Luk

2 Vwẹ ọke yena Siza Ọgọstọs de jurhi nẹ ihwo eje re dia otọrakpọ na re si odẹ phiyotọ. 2 (Odẹ esio phiyotọ rẹsosuọ nana phiare vwẹ ọke ri Kuirinọs vwọ dia osun ri Siria.) 3 Ihwo na eje de kpo dohwo dorere rọyen re si odẹ phiyotọ. 4 Vwọrẹ uyota, Josẹf ji vrẹn nẹ Galili, vwo nẹ orere ri Nazarẹt, o de kpo Judia kpo orere ri Devid re se Bẹtlẹhẹm, kidie ọyen ohwo rẹ uwevwin kugbe orua ri Devid. 5 Ọ vẹ Meri ra vwọ kẹ rọvwọn kirobo re ve kẹ, ro ji che vwiẹ kẹrẹkpẹ na, de re si odẹ phiyotọ. 6 Ayen vwọ hẹ oboyin, ọke ro che vwo vwiẹ de rhi te. 7 O de vwiẹ ọmọ rọyen, ọmọkpako na, ọ da vwẹ ẹbẹre emwa vwọ pharọ, o de muo sherhẹn asan rẹ eranvwe da riemu, kidie ayen mrẹ uvun vuọvo vwẹ asan re wonphiyọ na-a.

8 Vwẹ ẹkogho yena ọvuọvo na, isuigodẹ dia otafe, ayen je rhẹrẹ ichuru rayen vwẹ ason. 9 Siẹvuọvo na amakashe ri Jihova* de mudia obaro rayen, urinrin ri Jihova* de lo riariẹ ayen phiyọ, oshọ ko muẹ ayen gangan. 10 Ẹkẹvuọvo amakashe na da ta kẹ ayen nẹ: “Ovwan djoshọ-ọ, kidie nighere! mi ghwoghwo iyẹnrẹn esiri rẹ aghọghọ rode rẹ ihwo eje che vwo kẹ ovwan. 11 Kidie nonẹna e vwiẹ osivwin ọvo kẹ ovwan vwẹ orere ri Devid, ohwo rọ dia Kristi Ọrovwori na. 12 Ọnana yen oka rẹ ovwan che vwo vughe: Ovwan cha mrẹ ọmọboba ọvo ra vwẹ ẹbẹre emwa phare, re mu sherhẹn asan rẹ eranvwe da riemu.” 13 Siẹvuọvo na, otuofovwin rẹ odjuvwu buebun da vwomaba amakashe na, kẹ ayen jiri Ọghẹnẹ rẹ ayen vwọ tanẹ: 14 “Urinrin kẹ Ọghẹnẹ vwẹ asan ri kpenu vwẹ obenu na, vwẹ otọrakpọ ufuoma vwẹ ohri rẹ ihwo ri vwo ẹroesiri.”*

15 Ọtiọyena ọke rẹ emekashe na vwọ yanjẹ ayen vwo kpo obodjuvwu nu, isuigodẹ na ke ta kẹ ohwohwo nẹ: “E jẹ avwanre kpo Bẹtlẹhẹm asaọkiephana, ra mrẹ obo re phiare ri Jihova* nẹrhẹ avwanre riẹn na.” 16 Ayen de brokpakpa yanran, ayen da mrẹ Meri vẹ Josẹf kugbe ọmọboba na ro sherhẹn asan rẹ eranvwe da riemu. 17 Ayen vwọ mrẹ ọnana, ayen da niyẹnrẹn rẹ obo ra vuẹ ayen kpahen ọmọboba nana. 18 Oborẹ isuigodẹ na vuẹ ayen de gbe ihwo ejobi ri nyoro unu, 19 ẹkẹvuọvo Meri de phi eta nana eje phiyọ ẹwẹn, ko roro kpahan oborẹ enana eje mudiaphiyọ vwevunrẹ ubiudu rọyen. 20 Isuigodẹ na de rhivwin, kẹ ayen vwẹ urinrin kẹ Ọghẹnẹ ji jiro fikirẹ erọnvwọn eje rẹ ayen nyori je mrẹ kirobo ra vuẹ ayen na.

