Iruo rẹ Iyinkọn Na

2 Asaọkiephana vwẹ ẹdẹ rẹ Orẹ ri Pẹntikọst, ayen ejobi de koko vwẹ asan ọvo. 2 Siẹvuọvo na, edo ọvo de nẹ obodjuvwu rhe kerẹ edo rẹ odju ọgangan, ọ da vọn uwevwin na ejobi rẹ ayen chidia na. 3 Ayen da mrẹ ẹrẹnvwe re pha kerẹ erhanre re ghare oma phiyọ enu rẹ ayen ohwo ọvuọvo, 4 ayen ejobi da rhe vọn vẹ ẹwẹn ọfuanfon, kẹ ayen jẹ ejajẹ* sansan kirobo rẹ ẹwẹn na mu ayen vwọ jẹ.

5 Vwẹ ọke yena, ihwo ri Ju ri muọghọ okokodo kẹ Ọghẹnẹ ri nẹ ẹgborho ejobi rehẹ otọ rẹ odjuvwu na rhe dia Jerusalẹm. 6 Ọtiọyena ayen vwo nyo edo nana, ihwo buebun de koko, o de gbe ayen unu kidie ayen ohwo ọvuọvo nyo idibo na re jẹ ejajẹ robọ rayen. 7 Vwọrẹ uyota, o gbe ayen unu mamọ, ayen da tanẹ: “Nighere, ihwo nana ejobi re ta ota na ihwo ri Galili, gbanẹ ọ dia ọtiọyen? 8 Kẹ mavọ avwanre ohwo ọvuọvo rhe vwo nyo ejajẹ robọ rọyen?* 9 Ihwo ri Patia, Mid, kugbe Elam, ihwo re dia Mẹsopotemia, Judia kugbe Kapadosha, Pọntus kugbe ubrakpọ rẹ Esha, 10 Frigia kugbe Pamfilia, Ijipt kugbe ubrakpọ ri Libia rọ kẹrẹ Sairini, erhorha ri nẹ Rom rhe, ihwo ri Ju vẹ ihwo ri kurhẹriẹ kpo ẹga rẹ ihwo ri Ju, 11 ihwo ri Krit, kugbe ihwo rẹ Arebia—avwanre nyo ayen re vwẹ ejajẹ rẹ avwanre vwọ ta ota kpahen iruo rẹ igbunu rẹ Ọghẹnẹ.” 12 E, o gbe ayen ejobi unu, kẹ ayen ta kẹ ohwohwo nẹ: “Die yen ọnana mudiaphiyọ?” 13 Ẹkẹvuọvo, efa da vwẹ ayen jehwẹ tanẹ: “Ayen da iwaini rọ miẹmiẹ* vọn oma.”

14 Ẹkẹvuọvo Pita vẹ Uhwọvo na de vrẹn mudia, ọ da ta ota kẹ ayen vẹ upho ọgangan nẹ: “Ihwo ri Judia kugbe ovwan ihwo eje re dia Jerusalẹm, ovwan riẹn ọnana, ovwan me je nabọ kerhọ rẹ eta mẹ. 15 Vwọrẹ uyota, ọ dia udi yen muẹ ihwo nana kirobo rẹ ovwan ta na-a, kidie unọke rerha rẹ ẹdẹ na yen avwanre hepha na.* 16 Ukperẹ ọtiọyen, ọnana obo ra tare womarẹ ọmraro Joẹl nẹ: 17 ‘“Vwẹ ẹdẹ re koba na,” ọtiọyen Ọghẹnẹ tare, “Mi che ku ẹwẹn mẹ evo ku koka koka rẹ ihwo,* emeshare rẹ ovwan kugbe emetẹ rẹ ovwan ke cha mraro, ighene eshare rẹ ovwan ke cha mrẹ emramrẹ, eshare rẹ ovwan re kpakore ke cha vwerhẹn evwerhẹn, 18 me je cha tobọ ku ẹwẹn mẹ evo ku eviẹn mẹ rẹ eshare kugbe eviẹn mẹ rẹ eya vwẹ ẹdẹ yena, kẹ ayen cha mraro. 19 Ki mi che ru igbunu vwẹ obodjuvwu ji dje eka phia vwẹ otọrakpọ na—ọbara kugbe erhanre kugbe evwru rẹ ivwirhi. 20 Ọnre na ko che hirhephiyọ ebri, emeranvwe na mi rhe hirhephiyọ ọbara bẹsiẹ rẹ ẹdẹ rode rẹ urinrin ri Jihova* na cha vwọ rhe. 21 Kohwo kohwo ro se odẹ ri Jihova* ko vwo usivwin.”’

22 “Ihwo rẹ Izrẹl, ovwan nyo eta nana: Jesu ohwo ri Nazarẹt na ọyen ohwo rẹ Ọghẹnẹ dje kẹ ovwan vwẹ azagba womarẹ iruo re vọnre vẹ ẹgba kugbe igbevwunu kugbe eka rẹ Ọghẹnẹ wan oma rọyen ru vwẹ ohri rẹ ovwan, kirobo rẹ ovwan komobọ riẹnre. 23 Ọshare nana ra vwọ kpahotọ womarẹ ọhọre* rẹ Ọghẹnẹ kugbe oborẹ Ọghẹnẹ riẹnre jovwo* na, yen ovwan phi phiyọ obọ rẹ ihwo ri jurhi ẹyọnrọn, ovwan da kanrọ mu urhe, ovwan de hwe. 24 Ẹkẹvuọvo Ọghẹnẹ kparerọ nẹ ushi, ro vwo sio nẹ ọmiaovwẹ* rẹ ughwu, kidie ughwu cha sa gba siotọ-ọ. 25 Kidie Devid ta kpahọn nẹ: ‘Mi phi Jihova* phiyọ obaro mẹ ọkieje, kidie ọ hẹ obọrhen mẹ rere mi vwo je kpogho bẹdẹ. 26 Fikirẹ ọnana oma da vwerhen ubiudu mẹ, ẹrẹnvwe mẹ da je ghọghọ mamọ. Ke me* cha dia vẹ iphiẹrophiyọ; 27 kidie wọ cha yanjẹ uvwe* vwo vwevunrẹ Ushi-i* yẹrẹ vwẹ uphẹn kẹ ọ rọ fuevun kẹ wẹ nẹ o gbo-on. 28 Wo dje idjerhe rẹ arhọ kẹ vwẹ; wọ cha nẹrhẹ me vọn vẹ aghọghọ rode vwẹ obaro wẹn.’

