Iruo rẹ Iyinkọn Na

23 Rọ vwọ tẹnrovi Sanhẹdrin na, Pọl da tanẹ: “Iniọvo, ẹwẹn obrorhiẹn mẹ vuẹ vwẹ nẹ mi ru emu vuọvo rọ chọre vwẹ obaro rẹ Ọghẹnẹ rhi te nonẹna-a.” 2 Ọtiọyena orherẹn rode na Ananayas da tanẹ ihwo ri mudia kẹrẹ ghwiẹ unu rọyen. 3 Ọtiọyena Pọl da ta kẹ nẹ: “Ọghẹnẹ cha ghwiẹ wẹ, wẹwẹ rẹ igbẹhẹ ra vwẹ ọda ọfuanfon gbe na.* Wo chidia etiyin wo vwo gun vwe ẹdjọ nene Urhi na, jẹ wọ je vwẹ ọke vuọvo na vwo gbe Urhi na kuẹ ru wọ vwọ tanẹ a ghwiẹ vwẹ?” 4 Ihwo ri mudia etiyin da tanẹ: “Wo yinvwaro kpahen orherẹn rode rẹ Ọghẹnẹ?” 5 Pọl da tanẹ: “Iniọvo, me riẹnre nẹ orherẹn rode-e. Kidie e siro nẹ, ‘Wọ ta orharhe ota kpahen osun rẹ ihwo wẹ-ẹn.’”

6 Asaọkiephana ri Pọl vwọ riẹn nẹ ẹbẹre ọvo Sadiusi ẹkẹvuọvo ẹbẹre ro chekọ na ke rha Farisi, o de kperi phia vwevunrẹ Sanhẹdrin na nẹ: “Iniọvo, mẹvwẹ Farisi, ọmọ rẹ ihwo ri Farisi. Fikirẹ iphiẹrophiyọ rẹ evrẹnushi rẹ ihwo ri ghwuru na yen a vwọ reyọ ovwẹ vwo guẹdjọ na.” 7 Kidie nẹ ọ ta ọnana, aphro da vwomaphia vwẹ uvwre rẹ ihwo ri Farisi kugbe ihwo ri Sadiusi na, osikoko na da ghare. 8 Kidie ihwo ri Sadiusi na tanẹ evrẹnushi yẹrẹ amakashe yẹrẹ ẹwẹn herọ-ọ, ẹkẹvuọvo ihwo ri Farisi na rhọnvwephiyọ ayen eje.* 9 Ọtiọyena edo rode de mu, isiẹbe evo re dia e rẹ ẹko ri Farisi na de vrẹn mudia, kẹ ayen phraphro gangan nẹ: “Avwanre mrẹ emu vuọvo rọ chọre vwẹ oma rẹ ọshare nana-a, ẹkẹvuọvo ọ da dianẹ ẹwẹn ọvo yẹrẹ amakashe yen ta ota kẹ—.” 10 Asaọkiephana rẹ aphro na vwọ gan re, oshọ de mu onotu rode na nẹ ayen cha vwẹ abọ sha Pọl, ọ da ta kẹ isodje na nẹ ayen yanran ra vwẹ ẹgba reyọ nẹ ohri rayen, ayen reyọ rhe ogba rẹ isodje na.

11 Ẹkẹvuọvo vwẹ ason yena Ọrovwori na de mudia kẹrẹ, ọ da tanẹ: “Fiudugberi! Kidie kirobo ru wo soseri ro fiotọ kpahen ovwẹ vwẹ Jerusalẹm na, ọtiọyen wo ji che soseri vwẹ Rom.”

12 Ọke vwo rhie, ihwo ri Ju na da jiroro, ayen de duvwun iyorin kẹ oma rayen nẹ, kpẹsiẹ rẹ ayen hwe Pọl nu-u, ayen cha riemu yẹrẹ da ame-e. 13 Eshare re vrẹ 40 yen duvwun iyorin nana. 14 Eshare nana de bru irherẹn ride kugbe ekpako na ra, ayen da tanẹ: “Avwanre duvwun iyorin kẹ oma rẹ avwanre* nure nẹ avwanre cha re orọnvwọn vuọvo kakaka-a, bẹsiẹ rẹ avwanre vwo hwe Pọl. 15 Ọtiọyena ovwan vẹ Sanhẹdrin na gba vuẹ onotu rode na nẹ ọ reyọ rhe, kerẹsiẹ ra da mrẹ nẹ ovwan guọnọ fuẹrẹn ẹdjọ rọyen na fiotọ. Ẹkẹvuọvo tavwen o ki sikẹrẹ obonẹ jẹ avwanre choma rẹ avwanre vwo hwe nure.”