21 Ẹdẹ ẹrenren vwọ wan nu, ro vwo te ọke ra cha vwọ yanvwọ, e de se Jesu, rọ dia odẹ rẹ amakashe na mu kẹ tavwen a ke mrevun rọyen.

22 Vwọba, o vwo te ọke re che vwo ru ayen fon vwo nene Urhi ri Mosis, e de muo kpo Jerusalẹm, a da vwọ kpahotọ kẹ Jihova,* 23 kirobo re siro phiyọ Urhi ri Jihova:* “Kọmọkpako kọmọkpako rọ dia ọmọshare,* ke se ọfuanfon kẹ Jihova.”* 24 Ayen de ze izobo vwo nene obo ra tare vwẹ Urhi ri Jihova:* “erurẹ ivẹ yẹrẹ emọ ilekuku ivẹ.”

25 Nighere! ọshare ọvo hẹ Jerusalẹm re se Simiọn, ọshare nana ọvwata, o ji muọghọ okokodo kẹ Ọghẹnẹ, ọ hẹrhẹ ọke rẹ Ọghẹnẹ cha vwọ vwẹ onẹrhẹvwe kẹ Izrẹl, ẹwẹn ọfuanfon jehẹ oma rọyen. 26 Vwo kpobarophiyọ, Ọghẹnẹ djere kẹ womarẹ ẹwẹn ọfuanfon na nẹ o che ghwu-u, jokpanẹ kẹ ọ mrẹ Kristi ri Jihova* na tavwen. 27 Asaọkiephana womarẹ ẹgba rẹ ẹwẹn na, ọ da rhe evunrẹ uwevwin rẹ ẹga na, ọke rẹ ọsẹ vẹ oni rẹ ọmọ na Jesu vwo muo rhe rhi ru oborẹ urhi na guọnọre vwọ kẹ, 28 o de mu ọmọ na, o de jiri Ọghẹnẹ, rọ vwọ tanẹ: 29 “Asaọkiephana Ọrovwori ro Me Kpenu, wọ vwẹ uphẹn kẹ odibo wẹn nẹ ọ yanran vwọrẹ ufuoma kirobo wọ tare, 30 kidie ẹro mẹ mrẹ ọ ru wo che vwo sivwin ihwo wẹn na re 31 ru wo muegbe rọyen vwẹ obaro rẹ ihwo ejobi, 32 urhukpẹ ro che si oga* ro rhurhu ẹro rẹ ẹgborho na no, kugbe urinrin vwọ kẹ ihwo wẹn Izrẹl.” 33 Erọnvwọn ra ta kpahen ọmọ na ki gbe ọsẹ vẹ oni rọyen unu ọkieje. 34 Vwọba, Simiọn de bruba kẹ ayen, ọ da ta kẹ Meri oni ọmọ na nẹ: “Nighere! A vwẹ ọmọ nana vwo mu vwọ kẹ eshe kugbe evrẹn rẹ ihwo buebun vwẹ Izrẹl, rere ọ je vwọ dia oka ra cha ta ota vwọso 35 (e, a cha vwẹ ọlọkọ ogrongron vwo duvwun uwe* fi), rere a vwọ vwẹ iroro rọhẹ ubiudu rẹ ihwo buebun vwọ phia.”

