1. ¿Bintik yakʼojik ta nopel te ya sbolobtesbey skʼoplal te Diose?

Te lotil religionetik «la sjelic ta lotil te bin smelelil yuʼun Dios» (Romanos 1:25). Jich bitʼil, ay bayal religionetik te ma xyakʼik ta nopel te sbiil te Diose. Yan stukel te Biblia ya yal te ya skʼan ya jtuuntestike (Romanos 10:13, 14). Ay jwolwanej yuʼun religionetik te ya yalik te kʼalal ay machʼa ya sta swokole jaʼlaj yuʼun te jich la skʼan te Diose. Pero ma jichuk-abi. Te wokolil ya jtatike ma jaʼuk smul te Diose (kʼopona Lamentaciones 3:33). Ta skaj te bin ya yalike bayal machʼatik maba kʼux ta yoʼtanik te Diose.

Te Jehová nopolme ya slajin spisil te wokolil ta swenta te Wentainel yuʼune. Jaʼ yuʼun ya jkʼan ya kalbeytik yantik te bin ya spas te Diose. Te Jesús la yalbey te jnopojeletik te akʼa spukik ta alel ta swolol Balumilal (Mateo 28:19, 20). ¿Bin-utʼil ya yakʼik ta ilel te testigoetik yuʼun Jehová te yakik ta schʼuunel te mantalil la yakʼ te Jesuse?

1. ¿Bin-utʼil yak ta kʼoel ta pasel te bin ya yal Mateo 24:14?

Te Jesús jich la yal: «Ya me xpuhc ta halel ta swohlol bahlumilal scʼoblal te lec yachʼil cʼop yuʼun te cuentahinel yuʼun Dios» (Mateo 24:14). Te testigootik yuʼun Jehová ya jmulantik spasel te aʼtelil ini. Ya jcholtik te skʼop Dios kʼaxem ta jmil ta chajp kʼopiletik ta swolol Balumilal. Swenta ya jpastik te mukʼul aʼtelil ini, ya skʼan pasel tulan sok ya skʼan chajpanel ta lek. Jaʼnaxme ya xjuʼ kuʼuntik spasel teme ya skoltayotik te Jehovae.

2. ¿Bin-utʼil ya jcholbeytik skʼop Dios te ants winiketike?

Ya jcholtik te skʼop Diose chikan te banti ay te ants winiketike. Jich bitʼil la spasik te sbabial jchʼuunjeletik, ya jcholtik skʼop Dios «ta nahnatic» (Hechos 5:42). Jaʼme jich ya jcholbeytik skʼop Dios bayal ants winiketik ta jujun jaʼbil. Te bitʼil ay ma jtatik ta snaike, ya jcholtik te skʼop Dios te banti ay bayal ants winiketik. Spisil-ora ya jletik te bin-utʼil ya jcholtik te skʼop Diose.

3. ¿Machʼatik ay ta swenta scholel te skʼop Diose?

Jaʼik te smelelil jchʼuunjeletike. Jaʼ yuʼun mero mukʼ skʼoplal ta koʼtantik scholel te lek yachʼil kʼope. Ya jpastik te ban kʼalal ya xjuʼ kuʼuntik, melel ya jnaʼtik te jich ya xjuʼ ya sta skolelik te ants winiketike (kʼopona 1 Timoteo 4:16). Maʼyuk machʼa ya stojotik yuʼun te ya jcholtik te skʼop Diose, melel te Biblia jich ya yal: «Ta mahtanil la awichʼic, hich ni me ta mahtanil yac awaqʼuic» (Mateo 10:7, 8). Manchukme ay ma skʼan ya yaʼiyik te skʼop Diose ma jkom jbatik ta spasel, melel jich ya kichʼtik ta mukʼ te Jehová sok ya kakʼbeytik stseʼelil yoʼtan.

JNOPTIKXAN TA LEK

4. Ya jletik te ants winiketik bayuk banti ayik

VIDEO: Ya jcholtik skʼop Dios «cʼalal ta stiʼil bahlumilal» (7:33)

• ¿Bin-a te la amulanxan te ya spasik te testigoetik yuʼun Jehová ta scholel skʼop Dios?

Kʼoponaik Mateo 22:39 sok Romanos 10:13-15, sok albeyaik skʼoplal ini:

• ¿Bin-utʼil ya kakʼtik ta ilel te kʼux ta koʼtantik te ants winiketik te kʼalal ya jcholtik skʼop Diose?

