machʼa ma xchaʼkuxaj?