Iruo rẹ Iyinkọn Na

27 Asaọkiephana re vwo brorhiẹn nu nẹ avwanre bi kpo Itali, a da vwẹ Pọl vẹ ihwo efa re mu phiyọ uwodi vwọ kẹ onotu rẹ isodje ọvo re se Juliọs rọhẹ ẹko rẹ Ọgọstọs. 2 Avwanre da ro okọ ọvo nẹ Adramitiọm rọ guọnọ biẹ kpo unuerhuru sansan vwẹ orhoma rẹ urhie rẹ ubrakpọ rẹ Esha, avwanre de bi yanran; Aristakọs ohwo ri Masidonia ro nẹ Tẹsalonaika rhe vẹ avwanre herọ. 3 Vwẹ ẹdẹ rọ vwọ kpahọn avwanre de te Saidọn, Juliọs de dje uruemu esiri kẹ Pọl, ọ da vwẹ uphẹn kẹ nẹ o bru igbeyan rọyen ra rere ayen nabọ vwẹrote.

4 Avwanre da ro okọ nẹ etiyin, avwanre de bi wan orhoma rẹ urhie ri Saiprọs, kidie odju na guọnọ muẹ avwanre rhivwin. 5 Avwanre de bi wan abadi na vwẹ orhoma rẹ urhie ri Silisha kugbe Pamfilia, avwanre de rhi te unuerhuru rọhẹ Maira vwẹ Laisia. 6 Etiyin kọyen onotu rẹ isodje na da mrẹ okọ ọvo ro nẹ Alẹzandria rhe, ro kpo Itali, ọ da tanẹ avwanre ruọ. 7 Avwanre vwo bi ememerha vwẹ ẹdẹ ibro nu, avwanre da vwẹ ẹgbẹgba te Nidọs. Kidie nẹ odju na jẹ avwanre bi phiọngu-un, avwanre de bi wan orhoma rẹ urhie ri Krit ro chukoku Salmọnẹ. 8 Avwanre vwọ vwẹ ẹgbẹgba biẹ vwẹ orhoma rẹ urhie na, avwanre de rhi te asan re se Omamọ Unuerhuru,* rọ kẹrẹ orere ri Lasea.

9 Ọke buebun wanre, asaọkiephana imuoshọ herọ siẹrẹ e de bi, kidie owẹnvwe echiro rẹ Ẹdẹ Arhuẹrẹ na tobọ wanvrẹ re, ọtiọyena Pọl da vwẹ iroroẹjẹ ọvo phia 10 kẹ ayen nẹ: “Ihwo na, me mrẹ nẹ oyan nana cha so oghwọrọ rode, ọ dia vwọ kẹ okọ na vẹ eghwa re mu phiyọ ọvo-o, ẹkẹvuọvo ji te arhọ* rẹ avwanre.” 11 Ẹkẹvuọvo onotu rẹ isodje na da kerhọ rẹ ohwo ro biẹ okọ na kugbe ohwo ro vwo okọ na, ukperẹ oborẹ Pọl ta na. 12 Rọ vwọ dianẹ unuerhuru na fo asan ra dia vwẹ ọke ekpahe-en na, otu ri me bun vwẹ usun rayen da tanẹ e bi nẹ etiyin, rere e no sẹ ayen sa ghwọrọ ọke ekpahen na vwẹ Foniks, unuerhuru ri Krit ro hirharoku obohwẹre ọnre vwẹ ẹbẹre ọnre va nẹcha kugbe obọrhen ọnre vwẹ ẹbẹre ọnre va nẹcha.

