Mak

12 Ọyena vwọ wan nu, ọ da vwẹ idje vwọ ton ota ẹta phiyọ kẹ ayen nẹ: “Ọshare ọvo kọn ogba rẹ ivaini, ọ da gbogba riariẹ phiyọ, ọ da tọn asan re de mie iwaini phiyọ, ọ da bọn uwevwin ọvo ro kpenu phiyọ; o de siobọno vwọ kẹ eghwẹrẹ, o de kpo isiorho. 2 Ọke ra cha vwọ kọrọ ayen vwo te, o de ji odibo rọyen ọvo bru eghwẹrẹ na ra, ra reyọ evo vwẹ usun rẹ emamọ rẹ ogba rẹ ivaini na mie ayen. 3 Ẹkẹvuọvo ayen de muo, ayen de hwe, ayen de siobọno yanran vẹ abọ fefe. 4 Ọ da rhoma ji odibo ọfa bru ayen ra, ayen da ghwiẹ uyovwin rẹ ọyena je phọphọ. 5 O de ji ọfa yanran, ayen da teyọn hwe, o ji ji efa buebun, ayen hwe evo vwẹ usun rayen ehwe rẹ ugbobọ, ayen da rha teyen efa vwẹ usun rayen hwe. 6 Ọvo ji chekọ, ọmọ ro vwo ẹguọnọ rọyen. Ukuotọ rọyen o de jo bru ayen ra, ọ da ta kẹ oma rọyen nẹ, ‘Ayen che muọghọ kẹ ọmọ mẹ.’ 7 Ẹkẹvuọvo eghwẹrẹ na da ta kẹ ohwohwo nẹ, ‘Ọnana yen ọriuku na. Yanrhe, e jẹ avwanre hwe, rere uku na dia ọ rẹ avwanre.’ 8 Ọtiọyena ayen de muo, ayen da teyọn hwe, ayen de do phiyọ otafe rẹ ogba rẹ ivaini na. 9 Die yen ohwo ro vwo ogba rẹ ivaini na che ru? Ọ cha rhe rhi hwe eghwẹrẹ na, ọ me vwẹ ogba rẹ ivaini na kẹ ihwo efa. 10 Ovwan ji rhi se vwẹ isiesi ọfuanfon na dẹvo nẹ: ‘Ukuta rẹ ihwo re bọn uwevwin na senre, kọyen rhoma rhe dia osusu vwẹ ubienyẹ.* 11 Obọ ri Jihova* yen ọnana nurhe, ọ da je dia igbevwunu vwẹ ẹro rẹ avwanre’?”

12 Ọtiọyena kẹ ayen guọnọ shabọ phiyọ,* ẹkẹvuọvo oshọ rẹ otu na muẹ ayen, kidie ayen riẹnre nẹ ayen yen o vwo vwẹ ẹwẹn vwo ru udje na. Ọtiọyena ayen da yan jovwo yanran.

13 Ọyena vwọ wan nu, ayen de ji ihwo ri Farisi evo kugbe otu ri nene Hẹrọd bro ra, rere ayen sa vwọ mrẹ asan vwẹ ota rọyen yọnrọn. 14 Enana vwo te oboyin, ayen da ta kẹ nẹ: “Oyono, avwanre riẹnre nẹ wẹwẹ ohwo rẹ uyota, wọ guọnọ ẹroesiri rẹ ohwo vuọvo-o, kidie ọ dia oborẹ ihwo hepha vwẹ otafe yen wo nẹ-ẹ, ẹkẹvuọvo wo yono idjerhe rẹ Ọghẹnẹ vwo nene uyota na. Urhi rhọnvwere nẹ a hwosa uyovwin kẹ Siza, gbanẹ ọ rhọnvwere-e?* 15 Ofori nẹ avwanre hwa gbanẹ avwanre hwa-a?” Rọ vwọ riẹn omeru rayen, ọ da ta kẹ ayen nẹ: “Diesorọ ovwan vwọ davwen ovwẹ nẹ? Ovwan reyọ idinarọs* ọvo rhe vwe rere mi no.” 16 Ayen da vwẹ ọvo kẹ, ọ da ta kẹ ayen nẹ: “Ọnana uhoho kugbe isiesi rẹ ono?” Ayen da ta kẹ nẹ: “I ri Siza.” 17 Jesu da ta kẹ ayen nẹ: “Ovwan hwa erọnvwọn ri Siza vwọ kẹ Siza, ẹkẹvuọvo erọnvwọn rẹ Ọghẹnẹ vwọ kẹ Ọghẹnẹ.” O de gbe ayen unu.

