Luk

22 Asaọkiephana Orẹ rẹ Ibrẹdi ro Jephuo na, re se Orẹ rẹ Ọwanvrẹ na siẹkẹrẹ re. 2 Irherẹn ride na vẹ isiẹbe na ke guọnọ idjerhe ro me yovwin rẹ ayen se vwo hwe, kidie ayen djoshọ rẹ ihwo na. 3 Eshu da ro evunrẹ Judas, ọ re se Iskariọt, ohwo re keri ba Ihwivẹ na. 4 Ọ da yanran re nene irherẹn ride na kugbe erevwẹrote erhẹrotọ rẹ uwevwin rẹ ẹga na ta ota kpahen obo rọ sa vwọ shẹ kẹ ayen. 5 Oma vwerhen ayen kpahen ọnana, ayen da rhọnvwe nẹ ayen cha vwẹ igho rẹ idọnọ ọfuanfon kẹ. 6 Ọtiọyena ọ da rhọnvwe, kọ guọnọ ọke ro shephiyọ rọ sa vwọ shẹ kẹ ayen rẹ ihwo vwo jẹmrẹ.

7 Ẹdẹ rẹ orẹ rẹ Ibrẹdi ro Jephuo na de rhi te, ẹdẹ re vwo ze izobo rẹ Ọwanvrẹ na; 8 ọtiọyena Jesu de ji Pita vẹ Jọn, ọ da ta kẹ ayen nẹ: ‘Ovwan yanran re muegbe rẹ Orẹ rẹ Ọwanvrẹ rẹ avwanre cha re na phiyotọ kẹ avwanre.” 9 Ayen da ta kẹ nẹ: “Tivọ yen wọ guọnọre nẹ avwanre de muegbe rọyen?” 10 Ọ da ta kẹ ayen nẹ: “Nighere! Ọke rẹ ovwan da ro evunrẹ orere na, ọshare ọvo ro mu ochẹ rẹ ame cha vwa ovwan. Ovwan nene ro evunrẹ uwevwin rọ roro. 11 Ovwan me ta kẹ ọrovwuwevwin na nẹ, ‘Oyono na tare nẹ: “Tivọ yen uvun rẹ erhorha na hepha, re me vẹ idibo mẹ da sa re Orẹ rẹ Ọwanvrẹ na?”’ 12 Ọshare na che dje uvun rode ọvo kẹ ovwan vwẹ obenu, ra rhuẹrẹ fia. Ovwan muegbe rọyen vwẹ etiyin.” 13 Ọtiọyena ayen da yanran, ayen da mrẹ kirobo rọ ghwa vuẹ ayen na, ayen de muegbe vwọ kẹ Orẹ rẹ Ọwanvrẹ na.

14 Ọtiọyena unọke na vwo te, ọ vẹ iyinkọn na de chidia imẹjẹ. 15 Ọ da ta kẹ ayen nẹ: “Mi vwo owenvwe ọgangan re me vẹ ovwan vwọ re Orẹ rẹ Ọwanvrẹ nana tavwen me ke rioja; 16 kidie me ta kẹ ovwan nẹ, me rha cha riọ ọfa-a, bẹsiẹ ro vwo rugba vwẹ Uvie rẹ Ọghẹnẹ na.” 17 Rọ vwọ reyọ uko ọvo, ọ da kpẹvwẹ Ọghẹnẹ, ọ da tanẹ: “Ovwan reyọ ọnana rere ovwan muo kẹ ohwohwo vwẹ ohri rẹ ovwan, 18 kidie me ta kẹ ovwan nẹ, vwo nẹ ọke nana yanran, me rha cha da oka rẹ udi nana ra vwẹ ivaini vwo ru na-a, bẹsiẹ rẹ Uvie rẹ Ọghẹnẹ vwọ rhe.”