29 “Iniọvo, we juvwe ta ota kẹ ovwan vẹ ugbomọphẹ kpahen ọgbuyovwin rẹ orua na Devid, nẹ o ghwuru e de sho, ushi rọyen je herọ rhi te nonẹna. 30 Kidie ọmraro yen o ruẹ, ọ je riẹn nẹ Ọghẹnẹ ve ive kẹ ọyen womarẹ iyorin eduvwon nẹ ọ cha vwẹ ọmọ rọyen ọvo* vwo chidia ekete rọyen, 31 ọ kparo mrẹ je ta ota kpahen evrẹnushi ri Kristi, nẹ a kpairoro vrẹ vwevunrẹ Ushi-i* yẹrẹ ugboma rọyen gbonri-i. 32 Ọghẹnẹ kpare Jesu nana nẹ ushi, avwanre eje soseri rẹ ọnana. 33 Ọtiọyena, kidie nẹ a kparerọ kpenu kpo obọrhen rẹ Ọghẹnẹ, Ọsẹ na je vwẹ ẹwẹn ọfuanfon ro veri na kẹ, kọyensorọ o vwo ku oborẹ ovwan mrẹre, rẹ ovwan ji nyo na phia. 34 Kidie Devid kpo obodjuvwu-u, ẹkẹvuọvo ọyen komobọ tare nẹ, ‘Jihova* ta kẹ Ọrovwovwe nẹ: “Chidia obọrhen mẹ 35 bẹsiẹ me vwọ vwẹ ivwighrẹn wẹn hwotọ kẹ wẹ chiyin.”’ 36 Ọtiọyena, e jẹ uwevwin rẹ Izrẹl ejobi riẹn vwọrẹ imuẹro nẹ, Jesu nana rẹ ovwan hwe mu urhe na yen Ọghẹnẹ vwo mu Ọrovwori kugbe Kristi.”

37 Ọke rẹ ayen vwo nyo eta nana, o de duvwun ayen te ubiudu, ayen da ta kẹ Pita vẹ iyinkọn ri chekọ na nẹ: “Iniọvo, die yen ofori nẹ avwanre ru?” 38 Pita da ta kẹ ayen nẹ: “Ovwan kurhẹriẹ rere e bru ovwan ohwo ọvuọvo phiyame vwẹ odẹ ri Jesu Kristi, rere a sa vwọ vwẹ imwemwu rẹ ovwan vwo ghovwo ovwan, ka vwẹ ẹserọphẹ rẹ ẹwẹn ọfuanfon na kẹ ovwan. 39 Kidie ovwan kugbe emọ rẹ ovwan, kugbe ihwo eje re dia asan oshesheri yen e ve ive na kẹ, ihwo eje ri Jihova* Ọghẹnẹ rẹ avwanre se se te oma.” 40 Ọ da je ta eta efa buebun vwo soseri ro fiotọ kẹ ayen, jẹ o jiro kẹ ayen nẹ: “Ovwan hẹrioma nẹ uvwiẹ umwemwu nana rere e sivwin ovwan.” 41 Ọtiọyena, e de bru ihwo ri rhiabọreyọ ota rọyen vẹ omavwerhovwẹn phiyame, ihwo* ri te omarẹ 3,000 da vwomaba ayen vwẹ ẹdẹ yena. 42 Kẹ ayen muomaphiyọ uyono rẹ iyinkọn na, vwoma kuẹgbe,* riemu kuẹgbe, je nẹrhovwo kuẹgbe ọkieje.

43 Vwọrẹ uyota, oshọ ko muẹ ihwo* ejobi, iyinkọn na ki ruẹ emu rẹ igbevwunu vẹ eka buebun. 44 Ihwo ejobi ri segbuyota de kuomakugbe, ayen de nene ohwohwo ghare erọnvwọn ejobi rẹ ayen vwori, 45 kẹ ayen shẹ etọ rayen kugbe erọnvwọn rẹ ayen vwori, ayen me ghare igho ro nuro rhe kẹ ihwo ejobi vwo nene oborẹ ohwo ọvuọvo guọnọre. 46 Nẹ ẹdẹ ra ro ẹdẹ kọyen ayen vwo kpo uwevwin rẹ ẹga na vẹ ẹwẹn ọvo, jẹ ayen riemu vwẹ iwevwin sansan ji rhievun ghara emu rayen vẹ aghọghọ rode, 47 jiri Ọghẹnẹ, je mrẹ ẹroesiri vwẹ obọ rẹ ihwo ejobi. Vwẹ ọke vuọvo na, jẹ Jihova* vwẹ ihwo re sivwẹn rhọ vwọ ba ayen kẹdi kẹdẹ.