Mame jkom jbatik ta spasel tulan ta yichʼel te bendision yuʼun Jehová

1, 2. ¿Bintik yakotik ta spasel tulan te j-abatotik yuʼun Jehová?

JAʼTO ta skʼajkʼalel Abel kʼalalto ta ora ini jpisiltik te j-abatotik yuʼun Dios jpasojtik tulan swenta jun koʼtantik ya kakʼ jbatik ta stojol. Te jchʼuunjeletik te stsʼumbalik hebreo la yichʼik albeyel yuʼun te jpuk-kʼop Pablo te bayal wokolil tsʼijkem yuʼunik sok te la spasik tulan yuʼun lek ya x-ilotik yuʼun te Jehová sok ya staik te bendision yuʼune (Hebreos 10:32-34). Jich bitʼil te jchʼuunjeletik ya spasik tulan ta stael te bin ya skʼanike, te Pablo la spaj sok te bitʼil ya spasik tulan-euk ta stael te bin ya skʼanik te machʼa ya x-animajik, te boxeador sok te machʼatik ya stsak sbaik ta namey Grecia (Hebreos 12:1, 4). Ta ora ini, yakotik ta animal te ya yikʼotik bael ta stael te kuxlejalil ta sbajtʼelkʼinal. Jaʼukmeto ay jkontrataktik te ya skʼan ya schʼaytes koʼtantik, te ya skʼanik te ya xchʼay te sbujtsʼ koʼtantik sok te ya xchʼay kuʼuntik te bintik jamal yaloj te Jehová te ya yakʼbotike.

² Te bin tulanxan yakotik ta spasel jaʼ te ya jtsal jbatik sok te Satanás sok te chopol balumilal yuʼune (Efesios 6:12). Kʼax tulan skʼoplal te maba ya kakʼ yutsʼinotik te nojptesel ya yakʼ te balumilal, te snopjibal winiketik sok spasel te bintik chopol jich bitʼil te yalel ta mulile, snukʼel may, te jelawel ta yuchʼel trago o stuuntesel droga. Jaʼnix jich ya skʼan maba ya jkom jbatik ta spasel tulan te manchuk ya xchebaj koʼtantik sok manchuk ya stsalotik te banti ay ya xchʼayotike (2 Corintios 10:3-6; Colosenses 3:5-9).

 3. ¿Bin-utʼil ya schajpanotik te Jehová swenta ya jpastik tulan ta stsalel te jkontrataktike?

³ ¿Yabal xjuʼ kuʼuntik ta smelelil stsalel te mukʼul jkontrataktike? Ya xjuʼ, jaʼnax te maba kʼun ta pasele. Te Pablo la spaj sba sok jtul boxeador kʼalal jich la yal: «Ma ba hich ya caʼiy majtamba te bin utʼil machʼa ya smaj te iqʼue» (1 Corintios 9:26). Ya skʼan ya jpastik tulan ta stsalel te jkontrataktik jich bitʼil te machʼa ya spas boxeo, te Jehová ya skoltayotik sok ya schajpanotik ta swenta-abi. ¿Bin-utʼil ya spas? Ta swenta te Biblia, te junetik kuʼuntike, te tsoblejetik soknix te mukʼul tsoblejetike. ¿Yakotikbal ta stuuntesel spisil te bin ya stuuntes Jehová yuʼun ya snojptesotike? Teme ma jichuke, maba yakotik ta spasel spisil te bin ya skʼan pasel swenta ya jpastik tulan ta stsalel te jkontrataktike, jich pajalotik sok te machʼa ya spas boxeo te jaʼ yak ta smajel te ikʼe.

 4. ¿Bin ya xjuʼ ya jpastik swenta maba ya stsalotik te bin chopole?

⁴ Ya skʼan te spisiluk-ora wikʼiluk jsitik. ¿Bin yuʼun? Melel te jkontrataktik ya xjuʼ ya yutsʼinotik kʼalal chʼayem koʼtantik o kʼalal maʼyuk yip koʼtantik-ae. Te Biblia ya sjultes ta koʼtantik sok ya yakʼ yip koʼtantik sok te kʼopetik ini: «Ma me xawacʼ stsalat te bin chopol, haʼat me xatsal ta bin lec te bin ma lecuque» (Romanos 12:21). Te bin ya skʼan ya yal jaʼ teme ya jpastikxan tulan ta stsalel te bin chopol ya xjuʼ ya kaʼiytik tsalaw. Jaʼukmeto teme maba wikʼil jsitik ya kakʼ jbatik sok ya jkom jbatik ta tsalawe, ya xjuʼ ya stsalotik te Satanás, te chopol balumilal yuʼun sok te banti ay ya xchʼayotike. Jaʼ yuʼun mame ayuk bin-ora ya xlujbotik ta spasel tulan. Mame kakʼ xchebaj koʼtantik ni jaʼuk te ya kakʼ yaluk te jkʼabtike (1 Pedro 5:9).