19 Vwọba, ọ da reyọ ibrẹdi, ọ da kpẹvwẹ Ọghẹnẹ, o de bro, ọ da vwọ kẹ ayen, ọ da tanẹ: “Ọnana mudiaphiyọ ugboma mẹ, ra cha vwọ kpahotọ fikirẹ ovwan. Ovwan rhe ruẹ ọnana vwọ karophiyọ ovwẹ.” 20 O de ji ru ọtiọyen kpahen uko na ọke rẹ ayen vwọ riemu rẹ ovwọnvwọn na nu, ọ da tanẹ: “Uko nana mudiaphiyọ ọphọ kpokpọ na, ra rere womarẹ ọbara mẹ re che ku kuotọ fikirẹ ovwan.

21 “Ẹkẹvuọvo nighere! obọ rẹ ohwo rọ cha shẹ vwẹ vẹ ovwẹ herọ vwẹ imẹjẹ na. 22 Kidie vwọrẹ uyota, Ọmọ rẹ ohwo na yanran kirobo re brorhiẹn rọyen nure; dedena okpetu rode vwọ kẹ ohwo yena ra wan oma rọyen shẹ!” 23 Ọtiọyena kẹ ayen ta ota kẹ ohwohwo kpahan ohwo rọ ghene guọnọ ru ọnana vwẹ usun rayen.

24 Ẹkẹvuọvo, aphro ọgangan da je vwomaphia vwẹ ohri rayen vwọ kpahen ohwo re niri nẹ ọyen ma rho vwẹ usun rayen. 25 Ẹkẹvuọvo ọ da ta kẹ ayen nẹ: “Ivie rẹ ẹgborho na vwẹ oma ruẹ inini vwẹ enu rayen, e se ihwo ri vwo ogangan vwẹ enu rayen Iruẹse. 26 Ẹkẹvuọvo ovwan dia ọtiọye-en. Ukperẹ ọtiọyen, e jẹ ọ rọ ma rho vwẹ ohri rẹ ovwan dia kerẹ ọ rọ ma hanvwe, rere ọ rọ kobaro dia kerẹ ọ ro gbodibo. 27 Ọvọ yen ma rho, ọ rọ riemu* gbanẹ ọ ro gbodibo?* Ọ dia ọ rọ riemu?* Ẹkẹvuọvo me hẹ ohri rẹ ovwan kerẹ ọ ro gbodibo.*

28 “Ẹkẹvuọvo ovwan yen ihwo ri churu mu vwe vwevunrẹ edavwini mẹ; 29 mi nene ovwan re ọphọ kirobo rẹ Ọsẹ mẹ ji nene uvwe re ọphọ rẹ Uvie ọvo, 30 rere ovwan sa vwọ re je da vwẹ imẹjẹ mẹ vwevunrẹ Uvie mẹ, ji chidia ekete vwo guẹdjọ rẹ uvwiẹ 12 rẹ Izrẹl.

31 “Saimọn, Saimọn, nighere! Eshu tare nẹ a vwẹ ovwan eje kẹ ọyen rere ọ frẹ ovwan kerẹ iwiti. 32 Ẹkẹvuọvo me rẹ orẹ fiki wẹ nure, rere esegbuyota wẹn vwo je yeghe; vwọ kẹ wẹ, ọke wo de rhivwin rhe, wọ me bọn iniọvo wẹn gan.” 33 Ọ da ta kẹ nẹ: “Ọrovwori, me choma mi vwo nene uwe kpo uwodi ji nene uwe ghwu.” 34 Ẹkẹvuọvo ọ da tanẹ: “Me ta kẹ wẹ, Pita, nẹ ọhọ* che bo nonẹna-a, bẹsiẹ wọ vwọ sen abọ erha nẹ wọ riẹn vwẹ-ẹ.”

