¿Bin-a te Wentainel yuʼun te Diose?

 1. ¿Bin orasion ya kilbeytik skʼoplal ta kapitulo ini?

BAYAL millón ta tul ants winiketik naʼbil yuʼunik te orasion la spas te Jesús te banti la yakʼ ta nopel bin-utʼil ta kʼoponel te Diose. ¿Bintik la skʼan te Jesús ta orasion ini? ¿Bin yuʼun tulan skʼoplal te ya xkʼot ta koʼtantik bin swentail te bintik la skʼane? Akʼa kiltik.

 2. ¿Bintik oxchajp la snojptesotik ta skʼanel ta orasion te Jesuse?

² Te Jesús jich la yal: «Yan te jaʼexe, jich ya skʼan ya akʼoponik te Diose: “Jtatik te ayat ta chʼulchan, akʼa yichʼ chʼultesel te abiile. Akʼa taluk te Wentainel awuʼune. Akʼa yichʼ pasel te skʼanojel awoʼtan ta chʼulchan soknix ta Balumilal”» (kʼopona Mateo 6:9-13). Jich bitʼil ya kiltik, ay oxchajp bin la snojptesotik ta skʼanel ta orasion te Jesuse, ¿bin yuʼun? (Ilawil te nota 20, te bin-utʼil ta kʼoponel te Diose).

 3. ¿Bin ya jnoptik ta kapitulo ini?

³ La jnoptikix te jaʼ Jehová sbiil te Diose. Jaʼnix jich la jnoptikix bin-a te skʼanojel yoʼtan te Dios ta stojol te ants winiketik sok ta swenta te Balumilale. Pero, ¿bin yak ta yalbeyel skʼoplal-a te Jesús te kʼalal jich la yale: «Akʼa taluk te Wentainel awuʼune»? Ta kapitulo ini yame jnoptik bin-a te Wentainel yuʼun te Dios, bin ya xbajt spas sok bin-utʼil ya yakʼbey ta ichʼel ta mukʼ sbiil te Diose.

 4. 1) ¿Bin-a te Wentainel yuʼun te Diose? 2) ¿Machʼa-a te Ajwalil yuʼune?

⁴ Te Wentainel yuʼun te Dios jaʼ jun gobierno te yakʼoj te Jehová ta chʼulchan. Te Dios jaʼ la stsa te Jesús yuʼun ya x-och ta Ajwalil. Te Biblia jich ya yal ta stojol te Jesuse: «Ha principal yuʼun principaletic soc ha Ajwalil yuʼun ajwaliletic» (Apocalipsis 17:14). Ta melel, maʼyuk jtuluk ajwalil ta Balumilal te ya xjuʼ ya skoltayotik jich bitʼil te Jesuse. Jaʼnix jich ma xjuʼ ya xtsalot yuʼun te ajwaliletik ta Balumilale, manchukme jun-nax ya yakʼ sbaik.

 5. 1) ¿Bin ya swentain te Wentainel yuʼun te Diose? 2) ¿Bantito kʼalal ya xwentainwan?

⁵ Te Jesús chaʼsujt bael ta chʼulchan te kʼalal kʼaxix 40 kʼajkʼal schaʼkuxajel-a. Kʼalal kʼax bael te tiempoe te Jehová la yotses ta Ajwalil yuʼun te Wentainel ini (Hechos 2:33). Te Wentainel yuʼun te Dios yame swentain te Balumilal kʼalalto ta chʼulchan (Apocalipsis 11:15). Jaʼ yuʼun te Biblia ya yal te jaʼ «te cuentahinel yuʼun [Dios] ta chʼulchan» (2 Timoteo 4:18).

6, 7. ¿Bin yuʼun te kʼax lekil Ajwalil te Jesús te ma xpajot yuʼun te ajwaliletik yuʼun te Balumilale?

⁶ Te Biblia ya yal te jaʼ kʼax lekil Ajwalil te Jesús te ma xpajot yuʼun te ajwaliletik yuʼun te balumilale, melel «ma ba ya xchamix xan» (Romanos 6:9). Spisil te ajwaliletik yuʼun balumilal yananix xlajik-a, yan stukel te Jesús maʼyuk bin-ora ya xlaj. Jich yuʼun yame xjalaj sbajtelkʼinal spisil te bin ya spas ta jtojoltike.

