Matiu

6 “Ovwan nomaso rere ovwan vwo jẹ ophiọnphiọn rẹ ovwan eruo vwẹ obaro rẹ ihworakpọ rere ayen sa vwọ mrẹ ovwan; ọ rha dia ọtiọye-en, osaẹhwa vuọvo che nẹ obọ rẹ Ọsẹ rẹ ovwan rọhẹ obodjuvwu bru ovwan rhe-e. 2 Ọtiọyena ọke wọ da cha kẹ okẹ rẹ arodọnvwẹ,* wo hworo owanre* vwọ kobaro-o, kirobo rẹ ihwo rẹ omeru na ruẹ vwẹ sinagọg kugbe irhuvwun na, rere ihworakpọ sa vwọ vwẹ urinrin kẹ ayen. Uyota me ta kẹ ovwan nẹ, ayen vwo osa rayen vọnvọn nure. 3 Ẹkẹvuọvo vwọ kẹ wẹ, ọke wọ da kẹ okẹ rẹ arodọnvwẹ, wo jẹ obohwẹre wẹn riẹn oborẹ obọrhen wẹn ruẹ-ẹ, 4 rere okẹ rẹ arodọnvwẹ wẹn sa vwọ dia odjahọn. Ọke yena Ọsẹ wẹn rọ dia odjahọn de ni we na kọ cha hwosa kẹ wẹ.

5 “Vwọba, ọke rẹ ovwan da nẹrhovwo, ovwan ruẹ kerẹ ihwo rẹ omeru na-a, kidie oma vwerhan ayen rẹ ayen vwo muẹdia nẹrhovwo vwevunrẹ sinagọg kugbe vwẹ ọkọkọ rẹ irhuvwun ride rere ihwo sa vwọ mrẹ ayen. Uyota me ta kẹ ovwan nẹ, ayen vwo osa rayen vọnvọn nure. 6 Ẹkẹvuọvo ọke wọ da nẹrhovwo, ro evunrẹ uvun wẹn, ọke rẹ wo de bi ẹchẹ wẹn gbe nu, gba nẹrhovwo rhe Ọsẹ wẹn rọhẹ odjahọn na. Ọke yena Ọsẹ wẹn rọ dia odjahọn de ni we na kọ cha hwosa kẹ wẹ. 7 Ọke wọ da nẹrhovwo, wo dje orọnvwọn ọvuọvo ẹvwẹvwanriẹ-ẹn kirobo rẹ ihwo rẹ ẹgborho na ruẹ, kidie ayen roro nẹ e che nyo ayen fikirẹ eta buebun rẹ ayen reyọ vwo ruiruo. 8 Ọtiọyena ovwan ruẹ kerẹ aye-en, kidie Ọsẹ rẹ ovwan riẹn oborẹ ovwan guọnọre tavwen ovwan ke tobọ nọ.

9 “Ọtiọyena, enẹ ovwan nẹrhovwo wan:

“‘Ọsẹ rẹ avwanre rọhẹ obodjuvwu, e jẹ e ru odẹ wẹn fon.* 10 Jẹ Uvie wẹn rhe. Jẹ e ru ọhọre wẹn vwẹ otọrakpọ na kirobo rọ hepha vwẹ obodjuvwu. 11 Kẹ avwanre ibrẹdi* rẹ ẹdẹ ri nonẹna; 12 wọ je vwẹ osa* rẹ avwanre vwo ghovwo avwanre, kirobo rẹ avwanre ji vwo ghovwo ihwo re riosa rẹ avwanre.* 13 Wọ reyọ avwanre rua evunrẹ ọdavwini-i,* ẹkẹvuọvo sivwin avwanre vwo nẹ obọ rẹ ohwo umwemwu na.’

14 “Kidie ovwan da reyọ oruchọ rẹ ihwo vwo ghovwo ayen, Ọsẹ rẹ ovwan rọhẹ obodjuvwu kọ je reyọ vwo ghovwo ovwan; 15 ẹkẹvuọvo ovwan rha reyọ oruchọ rẹ ihwo vwo ghovwo aye-en, Ọsẹ rẹ ovwan je cha reyọ oruchọ rẹ ovwan vwo ghovwo ovwa-an.

16 “Ọke rẹ ovwan de chiri owẹnvwe, ovwan rhe mu epharo phiyọ kerẹ ihwo rẹ omeru na-a, kidie ayen ruẹ epharo rayen miomiovwin* rere ihwo sa vwọ mrẹ nẹ ayen chiri owẹnvwe. Uyota me ta kẹ ovwan nẹ, ayen vwo osa rayen vọnvọn nure. 17 Ẹkẹvuọvo ọke wo de chiri owẹnvwe, vwẹ ori ghworo uyovwin wẹn, wọ je hworhẹ opharo wẹn, 18 rere ihwo vwo jẹriẹn nẹ wo chiri owẹnvwe, jokparẹ Ọsẹ wẹn rọhẹ evunrẹ odjahọn na ọvo. Ọke yena Ọsẹ wẹn rọ dia odjahọn de ni we na kọ cha hwosa kẹ wẹ.

