Li kʼusi chanubtasvan Jesús ta sventa li Diose

«Jaʼ noʼox jech ec li Jtote muʼyuc bochʼo snaʼbe cʼu xʼelan yoʼnton. Vuʼun noʼox jnaʼ, xchiʼuc ta snaʼic ec li bochʼotic ta xcacʼbe snaʼique.» (LUCAS 10:22)

KʼALAL skʼan toʼox xvokʼ kʼuchaʼal jun krixchano li baʼyel xNichʼon Diose, mu albajuk sjalil te xa onoʼox xchiʼuk li sTote (Colosenses 1:15). Ti kʼu sjalil te xchiʼuk li sTote laj yojtikinbe lek li snopbene, ti kʼuyelan chaʼi sbae xchiʼuk ti kʼuyelan stalelale. Jaʼ yuʼun kʼalal tal liʼ ta Balumile laj yakʼ persa ti akʼo xojtikinik lek Dios li krixchanoetike. ¿Kʼusi xuʼ jchantik ta sventa li kʼusitik chanubtasvane?

Li sbi Diose Li Jesuse toj tsots skʼoplal laj yil ti xojtikinik xchiʼuk ti stunesbeik sbi Dios li krixchanoetike, Jeova. Li sbi Jesuse jaʼ skʼan xal: «Jaʼ Chpojvan li Jeovae». Jaʼ yuʼun kʼalal skʼan toʼox jun akʼobal xchame xi laj yalbe ta sjunul yoʼonton li sTote: «Kakʼojbeik yojtikin li abie» (Juan 17:26, NM). Ta melel, li Jesuse la stunesbe sbi li Diose xchiʼuk laj yakʼbe yojtikin li krixchanoetik buchʼu chaʼiike. ¿Kʼuxi xa noʼox chojtikin krixchanoetik li kʼusi melel sventa Jeova mi mu xojtikinbeik li sbi xchiʼuk li kʼusi skʼan xale?a

Toj ep chkʼanvan Jun velta kʼalal yakal tspas orasion ta stojolal Dios li Jesuse, xi laj yale: «Tati, [...] lec onoʼox acʼanojun ti cʼalal muʼyuc toʼox banamile» (Juan 17:24). Kʼalal te toʼox oy ta vinajel li Jesuse laj yaʼi kʼuyelan chkʼanvan li Diose; jaʼ yuʼun kʼalal yal talel liʼ ta Balumile, la spas persa ti bu kʼalal xuʼ yuʼun sventa oyuk sbalil xil ta xkuxlejalik li kʼanelal yuʼun Dios li krixchanoetike.

Baʼyele, chanubtasvan ti skʼanoj skotol krixchanoetik li Jeovae. «Yuʼun toj ep la xcʼuxubin scotol cristianoetic ta banamil li Diose —xi laj yal—, jech laj yacʼ li jun noʼox Xnichʼon oye, yuʼun jech mu chʼayeluc chbat li bochʼotic ta xchʼunic ti jaʼ Jcoltavanej yuʼunique; jaʼ ta xcuxiic o sbatel osil.» (Juan 3:16.) Ta melel skʼanoj skotol krixchanoetik li Diose. Ta skoj li kʼanelal taje li Diose jaʼ tijbat-o yoʼonton sventa chakʼ ta matanal li xNichʼon ti mas skʼanoje. Jaʼ jech xuʼ spoj lokʼel ta mulil xchiʼuk ta lajel li yajtuneltak ti tukʼ yoʼontonike xchiʼuk sventa xuʼ staik li kuxlejal sbatel osile. Mu xa noʼox jtatik ta nopel ti kʼu xa noʼox yepal skʼanojutik li Diose (Romanos 8:38, 39).

Pe li Jesuse oy to kʼusi yan chanubtasvan ta sventa li Jeovae: jaʼ ti skʼanoj ta jujuntal li yajtuneltake. Li Jesuse la skoʼoltas kʼuchaʼal jun jchabichij li sTote, ti skʼanoj ta jujukot li xchije (Mateo 18:12-14). Jech noxtok laj yal ti akʼo mi xpʼaj yalel ta lum li uni bikʼtal mute muʼyuk chʼayem ta sjol li Jeovae. Maʼuk noʼox taje, yuʼun «cʼalal ta stsotsil ajolic lec atbil», xi laj yal li Jesuse (Mateo 10:29-31). Ta jaypʼeluk noʼox kʼope, ti mi mu xchʼay ta sjol Jeova li uni bikʼit mut ti muʼyuk bu te oy ta sate, ¿mi jaʼ xa van muʼyuk chat yoʼonton ta stojolal li jujuntal yajtuneltake? Xchiʼuk mi chat ta jujupʼej li stsatsal joltike, ¿mi jaʼ xa van mu xakʼ ta venta li kʼusi chtun kuʼuntike, li kʼusi yakalutik stsalele xchiʼuk li kʼusitik chkat-o koʼontontike?