35 Ọ da je ta kẹ ayen nẹ: “Ọke mi vwo ji ovwan yanran jẹ ovwan ghwa ekpu rẹ igho kugbe ekpu rẹ emu kugbe isabato-o, emu vuọvo kanre ovwa-an, gbanẹ emu kanre ovwan?” Ayen da tanẹ: “Ẹjo!” 36 Ọ da ta kẹ ayen nẹ: “Ẹkẹvuọvo asaọkiephana, e jẹ ohwo ro vwo ekpu rẹ igho muo, ọtiọyen ji te ekpu rẹ emu, e jẹ ohwo ro vwo ọlọkọ-ọ shẹ ewun rẹ obotafe rọyen rere ọ dẹ ọvo. 37 Kidie me ta kẹ ovwan nẹ, obo re siri che rugba vwẹ oma mẹ nẹ, ‘E kerire ba ihwo ri jurhi ẹyọnrọn.’ Kidie ọnana ruẹgba vwọ kpahan ovwẹ re.” 38 Ayen da tanẹ: “Ọrovwori, nighere! elọkọ ivẹ hẹ etinẹ.” Ọ da ta kẹ ayen nẹ: “I teri.”

39 Ro vwo vrẹn nẹ etiyin, o de kpo Ugbenu rẹ Oliv kirobo rẹ ẹkuruemu rọyen hepha, idibo na de ji nene. 40 Ayen vwo te asan na, ọ da ta kẹ ayen nẹ: “Ovwan rha nẹrhovwo rere ovwan vwo jẹ ọdavwini ẹruọ.” 41 Ọ da yanjẹ ayen vwo kpo obaro emerha, o de shiguẹ, kọ nẹrhovwo, 42 ọ da tanẹ: “Ọsẹ, wọ da guọnọ, bi uko nana sheri kẹ vwẹ. Dedena jẹ ọhọre wẹn rugba, ọ dia ọmẹ-ẹ.” 43 Amakashe ọvo ro nẹ obodjuvwu rhe da vwomaphia kẹ, ọ da bọn gan. 44 Ẹkẹvuọvo kidie nẹ ẹwẹn rọyen yanghan ku, o de muomaphiyọ ẹrhovwo ẹnẹ na ganphiyọ; ọdja rọyen da rhe họhọ ọbara ro suẹn kuotọ. 45 Rọ vwọ nẹrhovwo nu, o de bru idibo na ra, ọ da mrẹ nẹ ayen go ovwerhẹn, oma bru ayen ku fikirẹ uvweri. 46 Ọ da ta kẹ ayen nẹ: “Diesorọ ovwan vwọ vwerhẹn? Ovwan vrẹn, ovwan rha nẹrhovwo, rere ovwan vwo jẹ ọdavwini ẹruọ.”

47 Rọ je vwọ ta ota na, nighere! ọshare re se Judas, ọvo vwẹ usun rẹ Ihwivẹ na de sun ihwo buebun rhe, o de sikẹrẹ Jesu rọ vwọ fiọnfiọn. 48 Ẹkẹvuọvo Jesu da ta kẹ nẹ: “Judas, wọ vwẹ unuẹfiọnfiọn vwọ shẹ Ọmọ rẹ ohwo?” 49 Ọke rẹ ihwo re riarierẹ phiyọ vwọ mrẹ obo re cha phia, ayen da tanẹ: “Ọrovwori, avwanre vwẹ ọlọkọ vwo nene ayen họnre?” 50 Ọvo vwẹ usun rayen tobọ nyavwe orhọ rẹ obọrhen rẹ odibo rẹ orherẹn rode na no. 51 Ẹkẹvuọvo Jesu da kpahen nẹ: “O teri.” O de djobọte orhọ na, o de sivwon. 52 Jesu da ta kẹ irherẹn ride na kugbe erevwẹrote erhẹrotọ rẹ uwevwin rẹ ẹga na kugbe ekpako ri bruro rhe etiyin nẹ: “Ovwan rhere vẹ elọkọ kugbe ibiurhe rhi mu vwe kerẹ oji? 53 Ọke re me vẹ ovwan vwọ hẹ evunrẹ uwevwin rẹ ẹga na kẹdi kẹdẹ, ovwan djobọte vwe-e. Ẹkẹvuọvo ọnana unọke rẹ ovwan kugbe ọ rẹ ogangan rẹ ebri na.”

