Luk

4 Ọyena vwọ wan nu, Jesu rọ vọnre vẹ ẹwẹn ọfuanfon na de vrẹn nẹ Jọdan, ẹwẹn na ko suon kpenẹ kpenẹ vwẹ aton na 2 vwẹ ẹdẹ 40, jẹ Idẹbono davwọn nẹ. Ọ re orọnvwọn vuọvo vwẹ ẹdẹ yena eje-e, ọtiọyena ẹdẹ yena vwọ gba nu, owẹnvwe ko hwe. 3 Ọtiọyena Idẹbono da ta kẹ nẹ: “Wọ da dia ọmọ rẹ Ọghẹnẹ, gba ta kẹ ukuta nana nẹ o hirhephiyọ ibrẹdi.” 4 Ẹkẹvuọvo Jesu da kpahen kẹ nẹ: “E siro nẹ: ‘Ohwo cha sa vwẹ ibrẹdi ọvo rhọ-ọ.’”

5 Ọtiọyena ọ da reyọ kpenu, o de dje uvie rẹ akpọ na ejobi kẹ ofuọvo. 6 Ọtiọyena Idẹbono da ta kẹ nẹ: “Me cha vwẹ ogangan nana ejobi kugbe urinrin rayen kẹ wẹ, kidie a vwẹ ayen kẹ vwẹ nure, kohwo kohwo re me guọnọre yen me vwẹ ayen kẹ. 7 Ọtiọyena wo de shiguẹ vwẹ obaro mẹ, je vwẹ ẹga kẹ vwẹ obọ vuọvo, ayen ejobi ke cha dia ewẹn.” 8 Jesu da kpahen kẹ nẹ: “E siro nẹ, ‘Jihova* Ọghẹnẹ wẹn yen wọ vwẹ ẹga kẹ, ọyen ọvo yen wọ vwẹ ẹga ọfuanfon kẹ.’”

9 Ọyena vwọ wan nu, o de suon kpo Jerusalẹm, ọ da reyọ vwo mudia asan ro me kpenu vwẹ enu rẹ uwevwin rẹ ẹga na, ọ da ta kẹ nẹ: “Wọ da dia ọmọ rẹ Ọghẹnẹ, gbe pho nẹ etinẹ na kpotọ, 10 kidie e siro nẹ, ‘Ọ cha vwẹ iji kẹ emekashe rọyen kpahen owẹ, rẹ ayen vwọ sẹro wẹ,’ 11 kẹ ‘Ayen cha vwẹ abọ rayen mu we, rere owọ wẹn vwo jẹ ukuta edje.’” 12 Jesu da kpahen kẹ nẹ: “A tarọ nẹ, ‘Wọ davwan Jihova* Ọghẹnẹ wẹn nẹ-ẹ.’” 13 Ọtiọyena ọke rẹ Idẹbono vwọ davwọn ni nu, ọ da yan jovwo bẹsiẹ ọke ọfa ro shephiyọ vwo te.

14 Asaọkiephana Jesu de rhivwin kpo Galili vẹ ẹgba rẹ ẹwẹn na. Omamọ iyẹnrẹn ra nẹ kpahọn da hra nene irere na eje re riariẹ Galili phiyọ. 15 Vwọba, ko yono vwẹ sinagọg rayen, ihwo eje ki muọghọ kẹ.

16 Ọyena vwọ wan nu, o de kpo Nazarẹt, asan rọ dia ghwanre, kerẹ ẹkuruemu rọyen vwẹ Ẹdẹ Urovwoma, ọ da ro sinagọg na, o de mudia rere o se. 17 Ọtiọyena a da vwẹ ukpirhin ọbe rẹ ọmraro Aizaya vwọ kẹ, o de rhie ukpirhin ọbe na, ọ da mrẹ asan re siro phiyọ nẹ: 18 “Ẹwẹn ri Jihova* hẹ oma mẹ, kidie ọ jẹ vwẹ reyọ mi vwo ghwoghwo iyẹnrẹn esiri kẹ ivwiogbere. O ji vwe re ghwoghwo ugbomọphẹ vwọ kẹ eviẹn, kugbe orẹmrẹ vwọ kẹ irhuẹro, me vwọ nẹrhẹ ihwo re shenyẹ vwo ọmuvwiẹ, 19 mi vwo ghwoghwo ọke ri Jihova* che vwo dje ẹroesiri kẹ ihwo.” 20 Ọtiọyena o de kpirhin ọbe na koko, ọ da vwọ kẹ ọrọvwẹrote ihwo na, o de chidia totọ; ihwo ejobi rehẹ sinagọg na da tẹnrovio. 21 Ọtiọyena kọ ta kẹ ayen nẹ: “Nonẹna, etinẹ rẹ Isiesi Ọfuanfon na rẹ ovwan ghwe nyo na rugba re.”