JTotik ta vinajel Jech kʼuchaʼal laj kiltike, li Jesuse jaʼ baʼyel xNichʼon li Diose. Jaʼ yuʼun mu labaluk ta aʼyel ti jutuk mu skotoluk velta «jTot» xi laj yale. Yuʼun jech, li baʼyel sloʼil Jesús ta jtatik ta Vivlia —ti kʼalal jaʼo te oy ta chʼulnae, ti lajcheb toʼox sjabilale— xi laj yale «li Jtote» (Lucas 2:49). Li jpʼel kʼop taje te van chichʼ tael 190 ta velta li ta Evanjelioetike ti jaʼ chalbe skʼoplal li Jeovae. Li Jesuse nopolik noʼox la stunes li kʼopetik liʼe: «Jtotic Dios», «Jtot» xchiʼuk li «Atoti[ke]» (Mateo 6:9; 7:21; 23:9). Jaʼ jech laj yakʼ ta ilel ti xuʼ lek xil sba xchiʼuk Jeova li jpas mulil krixchanoetike.

Jkʼuxubinvanej xchiʼuk jpasvanej ta perton Li Jesuse snaʼoj ti ta skoj ti jpas mulilutike, chtun kuʼuntik li kʼuxubinel yuʼun Diose. Jaʼ yuʼun, li ta lokʼolkʼop sventa li jtoyba nichʼonile te chakʼ ta ilel ti jaʼ jun totil ti lek snaʼ xkʼuxubinvan li Diose xchiʼuk ti sjamoj xa skʼob sventa chchʼam yan velta li xnichʼon ti sutesoj yoʼontone (Lucas 15:11-32). Jaʼ jech, li Jeovae tskʼel mi oy ta jsutes koʼontontik jutuk sventa xakʼbutik ta ilel li xkʼuxul yoʼontone. ¿Kʼu yuʼun? Yuʼun li stuke ta melel tskʼan chakʼbe perton li buchʼu tsutes yoʼontone. Li Jesuse xi laj yale: «Chacalboxuc avaʼyic, jaʼ noʼox jech toj xcuxet yoʼntonic te ta vinajel ec cʼalal me tsutes yoʼnton jun jpasmulile. Jaʼ mu sta jech xcuxet yoʼntonic yuʼun li balunlajuneb yoʼvinic (99) tucʼ yoʼntonique, yuʼun mu xa persauc ta sutes yoʼntonic» (Lucas 15:7). ¿Mi mu tauk stij avoʼonton sventa xa nopaj ta stojolal jun Dios ti toj lek xkʼuxubinvane?

Chaʼi li j-orasiontike Kʼalal te toʼox ta vinajel li Jesuse, la xchan ti tskʼan akʼo spasbat orasion yuʼun tukʼil yajtuneltak li Jeovae, yuʼun jaʼ li buchʼu chaʼi li jkʼoptike (Salmo 65:2). Jaʼ yuʼun, kʼalal tal ta Balumile, la xchanubtas yajtsʼaklomtak kʼuxi tspasik orasion. «Mu me teuc noʼox liquel-liquel avuʼun cʼusi chavalic», xi laj yal mantal. Jech noxtok, laj yalanbe kʼusitik xuʼ skʼanbeik li Diose: ti kʼotuk ta pasel li kʼusi tskʼan yoʼonton «liʼ ta banamil jech chac cʼu chaʼal te ta vinajele», ti x-akʼbatik li kʼusi chtun yuʼunik jujun kʼakʼale, ti spasbatik perton li smulike xchiʼuk ti xkoltaatik ta stsalel li sujel ta mulile (Mateo 6:5-13). Li Jesuse jamal laj yakʼ ta ilel ti Jeovae jaʼ jun Totil ti lek snaʼ xkʼanvane, ti tstakʼbe s-orasion li tukʼil yajtuneltak ti ta sjunul yoʼonton tspasike (Mateo 7:7-11).

Lek jamal xvinaj: li Jesuse laj yakʼ ta ilel li kʼusi melel ta sventa Jeovae xchiʼuk ti kʼuyelan stalelale. Pe oy to kʼusi yan tskʼan chakʼ ta ilel li Jesuse: jaʼ li kʼusi tstunes Dios sventa xkʼot ta pasel li kʼusi tskʼan tspas liʼ ta Balumile xchiʼuk ta stojolal li krixchanoetike. Taje, jaʼ li kʼusi mas laj yalbe skʼoplal kʼalal la xchol mantale.

[Tsʼib ta yok vun]