13 Ọke rẹ odju rẹ obọrhen ọnre na vwo djuẹ vwiọrọvwiọrọ re, kẹ ayen roro nẹ oborẹ ayen guọnọ na te ayen obọ nure, ayen da kpare ọtan na, ayen de bi wan orhoma rẹ urhie ri Krit. 14 Ẹkẹvuọvo ọmọke krẹn vwọ wan nu, odju ọgangan ọvo re se Yuroakuilo* de dju rhe. 15 Rẹ odju ọgangan na vwo djuẹ okọ na, avwanre rha sa gare uyovwin vi ẹbẹre ro djuẹ nẹcha na-a, avwanre da vwẹ uphẹn kẹ, o de mu avwanre nene oma. 16 Avwanre de bi kpakpata kẹrẹ otọ otete ọvo rẹ ame riariẹ phiyọ re se Kauda, dedena ẹgbẹgba yen avwanre se vwo sivwin okọ otete re kpono nene oma vwẹ obuko okọ na. 17 Ẹkẹvuọvo ọke rẹ ayen vwo mu okọ otete na ro evun rọyen nu, ayen da vwẹ erọnvwọn gba okọ na, kidie oshọ muẹ ayen nẹ okọ na che djotọ vwẹ Sẹtis,* ayen da lọrọ amwa rẹ okọ na rhe otọ, odju na ko muẹ avwanre nene oma. 18 Kidie nẹ odju ọgangan na muẹ avwanre cha muẹ avwanre kpo, vwẹ ẹdẹ rọ vwọ kpahọn, kẹ ayen ruẹ oborẹ okọ na sa vwọ pharhe. 19 Vwẹ ẹdẹ rerha, ayen ọvo da vwẹ obọ rayen vwo do ifi rẹ okọ na kufia.

20 Ọke rẹ avwanre vwo jẹ ọnre yẹrẹ isio ẹmrẹ vwẹ ẹdẹ buebun re, jẹ ogiribo ọgangan ọvo lagha avwanre, kọ ghwa họhọ nẹ avwanre rhe vwo iphiẹrophiyọ rẹ usivwi-in. 21 Ọke rẹ ayen vwọ vwẹ evun fefe dia vwẹ ọke grongron nu, Pọl de mudia ohri rayen, ọ da tanẹ: “Ihwo na, mane kẹ ovwan kerhọ rẹ uchebro mẹ nẹ e biẹ nẹ Kriti-i, ovwan rha rioja rẹ oghwọrọ rode nana rọ nẹrhẹ enana ejobi va ovwan abọ na-a. 22 Dedena asaọkiephana mi jiriro kẹ ovwan nẹ ovwan fiudugberi, kidie o vwo ohwo* vuọvo vwẹ usun rẹ ovwan na ro che ghwu-u, okọ na ọvo yen cha ghwọrọ. 23 Vwẹ ason nana, amakashe rẹ Ọghẹnẹ ro vwo vwe, re me je vwẹ ẹga ọfuanfon kẹ mudia kẹrẹ ovwẹ, 24 ọ da tanẹ: ‘Wọ djoshọ-ọ Pọl. Wo che mudia obaro ri Siza, nighere! Ọghẹnẹ vwẹ ihwo eje re vẹ owẹ gba hẹ okọ na kẹ wẹ nure.’ 25 Ọtiọyena ovwan fiudugberi, ihwo, kidie mi se Ọghẹnẹ gbuyota nẹ, ọ cha ghene phia kirobo ra vuẹ vwẹ na. 26 Ẹkẹvuọvo okọ na che shu vwẹ otọ ọvo rẹ ame riariẹ phiyọ.”

27 Asaọkiephana o rhi vwo te ason rihwẹne, jẹ odju na ji muẹ avwanre cha muẹ avwanre kpo vwẹ abadi rẹ Adria, vwẹ uherevie ason, ihwo ri biẹ okọ na ki no nẹ avwanre siẹkẹrẹ otọ ọvo re. 28 Ayen da vwanvwe oborẹ ame na kodo te, ayen da mrẹ nẹ ifatọm 20,* ọtiọyena ayen de bi kpo obaro emerha, ayen da rhoma vwanvwọ ayen da mrẹ nẹ ifatọm 15.* 29 Fikirẹ oshọ nẹ okọ na che dje ikuta, ayen de mu etan ẹne nẹ obuko okọ na do phiyọ ame, kẹ ayen rhẹro rọyen nẹ e jẹ ọke rhie. 30 Ẹkẹvuọvo ọke rẹ ihwo ri biẹ okọ na vwọ guọnọ djẹ nẹ okọ na, kẹ ayen lọrọ okọ otete na phiyọ abadi na, jẹ ayen me ruẹ kerẹsiẹ ra da mrẹ nẹ ayen guọnọ re muẹ etan nẹ obaro okọ na phiyọ ame na, 31 Pọl da ta kẹ onotu rẹ isodje na kugbe isodje na nẹ: “Jokpanẹ kẹ eshare nana daji okọ na, ovwan cha sa rhọ-ọ.” 32 Isodje na de bru ifi rẹ okọ otete na, o de she yanran.