16 Ẹkẹvuọvo, ọmọ* rẹ oniọvo ri Pọl rẹ aye nyo kpahen iroro rẹ ayen jẹre rẹ ayen vwọ hwa hẹrhẹ na, ọ da ro ogba rẹ isodje na, ọ da niyẹnrẹn rọyen kẹ Pọl. 17 Pọl de se ọvo vwẹ usun rẹ inotu rẹ isodje na, ọ da tanẹ: “Reyọ eghene ọshare nana bru onotu rode na ra, kidie o vwo obo rọ guọnọ vuẹ.” 18 Ọtiọyena ọ da reyọ, o de suon bru onotu rode na ra, ọ da tanẹ: “Pọl re mu phiyọ uwodi na se vwe ọ da vuẹ vwẹ nẹ me reyọ eghene ọshare nana bru we rhe kidie o vwo obo rọ guọnọ vuẹ wẹ.” 19 Onotu rode na da yọnrọn obọ, ọ da reyọ kpo ọkọkọ ọ da nọ nẹ: “Die yen wọ guọnọ vuẹ vwẹ?” 20 Ọ da tanẹ: “Ihwo ri Ju na jiroro nẹ ayen cha vuẹ wẹ nẹ wọ reyọ Pọl rhe Sanhẹdrin na odẹ rọ cha na, kerẹsiẹ ra da mrẹ nẹ ayen guọnọ riẹn erọnvwọn efa kpahen ẹdjọ rọyen na. 21 Ẹkẹvuọvo wọ rhọnvwa kẹ aye-en kidie eshare re vrẹ 40 yen hwa phiyọ hẹrhẹ, ayen duvwun iyorin kẹ oma rayen* nẹ ayen cha riemu yẹrẹ da ame-e bẹsiẹ rẹ ayen vwo hwe; ayen choma asaọkiephana rẹ ayen vwọ hẹrhẹ rere wọ rhọnvwephiyọ oyare rayen na.” 22 Ọtiọyena onotu rode na da tanẹ eghene ọshare na kpo, ọke ro vwo jurhi kẹ nu nẹ: “Wo jẹ ohwo vuọvo riẹn nẹ wọ vuẹ vwẹ kpahen ọnana-a.”

23 O de se ivẹ vwẹ usun rẹ inotu rẹ isodje na, ọ da tanẹ: “Ovwan muegbe rẹ isodje 200, iguiyesi 70 kugbe eshare re yọnrọn oshuẹ 200 rere ayen yan kpo Sizaria vwẹ unọke rerha rẹ ason na.* 24 Vwọba, vwẹ iyesi kẹ Pọl ri che muo bru osun Fẹliks ra gbẹrhẹnẹdẹ.” 25 O de si ovuẹ nana phiyọ ọbe:

26 “Klọdiọs Laisias vwo rhe Ọrode na, Osun Fẹliks: Mi yeren uwe! 27 Ihwo ri Ju mu ọshare nana, kẹ ayen guọnọ teyọn hwe, ẹkẹvuọvo mẹ vẹ isodje mẹ de brokpakpa yanran re sivwon, kidie mi nyori nẹ ohwo ri Rom yen o ruẹ. 28 Kidie nẹ me guọnọ riẹn oborẹ ayen tare nẹ o ruru, me da reyọ kpo Sanhẹdrin rayen. 29 Me da mrẹ nẹ erọnvwọn re vwọso Urhi rayen yen ayen tare nẹ o ruru, ẹkẹvuọvo o ru emu vuọvo rọ cha nẹrhẹ e hwe yẹrẹ muo phiyọ uwodi-i. 30 Ẹkẹvuọvo mi ji ọshare nana bru we cha kpakpata, kidie a vuẹ vwẹ kpahen iroro rẹ umwemwu ra jẹ kpahọn, me je vuẹ ihwo re vwọsuọ na nẹ ayen rhi gun ẹkẹn unu rayen kpahọn kẹ wẹ.”

31 Ọtiọyena isodje na da reyọ Pọl kirobo re jurhi rọyen kẹ ayen, ayen de muo kpo Antipatris vwẹ ason. 32 Vwẹ ẹdẹ rọ vwọ kpahọn, ayen da vuẹ iguiyesi na nẹ ayen nene yanran, ẹkẹvuọvo isodje ri chekọ na de rhivwin kpo ogba rẹ isodje na. 33 Iguiyesi na da ro Sizaria ayen da vwẹ ọbe na vwọ kẹ osun na, ayen da je vwẹ Pọl vwọ kẹ. 34 O de se ọbe na, ọ da nọ Pọl ubrakpọ ro nurhe, ọ da rhe riẹn nẹ Silisha yen o nurhe. 35 Ọ da tanẹ, “Me cha nabọ nyo we ọke rẹ ihwo re vwọso owẹ na da rhe.” Ọ da tanẹ e phio phiyọ uwodi vwẹ ọguan rẹ ovie Hẹrọd.