⁷ Te Biblia jaʼnix jich ya yal te jaʼ jtul Ajwalil te toj yoʼtan sok te ya snaʼ yoʼbolil jbatik. Ay jun albilkʼop te jich ya yal ta stojol: «Te espíritu yuʼun Jehová ya xhul ta stojol: ha te espíritu yuʼun pʼijil-oʼtanil soc snaʼbeyel scuentahil, te espíritu yuʼun jʼacʼ-oʼtanil soc yuʼel, te espíritu yuʼun bin ay ta naʼel soc xiʼel te Jehová». Sok ya yalxan: «Ma haʼuc ya schahpan yuʼun te bin ya yil ta sit, ma haʼuc ya schahpan yuʼun te bin ya yaʼiy ta schiquin; ha toj ya schahpan te pobrehetic» (Isaías 11:2-4). ¿Yabal akʼan ya swentainat jtul ajwalil jich bitʼil te Jesuse?

 8. ¿Bin yuʼun ya jnaʼtik te maba stukel ya xwentainwan te Jesuse?

⁸ Te Biblia ya yal te ay tsabil ants winiketik yuʼun Dios swenta ya sjokinik ta wentainwanej te Jesús ta chʼulchan. Jich ya yakʼ jnaʼtik ta swenta te bin albot te Timoteo yuʼun te jpuk-kʼop Pablo: «Teme ya xcʼax jwocoltic, ha nix hich pajal ya xʼochotic ta cuentahinwanej soc» (2 Timoteo 2:12). ¿Jaytul ants winiketik ya sjokinik ta wentainwanej te Jesuse?

 9. 1) ¿Jaytul te machʼatik ya xbajtik ta wentainwanej sok Jesús ta chʼulchan? 2) ¿Bin-ora jajch yichʼik tsael yuʼun Jehová te 144,000 ta tul?

⁹ Jich bitʼil la jnoptikix ta kapitulo 7, te jpuk-kʼop Juan la yil ta najalsitil te Jesús jich bitʼil Ajwalil ta chʼulchan te jokinbil yuʼun 144,000 ta tul ajwaliletik. ¿Machʼatik-a te 144,000 ta tule? Jaʼnix ya yalbotik kaʼiytik te Juane: «Haʼic te ya stʼunic ta bayuc ya xbaht te Jcolel Tuminchij». Jaʼnix jich ya yal te «mambil scolelic ta yohlil ants-winiquetic» (kʼopona Apocalipsis 14:1, 4). Te Jkolel Tuminchije, jaʼ te Jesús. Te 144,000 jaʼik te jchʼuunjeletik te tsabilik yuʼun Dios swenta ya «yaʼiyic cuentahinwanej ta bahlumilal» sok te Jesuse. Jich yuʼun te kʼalal ya xlajike ya xchaʼkuxajik ta chʼulchan (Apocalipsis 5:10). Ta sbabial siglo, te Jehová jajch stsa te 144,000 ta tul.

10. ¿Bin yuʼun ya xchiknaj ta ilel te skʼuxul yoʼtan Jehová te bitʼil ya yakʼ swentainotik te Jesús sok te 144,000 ta tule?

¹⁰ Kʼax bayal kʼuxotik ta yoʼtan te Jehová te jich stsaoj ants winiketik ta Balumilal yuʼun ya xwentainwanik sok te Jesuse. Te Jesús jaʼ lekil Ajwalil ya xkʼot, melel kuxin jich bitʼil winik ta Balumilal sok kʼax bayal swokol-euk. Te jpuk-kʼop Pablo la yal te ya xkʼot ta yoʼtan te Jesús te bin yaʼiyel ya kaʼiy jbatik sok te ya snaʼ «yoʼbolil jbahtic yuʼun te mayuc quiptic», melel «hich nix la yaʼiy tsajel ta spisil hich te bin utʼil te hoʼotic» (Hebreos 4:15; 5:8). Te 144,000 ta tule jaʼnix jich ya xkʼot ta yoʼtanik te bin yaʼiyel ya kaʼiy jbatike, melel spasojik tulan ta stsalel te mulil sok ta stsʼikel te chamele. Jaʼ yuʼun ya xjuʼ ya schʼuun koʼtantik te ya xbajt kʼotuk ta yoʼtan te Jesús sok te 144,000 ta tul te bin yaʼiyel ya kaʼiy jbatike.

11. ¿Bin yuʼun la yakʼ ta nopel Jesús te akʼa skʼanik te jnopojeletik te ya yichʼ pasel te skʼanojel yoʼtan te Dios ta chʼulchane?