22 Ayen eje ki se omamọ oseri kpahọn, eta evwevwerhen ri nẹ unu rọyen cha ko gbe ayen unu, kẹ ayen tanẹ: “Ọnana ọmọ ri Josẹf, ọ dia ọtiọyen?” 23 Ọtiọyena ọ da ta kẹ ayen nẹ: “Aphro herọ-ọ, ovwan cha ta eta nana kẹ vwẹ, ‘Ọbo, sivwin oma wẹn. Gbe ji ru erọnvwọn rẹ avwanre nyori nẹ wo ruru vwẹ Kepanọm vwẹ ekogho wẹn etinẹ na.’” 24 Ọtiọyena ọ da tanẹ: “Uyota me ta kẹ ovwan nẹ, o vwo ọmraro vuọvo re rhiabọreyọ vwẹ ekogho rọye-en. 25 Kerẹ udje, uyota me ta kẹ ovwan nẹ, eyauku buebun yehẹ Izrẹl vwẹ ọke rẹ Ilaija, ọke rẹ osio vwo jẹ rhọ vwẹ ẹgbukpe erha gbe emeranvwe esan, rẹ owẹnvwe ọgangan vwo fi vwẹ otọ na ejobi. 26 Dedena e ji Ilaija bru ọvuọvo vwẹ usun rẹ eya yena ra-a, jokparẹ ayeuku ọvo rọhẹ Zarefat vwẹ otọ ri Saidọn. 27 Vwọba, ehọnvwoti buebun yen evunrẹ Izrẹl vwẹ ọke rẹ Ilaesha ọmraro na, dedena o vwo ọvuọvo vwẹ usun rayen re ru fo-on,* jokparẹ Neman ohwo ri Siria. 28 Asaọkiephana ophu de mu ihwo eje ri nyo eta nana vwevunrẹ sinagọg na, 29 ayen de vrẹn, ayen da reyọ kpakpata kpo otafe rẹ orere na, ayen da reyọ kpo asan ro me kpenu vwẹ ugbenu ra bọn orere rayen phiyọ na, rere ayen se vwo do kpotọ. 30 Ẹkẹvuọvo ọ da yan wan ohri rayen, ọ da yanran.

31 O de kpo Kepanọm, orere ri Galili ọvo. Ko yono ayen vwẹ Ẹdẹ Urovwoma na, 32 obo ro yono ihwo wan de gbe ayen unu, kidie ọ ta ota vẹ ogangan. 33 Asaọkiephana vwevunrẹ sinagọg na, o vwo ọshare ọvo ro vwo ẹwẹn ro jẹfuọn, ẹwẹn rẹ Idẹbono, o de kperi phia vẹ urhuru ọgangan nẹ: 34 “E! Die yen avwanre vẹ owẹ vwo kugbe, Jesu ohwo ri Nazarẹt? Wọ rhere rhe ghwọrọ avwanre? Me riẹn ohwo ru wọ hepha dẹn, Ohwo Ọfuanfon rẹ Ọghẹnẹ na.” 35 Ẹkẹvuọvo Jesu da ghwọkuo, ọ da tanẹ: “Rhurhu unu wẹn, wo nẹ oma rọyen.” Ọtiọyena, ọke rọ vwọ reyọ ọshare na vwọ ghwiotọ vwẹ ohri rayen nu, ẹwẹn rẹ Idẹbono na de nẹ oma rọyen, jẹ ọ wan rọ oma-a. 36 Ọtiọyena o de gbe ayen ejobi unu, kẹ ayen ta kẹ ohwohwo nẹ: “Ọnana oka rẹ ota vọ? Kidie ọ vwẹ ogangan vẹ ẹgba vwo jurhi kẹ ẹwẹn ri jẹfuọn na, ayen me ro otafe!” 37 Ọtiọyena iyẹnrẹn rọyen kọ hra nene kasan kasan vwẹ irere re riariẹ etiyin na phiyọ.

38 Ro vwo vrẹn nẹ sinagọg na, ọ da ro uwevwin ri Saimọn. Asaọkiephana oni aye ri Saimọn rioja rẹ ọga rẹ odo* ọgangan, ayen da vuẹ nẹ ọ cha uko. 39 Ọtiọyena o de mudia kẹrẹ, ọ da ghwọku odo* na, o de no oma. Ugege yena o de vrẹn, ko gbodibo kẹ ayen.

40 Ẹkẹvuọvo ọnre na vwo she re, ihwo eje ri vwo ihwo re họnvwa koka koka rẹ ega de mu ayen bro rhe. O de sivwin ayen womarẹ abọ rọ ghwẹ kpahen ayen ohwo ọvuọvo. 41 Ẹwẹn rẹ Idẹbono ji nẹ oma rẹ buebun rayen phia, kẹ ayen kperẹ je tanẹ: “Wẹwẹ yen Ọmọ rẹ Ọghẹnẹ na.” Ẹkẹvuọvo kọ ghwọkuẹ ayen, ọ rhọnvwa kẹ ayen nẹ ayen ta ota-a, kidie ayen riẹnrẹ phiyọ Kristi na.

42 Ẹkẹvuọvo ọke vwo rhie, o de vrẹn nẹ etiyin, o de kpo asan rẹ ohwo vuọvo hepha-a. Otu na ke guọnọ, ayen da rhe asan rọ hepha, kẹ ayen davwẹngba rẹ ayen vwọ daji, kidie ayen guọnọre nẹ ọ yanjẹ ayen vwo-o. 43 Ẹkẹvuọvo ọ da ta kẹ ayen nẹ: “Mi ji che ghwoghwo iyẹnrẹn esiri rẹ Uvie rẹ Ọghẹnẹ na vwẹ irere efa, kidie fikirẹ ọnana yen e vwo ji vwe rhe.” 44 Ọtiọyena ko ghwoghwo vwẹ sinagọg rehẹ Judia.