Matiu

5 Ọ vwọ mrẹ otu na, o de kpo enu rẹ ugbenu na; ro vwo chidia nu, idibo rọyen de bro rhe. 2 O de rhie unu rọyen, ko yono ayen rọ vwọ tanẹ:

3 “Omavwerhovwẹn dia vwọ kẹ ihwo re riẹnre nẹ ayen guọnọ odjekẹ rẹ Ọghẹnẹ,* kidie Uvie rẹ idjuvwu na ọrayen.

4 “Omavwerhovwẹn dia vwọ kẹ ihwo ri vwere uvweri, kidie e che bru ayen uche.

5 “Omavwerhovwẹn dia vwọ kẹ ihwo re pha dẹndẹn,* kidie ayen cha vwẹ otọrakpọ na vwọ riuku.

6 “Omavwerhovwẹn dia vwọ kẹ ihwo rẹ owẹnvwe rẹ ophiọnphiọn hwe, rẹ urhuru rẹ ophiọnphiọn ji siẹ, kidie evun cha vọn ayen.

7 “Omavwerhovwẹn dia vwọ kẹ ihwo ri gbe arodọnvwẹ, kidie e che gbe arodọnvwẹ kẹ ayen.

8 “Omavwerhovwẹn dia vwọ kẹ ihwo rẹ ubiudu rayen fonro, kidie ayen cha mrẹ Ọghẹnẹ.

9 “Omavwerhovwẹn dia vwọ kẹ ihwo re guọnọ ufuoma,* kidie e che se ayen emọ rẹ Ọghẹnẹ.

10 “Omavwerhovwẹn dia vwọ kẹ ihwo re mukpahen fikirẹ ophiọnphiọn, kidie Uvie rẹ idjuvwu na ọrayen.

11 “Omavwerhovwẹn dia vwọ kẹ ovwan ọke rẹ ihwo da hanrha ovwan, muẹkpahan ovwan, guẹn efian je ta koka koka rẹ eta ebrabra kpahan ovwan fiki mẹ. 12 Ovwan ghọghọ rere oma vwerhen ovwan gangan, kidie osa rẹ ovwan pha rhuarho vwẹ obodjuvwu, kidie ọtiọyen e ji mukpahen emraro na re kobaro kẹ ovwan.

13 “Ovwan yen ughwanka rẹ akpọ na, ẹkẹvuọvo ọ da dianẹ ughwanka ku avwerhen rọyen kufia, kẹ mavọ yen ọ sa vwọ rhoma vwo avwerhen rọyen? A rha cha sa reyọ vwo ru orọnvwọn vuọvo ọfa-a, ke kuo phiyọ otafe rere ihwo chiyon muotọ.

14 “Ovwan yen urhukpẹ rẹ akpọ na. Orere che se siomanu siẹrẹ ọ dahẹ enu rẹ ugbenu-u. 15 Ihwo vwẹ urhukpẹ vwo muẹ nẹ ayen mi muo phiyọ otọ rẹ obere-e,* ẹkẹvuọvo enu rẹ ogburhukpẹ, o mi lo mu ihwo eje rehẹ uwevwin na. 16 Vwẹ idjerhe vuọvo na, e jẹ urhukpẹ rẹ ovwan lo vwẹ obaro rẹ ihwo rere ayen sa vwọ mrẹ iruo esiri rẹ ovwan, ayen me vwẹ urinrin kẹ Ọsẹ rẹ ovwan rọhẹ obodjuvwu.

17 Ovwan roro nẹ me rhere rhe ghwọrọ Urhi na yẹrẹ Emraro na-a. Me rhere, ọ dia me vwọ ghwọrọ-ọ, ẹkẹvuọvo mi vwo ru ayen gba. 18 Uyota me ta kẹ ovwan nẹ, ọ cha phẹre rẹ odjuvwu vẹ akpọ na vwọ wanvrẹ, vwọ vrẹ ọ rẹ ubiota rọ ma hanvwe yẹrẹ ubiota ọvo vwọ wanvrẹ nẹ evunrẹ Urhi na bẹsiẹ rẹ erọnvwọn eje vwọ phia. 19 Ọtiọyena, kohwo kohwo rọ chọ ọvo vwẹ usun rẹ iji nana re ma hanvwe na, ro de ji yono ihwo efa nẹ ayen ru ọtiọyen, ke se ọ rọ ma hanvwe vwevunrẹ Uvie rẹ idjuvwu na.* Ẹkẹvuọvo kohwo kohwo ro ru ayen, rọ da je vwẹ ayen vwo yono ihwo, ke se ọ rọ rhoro vwevunrẹ Uvie rẹ idjuvwu na.* 20 Kidie me ta kẹ ovwan nẹ ophiọnphiọn rẹ ovwan rha vrẹ ọ rẹ isiẹbe na kugbe ihwo ri Farisi na-a, o vwo ọke vuọvo rẹ ovwan cha vwọ ro Uvie rẹ idjuvwu na-a.