 5. 1) Teme ya jkʼantik te lek ya yilotik te Jehová, ¿bin ya skʼan ya xjul ta koʼtantik? 2) ¿Machʼatik ya kalbeytik skʼoplal ta ora ini?

⁵ Teme ya jkʼan ya kaʼiytik tsalawe, ya skʼan ya xjul ta koʼtantik te yakotik ta spasel tulan yuʼun ya jkʼantik te lek ya yilotik te Diose. Ta Hebreos 11:6 ya yal: «Te machʼa ya xnohpoj ta stojol Dios ya scʼan ya schʼuhun te ay Dios soc te ya yaʼbe smahtan te machʼatic ya xlehot yuʼune». Jich bitʼil ya kiltike, teme ya jkʼantik te ya yakʼbotik bendision te Jehovae, ya skʼan ya jpastik tulan ta bayal (Hechos 15:17). Te Biblia ya yalbey skʼoplal bayal ants winiketik te sok spisil yoʼtanik la spasik tulan. Chaʼoxtul te ya yalbey skʼoplal jaʼik te Jacob, Raquel, José sok te Pablo. Spisilik-abi ay maba lek la yaʼiy sbaik sok ay la sta swokolik ta skuxlejalik. Jaʼukmeto jich bitʼil la spasik tulan, akʼbotik bendision yuʼun te Diose. Te bin la spasik ya yakʼ kiltik te bitʼil te Jehová jichnix ya yakʼbotik bendision teme ya jpastik tulane. Kiltik bin-utʼil ya xjuʼ ya jtʼuntik te lekil ejemploetik-abi.

 6. 1) ¿Bin yuʼun ma lujb te Jacob ta spasel tulan ta stael te bin ya skʼane? 2) ¿Bin majtʼanil akʼbot? (Ilawil te lokʼomba ta sjajchibal te articulo).

⁶ Te Jacob jaʼ jtul winik te jun yoʼtan la yakʼ sba ta stojol Dios te maʼyuk bin-ora lujb ta spasel tulan ta stael te bin ya skʼane. ¿Bin yuʼun? Melel kʼux ta yoʼtan te Jehová sok tulan skʼoplal la yil te bitʼil yamigoinej sba soke. Ay smukʼul yoʼtan ta stojol Jehová te ya skʼotes ta pasel te bitʼil jamal yaloj te ya yakʼbey bendision te stsʼumbale (Génesis 28:3, 4). Kʼalal jteb ma sta 100 yaʼbilal-a te Jacob, la stsak sba sok jtul chʼul-abat swenta ya yichʼ te bendision yuʼun te Jehová (kʼopona te sjun Génesis 32:24-28). ¿Bin yuʼun juʼ yuʼun te la stsak sba soke? Ma jaʼuk ta skaj te bayal yipe. Jaʼ ta swenta te yuʼun-nanix ay ta yoʼtan-a te ya skʼan ya spas tulan ta stael te bendision yuʼun te Jehová. Juʼ yuʼun stael, melel te Jehová la yakʼbey bendision ta skaj te maba la skom sba ta sleele. Jaʼ yuʼun la yakʼbey sbiilin Israel, te ya skʼan ya yal: «Ya stsac sba soc Dios». Te bitʼil te Jehová la smajtʼantes te Jacob jaʼ te lek la yil sok la yakʼbey te sbendision. Jaʼnix jich ya jkʼantik te ya smajtʼantesotike.

 7. 1) ¿Bin wokolil te mel-oʼtantik sba kʼax ta stojol te Raquel? 2) ¿Bin la spas te Raquel sok bin bendision la sta?

⁷ Te Raquel jaʼ te yinam te Jacob te kʼux aʼiybil ta yoʼtane. Jaʼnix jich te Raquel la skʼan la yil bin-utʼil ya skʼotes ta pasel Jehová te bin jamal yalojbey te smamlale. Jaʼukmeto ay bin ya xmakawan. Te Raquel ma xjuʼ x-alaj-a, jaʼ-abi tulan wokolil ya yilik-a te antsetik ta namey. ¿Bin la spas te Raquel ta swenta te wokolil te mel-oʼtantik sbae? Maʼyuk bin-ora chebaj yoʼtan, bayal buelta la skʼopon Jehová swenta ya xjuʼ ya spasxan tulan ta stael te bin ya skʼane. Te Jehová la yaʼiybey te skʼop te lokʼem ta yoʼtane, ta patil la smajtʼantes te kʼalal la yakʼbey yalatak. Jaʼ yuʼun ta jun buelta la yal te la spas tulan sok spisil yip. Sok la yalxan: «Huʼix cuʼun» (Génesis 30:8, 20-24).