• ¿Bin yilel ya yil Jehová te machʼatik ya scholik te lek yachʼil kʼope? (Ilawilik te versículo 15).

5. Ya x-aʼtejotik sok Dios

Te bintik kʼoem ta pasel ya yakʼ ta ilel te jaʼ ya stojobtes te scholel skʼop Dios te Jehová. Kiltik te bin kʼot ta pasel ta Nueva Zelanda. Ta jun mal kʼajkʼal, jtul Testigo te Paul sbiil bajt schol skʼop Dios ta nanatik. La sta jtul ants te cholbot yaʼiy te ta sab-abi la spas jun oración te banti la stuuntesbey sbiil te Jehová sok la skʼanbey te ayuk machʼa ya xkoltayot ta snaʼbeyel sba te Diose. Te Paul jich la yal: «Oxeb ora ta patil, kʼot jtijbey te stiʼ snae».

Kʼoponaik 1 Corintios 3:9 sok albeyaik skʼoplal ini:

• ¿Bin-utʼil ya yakʼ ta ilel te bin kʼot ta pasel te jaʼ yak ta stojobtesel te scholel skʼop Dios te Jehovae?

Kʼoponaik Hechos 1:8 sok albeyaik skʼoplal ini:

• ¿Bin yuʼun ya jkʼantik te yakuk skoltayotik te Jehová ta scholel te skʼope?

¿Anaʼojbal-a?

Ta tsoblejetik yuʼun olil semana ya kichʼtik nojptesel ta scholel skʼop Dios. ¿Aybal kʼoematix ta tsoblejetik? ¿Bin yilel awiloj te nojptesel ya kichʼtike?

6. Ya jcholtik te skʼop Dios jich bitʼil ya yal ta mantal te Diose

Te jnopojeletik yuʼun te Jesuse la yichʼik kontrainel yuʼun te la scholik skʼop Diose, pero ma la yakʼ sbaik ta komel yuʼun. La yakʼik ta naʼel te smelelil te lek yachʼil kʼope (Filipenses 1:7). Ta ora ini, jaʼnix jich ya spasik te testigoetik yuʼun Jehová.a

VIDEO: Ya jkoltaybeytik skʼoplal te lek yachʼil kʼop ta stojol juez (2:28)

Kʼoponaik Hechos 5:27-42 sok albeyaik skʼoplal ini:

• ¿Bin yuʼun ma jkom jbatik ta scholel skʼop Dios? (Ilawilik te versículo 29, 38 sok 39).

¿BINTIK LA JNOPTIK?

Te Jesús la yalbey te jnopojeletik yuʼun te yakuk scholik te skʼop Dios ta swolol Balumilal. Te Jehová yak ta skoltayel te j-abatetik yuʼun ta spasel te aʼtelil-abi.

¿Jilbal ta awoʼtan into?

• ¿Bin-utʼil yak ta cholel te skʼop Dios ta swolol Balumilal?

• ¿Bin-utʼil ya kakʼtik ta ilel te kʼux ta koʼtantik te ants winiketik kʼalal ya jcholtik skʼop Dios?

• ¿Yabal yakʼ stseʼelil koʼtantik te scholel skʼop Diose? ¿Bin yuʼun?

YA XJUʼ YA ANOPXAN INI

Ilawil bin-utʼil ya scholik skʼop Dios ta mukʼul lumetik te testigoetik yuʼun Jehová.

Scholel skʼop Dios ta París te banti ya xkʼax bayal ants winiketik (5:11)

¿Bin-utʼil ya yichʼ cholbeyel skʼop Dios te machʼatik anemik lokʼel ta slumalik?

Ya kakʼbeytik smukʼul yoʼtan te machʼatik anemik lokʼel ta slumalik (5:59)

Ilawil bin yuʼun tseʼel yoʼtan te machʼa ya schol skʼop Diose.

Jun aʼtelil te yakʼojbon bayal stseʼelil koʼtan (6:29)

Ilawil bitʼil ay yichʼoj koltaybeyel skʼoplal ta stojol juecetik te scholel skʼop Diose.

«Te machʼatik ya scholik skʼop Dios ya yichʼik chajpanel ta stojol juez» (Te Wentainel yuʼun Dios yakix ta wentainwanej, capítulo 13)