Ẹvwọphia ri Jọn

3 “Si rhe amakashe rẹ ukoko ri Sadis nẹ: Enana yen erọnvwọn rẹ ohwo ro vwo ẹwẹn ighwrẹn rẹ Ọghẹnẹ kugbe isio ighwrẹn na tare: ‘Me riẹn iruo wẹn, nẹ wo vwo odẹ* na nẹ wọ hẹ akpọ, ẹkẹvuọvo wo ghwure. 2 Rhẹrẹ rere wo ru erọnvwọn ri chekọ re guọnọ ghwẹ re na gan, kidie me mrẹ nẹ wo ji rhi ruiruo wẹn vọnvọn* vwẹ obaro rẹ Ọghẹnẹ mẹ-ẹ. 3 Ọtiọyena rha davwerhọ rẹ* obo ra vwọ kẹ wẹ kugbe oborẹ wo nyori, wọ me je rha sẹro rayen, wo ji kurhẹriẹ. Vwọrẹ uyota, wọ rha rhẹrẹ-ẹ, me cha rhe kerẹ oji, wọ cha riẹn unọke ri mi che vwo bru we rhe kakaka-a.

4 “‘Dedena wo ji vwo imihwo* evo vwẹ Sadis ri gbe iwun rayen ẹgua-a, ayen che nene uvwe yan vẹ iwun efuanfon kidie ayen muwan. 5 Ohwo ro phikparobọ ko ku iwun efuanfon phiyọ, o vwo ọke vuọvo mi che vwo phoro odẹ rọyen vwo nẹ ọbe rẹ arhọ na-a, ẹkẹvuọvo me cha rhọnvwe nẹ me riẹn odẹ rọyen vwẹ obaro rẹ Ọsẹ mẹ kugbe obaro rẹ emekashe rọyen. 6 E jẹ ohwo ro vwo erhọ nyo oborẹ ẹwẹn na ta kẹ ikoko na.’

7 “Si rhe amakashe rẹ ukoko ri Filadẹlfia nẹ: Enana yen erọnvwọn rẹ ohwo ọfuanfon, ohwo rẹ uyota ro vwo usiaphrẹ ri Devid, ro rhie nẹ rẹ ohwo vuọvo de je se ẹkanrọ, rọ je kanra nẹ rẹ ohwo vuọvo de je se rhie tare: 8 ‘Me riẹn iruo wẹn—nighere! mi rhie ẹchẹ phiyọ vwẹ obaro wẹn rẹ ohwo vuọvo cha sa kanre-e. Me riẹnre nẹ wo vwo ẹmẹgba, wọ je sẹro rẹ ota mẹ, wọ sen odẹ mẹ-ẹ. 9 Nighere! me cha nẹrhẹ ihwo ri nẹ sinagọg rẹ Eshu rhe re tanẹ ayen ihwo ri Ju, jẹ ayen dia ihwo ri Ju-u, ẹkẹvuọvo ayen guẹn efian—nighere! me cha nẹrhẹ ayen rhe, rhe vwẹ uyovwin kpotọ* vwẹ obaro rẹ awọ wẹn, je nẹrhẹ ayen riẹn nẹ mi vwo ẹguọnọ wẹn. 10 Kidie nẹ wọ sẹro rẹ ota ro shekpahen akoechiro mẹ,* ke me je cha sẹro wẹn vwo nẹ unọke rẹ ọdavwini na, rọ cha rhe enu rẹ akpọ na eje rhe davwen ihwo re dia akpọ na ni. 11 Me cha kpakpata. Yọnrọn oborẹ wo vwori gan kokoroko ọkieje rere ohwo vuọvo vwo jẹ erhu wẹn ẹreyọ.

12 “‘Ohwo ro phikparobọ—ki mi che vwo ru uchivwo vwẹ uwevwin rẹ ẹga rẹ Ọghẹnẹ mẹ, o vwo ọke vuọvo ro che vwo vrẹn no ọfa-a, mi che si odẹ rẹ Ọghẹnẹ mẹ phiyọ oma rọyen kugbe odẹ rẹ orere rẹ Ọghẹnẹ mẹ, Jerusalẹm Kpokpọ na, ro nẹ obọ rẹ Ọghẹnẹ mẹ rọhẹ obodjuvwu cha, kugbe odẹ kpokpọ mẹ. 13 E jẹ ohwo ro vwo erhọ nyo oborẹ ẹwẹn na ta kẹ ikoko na.’

14 “Si rhe amakashe rẹ ukoko ri Laodisha nẹ: Enana yen erọnvwọn rẹ Isẹ na, oseri rọ fuevun rọ je dia ọ rẹ uyota, kugbe ọtonphiyọ rẹ emama rẹ Ọghẹnẹ na tare: 15 ‘Me riẹn iruo wẹn, nẹ wo djirori-i wọ je tuabọ-ọ. Mane ku wo djirori yẹrẹ ku wọ tuabọre. 16 Ọtiọyena kidie nẹ wọ pha bọrọbọrọ, wọ tuabọre-e wo ji djiro-o na, mi che dje we kufia vwo nẹ unu mẹ. 17 Kidie wọ tanẹ, “Mẹvwẹ ọdafe, mi koko efe buebun, me rha guọnọ orọnvwọn vuọvo ọfa-a,” ẹkẹvuọvo wọ rha riẹn nẹ wẹwẹ ohwo ro muomaphiyọ rẹ aro rọyen dọn ihwo, ovwiogbere, orhuẹro rọ je banphiyọ-ọ, 18 mi jiriro kẹ wẹ nẹ wọ dẹ oro ra vwẹ erhanre ru fon mie vwe rere wo se vwo fe, kugbe iwun efuanfon rere wọ sa vwọ mrẹ iwun kuphiyọ, ihwo vwo jẹ ẹban wẹn ẹmrẹ rẹ oma vwo ju we ẹvuọ, kugbe uhuvwun ra vwọ rhọghọ ẹro rere wọ sa vwọ mrorẹ.

19 “‘Ihwo eje ri mi vwo ẹguọnọ kpahen yen me ghwọkuẹ je kpọviẹ. Ọtiọyena gbe vwo oruru rere wo kurhẹriẹ. 20 Nighere! mi mudia anurhoro je vwobọ hworo ẹchẹ. Ọ da dianẹ ohwo ọvo nyo urhuru mẹ ro de rhie ẹchẹ na, me cha ro uwevwin rọyen, mi che nene riemu rẹ ovwọnvwọn, ọ vẹ ovwẹ me riemu kugbe. 21 Vwọ kpahen ohwo ro phikparobọ, me cha rhọnvwe kẹ nẹ o nene uvwe chidia ekete mẹ, kirobo ri mi phikparobọ ri mi de nene Ọsẹ mẹ chidia ekete rọyen na. 22 E jẹ ohwo ro vwo erhọ nyo oborẹ ẹwẹn na ta kẹ ikoko na.’”