 8. 1) ¿Bintik wokolil kʼax ta stojol te José? 2) ¿Bin ya snojptesotik te lekil ejemplo yuʼune?

⁸ Te bitʼil la yakʼik ta ilel te schʼuunel yoʼtanik te Jacob sok te Raquel koltayot te yal snichʼan te José sbiil swenta ya sitintay te wokoliletik ta skuxlejale. Kʼalal juklajuneb yaʼbilal-a te José, jelon ta jkʼaxel te skuxlejale. Te sbankiltake ay sbikʼtal yoʼtanik ta stojol, jaʼ yuʼun la schonik bael ta mosoil. Kʼalal kʼax bael te tiempo, te José bayal jaʼbil la yichʼ chukel ta Egipto manchukme maʼyuk smul (Génesis 37:23-28; 39:7-9, 20, 21). Jaʼukmeto maba chebaj yoʼtan, maba chʼay stseʼelil yoʼtan sok maʼyuk bin-ora la skʼan la sujt spakol. ¿Bin yuʼun? Melel jaʼ bajtʼ ta yoʼtan te bitʼil yamigoinej sba sok te Jehovae (Levítico 19:18; Romanos 12:17-21). Te lekil ejemplo yuʼun te José ya yakʼ jnoptik te ya skʼan ya jpastikxan tulan ta tsalaw manchukme la kil jwokoltik kʼalal tutotikto-ae o kʼalal ma xjuʼ ta chajpanel ya kaʼiytik te jwokoltike. Ya skʼan ya jnaʼtik ta lek te bitʼil te Jehová ya yakʼbotik bendision teme maba ya jkom jbatik ta spasel tulane (kʼopona te sjun Génesis 39:21-23).

 9. ¿Bin-utʼil ya xjuʼ ya jtʼuntik te ejemplo yuʼun te Jacob, Raquel sok te José?

⁹ Jichniwan te joʼotik ya skʼan ya stsʼijk kuʼuntik tulan wokoliletik. Yakotikniwan ta pasbeyel te bin ma stojiluke, pʼajel, labanel o ay machʼa yak yutsʼinbelotik ta skaj te ay sbikʼtal yoʼtan ta jtojoltik. Jaʼukmeto ma skʼan ya xchebaj koʼtantik. Juluk ta koʼtantik te ay bin koltayot yuʼun te Jacob, Raquel sok te José swenta ya x-abatinikxan ta stojol Jehová sok sbujtsʼ yoʼtanik. Kʼax mukʼ skʼoplal la yilik te bitʼil yamigoinej sbaik sok te Jehovae, jaʼ yuʼun akʼbotik yip yoʼtanik sok akʼbotik bendision. Te j-abatetik-abi la spasik tulan ta stael te bin ya skʼanik sok ta spasel ta skuxlejalik te bin la skʼanik ta skʼoponel te Diose. Jich bitʼil ayotikix ta slajibal kʼajkʼale, tulan skʼoplal te ayuk yip schʼuunel koʼtantik ta swenta te bin yakotik ta smaliyel ta pajel chaʼbeje. ¿Yabal jkʼantik spasel tulan ta yichʼel te bendision yuʼun te Jehovae?

10, 11. 1) ¿Bin yuʼun ya skʼan ya jpastik tulan swenta ya kichʼtik te bendision yuʼun te Dios? 2) ¿Bin ya skoltayotik ta stael ta nopel te bin lek ya jpas ta jkuxlejaltike?

¹⁰ ¿Bin yuʼun ya skʼan ya jpastik tulan swenta ya kichʼtik te bendision yuʼun te Diose? Bayal ta chajp bin yuʼun. Jich bitʼil ta skaj te maba tojotike, ay j-abatetik yuʼun Dios te kʼax wokol ya yaʼiyik stsalel te bin chopol ya skʼan te yoʼtanike. Yantik ya spasik tulan ta smulanel te scholel skʼop Diose, ay yantik maba ya yakʼ sbaik ta tsalel yuʼun te chamel o te bitʼil stukel ya yaʼiy sbaike. Jaʼnix jich ay yantik wokol ya yaʼiyik spasbeyel perdon te machʼa ay bin chopol pasbot yuʼune. Manchukme bayalix jaʼbil yakotik ta abatinel ta stojol te Jehová, jpisiltik ya skʼan ya jpastik tulan ta swenta te bintik ya smakotik ta abatinel ta stojole. Juluk ta koʼtantik te ya smajtʼantes Jehová te machʼa jun yoʼtan ya yakʼ sba ta stojole.