21 “Ovwan nyori nẹ a ta kẹ ihwo rẹ ọke awanre nẹ: ‘Wo hwe ohwo-o, ẹkẹvuọvo kohwo kohwo ro hwe ohwo ka reyọ vwo guẹdjọ vwevunrẹ aguare.’ 22 Ẹkẹvuọvo me ta kẹ ovwan nẹ, kohwo kohwo rọ rhọnvwe jẹ ophu ro muẹ kpahan oniọvo rọyen vwo-o, ka reyọ vwo guẹdjọ vwevunrẹ aguare; kohwo kohwo rọ hanrhe oniọvo rọyen ekan rọ ghẹnghẹn orhọ, ka reyọ vwo guẹdjọ vwevunrẹ Aguare Ro Me Kpenu; ẹkẹvuọvo kohwo kohwo rọ tare nẹ, ‘Wẹwẹ rẹ ẹkpa oboba na!’ ko kpo erhanre ri Gehina.*

23 “Ọtiọyena, ọ da dianẹ wọ reyọ okẹ wẹn kpo asan agbada na, wọ da karophiyọ nẹ oniọvo wẹn ru orọnvwọn ọvo vwọso owẹ, 24 yanjẹ okẹ wẹn vwo vwẹ obaro rẹ agbada na rere wọ yanran. Ẹsosuọ, wẹ vẹ oniọvo wẹn rhuẹrẹ kugbe, wo de ru ọtiọyen nu, gbe rhivwin rhe rhe vwẹ okẹ wẹn kpahotọ.

25 “Brokpakpa nene ohwo ro mu we kpo aguare rhuẹrẹ kugbe rẹ ovwan je vwọ hẹ idjerhe yanran na, rere ohwo na vwo jẹ uwe ẹvwọ kẹ oguẹdjọ na, oguẹdjọ na me rha reyọ owẹ vwọ kẹ ohwo ro ruiruo vwevunrẹ aguare na, re de do we phiyọ uwodi. 26 Vwọrẹ uyota, me ta kẹ wẹ nẹ, wo che nẹ etiyin rhe-e, bẹsiẹ wọ vwọ hwa imigho otutuno rọ koba* ru wọ riosa rọyen re.

27 “Ovwan nyori nẹ a tarọ nẹ: ‘Wo gbe igberadja-a.’ 28 Ẹkẹvuọvo me ta kẹ ovwan nẹ, kohwo kohwo rọ tẹnrovi aye ro de vwo urhurusivwe kpahọn nenire gbe igberadja vwevunrẹ ubiudu rọyen nure. 29 Asaọkiephana, ọ da dianẹ ẹro rẹ obọrhen wẹn yen nẹrhẹ wọ kprowọ, yoro no wo do kufia. Kidie o yovwirin rẹ ẹbẹre ọvo rẹ ugboma wẹn vwo ghwru nẹ ọ re vwo do ọsoso rẹ ugboma wẹn phiyọ Gehina.* 30 Vwọba, ọ da dianẹ obọrhen wẹn yen nẹrhẹ wọ kprowọ, bro no wo do kufia. Kidie o yovwirin rẹ ẹbẹre ọvo rẹ ugboma wẹn vwo ghwru nẹ ọ rẹ ọsoso rẹ ugboma wẹn de shotọ vwẹ Gehina.*

31 “Vwọ vrẹ ọyena, a tare nẹ: ‘Kohwo kohwo rọ sen aye rọyen, e jẹ ọ vwẹ ọbe rẹ orọnvwe-ẹfan vwọ kẹ.’ 32 Ẹkẹvuọvo me ta kẹ ovwan nẹ, kohwo kohwo rọ sen aye rọyen jẹ ọ dia o gbe ọfanrhiẹ-ẹn,* jẹ ọ nẹrhẹ aye rọyen dia ohwo ro se gbe igberadja, kohwo kohwo rọ rọvwọn aye ra senre gbe igberadja.