18 Asaọkiephana ihwo ri Sadiusi na re tanẹ evrẹnushi herọ-ọ, da rhe rhe nọ nẹ: 19 “Oyono, Mosis siro kẹ avwanre nẹ, siẹrẹ oniọvo rẹ ohwo de ghwu yanjẹ aye vwo jẹ o vwiẹ ọmọ-ọ, e jẹ oniọvo rọyen reyọ aye na rere o vwiẹ emọ kẹ oniọvo rọyen na. 20 O vwo iniọvo ighwrẹn. Ọrẹsosuọ na reyọ aye, ẹkẹvuọvo ọ yanjẹ ọmọ vuọvo vwo ọke ro vwo ghwu-u. 21 Ọrivẹ na da rọvwọn ẹkẹvuọvo ọ yanjẹ ọmọ vuọvo vwo ọke ro vwo ghwu-u, ọtiọyen ji te ọrerha. 22 Ighwrẹn na eje yanjẹ ọmọ vuọvo vwo-o. Ukuotọ rọyen eje, aye na de ji ghwu. 23 Vwevunrẹ evrẹnushi na, aye rẹ ono yen ọ cha dia? Kidie ayen ihwo ighwrẹn na vwiro ru aye.” 24 Jesu da ta kẹ ayen nẹ: “Ọ dia ọnana yen sorọ ovwan vwo roro chọ na, kidie ovwan riẹn Isiesi Ọfuanfon na yẹrẹ ẹgba rẹ Ọghẹnẹ-ẹ? 25 Kidie ọke rẹ ayen de vrẹn nẹ ughwu, eshare rọvwọ-ọn, a je vwẹ eya kpo orọnvwe-e, ẹkẹvuọvo ayen pha kerẹ emekashe rehẹ idjuvwu na. 26 Ẹkẹvuọvo vwọ kpahen irivwin ra cha kpare vrẹn na, ovwan ji rhi se vwẹ ọbe ri Mosis, vwẹ ikuegbe ro shekpahen umurhe ro vwo inwe na, nẹ Ọghẹnẹ ta kẹ nẹ: ‘Mẹvwẹ Ọghẹnẹ rẹ Ebraham, Ọghẹnẹ rẹ Aizik kugbe Ọghẹnẹ ri Jekọp’? 27 Ọyen Ọghẹnẹ, ọ dia ọ rẹ ihwo ri ghwuru-u, ẹkẹvuọvo ọ rẹ ihwo ri yerẹn. Ovwan roriro chọ mamọ.”

