Te bin ya yichʼ ta wenta te Jehová kʼalal ya spasbey perdón jtul ants winik jaʼ teme snaʼoj-a te ma lek te bin la spase. Te Jesús jich jamal la yal ta Lucas 12:​47, 48. Kʼalal jtul ants winik spasemal yoʼtan ya spas te bin ma lek ya yil te Diose, ya spas tulan mulil. Ya xjuʼ te maba ya xpasbot perdón yuʼun te Jehová (Mar. 3:29; Juan 9:41). Pero ¿yabal xjuʼ ya xpasbotik perdón ta patil? Yak. Te Jehová jaʼnix jich ya yichʼ ta wenta teme la sujtesix yoʼtan ta smelelil te machʼa ay bin ma lek la spase. Jaʼ te ya sjeltay te stalel o te bin snopoj ya spase. Jaʼnix jich ma lek ya yaʼiy sba sok jkʼaxel ya smel yoʼtan yuʼun te bin ma lek la spas o yuʼun ma la spas te bin lek ya skʼan pasele. Ma jaʼuknax te ma lek ya yaʼiy sba yuʼun-abi, jaʼnix jich te pejkʼajem-a te schʼuunel yoʼtane. w22.06 5, 6 párr. 15-17

Te jkontrataktik spukojik ta alel lotil o ya yakʼik ta naʼel te bin ma stojiluk ta stojol te hermanoetik te yichʼoj yaʼtelik ta organización yuʼun te Jehová (Sal. 31:13). Ay chaʼoxtul hermanoetik akʼbot smulinik spasel te bin chopol sok ay yichʼojik chukel. Jteb ma jichuk kʼot ta pasel ta sbabial siglo. Te jpuk-kʼop Pablo la yichʼ lebeyel smul sok la yichʼ chukel. Ay chaʼoxtul jchʼuunjeletik la yijkitayik te jpuk-kʼop Pablo te kʼalal la yichʼ chukel ta Roma (2 Tim. 1:​8, 15; 2:​8, 9). Chikan te bin la snopik, kʼax ma lekniwan la yaʼiy sba te Pablo, melel bayal kʼaxem swokol sok yakʼoj skuxlejal ta stojolik (Hech. 20:​18-21; 2 Cor. 1:8). Mame ayuk bin-ora jich ya jpastik te bin-utʼil la spasik te jchʼuunjeletik te la yijkitayik jilel te Pablo. Jaʼ yuʼun ma yanuknax ya kiltik-a te jaʼ stʼojanoj sit te Satanás ta stojol te hermanoetik te yichʼoj yaʼtelike. Te bin ya skʼane, jaʼ te manchuk jun yoʼtanik ta stojol te Jehová sok te yakuk x-och xiwel ta koʼtantike (1 Pedro 5:8). Ma xa akom aba ta skoltayel te hermanoetik sok junuk awoʼtan ta stojolik (2 Tim. 1:​16-18). w22.11 16, 17 párr. 8-11

Te chopol winik te la sujtes yoʼtan te jipil ta teʼ ta stsʼeel te Jesuse judioniwan, te judioetik jtulnax Dios ya yichʼik ta mukʼ, pero te ants winiketik ta yantik nación ya yichʼik ta mukʼ bayal diosetik (Éxodo 20:​2, 3; 1 Corintios 8:​5, 6). Te yanuk slumal-a te chopol winik-abi, jichniwan la sjojkʼoy te jichuke: «¿Matobal ya axiʼ-a te diosetike?». Jaʼnix jich, la yichʼ tikunel tal te Jesús ta sleel «te tuminchijetik yuʼun Israel te chʼayemike», jaʼ yuʼun maba ya scholbey skʼop Dios-a te ants winiketik te yan snacionik-ae (Mateo 15:24). Te Dios yakʼojbeyix snaʼ-a te israeletik te ya schaʼkuxajtes te machʼa lajemikixe. Jaʼ-abi snaʼojniwan-a te chopol winike, sok ta swenta te bin la yal ya yakʼ jnaʼtik te kʼoemniwan ta yoʼtan te ya yichʼ chaʼkuxajtesel te Jesús yuʼun te Jehová sok te ya x-och ta Ajwalil ta Wentainel yuʼun te Dios. Jich yilel te chopol winik-abi schʼuunoj yoʼtan te ya yichʼ chaʼkuxajtesel yuʼun te Diose. Te bitʼil jaʼ judío te chopol winike, snaʼoj ta swenta te Nichimal Kʼinal te banti la yakʼ Jehová te Adán sok te Eva. Jaʼ yuʼun laniwan snop te Nichimal Kʼinal la yal te Jesús, jaʼ te nichimal kʼinal te ya yichʼ pasel liʼ ta Balumilal (Génesis 2:15). w22.12 8, 9 párr. 2, 3