33 “Obọfa, ovwan nyori nẹ a tarọ kẹ ihwo rẹ ọke awanre nẹ: ‘Wo duvwun iyorin nẹ wo de je ruo-o, ẹkẹvuọvo hwa obo wo veri kẹ Jihova.’* 34 Ẹkẹvuọvo me ta kẹ ovwan nẹ: Wo duvwun iyorin kakaka-a, owenẹ ọ dia odjuvwu yen wo vwo duvwon, kidie ọyen ekete rẹ Ọghẹnẹ; 35 yẹrẹ akpọ na, kidie ọyen akpanurhe rọ ghwẹ awọ kpahan; yẹrẹ Jerusalẹm kidie ọyen orere rẹ Ovie rode na. 36 Wọ reyọ uyovwin wẹn vwo duvwun iyori-in, kidie wo che se wene ogẹton ọvo kpo ọfuanfon yẹrẹ obiebi-i. 37 E jẹ ota rẹ ovwan ‘E’ dia e, ‘Ẹjo’ rẹ ovwan me dia ẹjo, kidie obo re vrẹ ọtiọyen obọ rẹ ohwo umwemwu na yen o nurhe.

38 “Ovwan nyori nẹ a tarọ nẹ: ‘Ẹro vwọ kẹ ẹro, ubiakon vwọ kẹ ubiakon.’ 39 Ẹkẹvuọvo me ta kẹ ovwan nẹ: Wo nene ohwo umwemwu họnra-a, ẹkẹvuọvo kohwo kohwo rọ ghwiẹ ọhwa rẹ obọrhen wẹn, je vwẹ ọ ro chekọ na kẹ. 40 Ohwo da guọnọ mu we kpo aguare rere ọ reyọ ewun rẹ obevun wẹn, je vwẹ ewun rẹ obotafe wẹn kẹ; 41 ọ da dianẹ ohwo ọvo ro vwo ogangan rẹ usuon gba wẹ vwo ruiruo re te imaili* ọvo, nene te imaili ivẹ. 42 Ohwo rọ nọ mie we, vwọ kẹ; wọ sian kẹ ohwo rọ guọnọ momo* mie we-e.

43 “Ovwan nyori nẹ a tarọ nẹ: ‘Vwo ẹguọnọ rẹ ọrivẹ wẹn rere wo vwo utuoma kpahen ọvweghrẹn wẹn.’ 44 Ẹkẹvuọvo me ta kẹ ovwan nẹ: Ovwan rhe vwo ẹguọnọ rẹ ivwighrẹn rẹ ovwan, rere ovwan nẹrhovwo kẹ ihwo ri muẹkpahan ovwan, 45 rere ovwan se vwo dje oma rẹ ovwan phia kerẹ emọ rẹ Ọsẹ rẹ ovwan rọhẹ evunrẹ idjuvwu na, kidie ọ nẹrhẹ ọnre rọyen lo muẹ ihwo umwemwu vẹ ihwo esiri, ọ je nẹrhẹ osio rhọ kuẹ evwata kugbe ihwo ri jẹ evwata ẹdia. 46 Ọ da dianẹ ihwo ri vwo ẹguọnọ rẹ ovwan yen ovwan vwo ẹguọnọ rayen, erere vọ yen che te ovwan? Ọ dia emu vuọvo yena yen ihwo ri phi osa uyovwin ji ruẹ? 47 Ọ da je dianẹ iniọvo rẹ ovwan ọvo yen ovwan yerẹn, emu rẹ oghẹresan vọ yen ovwan ruẹ? Ọ dia orọnvwọn ọvuọvo yena yen ihwo rẹ ẹgborho na ji ruẹ? 48 Ovwan dia gbagba kirobo rẹ Ọsẹ rẹ ovwan rọhẹ obodjuvwu pha gbagba na.