Matiu

27 Ọke vwo rhie, irherẹn ride na eje kugbe ekpako rẹ ihwo na da jiroro kugbe kpahen Jesu rere ayen hwe. 2 Ọke rẹ ayen vwọ gba nu, ayen de suon yanran ra vwọ kpahotọ kẹ Pailet, osun na.

3 Ọke ri Judas rọ shẹrẹ na vwọ mrẹ nẹ e brorhiẹn hwe Jesu nure, ọ da da mamọ, ọ da reyọ idọnọ efuanfon 30 na rhivwin bru irherẹn ride na kugbe ekpako na ra, 4 ọ da tanẹ: “Mi ru umwemwu ọke me vwọ shẹ ọbara rẹ ohwo ro ru emuọvo-o.” Ayen da tanẹ: “Die yen te avwanre te ọyena? Ọyena ota wẹn!”* 5 Ọtiọyena o de do idọnọ efuanfon na phiyọ uwevwin rẹ ẹga na, o de vrẹn nẹ etiyin. Ọ da yanran re churu ghwu. 6 Ẹkẹvuọvo irherẹn ride na da reyọ idọnọ efuanfon na, ayen da tanẹ: “Urhi rhọnvwere nẹ e phi ayen phiyọ asan ra da sẹro rẹ igho vwẹ uwevwin rẹ ẹga na-a, kidie ayen igho rẹ ọbara.” 7 Ọke rẹ ayen vwọ jiroro kugbe nu, ayen da vwẹ igho na vwọ dẹ otọ rẹ ọmechẹ na,* ayen de vwo ru asan re shẹ erhorha phiyọ. 8 Ọtiọyena Otọ rẹ Ọbara kọyen e se otọ yena rhi te nonẹna. 9 Obo ra womarẹ Jerimaya rọ dia ọmraro na ta de rugba nẹ: “Ayen reyọ idọnọ efuanfon 30 na, unu igho re bru phiyọ ọshare na, ohwo rẹ evo vwẹ usun rẹ emọ rẹ Izrẹl bru igho phiyọ, 10 ayen da vwẹ ayen vwọ dẹ otọ rẹ ọmechẹ na,* kirobo ri Jihova* ji iji rọyen kẹ vwẹ.”

11 Asaọkiephana Jesu de mudia obaro rẹ osun na, osun na da nọ nẹ: “Wẹwẹ yen Ovie rẹ ihwo ri Ju na?” Jesu da kpahen nẹ: “Wẹwẹ komobọ yen tarọ.” 12 Ẹkẹvuọvo ọke rẹ irherẹn ride na kugbe ekpako na vwo guẹn nyẹ, ọ kpahen ota vuọvo-o. 13 Pailet da ta kẹ nẹ: “Wo nyo erọnvwọn sansan rẹ ayen guẹn nyẹ wẹ na?” 14 Ẹkẹvuọvo ọ kpahen kẹ-ẹ, ẹjo, ọ ta ota vuọvo-o, te ẹdia ro de gbe osun na unu mamọ.

15 Kọke kọke re de ruẹ orẹ nana, osun na vwo ẹkuruemu ro vwo siobọnẹ ohwo ọvo re mu phiyọ uwodi kẹ otu na, kohwo kohwo rẹ ayen guọnọre. 16 Vwẹ ọke yena jẹ ayen mu ọshare ọvo re se Barabas rọ churhi mamọ phiyọ uwodi. 17 Ọtiọyena ọke rẹ ayen vwo siomakoko, Pailet da ta kẹ ayen nẹ: “Ono yen ovwan guọnọre nẹ mi siobọnu kẹ ovwan, Barabas gbanẹ Jesu re se Kristi na?” 18 Kidie Pailet riẹnre nẹ omaẹriọ ọgangan yen nẹrhẹ ayen muo bru ọyen rhe. 19 Vwọba, ro vwo chidia agbara rẹ ẹdjọeguo na, aye rọyen da vwẹ ovuẹ rhe nẹ: “Wo vwobọ vwẹ ota rẹ ọshare yena rọ dia ọvwata na-a, kidie me rioja mamọ nonẹna vwẹ evwerhẹn fiki rọyen.” 20 Ẹkẹvuọvo irherẹn ride na kugbe ekpako na da riẹriẹ otu na vwọ tanẹ o siobọnẹ Barabas, rere o hwe Jesu. 21 Osun na da kpahen kẹ ayen nẹ: “Ọvọ vwẹ usun rẹ ihwo ivẹ na yen ovwan guọnọre nẹ mi siobọnu kẹ ovwan?” Ayen da tanẹ: “Barabas.” 22 Pailet da ta kẹ ayen nẹ: “Die kọyen mi ru Jesu re se Kristi na?” Ayen eje da tanẹ: “Kanrọ mu urhe!”* 23 Ọ da tanẹ: “Diesorọ? Emu ọbrabra vọ yen o ruru?” Dedena jẹ ayen rhoma kperẹ ganphiyọ nẹ: “Kanrọ mu urhe!”

24 Rọ vwọ mrẹ nẹ erhuvwu vuọvo nuro rhe-e, ẹkẹvuọvo ọ nẹrhẹ edo na rhoma ganphiyọ, Pailet da reyọ ame vwọ hworhẹ abọ rọyen vwẹ irharo rẹ otu na, ọ da tanẹ: “Me hworhẹ abọ mẹ fon vwo nẹ ọbara rẹ ọshare nana. Ovwan komobọ re ruo oborẹ ovwan guọnọre.” 25 Ọtiọyena ihwo na eje da kpahen nẹ: “E jẹ ọbara rọyen dia enu rẹ uyovwin rẹ avwanre vẹ emọ rẹ avwanre.” 26 O de siobọnẹ Barabas vwọ kẹ ayen, ẹkẹvuọvo ọ da tanẹ a fa Jesu, ọ da vwọ kpahotọ nẹ e re hwe mu urhe.

27 Isodje rẹ osun na da reyọ Jesu ro uwevwin rẹ osun na, ayen de koko isodje na eje riariẹ phiyọ. 28 Ayen vwo ku ewun no oma nu, ayen de phi amwa ọvwavware phiyọ oma, 29 ayen da vwẹ idjigbẹn vwo ru erhu rẹ ovie, ayen de kuo phiyọ uyovwin rọyen, ayen de phi ọkpọ phiyọ obọrhen rọyen. Ayen de shiguẹ vwẹ obaro rọyen, kẹ ayen vwọ jehwẹ nẹ: “Avwanre yeren uwe, Ovie rẹ ihwo ri Ju!” 30 Ayen de dje enya kuo, ayen da reyọ ọkpọ na mie, kẹ ayen vwọ fa uyovwin rọyen. 31 Ukuotọ rọyen, rẹ ayen vwọ reyọ vwọ jehwẹ nu, ayen da ghwiẹ amwa na no oma, ayen de ku iwun rẹ obotafe rọyen phiyọ, ayen de suon yanran ra kanrọ mu urhe.

32 Rẹ ayen vwọ yanran na, ayen da mrẹ ohwo ri Sairini ọvo re se Saimọn. Ayen da gba ọshare nana nẹ o mu urhe rẹ oja* rọyen. 33 Ọke rẹ ayen vwo te asan ọvo re se Gọlgọta, kọyen Asan Ekpehruyovwin, 34 ayen da vwẹ iwaini ra vwẹ orọnvwọn rọ yara vwọ gua kẹ nẹ ọ da; ẹkẹvuọvo rọ vwọ davwọn nu, ọ rha rhọnvwe da-a. 35 Ọke rẹ ayen vwọ kanrọ mu urhe nu, ayen de duvwun itẹ vwọ ghare iwun rẹ obotafe rọyen, 36 ayen de chidia etiyin rẹ ayen vwọ rhẹrẹ. 37 Ayen ji hwe ophapha ọvo mu obenu rẹ uyovwin rọyen re si urhi rẹ ayen vwo muo na phiyọ nẹ: “Ọnana Jesu, Ovie rẹ ihwo ri Ju na.”

38 A da je kanre iji ivẹ mu irhe kẹrẹ, ọvo hẹ obọrhen rọyen, ọ ro chekọ hẹ obohwẹre rọyen. 39 Ihwo re wanvrẹ ke ta eta ebrabra kpahọn, jẹ ayen kpogho uyovwin rayen 40 rẹ ayen vwọ tanẹ: “Wẹ rọ cha guọghọ uwevwin rẹ ẹga na rọ da bọn vwẹ ẹdẹ erha na, sivwin oma wẹn! Ọ da dianẹ wẹwẹ Ọmọ rẹ Ọghẹnẹ, gbe wontọ nẹ urhe rẹ oja* na rhe!” 41 Vwẹ idjerhe vuọvo na, irherẹn ride na kugbe isiẹbe na kugbe ekpako na ke je reyọ vwọ jehwẹ nẹ: 42 “O sivwin ihwo efa; jẹ o se sivwin oma rọye-en! Ọyen Ovie rẹ Izrẹl; e jẹ o wontọ nẹ urhe rẹ oja* na rhe asaọkiephana, kẹ avwanre che se gbuyota. 43 Ọ vwẹroso Ọghẹnẹ; e gbe jẹ o sivwon asaọkiephana siẹrẹ ọ da guọnọ sivwon, kidie ọ tanẹ, ‘Mẹvwẹ Ọmọ rẹ Ọghẹnẹ.’ 44 Vwẹ idjerhe vuọvo na, iji ra kanre mu irhe kẹrẹ dede, ke je reyọ vwọ jehwẹ.

45 Vwo nẹ unọke resan* na yanran, okuku de she rhurhu otọ na eje re te unọke rirhirin* na. 46 Vwẹ omarẹ unọke rirhirin na, Jesu de kperi phia vẹ urhuru ọgangan nẹ: “Eli, Eli, lama sabaktani?” kọyen, “Ọghẹnẹ mẹ, Ọghẹnẹ mẹ, diesorọ wọ vwọ sen vwẹ?” 47 Rẹ ayen vwo nyo ọnana, evo vwẹ usun rẹ ihwo ri mudia etiyin na ke tanẹ: “Ọshare nana se Ilaija.” 48 Ugege yena, ọvo vwẹ usun rayen da djẹ yanran ra reyọ ahworhẹ, o de duvwon phiyọ iwaini rọ fiunu, o de phio phiyọ ọkpọ, ọ da riẹn kẹ nẹ ọ da. 49 Ẹkẹvuọvo ihwo ri chekọ na da tanẹ: “Yan jovwo! E ja mrẹ sẹ Ilaija cha rhe rhi sivwon.” 50 Obọfa Jesu de kperi phia vẹ urhuru ọgangan, o de phi ẹwẹn phiyọ.*

51 Nighere! ikọtini rẹ asan ọfuanfon na da bẹre ẹkẹn ivẹ vwo nẹ obenu re totọ, otọ na de kpogho, eragha da bẹre. 52 Ishi* na de rhie, buebun rẹ ugboma rẹ ihwo efuanfon na re vwerhẹn vwọrẹ ughwu da va rhe 53 (ihwo ri nẹ ohri rẹ ishi na cha ọke ra vwọ kparọ vrẹn nu, da ro evunrẹ orere ọfuanfon na), ihwo buebun da mrẹ ayen. 54 Ẹkẹvuọvo ọke rẹ onotu rẹ isodje na vẹ ihwo re vẹ ọyen gba rhẹrẹ Jesu vwọ mrẹ otọ ro kpogho kugbe erọnvwọn re phia na, oshọ de mu ayen gangan, ayen da tanẹ: “Vwọrẹ uyota, ọnana Ọmọ rẹ Ọghẹnẹ.”

55 Eya buebun ri nene Jesu nẹ Galili rhe rere ayen vwo gbodibo kẹ jehẹ etiyin, ri nẹ vwẹ ugboko; 56 evo vwẹ usun rayen yen Meri Magdalini kugbe Meri rọ dia oni ri Jems kugbe Josis kugbe oni rẹ emeshare ri Zẹbẹdi.

57 Asaọkiephana rẹ ọke vwo kpo ovwọnvwọn re, ọdafe ọvo re se Josẹf, ohwo rẹ Arimatia da rhe, ọ je rhe dia odibo ri Jesu re. 58 Ọshare nana de bru Pailet ra, ọ da nokpẹn rẹ ugboma ri Jesu. Pailet de jurhi nẹ e muo kẹ. 59 Josẹf de mu ugboma na, ọ da vwẹ amwa oyoyovwin rọ je fon vwọ pharọ, 60 o de muo phiyọ ushi* kpokpọ rọyen rọ kare phiyọ evunrẹ oragha. Ọke ro vwo ghorie ukuta rode rhurhu asan ra wan rua ushi* na nu, ọ da yanran. 61 Ẹkẹvuọvo Meri Magdalini kugbe Meri ochekọ na da daji etiyin, jẹ ayen chidia obaro rẹ ushi na.

62 Vwẹ ẹdẹ rọ vwọ kpahọn, kọyen ẹdẹ rọ vwọ kpahen Egbemuo na, irherẹn ride na kugbe ihwo ri Farisi na de siomakoko bru Pailet ra, 63 ayen da tanẹ: “Ọga, avwanre karophiyọ oborẹ ọvwọrofian yena tare ọke rọ je vwọ hẹ akpọ nẹ, ‘Ẹdẹ erha da wan nu, a cha kpare ovwẹ vrẹn.’ 64 Ọtiọyena gbe jurhi nẹ a nabọ rhẹrẹ ushi na re te ẹdẹ rerha na, rere idibo rọyen vwo jẹ cha, rẹ ayen de cho, rẹ ayen da ta kẹ ihwo na nẹ, ‘A kparerọ vrẹn nẹ ughwu re!’ Ọke yena ophiẹnvwe rẹ ukuko na kọ cha bra vrẹ ọrẹsosuọ na.” 65 Pailet da ta kẹ ayen nẹ: “Ovwan sa reyọ erhẹrotọ. Ovwan yanran ra rhẹrẹ kirobo rẹ ovwan sa rhẹrẹ te eje.” 66 Ọtiọyena ayen da yanran re din ukuta re vwo rhurhu ushi na kokoroko ji phi erhẹrotọ phiyọ.