¹¹ Te Jesús la snojptes te jnopojeletik yuʼun ta skʼanel ta orasion te akʼa yichʼ pasel te skʼanojel yoʼtan Dios liʼ ta Balumilal sok ta chʼulchan. ¿Bin yuʼun la yal te akʼa skʼanik te ya yichʼ pasel ta chʼulchan te skʼanojel yoʼtan te Diose? Jich bitʼil la jnoptik ta kapitulo 3 te Satanás la skontrain te Diose. Te Jehová la yakʼ ayinuk jun tiempo ta chʼulchan te Satanás sok te chʼul-abatetik te la skʼaxuntayik mantale, te naʼbil sbaik bitʼil pukujetik ta ora ini. Jich yuʼun maba spisil te chʼul-abatetik yakik ta spasbeyel skʼanojel yoʼtan te Diose. Ta kapitulo 10 yame jnopbeytikxan skʼoplal te Satanás sok te pukujetike.

12. ¿Bin chaʼchajp mukʼ skʼoplal ya yal te Apocalipsis 12:10?

¹² Te Biblia la yal ta stojol te Jesús te ya yakʼbey guerra te Satanás te kʼalal mato bayaluk tiempo yochel ta Ajwalil ta Wentainel yuʼun Dios (kʼopona Apocalipsis 12:7-10). Ta Apocalipsis 12:10 ay chaʼchajp bin mukʼ skʼoplal ya yal. Sbabial, jaʼ te jajchix ta wentainwanej te Jesucristoe. Schebal, jaʼ te la yichʼ lokʼesel ta chʼulchan te Satanás sok la yichʼ chʼojel koel tal ta Balumilal. Jaʼ ini kʼoemix ta pasel, yatome kiltik bael.

13. ¿Bin-utʼil la yaʼiy sbaik te chʼul-abatetik kʼalal la yichʼ lokʼesel ta chʼulchan te Satanase?

¹³ Te chʼul-abatetik te maba la skʼaxuntaybeyik smantal te Diose, akʼbot bayal stseʼelil yoʼtanik te kʼalal la yichʼik lokʼesel ta chʼulchan te Satanás sok te j-abatetik yuʼune. Te Biblia jich ya yal: «Tseʼeluc me awoʼtan, haʼat chʼulchan, soc haʼex te nahinemex tey a» (Apocalipsis 12:12). Ta ora ini ayix lamalkʼinal sok jun-nax ayikix te machʼatik ayik ta chʼulchan ta swenta te yakix ta pasel te skʼanojel yoʼtan Dios tey-a.

14. ¿Bintik kʼoem ta pasel ta Balumilal jaʼto tal te la yichʼ lokʼesel ta chʼulchan te Satanase?

¹⁴ Pero yan yilel te kuxlejalil ta Balumilale. Nojel ta wokolil, melel «cohemix tal» te Satanás sok bayal ilinem «yuʼun ya snaʼ te nopol ya xlaj ora yuʼun» (Apocalipsis 12:12). Te Satanás kʼax bayal ilinem ta skaj te la yichʼ lokʼesel ta chʼulchan sok ya snaʼ te nopol ya yichʼ lajinele. Jich yuʼun bayal bintik yak ta spasel yuʼun ya yakʼbey bayal swokol te ants winiketik ta Balumilal.

15. ¿Bin-a te skʼanojel yoʼtan Dios ta swenta te Balumilale?

¹⁵ Pero te skʼanojel yoʼtan Dios ta swenta te Balumilale, maba jelonem. Te Dios ya skʼan te tojil ants winik ya xkʼootik swenta ya xkuxinotik ta sbajtelkʼinal ta jun nichimal kʼinal (Salmo 37:29). ¿Bin-utʼil ya spas spisil ini te Wentainel yuʼun te Diose?

16, 17. ¿Bin ya snojptesotik ta swenta te Wentainel yuʼun Dios te albilkʼop ay ta Daniel 2:44?

¹⁶ Te albilkʼop te ay ta Daniel 2:44 jich ya yal: «Te yorahil te ajwaliletic ini te Dios ta chʼulchan ya me shach jchahp ban cʼalal ya scuentahin jtuhl ajwalil te mayuc bin ora ya xlaj, soc ma ba ya xʼacʼot hilel ta scʼab yan nación; ha ya swuyticlan soc ya slajinlan spisil te jchahp ban cʼalal scuentahinejic te ajwaliletic ini, pero sbahtel qʼuinal ya xhil stuquel». ¿Bin ya snojptesotik ta swenta te Wentainel yuʼun Dios te albilkʼop ini?