36 Asaọkiephana o vwo ọmraro rẹ aye ọvo, Anna ọmọtẹ ri Fanuẹl, ro nẹ orua rẹ Asha rhe. Aye nana kpakore, ọ vẹ ọshare rọyen je dia kugbe vwẹ ẹgbukpe ighwrẹn rẹ ayen vwọ rọvwọn nu,* 37 ọyen ayeuku rọhẹ ẹgbukpe 84 asaọkiephana, kọke kọke yen o vwo kpo uwevwin rẹ ẹga na, rọ vwọ ga ẹga ọfuanfon te ason te uvo vẹ owẹnvwe echiro kugbe orẹ. 38 Vwẹ unọke vuọvo yena, o de sikẹrẹ, kọ kpẹvwẹ Ọghẹnẹ je ta ota kpahan ọmọ na kẹ ihwo eje re hẹrhẹ usivwin ri Jerusalẹm.

39 Ọtiọyena ọke rẹ ayen vwo ru erọnvwọn eje vwo nene Urhi ri Jihova* nu, ayen de rhivwin kpo Galili, vwo kpo orere robọ rayen Nazarẹt. 40 Jẹ ọmọ na rha rhuaphiyọ je ganphiyọ, ọ vọnre vẹ aghwanre, o ji vwo ẹroesiri rẹ Ọghẹnẹ ọkieje.

41 Asaọkiephana ọsẹ vẹ oni rọyen vwo ẹkuruemu rẹ ayen vwo kpo Jerusalẹm kukpe kukpe vwọ kẹ Orẹ rẹ Ọwanvrẹ na. 42 Ọke rọ vwọ hẹ ẹgbukpe 12, ayen da yanran kirobo rẹ ayen ruẹ jovwo vwẹ ọke rẹ orẹ na. 43 Ọke rẹ ẹdẹ rẹ orẹ na vwo re, rẹ ayen vwo rhivwin kpo, ọmọ na Jesu da daji Jerusalẹm, jẹ ọsẹ vẹ oni rọyen niroso-o. 44 Kẹ ayen roro nẹ ọ hẹ usun rẹ ihwo re yanran kuẹgbe na, ayen vwọ yan oyan rẹ ẹdọke ọvo nu, kẹ ayen guọnọ vwẹ ohri rẹ ihwo rẹ orua vẹ ihwo rẹ ayen vugheri. 45 Ẹkẹvuọvo kidie nẹ ayen mrẹrẹ-ẹ, ayen de rhivwin kpo Jerusalẹm, ayen da nabọ frẹkotọ guọnọ. 46 Ẹdẹ erha vwọ wan nu, ayen da mrẹ vwevunrẹ uwevwin rẹ ẹga na, o chidia ohri rẹ iyono na, rọ vwọ kerhọ rayen je nọ ayen enọ. 47 Ẹkẹvuọvo ẹruọ kugbe ẹkpahọnphiyọ rọyen gbe ihwo eje re kerhọ rọyen unu. 48 Asaọkiephana, ọke rẹ ọsẹ vẹ oni rọyen vwọ mrẹ, o de gbe ayen unu, oni rọyen da ta kẹ nẹ: “Ọmọ, diesorọ wo vwo ru avwanre ọtiọna? Mẹvwẹ vẹ ọsẹ wẹn guọnọ owẹ kpa kpa rhansiẹ.” 49 Ẹkẹvuọvo ọ da ta kẹ ayen nẹ: “Diesorọ ovwan vwọ guọnọ ovwẹ? Ovwan rha riẹn nẹ me cha dia evunrẹ uwevwin rẹ Ọsẹ mẹ?” 50 Ẹkẹvuọvo ayen vwo ẹruọ rẹ obo rọ vuẹ ayen na-a.

51 O de nene ayen, ayen de rhivwin kpo Nazarẹt, jẹ o ji muọghọ kẹ ayen* kirobo ro ruẹ jovwo. Vwọba, oni rọyen nabọ sẹro rẹ eta nana eje phiyọ ubiudu. 52 Jẹ aghwanre ri Jesu buẹnphiyọ, ọ rhuaphiyọ vwọrẹ ugboma, o ji vwo ẹroesiri rẹ Ọghẹnẹ vẹ ọ rẹ ihworakpọ.