Iruo rẹ Iyinkọn Na

21 Avwanre vwọ vwẹ ẹgbẹgba yanjẹ ayen vwo nu, avwanre da ro okọ, avwanre de bi phiọngun avwanre de rhi te Kọs. Vwẹ ẹdẹ rọ vwọ kpahọn, avwanre de te Rhodes, vwo nẹ etiyin avwanre de kpo Patara. 2 Avwanre vwọ mrẹ okọ ro kpo Fonisha, avwanre da ruọ, avwanre de bi yanran. 3 Ọke rẹ avwanre vwọ kparo mrẹ Saiprọs rọ dia otọ rẹ ame riariẹ phiyọ re, avwanre de chukokuo vwẹ obohwẹre, avwanre de bi kpo Siria, avwanre de rhi duvwun vwẹ Taya, asan ra da cha fa eghwa nẹ okọ na. 4 Avwanre da guọnọ idibo na, avwanre da mrẹ ayen, avwanre da dia etiyin ẹdẹ ighwrẹn. Ẹkẹvuọvo womarẹ ẹwẹn na, kẹ ayen djẹ Pọl ẹvuẹvuẹ nẹ o phi owọ phiyọ Jerusalẹmu-u. 5 Ọtiọyena ọke rẹ avwanre cha ghwọrọ vwẹ etiyin vwọ gba nu, avwanre de vrẹn nẹ etiyin, avwanre de mu oyan phiyọ, ẹkẹvuọvo ayen ejobi te eya te emọ na de nene avwanre rhi te ọke rẹ avwanre vwọ ro otafe rẹ orere na. Avwanre de shiguẹ totọ vwẹ orhoma rẹ abadi na, avwanre da nẹrhovwo, 6 avwanre da vuẹ ohwohwo nẹ kẹsiẹfao. Avwanre da ro okọ na, ayen de rhivwin kpo iwevwin rayen.

7 Vwo nẹ Taya avwanre de rhi bi te Tọlemais, avwanre de yeren iniọvo na, avwanre de nene ayen dia etiyin ẹdẹ ọvo. 8 Vwẹ ẹdẹ rọ vwọ kpahọn avwanre de vrẹn nẹ etiyin, avwanre de rhi te Sizaria, avwanre da ro uwevwin ri Filip rọ dia oghwoghwota na, ọvo vwẹ usun rẹ eshare ighwrẹn na, avwanre de nene dia. 9 Ọshare nana vwo emetẹ ẹne re je rọvwọ-ọn* re mraro. 10 Ẹkẹvuọvo avwanre vwọ dia etiyin ẹdẹ buebun nu, ọmraro ọvo re se Agabọs de nẹ Judia rhe. 11 O de bru avwanre rhe, ọ da reyọ umuehun ri Pọl vwọ gba abọ vẹ awọ romobọ rọyen, ọ da tanẹ: “Ọnana yen oborẹ ẹwẹn ọfuanfon na tare, ‘Ọtiọna yen ihwo ri Ju rehẹ Jerusalẹm cha gba ohwo ro vwo umuehun nana, kẹ ayen che phio phiyọ obọ rẹ ihwo rẹ ẹgborho na.’” 12 Ọke rẹ avwanre vwo nyo ọnana, avwanre vẹ ihwo rehẹ etiyin ke rẹ nẹ o kpo Jerusalẹmu-u. 13 Pọl da kpahen nẹ: “Die yen ovwan ruẹ na rẹ ovwan vwọ viẹ, rẹ ovwan vwọ guọnọ phiẹ ovwiẹrẹ phiyọ ovwẹ oma* kpahen obo ri mi brorhiẹn nẹ mi che ru? Ovwan vwo imuẹro nẹ, ọ dia ẹgba ra cha gba vwẹ ọvo yen me choma rọye-en, ẹkẹvuọvo me je choma mi vwo ghwu vwẹ Jerusalẹm fikirẹ odẹ rẹ Ọrovwori na Jesu.” 14 Ọke rẹ avwanre rhe se wene ẹwẹn rọye-en, avwanre da dobọji,* avwanre da tanẹ: “E jẹ ọhọre ri Jihova* rugba.”

