Jọn

20 Vwẹ ẹdẹ rẹsosuọ rẹ udughwrẹn na, Meri Magdalini da rhiọ kpo asan ushi* na, rẹ asan ejobi ji vwo muebri na, ọ da mrẹ nẹ e mu ukuta na nẹ ushi* na re. 2 Ọtiọyena ọ da djẹ bru Saimọn Pita vẹ odibo ochekọ ri Jesu vwo ẹguọnọ rọyen na rhe, ọ da ta kẹ ayen nẹ: “Ayen mu Ọrovwori na nẹ ushi na re, jẹ avwanre riẹn asan rẹ ayen muro phiyọ-ọ.”

3 Ọtiọyena Pita vẹ odibo ochekọ na de mu oyan phiyọ kpo asan ushi na. 4 Ayen ihwo ivẹ na da ton onẹdjẹ phiyọ kugbe, ẹkẹvuọvo odibo ochekọ na djẹ gan nọ Pita, ọ da karọ te asan ushi na. 5 Ro vwo rhuẹn ni evun rọyen, ọ da mrẹ emwa iyoyovwin na vwẹ otọ vwẹ etiyin, ẹkẹvuọvo ọ ro evun rọye-en. 6 Saimọn Pita da je vwọ kpahọn rhe, ọ da ro evunrẹ ushi na. Ọ da mrẹ emwa iyoyovwin na vwẹ otọ vwẹ etiyin. 7 Amwa rọhẹ uyovwin rọyen jovwo na hẹ asan rẹ emwa ri chekọ ra vwọ gba na hepha-a, ẹkẹvuọvo e kpirhinro phiyọ asan obọ rọyen san. 8 Odibo ochekọ na ro ke te asan ushi na da je ruọ, ọ da mrẹ, o de segbuyota. 9 Kidie ayen ji rhi vwo ẹruọ rẹ isiesi ọfuanfon na nẹ o che vrẹn nẹ ughwu-u. 10 Ọtiọyena idibo na de rhivwin kpo iwevwin rayen.

11 Ẹkẹvuọvo, Meri ji mudia otafe kẹrẹ ushi na, jẹ ọ viẹ. Rọ vwọ viẹ na, o de rhuẹn ni evunrẹ ushi na, 12 ọ da mrẹ emekashe ivẹ ri ku iwun efuanfon phiyọ ri chidia asan rẹ ugboma ri Jesu hepha jovwo na, ọvo hẹ asan uyovwin na, ọvo hẹ asan awọ na. 13 Ayen da ta kẹ nẹ: “Aye, diesorọ wọ vwọ viẹ?” Ọ da ta kẹ ayen nẹ: “Ayen mu Ọrovwovwe na yanran re, jẹ me riẹn asan rẹ ayen muro phiyọ-ọ.” 14 Rọ vwọ ta ọnana nu, o de kuomarhẹriẹ, ọ da mrẹ Jesu ro mudia etiyin, ẹkẹvuọvo ọ riẹnre nẹ ọyen Jesu-u. 15 Jesu da ta kẹ nẹ: “Aye, diesorọ wọ vwọ viẹ? Ono yen wọ guọnọ?” Kidie nẹ aye na roro nẹ ọyen ohwo rọ vwẹrote ogba na, ọ da ta kẹ nẹ: “Ọga, ọ da dianẹ wẹwẹ yen muro yanran, vuẹ vwẹ asan ru wo muro phiyọ, rere mi muo reyọ.” 16 Jesu da ta kẹ nẹ: “Meri!” Ro vwo kuomarhẹriẹ, Meri da ta kẹ vwẹ Hibru nẹ: “Raboni!” (ro mudiaphiyọ “Oyono!”) 17 Jesu da ta kẹ nẹ: “Wo rhe churẹ mu vwe-e, kidie mi ji rhi kpo obenu bru Ọsẹ na ra-a. Ẹkẹvuọvo bru iniọvo mẹ ra rere wọ vuẹ ayen nẹ, ‘Mi kpo obenu brẹ Ọsẹ mẹ kugbe Ọsẹ rẹ ovwan ra, Ọghẹnẹ mẹ kugbe Ọghẹnẹ rẹ ovwan.’” 18 Meri Magdalini da ghwa iyẹnrẹn na bru idibo na rhe nẹ: “Me mrẹ Ọrovwori na re!” Ọ da vuẹ ayen obo rọ vuẹ rẹ.