54 Ayen de muo, ayen de suon yanran, ayen da reyọ kpo evunrẹ uwevwin rẹ orherẹn rode na; jẹ Pita nene vwẹ ugboko. 55 Ọke rẹ ayen vwo koko erhanre phiyọ vwẹ uherevie rẹ egodo na ji chidia kugbe, Pita chidia ohri rayen. 56 Ẹkẹvuọvo odibo ọmọtẹ ọvo vwọ mrẹ nẹ ọ dia erhanre na, ọ da nabọ no, ọ da tanẹ: “Ọshare nana vẹ ọyen jẹ usun.” 57 Ẹkẹvuọvo ọ da siọn, rọ vwọ tanẹ: “Me riẹnrẹ-ẹ, aye na.” 58 Ọmọke krẹn vwọ wan nu, ohwo ọfa da mrẹ, ọ da tanẹ: “Wẹwẹ jẹ ọvo vwẹ usun rayen.” Ẹkẹvuọvo Pita da ta: “Ọshare na, me dia ọvo vwẹ usun raye-en.” 59 Omarẹ unọke ọvo vwọ wan nu, ọshare ọfa kọ kanroma phiyotọ tanẹ: “Aphro herọ-ọ, ọshare nana vẹ ọyen jẹ usun, kidie vwọrẹ uyota, ọyen ohwo ri Galili!” 60 Ẹkẹvuọvo Pita da ta: “Ọshare na, me riẹn oborẹ wọ ta na-a.” Ugege yena rọ je vwọ ta ota na, ọhọ* de bo. 61 Ọtiọyena, Ọrovwori na de kuomarhẹriẹ, o de ni Pita, Pita da karophiyọ eta rẹ Ọrovwori na, ọke rọ vwọ ta kẹ nẹ: “Tavwen ọhọ* ki bo nonẹna, wọ cha sen vwẹ abọ erha.” 62 Ọ da ro otafe, ọ da viẹ gangan.

63 Asaọkiephana ihwo ri mu Jesu na ke reyọ vwọ jehwẹ jẹ ayen ghwiẹ; 64 ọke rẹ ayen vwo rhurhu opharo rọyen nu, kẹ ayen dje ẹnẹnọ nẹ: “Mraro! Ono yen ghwiẹ wẹ?” 65 Ayen da je ta eta ẹgua efa buebun kpahọn.

66 Ọke vwo rhie, ọghwẹgbe rẹ ekpako rẹ ihwo na, te irherẹn ride vẹ isiẹbe na de koko, ayen da reyọ kpo evunrẹ ọguan ri Sanhẹdrin rayen, ayen da tanẹ: 67 “Ọ da dianẹ wẹwẹ yen Kristi na, vuẹ avwanre.” Ẹkẹvuọvo ọ da ta kẹ ayen nẹ: “Me da tobọ vuẹ ovwan, ovwan che se gbuyota kakaka-a. 68 Vwọba, me da nọ ovwan onọ, ovwan cha kpahe-en. 69 Ẹkẹvuọvo, vwo nẹ ọke nana yanran, Ọmọ rẹ ohwo na che chidia obọrhen rẹ Ọghẹnẹ rọ vọnre vẹ ẹgba na.” 70 Ọtiọyena ayen eje da tanẹ: “Wẹwẹ yen Ọmọ rẹ Ọghẹnẹ na?” Ọ da ta kẹ ayen nẹ: “Ovwan komobọ yen tanẹ mẹvwẹ ọyen.” 71 Ayen da tanẹ: “Diesorọ avwanre vwọ rhoma guọnọ iseri efa? Kidie avwanre komobọ nyoro nẹ unu robọ rọyen rhe.”