15 Asaọkiephana rẹ ọnana vwọ wan nu, avwanre de muegbe vwọ kẹ oyan na, avwanre de mu oyan phiyọ kpo Jerusalẹm. 16 Idibo na evo vwẹ Sizaria ji nene avwanre, ayen da reyọ avwanre bru Mesin ohwo ri Saiprọs ra, ọvo vwẹ usun rẹ idibo ri ke kurhẹriẹ kidie uwevwin rọyen yen avwanre che won. 17 Avwanre vwo te Jerusalẹm, iniọvo na de dede avwanre vẹ aghọghọ. 18 Ẹkẹvuọvo vwẹ ẹdẹ rọ vwọ kpahọn Pọl de nene avwanre bru Jems ra, jẹ ekpako na eje hẹ etiyin. 19 O de yeren ayen, ọ da tuẹn ota ẹta phiyọ rọ vwọ nabọ gbikun rẹ erọnvwọn rẹ Ọghẹnẹ ruru vwẹ ohri rẹ ẹgborho na womarẹ iruo rẹ odibo egbe rọyen.

20 Ọke rẹ ayen vwo nyo ọnana, kẹ ayen vwẹ urinrin kẹ Ọghẹnẹ, ayen da ta kẹ nẹ: “Wọ mrẹrẹ oniọvo, uriorin buebun rẹ ihwo ri Ju yen segbuyota, ayen ejobi vwo oruru kpahen Urhi na. 21 Ẹkẹvuọvo ayen nyori ra vwọ tanẹ wo yono ihwo ri Ju eje rehẹ ohri rẹ ẹgborho na uyono rọ vwọso Urhi ri Mosis, wọ vwọ vuẹ ayen nẹ ayen yanvwe emọ rayen yẹrẹ nene ẹkuruemu na-a. 22 Ọtiọyena, kẹ die yen e che ru kpahọn? Kidie o muẹro nẹ ayen che nyo nẹ wọ rhire. 23 Ọtiọyena gbe ru oborẹ avwanre vuẹ wẹ: Avwanre vwo eshare ẹne ri ve ive. 24 Reyọ eshare na nene oma wo ru oma wẹn vẹ ọrayen fon vwo nene urhi na, wọ je hwosa rẹ oborẹ ayen ghwọrọre, rere ayen wanre uyovwin rayen muotọ. Ọke yena ihwo eje ke cha riẹn nẹ obo ra ta kpahen owẹ na dia uyota-a, ẹkẹvuọvo wọ yan dẹndẹn nene ọrhuẹrẹphiyotọ, wọ je yọnrọn Urhi na. 25 Vwọ kpahen ihwo ri segbuyota vwẹ ohri rẹ ẹgborho na, avwanre si orhiẹn rẹ avwanre vwo rhe ayen nẹ ayen kẹnoma kẹ erọnvwọn re vwo ze izobo kẹ edjọ, ọtiọyen ji te ọbara, eranvwe ra chahen ohọre rayen,* kugbe ọfanrhiẹn.”*

26 Ọtiọyena Pọl da reyọ eshare na vwẹ ẹdẹ rọ vwọ kpahọn, o de ru oma rọyen vẹ ọrayen fon vwo nene urhi, ọ da ro evunrẹ uwevwin rẹ ẹga na re ghwoghwo ọke rẹ ẹdẹ orufon re ru nene urhi na che vwo re, kugbe ọke re che vwo ze izobo fikirẹ ayen ohwo ọvuọvo.