¹⁷ Te bin ya yakʼ jnoptik ta sbabial, jaʼ te ya xjajch ta mantalteswanej te Wentainel yuʼun Dios ta «yorahil te ajwaliletic ini». ¿Bin ya skʼan ya yal ini? Jaʼ te ayikto ta mantalteswanej-a te ajwaliletik ta Balumilal kʼalal ya xjajch ta mantalteswanej te Wentainel yuʼun te Diose. Te schebale, jaʼ te maʼyuk bin-ora ya xlaj te Wentainel yuʼun Dios sok te maʼyuk yan gobierno ya xtenot lokʼel yuʼune. Te yoxebale, jaʼ te ya sjachik guerra te ajwaliletik yuʼun balumilal ta stojol te Wentainel yuʼun te Diose. Jaʼme ya stsalawan te Wentainel yuʼun Dios sok jaʼnaxme stukel ya swentain jilel te Balumilale. Te kʼalal jich ya xkʼot ta pasele, jaʼnaxme lekil gobierno ya xbajt ayinuk ta stojol te ants winiketike.

18. ¿Bin sbiil te guerra te ya yakʼbey sbaik te Wentainel yuʼun Dios sok te ajwaliletik yuʼun te balumilale?

¹⁸ ¿Bin ya xkʼot ta pasel te kʼalal nopol ya yakʼbey sbaik guerra te ajwaliletik yuʼun balumilal sok te Wentainel yuʼun Diose? Te pukujetik yame stijbeyik yoʼtan «te ajwaliletic te ayic ta swohlol bahlumilal yuʼun ya stsobic ta guerra ta yorahil te mucʼ scʼahcʼalel yuʼun Dios te spisil ya xhuʼ yuʼune». Armagedón sbiil te guerra ini. Ta guerra-abi, te ajwaliletik yuʼun balumilal yame yakʼbeyik guerra te Wentainel yuʼun te Diose (Apocalipsis 16:14, 16; ilawil te nota 10, Armagedón).

19, 20. ¿Bin yuʼun ya jkʼantik te Wentainel yuʼun te Diose?

¹⁹ ¿Bin yuʼun ya jkʼantik te Wentainel yuʼun te Diose? Ay oxeb swentail te bin yuʼune. Te sbabiale, jaʼ ta skaj te jmulawilotike, jich yuʼun ya stsakotik chamel sok ya xlajotik bael. Pero te kʼalal jaʼ ya swentainotik te Wentainel yuʼun te Diose yame xkuxinotik ta sbajtelkʼinal, melel te Biblia jich ya yal: «Como hich cʼux ta yoʼtan Dios te bahlumilal te la sticon tal te hip jtuhl Snichʼan, scuenta yuʼun spisil te machʼatic ya schʼuhunic ma ba ya xchʼayic, ay scuxlejalic sbahtel qʼuinal yuʼun» (Juan 3:16).

²⁰ Te schebale, jaʼ yuʼun te kuxulotik ta Balumilal te nojel ta chopol ants winiketike. Bayal machʼatik ya spasik lot, ya xloʼlaywanik sok ya spasik bayal ta chajp mulil, pero maʼyuk bin-utʼil ya xjuʼ ya jkomtik te joʼotike. Yan stukel te Jehová ya xjuʼ yuʼun. Teme ma sjel te skuxlejalike yame yichʼik lajinel yuʼun Jehová ta Armagedón (kʼopona Salmo 37:10). Te yoxebal bin yuʼun ya jkʼantik te Wentainel yuʼun te Diose, jaʼ yuʼun te kʼax chopolik te ajwaliletik yuʼun te balumilale, ya x-elkʼajik sok ma xjuʼ yuʼunik slajinel spisil te wokolil ya xkʼax ta stojol te ants winiketike. Jaʼnix jich ma skʼan ya skoltayik te ants winiketik yuʼun ya schʼuunbeyik smantal te Diose. Jaʼ yuʼun ma xchʼay te kʼalal jich ya yal te Biblia: «Jtuhl winic ya smosohin yan winic yuʼun ya yaʼbe swocol» (Eclesiastés 8:9).

21. ¿Bin ya xbajt spas te Wentainel yuʼun Dios swenta ya yichʼ pasel te skʼanojel yoʼtan te Jehová?