33 Asaọkiephana rẹ ọke vwọ joma rhie re, Pọl da vwẹ uchebro kẹ ayen eje nẹ ayen riemu, rọ vwọ tanẹ: “Nonẹna yen ọ vwọ gba ẹdẹ 14 re rẹ ovwan vwọ hẹrhẹ vẹ ẹnwan, ovwan je riemu vuọvo-o. 34 Ọtiọyena mi jiriro kẹ ovwan nẹ ovwan riemu; me ta ọnana fikirẹ erhuvwu rẹ ovwan, kidie o vwo ohwo vuọvo vwẹ usun rẹ ovwan na rẹ ogẹton rẹ uyovwin rọyen che ghwru-u.” 35 Rọ vwọ ta ọnana nu, ọ da reyọ ibrẹdi, ọ da kpẹvwẹ Ọghẹnẹ vwẹ irharo rayen eje, o de bro, kọ riọ. 36 Ọtiọyena ayen ejobi de fiudugberi, kẹ ayen je riemu. 37 Avwanre ihwo* 276 yen evunrẹ okọ na. 38 Ọke rẹ ayen vwọ re evun vọn nu, ayen da kpare iwiti na do phiyọ abadi na rere okọ na vwọ pharhe.

39 Ọke vwo rhie, ayen se vughe otọ na-a, ẹkẹvuọvo ayen mrẹ asan ọvo rọ vọnre vẹ ehavwo, ayen de brorhiẹn nẹ ayen che bi okọ na kpo etiyin ọ da dia oborẹ ayen se ru. 40 Ayen de bru ifi rẹ etan na, i de she phiyọ abadi na, vwẹ ọke vuọvo na jẹ ayen rhan ifi rẹ uvi na; ọke rẹ ayen vwọ rhan amwa rẹ okọ na vwọ kẹ odju mu nu, ayen de bi kpo orhoma rẹ abadi na. 41 Ọke rẹ ayen vwo bi okọ na ro ekpẹn rọhẹ otọ rẹ abadi na, okọ na de djotọ, obaro rọyen da gbadje, o rhe se kpogho-o, ẹkẹvuọvo ọgbogho rẹ abadi na kọ fa obuko okọ na, ọ da guọghọ chẹghẹchẹghẹ. 42 Ọtiọyena, isodje na de brorhiẹn nẹ ayen che hwe ihwo re mu phiyọ uwodi na rere ọvuọvo vwẹ usun rayen vwo jẹ rhẹrhẹ, rẹ ayen da djẹ vabọ. 43 Ẹkẹvuọvo onotu rẹ isodje na guọnọ mu Pọl te asan rọ ra gbẹrhẹnẹdẹ, ọtiọyena ọ da da ayen obọ ji rere ayen vwo jẹ oborẹ ayen jiroro rọyen na eruo. Ọ da vuẹ otu re sa rhẹrhẹ nẹ ayen pho ro abadi na rere ayen ka rhẹrhẹ wontọ, 44 ihwo ri chekọ na me rha vwọ kpahen ayen, evo cha ro enu rẹ ephapha, efa me rha ro enu rẹ ẹbẹre rẹ okọ na. Ọtiọyena ayen eje de rhi te otọ gbẹrhẹnẹdẹ.