27 Asaọkiephana rẹ ẹdẹ ighwrẹn na vwọ joma gba re, ihwo ri Ju ri nẹ Esha rhe vwọ mrẹ Pọl vwẹ uwevwin rẹ ẹga na, ayen da kpare ophu rẹ otu na ejobi ayen de shabọ phiyọ, 28 kẹ ayen kperẹ nẹ: “Ihwo ri Izrẹl, ovwan rhe cha avwanre uko! Ọnana yen ọshare ro yono ihwo eje vwẹ kasan kasan vwọsua ihwo rẹ avwanre, Urhi rẹ avwanre kugbe etinẹ na. Ma bra kparobọ, ọ tobọ reyọ ihwo ri Grik ro evunrẹ uwevwin rẹ ẹga na o de gbe asan ọfuanfon nana ẹgua.” 29 Kidie ayen ka mrẹ Pọl vẹ Trofimọs rọ dia ohwo rẹ Ẹfesọs vwevunrẹ orere na, kẹ ayen roro nẹ ọ reyerọ ro evunrẹ uwevwin rẹ ẹga na. 30 Edo rode de mu vwevunrẹ orere na eje, ihwo na da djẹ rhe ayen de shabọ phiyọ Pọl, ayen de kpono ro otafe rẹ uwevwin rẹ ẹga na, ugege yena e de bi ẹchẹ na gbe. 31 Ọke rẹ ayen vwọ davwẹngba rẹ ayen vwo hwe ghwu, ovuẹ de te onotu rode rẹ ẹko rẹ isodje na obọ nẹ Jerusalẹm eje yanghan ku; 32 ugege yena ọ da reyọ isodje kugbe inotu rẹ isodje ọ da djẹ bru ayen ra. Ọke rẹ ayen vwọ mrẹ onotu rode na vẹ isodje na, ayen da dobọ rẹ ehwe ri Pọl ji.

33 Ọtiọyena onotu na de sikẹrẹ ayen, o de mu Pọl, ọ da tanẹ a vwẹ ejọnrọn ivẹ vwọ kanrọ; ọ da nọ kpahen ohwo rọ hepha kugbe obo ro ruru. 34 Ẹkẹvuọvo ihwo evo vwevunrẹ otu na ki kperẹ orọnvwọn ọvo, jẹ efa kperẹ orọnvwọn ọfa. Rọ vwọ dianẹ o se nyo ẹkpahọnphiyọ ọvuọvo fiotọ-ọ fikirẹ ozighi na, ọ da tanẹ e muo kpo obo ogba rẹ isodje na. 35 Ẹkẹvuọvo ọke ro vwo te asan ra wan yerẹn kpenu na, isodje na de muo fikirẹ ozighi rẹ otu na, 36 kidie ihwo buebun ghwiẹ nene ayen, jẹ ayen kperẹ nẹ: “Ovwan teyọn hwe!”

37 Ọke rẹ ayen vwọ guọnọ reyọ rua ogba rẹ isodje na, Pọl da ta kẹ onotu rode na nẹ: “Wọ sa kẹ vwẹ uphẹn rere me vuẹ wẹ ota ọvo?” Ọ da tanẹ: “Wọ sa jẹ Grik? 38 Wẹwẹ dia ohwo rẹ Ijipt rọ vwọso usuon ọke ọvo rọ wanre ro de sun eshare 4,000 vẹ agbogun* ro evunrẹ aton na?” 39 Ọtiọyena Pọl da tanẹ: “Vwọrẹ uyota, mẹvwẹ ohwo ri Ju ro nẹ Tasọs ri Silisha rhe, ọmotọ rẹ orere ra nabọ riẹn. Ọtiọyena me rẹ wẹ, biko kẹ vwẹ uphẹn me vwọ ta ota kẹ ihwo na.” 40 Ọke rọ vwọ vwẹ uphẹn kẹ nu, Pọl de mudia asan ra wan yerẹn kpenu na, o de kpogho obọ kẹ ihwo na. Ọke rẹ asan ejobi vwọ fọ riẹi nu, ọ da vwẹ ejajẹ ri Hibru vwọ ta ota kẹ ayen, ọ da tanẹ: