Vwo Rhe Ihwo ri Rom

8 Ọtiọyena, e brorhiẹn hwe otu re vẹ Kristi Jesu gba herọ-ọ. 2 Kidie urhi rẹ ẹwẹn na* rọ vwẹ arhọ kẹ otu re vẹ Kristi Jesu gba herọ na, rhan ovwan vwo nẹ otọ rẹ urhi rẹ umwemwu vẹ ughwu. 3 Oborẹ Urhi na se ru-u kidie nẹ ihworakpọ gbare-e, Ọghẹnẹ ruro womarẹ Ọmọ rọyen ro ji rhe vwẹ ugboma rẹ ohworakpọ kerẹ avwanre re dia irumwemwu rere o vwo si umwemwu no, ọ da womarẹ ọyena brorhiẹn hwe umwemwu rẹ ihworakpọ. 4 Rere ophiọnphiọn rẹ Urhi na guọnọre se vwo rugba vwẹ oma rẹ avwanre ri yerẹn vwo nene ẹwẹn na, ọ dia ugboma na-a. 5 Kidie ihwo ri yerẹn nene ugboma na muẹ ẹwẹn rayen kpahen erọnvwọn rẹ ugboma na, ẹkẹvuọvo ihwo ri yerẹn nene ẹwẹn na muẹ ẹwẹn rayen kpahen erọnvwọn rẹ ẹwẹn na. 6 Kidie re vwo muẹ ẹwẹn kpahen ugboma na mudiaphiyọ ughwu, ẹkẹvuọvo re vwo muẹ ẹwẹn kpahen ẹwẹn na mudiaphiyọ arhọ kugbe ufuoma; 7 re vwo muẹ ẹwẹn kpahen ugboma na ruẹ ohwo phiyọ ọvweghrẹn rẹ Ọghẹnẹ, kidie ugboma na vwomakpotọ kẹ urhi rẹ Ọghẹnẹ-ẹ, o che se ru ọtiọyen bẹdẹ-ẹ. 8 Ọtiọyena, otu ri nenesi rẹ ugboma na che se ru obo ri je Ọghẹnẹ-ẹ.

9 Ẹwẹn rẹ Ọghẹnẹ da ghene hẹ oma rẹ ovwan, kọyen ovwan nenesi rẹ ẹwẹn na, ọ dia ugboma na-a. Ẹkẹvuọvo ohwo ro vwo ẹwẹn ri Kristi-i, ohwo yena dia ọ ri Kristi-i. 10 Jẹ, ovwan vẹ Kristi de vwo orukugbe, kọyen ugboma na ghwuru fikirẹ umwemwu, ẹkẹvuọvo ẹwẹn na kẹ ovwan arhọ fikirẹ ophiọnphiọn. 11 Asaọkiephana, ọ da dianẹ ẹwẹn rẹ ohwo rọ kpare Jesu vrẹn nẹ ughwu hẹ oma rẹ ovwan, ohwo rọ kpare Kristi Jesu nẹ ughwu na kọ je vwẹ arhọ kẹ ugboma rẹ ovwan ro ghwẹ na womarẹ ẹwẹn rọyen rọhẹ oma rẹ ovwan.

12 Ọtiọyena iniọvo, avwanre vwo oghwa, ẹkẹvuọvo ọ dia ọ re vwo yerin nene ugboma na-a; 13 kidie ovwan de yerin nene ugboma na, ovwan che ghwu; ẹkẹvuọvo ovwan de siobọnu iruo rẹ ugboma na karekare womarẹ ukẹcha rẹ ẹwẹn na, kẹ ovwan rhọ. 14 Kidie ihwo eje rẹ ẹwẹn rẹ Ọghẹnẹ suẹn ghene emọ rẹ Ọghẹnẹ. 15 Ọ dia ẹwẹn rẹ ọviẹn rọ cha rhoma so oshọ yen a vwọ kẹ ovwa-an, ẹkẹvuọvo ẹwẹn rẹ ihwo ra reyọ phiyọ emọ, ẹwẹn rọ nẹrhẹ avwanre kperẹ “Abba,* Ọsẹ!” 16 Ẹwẹn na komobọ vẹ ẹwẹn avwanre soseri nẹ avwanre emọ rẹ Ọghẹnẹ. 17 Avwanre da dia emọ, avwanre ke jẹ iriuku—iriuku rẹ Ọghẹnẹ, re vẹ Kristi gba cha riuku na⁠—​takpe nẹ avwanre vẹ ọyen rioja kugbe rere avwanre vẹ ọyen ji vwo vwo urinrin kugbe.

18 Kidie mi niro nẹ oja rẹ avwanre ria asaọkiephana fiemu vuọvo-o siẹrẹ a da reyọ vwọ vwanvwe urinrin re che djephia vwẹ oma rẹ avwanre. 19 Emama na rhẹro rẹ ọke re che vwo dje emọ rẹ Ọghẹnẹ phia. 20 Kidie ọ dia ọhọre rẹ emama na yen e vwo phio phiyọ ẹdia ofefe-e, ẹkẹvuọvo womarẹ ohwo ro phiro phiyọ ẹdia na vẹ iphiẹrophiyọ 21 nẹ e che si emama na vwo nẹ ọviẹn vwọ kẹ egbon, ayen mi vwo urinrin rẹ ugbomọphẹ rẹ emọ rẹ Ọghẹnẹ. 22 Kidie avwanre riẹnre nẹ emama na ejobi rha guan, ayen ji rhiẹromrẹ odjadja rhi te ọke nana. 23 Vwọba, avwanre ri vwo ẹbẹre rẹsosuọ rẹ osa na rọ dia ẹwẹn ọfuanfon na je guan, rẹ avwanre vwọ rhẹro rẹ ọke ra cha vwọ reyọ avwanre kerẹ emọ, re che vwo si avwanre vwo nẹ ugboma rẹ avwanre womarẹ ọtanhirhe. 24 Kidie e sivwin avwanre fikirẹ iphiẹrophiyọ nana; ẹkẹvuọvo e vwo iphiẹrophiyọ kpahen obo ra mrẹ nure-e, gbanẹ ohwo je rhẹro rẹ obo rọ mrẹ nure? 25 Ẹkẹvuọvo, avwanre de vwo iphiẹrophiyọ kpahen oborẹ avwanre mrẹ-ẹ, kẹ avwanre vwẹ owenvwe ọgangan vwọ hẹrhẹ vẹ erhiorin.

26 Vwẹ idjerhe vuọvo na, ẹwẹn na vwẹ ukẹcha kẹ avwanre ọke rẹ avwanre da vwiẹrẹ, kidie ebẹnbẹn na kẹ ọna: avwanre riẹnre nẹ ofori nẹ avwanre nẹrhovwo, jẹ avwanre riẹn obo ra cha nẹrhovwo kpahe-en, ẹkẹvuọvo ẹwẹn na rẹ kẹ avwanre ọke rẹ avwanre de dirhivwẹn. 27 Ọghẹnẹ rọ hiẹ ubiudu rẹ avwanre na riẹn oborẹ ẹwẹn ọfuanfon na rẹ kpahan vwọ kẹ ihwo efuanfon na, kidie o shephiyọ ọhọre rọyen.

28 Avwanre riẹnre nẹ Ọghẹnẹ ruro rere iruo rọyen eje vwọ wian kugbe vwọ kẹ erhuvwu rẹ ihwo ri vwo ẹguọnọ rọyen, ihwo re seri kirobo rẹ ọhọre rọyen hepha; 29 kidie vwo nẹ ọtonphiyọ rhe yen ọ vwọ riẹn kpahen ihwo rọ cha sane, o de ji brorhiẹn phiyotọ nẹ ayen cha họhọ Ọmọ rọyen rere Ọmọ na sa vwọ dia ọmọkpako vwẹ ohri rẹ iniọvo buebun. 30 Vwọba, ihwo ro brorhiẹn rọyen phiyotọ na yen ọ jẹreyọ, ihwo rọ jẹreyọ na keyen o rhe se evwata. Ukuotọ rọyen, otu ro seri evwata na keyen ọ rha vwẹ urinrin kẹ.

31 Kẹ die yen avwanre cha ta kpahen erọnvwọn nana? Ọghẹnẹ dahẹ ẹbẹre rẹ avwanre, kẹ ono yen sa vwọso avwanre? 32 Rọ vwọ dianẹ o siomauko rọ vwọ vwẹ Ọmọ rọyen kpahotọ kẹ avwanre na-a, o rhe ji siobọnu erọnvwọn efa kẹ avwanre kirobo rọ vwẹ Ọmọ na kẹ avwanre na? 33 Kẹ ono yen se gun se ihwo rẹ Ọghẹnẹ jẹreyọ na? Ọghẹnẹ yen tare nẹ ayen evwata. 34 Ono yen se brorhiẹn hwe ayen? Kristi Jesu yen ohwo ro ghwuru, e, vwọ vrẹ ọyena, ọyen ohwo ra kpare vrẹn, ro chidia obọrhen rẹ Ọghẹnẹ, rọ je rẹ kẹ avwanre.

35 Kẹ die yen sa hẹriẹ avwanre vwo nẹ ẹguọnọ ri Kristi na? Ukpokpogho, gbanẹ okpetu, gbanẹ omukpahen, gbanẹ owẹnvwe, gbanẹ ẹban, gbanẹ imuoshọ, gbanẹ ọlọkọ? 36 Kirobo re siro: “Fikirẹ ovwan yen avwanre vwo hirharokuẹ ughwu kẹdi kẹdẹ; e ni avwanre kerẹ igodẹ re che hwe.” 37 Ẹkẹvuọvo, vwevunrẹ ẹdia nana ejobi, avwanre phiẹkparobọ womarẹ ohwo ro vwo ẹguọnọ rẹ avwanre. 38 Kidie mi vwo imuẹro nẹ ughwu yẹrẹ arhọ yẹrẹ emekashe yẹrẹ isuon yẹrẹ erọnvwọn re herọ enẹna yẹrẹ erọnvwọn re cha yẹrẹ ẹgba 39 yẹrẹ erọnvwọn rehẹ obenu yẹrẹ ukokodo yẹrẹ emama ọfa sa hẹriẹ avwanre vwo nẹ ẹguọnọ rẹ Ọghẹnẹ rọhẹ Kristi Jesu Ọrovwavwanre-e.