²¹ Te kʼalal kʼaxix-a te Armagedón, te Wentainel yuʼun te Diose jaʼme ya yakʼ kʼotuk ta pasel te skʼanojel yoʼtan Dios ta Balumilal. Te Satanás sok te j-abatetik yuʼune yame yichʼik makel ta xaab (Apocalipsis 20:1-3). Jich yuʼun te kʼalal ya xkʼax bael te kʼajkʼale, mame ayuk machʼa ya xtsakotix ta chamel sok maʼyuk machʼa ya xlajix. Ta swenta te la yakʼ ta tojel jmultik te Jehová, spisil te ants winiketik te ya schʼuunik mantale yame xjuʼ ya xkuxinik ta sbajtelkʼinal ta Nichimal Kʼinal (Apocalipsis 22:1-3; ilawil te nota 21, la yichʼ manel jkoleltik). Te Wentainel yuʼun te Diose jaʼnix jich yame schʼultesbey sbiil te Dios. Te bin ya skʼan ya yal ini, jaʼ te kʼalal yakix ta mantalteswanej ta Balumilal-a te Wentainel yuʼun te Diose spisil te ants winiketik yame yichʼbeyik ta mukʼ sbiil te Diose.

22. ¿Bin-utʼil ya jnaʼtik te maba och ta Ajwalil te Jesús kʼalal ay ta Balumilal-a o te kʼalal kʼotnax ta chʼulchane?

²² Te Jesús jich la snojptes te jnopojeletik yuʼun ta skʼanel ta orasion: «Akʼa taluk te Wentainel awuʼune». Jaʼ-abi ya skʼan ya yal te matoba talem-a te Wentainel yuʼun te Diose, melel ayto ya skʼan-a te ya yakʼ ta Ajwalil te Jesús te Jehovae sok te ya xjajch ta aʼtel te Wentainel yuʼune. Pero, ¿labal yichʼ otsesel ta Ajwalil te Jesús ta oranax te kʼalal sujt bael ta chʼulchane? Maʼuk, la skʼan te yato smaliye. Te jpuk-kʼop Pedro sok te Pablo la sjamaltesbeyikxan skʼoplal ini te kʼalal mato jaluk schaʼkuxajel-a te Jesuse. La yalik te kʼot ta pasel ta stojol Jesús te albilkʼop ay ta Salmo 110:1. Ta albilkʼop ini, jich la yal te Jehová: «Huclan ta jwaʼel-cʼab, ha to cʼalal ya caʼbat atecʼtajibin acontratac» (Hechos 2:32-35; Hebreos 10:12, 13). Jaʼ ini ya yakʼ kiltik te maba oranax la yichʼ otsesel ta Ajwalil te Jesuse, la smaliy te bin-ora albot yuʼun te Jehovae.

23. 1) ¿Bin-ora jajch ta wentainwanej te Jesús jich bitʼil Ajwalil? 2) ¿Bin ya kilbeytik skʼoplal ta yan kapitulo?

²³ ¿Bin-ora jajch ta wentainwanej te Jesuse? Ta 1914. Te kʼalal mato xkʼot-a te jaʼbil ini, ay jtsojb jchʼuunjeletik te kʼot ta yoʼtanik te mukʼ skʼoplal ya xkʼot te jaʼbil 1914 ta swenta te bin ya yal te albilkʼopetik ta Biblia. Ta swenta te bintik kʼoemik ta pasel ta swolol Balumilal jaʼto tal ta jaʼbil 1914 chikan ta ilel te yuʼun-nix melel-a te bin kʼot ta yoʼtanik te jchʼuunjeletik-abi. Ta jaʼbil-abi jajch ta wentainwanej te Jesuse (Salmo 110:2; ilawil te nota 22, ¿bin yuʼun tulan skʼoplal te jaʼbil 1914?). Maba kʼax bayal tiempo ta patil te la yichʼ chʼojel koel tal ta Balumilal te Satanás, ta ora ini «nopol ya xlaj ora yuʼun» (Apocalipsis 12:12). Ta yan kapitulo yame kiltik te bintikxan ya yakʼ ta ilel te yuʼun-nix yakotik ta kuxinel ta tiempo-abi te nopol ya xlajixe. Jaʼnix jich yame kiltik bin-utʼil te Wentainel yuʼun te Dios nopolix ya xbajt skʼotes ta pasel te skʼanojel yoʼtan Dios liʼ ta Balumilal.