¹¹ Ta melel ayniwan tulan ya kaʼiytik te ya x-abatinotik ta stojol Dios sok te lekuk ya jtatik ta nopel te bin ya jpas ta jkuxlejaltik, kʼaxemtoxan-a kʼalal yakotik ta spasel tulan ta stsalel te bin chopol ya skʼan te koʼtantike (Jeremías 17:9). Teme jich yak ta kʼoel ta pasel ta jtojoltike, jkʼanbeytik Jehová te schʼul espiritu. Te skʼoponel Dios sok te chʼul espiritu ya xjuʼ ya yakʼbotik kiptik ta spasel te bin leke. Jich ya kichʼtik te bendision yuʼun te Diose. Kakʼtik ta koʼtantik spasel ta jkuxlejaltik te bin ya jkʼanbeytik te Dios kʼalal ya jkʼopontike. Jpastik tulan ta skʼoponel te Biblia ta jujun kʼajkʼal sok jlokʼestik tiempo ta snopel te Biblia ta jtukeltik sok ta yichʼel ta mukʼ Dios ta sjunal na (kʼopona te sjun Salmo 119:32).

12, 13. ¿Bin koltayotik yuʼun chaʼtul hermanoetik swenta ya skom sbaik ta spasel te bin chopol ya skʼan yoʼtanike?

¹² Ta swenta te koltayel ya yakʼ te Biblia, te chʼul espiritu sok te junetik kuʼuntike, bayal ta tul kermanotaktik stsalojik te bin chopol ya skʼan yoʼtanike. Jtul jchʼiel kerem la skʼopon te articulo: «¿Cómo puede usted resistirse a los malos deseos?» te ay ta revista ¡Despertad! 8 yuʼun diciembre 2003. Te jchʼiel jich la yal: «Yakon ta spasel tulan ta slokʼesel te chopol pensare. Kʼalal la jkʼopon ta articulo te bayal machʼatik kʼax tulan ya yaʼiyik stsalel te bintik chopol ya skʼan yoʼtanik, maba jtukel la kaʼiy jba, jich la kaʼiy te bayal kermanotak ta swolol Balumilal». Jaʼnix jich te jchʼiel-abi tuun yuʼun te articulo «¿Aprueba Dios los estilos de vida alternativos?», te chiknaj ta ¡Despertad! 8 yuʼun octubre 2003. Ta articulo-abi la yil te ay j-abatetik yuʼun Dios te yakik ta spasel tulan ta jujun kʼajkʼal te jich kʼoem bin-utʼil «mucʼul chʼix» ta sbakʼetalik (2 Corintios 12:7, XCD). Jaʼukmeto jichnix la yil te yakik ta spasel tulan swenta maʼyuk yabakul te skuxlejalik sok jaʼ ya xbajtʼ ta yoʼtanik yilel te bintik lek ya xtal ta pajel chaʼbeje. Te jchʼiel jich la yalxan: «Ta swenta-abi, ya jnaʼ te jujun kʼajkʼal ya xkʼaxe ya xjuʼ te jun koʼtan ya kakʼ jba ta stojol Dios. Bayal wokol ya kalbey te Jehová te ya stuuntes te organisasion yuʼune swenta maba ya kakʼ jba ta tsalel ta jujun kʼajkʼal liʼ ta chopol balumilale».

¹³ Jaʼnix jich ya kalbeytik skʼoplal jtul hermana te ay ta nainel ta Estados Unidos. Jich la stsʼibay: «Ya jkʼan ya kalbeyex wokol yuʼun te spisil-ora ya kichʼtik akʼbeyel te weʼelil ta swenta skʼop Dios te kʼalal ya xtuunxan kuʼuntik. Bayal buelta kaʼiyoj te la yichʼik tsʼibayel te articuloetik-abi jaʼnax ta jtojol. Ayix tal bayal jaʼbil te yakon ta spasel tulan yuʼun maba ya jpas te bin kʼax chopol ya jkʼan te ya yilay te Jehová. Ay baeltik te jich kaʼiyoj te ma xjuʼix kuʼun sok te ma jkʼan ya jpasix tulan. Ya jnaʼ te ya snaʼbotik yoʼbolil jbatik te Jehovae sok te ya spasbotik perdon, jaʼukmeto maba snujpʼuk ya kaʼiy te ya skoltayone, melel ya jkʼan ya jpas te bin chopol sok ta skʼubulil te koʼtan maba ya kilay. Te tsalaw ini te ma xkomaje yutsʼinojix bayal te jkuxlejale». Jich yuʼun la skʼopon te articulo ¿Está su corazón dispuesto a conocer a Jehová?, te ay ta La Atalaya 15 yuʼun marzo 2013. ¿Bin-utʼil la yaʼiy sba ta patil? Jich la yal: «Kʼot ta koʼtan te yuʼun-nix ta smelelil ya skʼan ya skoltayon te Jehová».