19 Ọke vwọ yan sheri re vwẹ ẹdẹ yena, vwẹ ẹdẹ rẹsosuọ rẹ udughwrẹn na, ra je vwọ kanre ẹchẹ rẹ asan rẹ idibo na hepha fikirẹ oshọ rẹ ihwo ri Ju na, Jesu da rhe, o de mudia ohri rayen, ọ da ta kẹ ayen nẹ: “E jẹ ufuoma nene ovwan dia.” 20 Rọ vwọ ta ọnana nu, o de dje abọ rọyen vẹ ẹfẹn rọyen kẹ ayen. Ọtiọyena idibo na da ghọghọ rẹ ayen vwọ mrẹ Ọrovwori na. 21 Jesu da rhoma ta kẹ ayen nẹ: “E jẹ ufuoma nene ovwan dia. Kirobo rẹ Ọsẹ na ji vwe rhe na, ọtiọyena mi ji jẹ ovwan na.” 22 Rọ vwọ ta ọnana nu, o de phopho odju ku ayen, ọ da ta kẹ ayen nẹ: “Ovwan vwo ẹwẹn ọfuanfon. 23 Ovwan da vwẹ imwemwu rẹ ohwo vwo ghovwo, jẹ e vwo ghovwo; ovwan rha vwẹ imwemwu rẹ ohwo vwo ghovwo-o, e che vwo ghovwo-o.”

24 Ẹkẹvuọvo Tọmọs, ọvo vwẹ usun rẹ Ihwivẹ na, ọ re se Ejimẹ na vẹ ayen herọ ọke ri Jesu vwọ rhe-e. 25 Ọtiọyena idibo ri chekọ na ke ta kẹ nẹ: “Avwanre mrẹ Ọrovwori na re!” Ẹkẹvuọvo ọ da ta kẹ ayen nẹ: “Jokpanẹ ke me mrẹ unu* rẹ ipẹrẹn na vwẹ abọ rọyen, ri mi de duvwun urhiobọ mẹ phiyọ unu rẹ ipẹrẹn na, ji duvwun obọ mẹ phiyọ ẹfẹn rọyen, o vwo ọke vuọvo mi che vwo segbuyota-a.”

26 Ẹdẹ ẹrenren vwọ wan nu, idibo na da rhoma vwoma vwevunrẹ uwevwin, Tọmọs vẹ ayen herọ. Jesu da rhe dede nẹ a kanre ẹchẹ na, o de mudia ohri rayen, ọ da tanẹ: “E jẹ ufuoma nene ovwan dia.” 27 Ọyena vwọ wan nu, ọ da ta kẹ Tọmọs nẹ: “Phi urhiobọ wẹn phiyọ etinẹ rere wo ni abọ mẹ, reyọ obọ wẹn rere wo duvwon phiyọ ẹfẹn mẹ, wo rhe vwo ẹwẹn ivivẹ ọfa-a ẹkẹvuọvo segbuyota.” 28 Tọmọs da kpahen kẹ nẹ: “Ọrovwovwe kugbe Ọghẹnẹ mẹ!” 29 Jesu da ta kẹ nẹ: “Wọ vwọ mrẹ vwẹ na, wo segbuyota re? Omavwerhovwẹn dia vwọ kẹ ihwo re je mrẹ-ẹ, dedena jẹ ayen segbuyota.”

30 Vwọrẹ uyota, Jesu ji ru eka efa buebun vwẹ irharo rẹ idibo na re si phiyọ ukpirhin ọbe nana-a. 31 Ẹkẹvuọvo e si enana phiyotọ rere ovwan se vwo segbuyota nẹ Jesu yen Kristi na, Ọmọ rẹ Ọghẹnẹ, kugbe nẹ kidie nẹ ovwan segbuyota, kẹ ovwan se vwo arhọ womarẹ odẹ rọyen.