28 Ọvo vwẹ usun rẹ isiẹbe na rọ rhere, ro ji nyo rẹ ayen vwọ phraphro, vwọ riẹn nẹ ọ kpahen kẹ ayen vwẹ idjerhe oyoyovwin, ọ da nọ nẹ: “Ọvọ yen ọrẹsosuọ* vwẹ usun rẹ iji na eje?” 29 Jesu da kpahen nẹ: “Ọrẹsosuọ yen, ‘Nyo, E Izrẹl, Jihova* Ọghẹnẹ rẹ avwanre na, Jihova* ọvuọvo, 30 wo mi vwo ẹguọnọ ri Jihova* Ọghẹnẹ wẹn vẹ ubiudu wẹn eje kugbe erhi* wẹn eje kugbe iroro wẹn eje kugbe ogangan wẹn eje.’ 31 Ọrivẹ kẹ ọna, ‘Vwo ẹguọnọ rẹ ọrivẹ wẹn kirobo wo vwo ẹguọnọ rẹ oma wẹn.’ O vwo iji ọfa rọ rho vrẹ enana-a.” 32 Osiọbe na da ta kẹ nẹ: “Oyono, wọ riẹn ta, ota wẹn na ji nene uyota na, ‘Ọyen Ọvuọvo, o vwo ọfa rọ họherọ-ọ’; 33 re vwo vwo ẹguọnọ rọyen vẹ ubiudu rẹ ohwo eje, vẹ ẹruọ rẹ ohwo eje, kugbe ogangan rẹ ohwo eje, kugbe re vwo vwo ẹguọnọ rẹ ọrivẹ rẹ ohwo kerẹ oma rẹ ohwo ghanre shesheri vwọ vrẹ izobo rẹ ẹtorhẹ kugbe izobo na eje.” 34 Jesu vwo noso nẹ ẹkpahọnphiyọ rọyen na vọnre vẹ aghwanre, ọ da ta kẹ nẹ: “Wo sherabọ kẹ Uvie rẹ Ọghẹnẹ na-a.” Ẹkẹvuọvo o rhe vwo ohwo vuọvo ro se fiudugberi nọ onọ ọfa-a.

35 Ẹkẹvuọvo, Jesu ji vwo yono vwẹ uwevwin rẹ ẹga na, ọ da tanẹ: “Diesorọ isiẹbe na vwọ tanẹ Kristi na ọmọ ri Devid? 36 Womarẹ ẹwẹn ọfuanfon na, Devid komobọ rọyen tare nẹ, Jihova* ta kẹ Ọrovwovwe nẹ: “Chidia obọrhen mẹ bẹsiẹ mi vwo phi ivwighrẹn wẹn phiyọ obotọ awọ wẹn.”’ 37 Devid komobọ rọyen sere Ọrovwori, kẹ mavọ yen ọ vwọ dia ọmọ rọyen?”

Jẹ otu buebun na kerhọ rọyen vẹ omavwerhovwẹn. 38 Vwevunrẹ uyono rọyen, ọ da tanẹ: “Ovwan nomaso kpahen isiẹbe na ri vwo omavwerhovwẹn rẹ ayen vwo kuẹ iwun igrongron phiyọ yan, je guọnọ uyeren vwẹ afieki 39 kugbe egbara rehẹ obaro* vwẹ sinagọg kugbe asan ri me titi vwẹ emuẹriọ rẹ ovwọnvwọn. 40 Ayen reyọ iwevwin* rẹ eyauku, je nẹrhovwo igrongron vwo dje oma phia.* Enana che rhiẹromrẹ ẹdjọeguo ọgangan.”*

41 O de chidia asan rọ da mrẹ ikpeti rẹ utoro na, ko nẹ otu na rẹ ayen vwo phiẹ igho phiyọ ikpeti rẹ utoro na, edafe buebun phiẹ igho buebun phiyọ. 42 Asaọkiephana ayeuku ọvo rọ dia ovwiogbere da rhe, o de phi igho itete ivẹ* ri te emuọvo-o phiyọ. 43 Ọtiọyena o de se idibo rọyen te oma, ọ da ta kẹ ayen nẹ: “Uyota me ta kẹ ovwan nẹ ayeuku nana rọ dia ovwiogbere na phi phiyọ bun vrẹ ihwo ri chekọ na eje ri phi igho phiyọ ikpeti rẹ utoro na. 44 Kidie ayen eje phi phiyọ vwo nẹ oborẹ ayen re chekọ, ẹkẹvuọvo aye na, vwẹ ẹdia rẹ ọkanrovwẹ rọyen,* yen o de phi erọnvwọn eje ro vwori phiyọ, erọnvwọn eje ro vwori vwẹ akpeyeren.”