19 “Ovwan rha sẹro rẹ efe kẹ oma rẹ ovwan vwẹ akpọ na-a, asan rẹ eghwọghwọ* kugbe ekagba da guọghọ, kugbe asan rẹ iji da kpanra ẹchẹ ayen mi cho. 20 Ukperẹ ọtiọyen, ovwan koko efe kẹ oma rẹ ovwan vwẹ obodjuvwu, asan rẹ eghwọghwọ* yẹrẹ ekagba de jẹghwọrọ, kugbe asan rẹ iji de jẹ ẹchẹ ẹkpanrọ rẹ ayen de cho. 21 Kidie asan rẹ efe wẹn hepha, etiyin ubiudu wẹn je cha dia.

22 “Urhukpẹ rẹ ugboma na yen ẹro na. Ọtiọyena, ẹro wẹn de nẹ orọnvwọn ọvuọvo,* ugboma wẹn ejobi ko che lo.* 23 Ẹkẹvuọvo ẹro wẹn da rioma,* ugboma wẹn ejobi kọ cha dia ebri. Ọ da dianẹ urhukpẹ rọhẹ ugboma wẹn ghini ebri, mavọ yen ebri yena gan te!

24 “Ohwo vuọvo cha sa dia ọviẹn vwọ kẹ inini ivẹ-ẹ; kidie o che vwo utuoma kpahen ọvo, o mi rhe vwo ẹguọnọ rẹ ọ ro chekọ, yẹrẹ o che churu mu ọvo, ọ me rha jẹ ọ ro chekọ fia. Ovwan cha sa dia eviẹn vwọ kẹ Ọghẹnẹ kugbe Efe-e.

25 “Fikirẹ ọnana me ta kẹ ovwan nẹ: Ovwan rha rua ẹnwan kpahan arhọ* rẹ ovwan, vwọ kpahan oborẹ ovwan cha re yẹrẹ oborẹ ovwan cha da-a, yẹrẹ kpahan ugboma rẹ ovwan, vwọ kpahan oborẹ ovwan che kuphiyọ-ọ. Arhọ* rha ghanre vwọ vrẹ emu, rẹ ugboma na da je ghanre vwọ vrẹ iwun? 26 Ovwan nabọ ni emephran rẹ odjuvwu na; ayen kọn ibi yẹrẹ vuẹn yẹrẹ koko phiyọ iwevwin ra da sẹro rẹ erọnvwọ-ọn, dedena Ọsẹ rẹ ovwan rọhẹ obodjuvwu ghẹrẹ ayen. Ovwan rha ghanre vrẹ ayen? 27 Ono vwẹ usun rẹ ovwan na yen sa womarẹ ẹnwan rọ rua vwọ vwẹ kubit* ọvo vwọ ba arhọ rọyen? 28 Vwọba, diesorọ ovwan vwọ rua ẹnwan kpahan iwun? Ovwan yono mie idodo rẹ aghwa na, oborẹ ayen rhua wan; ayen wian yẹrẹ kẹ ayen ko iwu-un; 29 ẹkẹvuọvo me ta kẹ ovwan nẹ Solomọn dede vwevunrẹ urinrin rọyen na eje, sẹn te ọvo vwẹ usun rẹ enana-a. 30 Asaọkiephana ọ da dianẹ ọtiọna yen Ọghẹnẹ rhuon odi rẹ aghwa na re herọ nonẹna, odẹ rọ cha na e mi do ayen phiyọ erhanre na, o rhe se rhuon ovwan vrẹ ọtiọye-en, ovwan ri vwo esegbuyota tutuno na? 31 Ọtiọyena ovwan rha vwẹ ọke vuọvo vwọ rua ẹnwan rẹ ovwan da tanẹ, ‘Die yen avwanre cha re?’ yẹrẹ ‘Die yen avwanre cha da?’ yẹrẹ ‘Die yen avwanre che kuphiyọ-ọ?’ 32 Kidie enana eje yen erọnvwọn rẹ ẹgborho na vwọtua vẹ owenvwe ọgangan. Ọsẹ rẹ ovwan rọhẹ obodjuvwu riẹnre nẹ ovwan guọnọ erọnvwọn nana eje.

33 “Ọtiọyena, ovwan gba rha guọnọ Uvie na vẹ ophiọnphiọn rọyen ẹsosuọ, ka vwẹ erọnvwọn nana ejobi ri chekọ na vwọ ba kẹ ovwan. 34 Ọtiọyena, ovwan vwẹ ọke vuọvo vwọ rua ẹnwan kpahan odẹ rọ cha na-a, kidie odẹ rọ cha na che vwo ẹnwan romobọ rọyen. Ẹdẹ ọvuọvo vwo ebẹnbẹn ro te vwọ kẹ.