14. 1) ¿Bin snaʼoj ta lek te Pablo ta kaj te jich kʼax ta skuxlejale? 2) ¿Bin-utʼil ya xjuʼ jtsaltik te banti ya xchʼayotike?

¹⁴ (Kʼopona te sjun Romanos 7:21-25). Ta swenta te bin kʼax ta skuxlejal te Pablo snaʼoj ta lek te tulan ta tsalel te bin chopol ya skʼan koʼtantik sok te banti ay ya xchʼayotike. Jaʼukmeto schʼuunej lek yoʼtan te ya xjuʼ yuʼun tsalaw teme ya skʼopon te Jehová, ya yakʼ smukʼul yoʼtan ta stojol sok teme ya yakʼ schʼuunel yoʼtan ta swenta te la yakʼ sba ta lajel te Jesuse. ¿Jaxan te joʼotike? ¿Yabal xjuʼ ya jtsaltik te banti ya xchʼayotike? Yak, jaʼ teme ya jtʼunbeytik stalel te Pablo, ya kakʼ schʼuunel koʼtantik ta swenta te la yakʼ sba ta lajel te Jesús sok ya kakʼ smukʼul koʼtantik ta stojol Jehová ma jaʼuk ta joʼotiknix.

15. ¿Bin-utʼil ya skoltayotik te Jehová swenta jun koʼtantik ya kakʼ jbatik ta stojol sok ya stsʼijk kuʼuntik te wokoliletike?

¹⁵ Ay baeltik, yaniwan yakʼ Jehová te ya kakʼbeytik yil te jayebto ya jmel koʼtantik ta swenta te ay bin yak ta kʼaxel ta jtojoltike. Jich bitʼil, ¿bin ya jpastik teme ay jtul ta jfamiliatik ay ta wokol ta swenta chamel o ay bin pasbot te ma stojiluke? ¿Jaxan teme joʼotik ya stsakotik chamel o ya kichʼtik pasbeyel te bin ma stojiluke? Teme jaʼ ya kakʼ smukʼul koʼtantik ta stojol Jehová, yame jkʼanbeytik te ya yakʼbotik kiptik swenta jun koʼtan ya kakʼ jbatik ta stojol, te ayuk sbujtsʼ koʼtantik sok te ya kamigointikxan (Filipenses 4:13). Te ejemploetik ta swenta bayal j-abatetik yuʼun Dios ta namey sok ta kʼajkʼal ini ya yakʼik ta ilel te kʼalal ya jkʼopontik te Jehová, ya yakʼbotik kiptik sok stulanil koʼtantik swenta ya stsʼijkxan kuʼuntik.

16, 17. ¿Bin ya skʼan ya kakʼ ta koʼtantik spasel?

¹⁶ Te Satanás ya smulan ta jkʼaxel te ya jmel koʼtantik, te ya xlujbotik sok te ya yakʼ yaluk te jkʼabtike. Jaʼ yuʼun, akʼa kakʼ ta koʼtantik spaselxan bael te «bin leque» (1 Tesalonicenses 5:21). Ya xjuʼ kuʼuntik stsalel te Satanás, te chopol balumilal yuʼun sok te bintik chopol ya skʼan koʼtantike. Ya xjuʼ kuʼuntik tsalaw teme ta melel ya kakʼ smukʼul koʼtantik ta stojol te Jehová te ya yakʼ yip koʼtantik sok te ya skoltayotike (2 Corintios 4:7-9; Gálatas 6:9).

¹⁷ Jaʼ yuʼun akʼa jpastikxan tulan sok mame ayuk bin-ora ya kakʼ xlujbotik. Ya xjuʼ schʼuun lek koʼtantik te bitʼil te Jehová ya yakʼbotik «bayel bendicionetic» te maʼyuk bin-ora ya xlaje (Malaquías 3:10).