Luk

8 Ọmọke krẹn vwọ wan nu, o de nẹ orere kpo orere, nẹ ọko kpo ọko, jẹ o ghwoghwo iyẹnrẹn esiri rẹ Uvie rẹ Ọghẹnẹ na. Ihwivẹ na vẹ ọyen herọ, 2 ọtiọyen ji te eya evo re sivwin ega rayen je djẹ ẹwẹn umwemwu nẹ oma rayen: Meri re se Magdalini, ohwo rẹ ẹwẹn rẹ Idẹbono ighwrẹn nẹ oma rọyen; 3 Joana aye ri Chuza, ohwo rọ vwẹrote uwevwin ri Hẹrọd; Suzana; kugbe eya efa buebun re vwẹ ekuakua rẹ ayen vwori vwo gbodibo kẹ ayen.

4 Asaọkiephana ọke rẹ ihwo buebun vwo koko vẹ ihwo ri bro ra vwo nẹ orere kpo orere, ọ da ta ota kẹ ayen womarẹ udje ọvo: 5 “Ọkekankọn ọvo yanran ra kọn ibi rọyen. Rọ vwọ kọn na, evo de she phiyọ orhoma rẹ idjerhe na, e de chiyin ayen muotọ, emephran rẹ odjuvwu na da re ayen. 6 Evo de she phiyọ enu rẹ oragha, ọke rẹ ayen vwọ djẹ phia, ayen de vwioro kidie ayen mrẹ ame-e. 7 Efa she phiyọ ohri rẹ idjigbẹn, idjigbẹn re vẹ ayen gba djẹ rhe na de duvwun ayen. 8 Ẹkẹvuọvo efa she phiyọ omamọ rẹ otọ, ọke rẹ ayen vwọ djẹ phia nu, ayen da mọ emamọ 100 vrẹ obo ra kọnre na. Rọ vwọ ta eta nana nu, o de kperi phia nẹ: “E jẹ ohwo ro vwo erhọ ro vwo nyo, nyo.”

9 Ẹkẹvuọvo idibo rọyen da nọ oborẹ udje nana mudiaphiyọ. 10 Ọ da tanẹ: “Ovwan yen a rhọnvwe kẹ nẹ i vwo ẹruọ rẹ odjahọn efuanfon rẹ Uvie rẹ Ọghẹnẹ na, ẹkẹvuọvo vwọ kẹ ihwo ri chekọ na, udje yen ọ hepha vwọ kẹ ayen, rere dede nẹ ayen nẹ, ayen ni kufia, dede nẹ ayen nyo, ayen vwo jẹ ẹruọ rọyen evwo. 11 Asaọkiephana oborẹ udje na mudiaphiyọ kẹ ọna: “Ubi na ọyen ota rẹ Ọghẹnẹ. 12 E rehẹ orhoma rẹ idjerhe na yen ihwo ri nyori, rẹ Idẹbono da rhe, ọ da reyọ ota na vwo nẹ ubiudu rayen rere ayen vwo je segbuyota, rẹ ayen de sivwin rhọ. 13 E rehẹ enu rẹ oragha na yen ihwo ri rhiabọreyọ ota na vẹ aghọghọ ọke rẹ ayen vwo nyo, ẹkẹvuọvo ayen vwo awọ vwẹ otọ-ọ. Ayen segbuyota vwẹ ọmọke, ẹkẹvuọvo vwẹ ọke rẹ ọdavwini, ayen de she. 14 Vwọ kẹ i ri she phiyọ ohri rẹ idjigbẹn na, enana yen ihwo ri nyori, ẹkẹvuọvo kidie nẹ ẹnwan, efe kugbe akpọẹriọ rẹ akpọ nana mu ayen reyọ, i de duvwun ayen karekare, ayen rha sa rho tedje-e. 15 Vwọ kẹ e rehẹ omamọ rẹ otọ na, enana yen ihwo ri rhiabọreyọ ota na vẹ omamọ rẹ ubiudu ọke rẹ ayen vwo nyo nu, ayen da sẹro rọyen, ayen da mọ omamọ vẹ akoechiro.

16 “O vwo ohwo vuọvo rọ vwẹ urhukpẹ muẹ nẹ, rọ da vwẹ ochẹ rhurho yẹrẹ muo phiyọ otọ rẹ ehwa-a, ẹkẹvuọvo o muo phiyọ enu rẹ ogburhukpẹ rere ihwo re ro uwevwin na sa vwọ mrẹ elo na. 17 Kidie o vwo orọnvwọn vuọvo re sinu ro che jẹ phia-a, o vwo orọnvwọn vuọvo ra nabọ sinu re che jẹriẹn yẹrẹ ro che jẹ phia vwẹ azagba-a. 18 Ọtiọyena ovwan nomaso kpahen oborẹ ovwan kerhọ wan, kidie kohwo kohwo ro vwori, a cha vwẹ efa ba kẹ, ẹkẹvuọvo kohwo kohwo ro vwori-i, obo rọ tobọ roro nẹ ọyen vwori na, a cha reyọ mie.”

19 Asaọkiephana oni rọyen vẹ iniọvo rọyen de bro rhe, ẹkẹvuọvo fikirẹ otu na, ayen se sikẹrẹ-ẹ. 20 Ọtiọyena a da vuẹ nẹ: “Oni wẹn vẹ iniọvo wẹn mudia otafe, ayen guọnọ mrẹ wẹ.” 21 Ọ da kpahen kẹ ayen nẹ: “Oni mẹ kugbe iniọvo mẹ yen ihwo nana ri nyo ota rẹ Ọghẹnẹ na ri ji ruẹ nene.”

22 Vwẹ ẹdẹ ọvo, ọ vẹ idibo rọyen da ro okọ ọvo, ọ da ta kẹ ayen nẹ: “E jẹ avwanre kpo ẹbẹre ochekọ rẹ ẹtẹrhe ame na.” Ọtiọyena ayen de bi yanran. 23 Ẹkẹvuọvo rẹ ayen vwo biẹ yanran na, ovwerhẹn de muo yanran. Ogiribo ọgangan ọvo ko djuẹ vwẹ ẹtẹrhe ame na, ame kọ rua evunrẹ okọ rayen na, ayen da rhe dia ẹdia rẹ imuoshọ. 24 Ọtiọyena ayen da yanran ra rhọvwọn, ayen da ta kẹ nẹ: “Oyono, oyono, ughwu yen avwanre hepha na!” Ọtiọyena o de vrẹn, ọ da ghwọku odju na kugbe ọgbogho rẹ ame na, ayen de kpotọ, asan ejobi da fọ riẹi. 25 Ọ da ta kẹ ayen nẹ: “Esegbuyota rẹ ovwan rhọ?” Ẹkẹvuọvo oshọ vọn ayen oma, ọnana ji gbe ayen unu, kẹ ayen ta kẹ ohwohwo nẹ: “Ono yen ohwo nana ghene hepha? Kidie o jurhi kẹ odju na vẹ ame na dede, kẹ ayen nyẹme rọyen.”

26 Ayen de rhi duvwun vwẹ ekogho rẹ ihwo ri Gẹrasa, rọhẹ ẹbẹre ro hirharoku Galili. 27 Rẹ Jesu vwo wontọ, ọshare ọvo rẹ ẹwẹn rẹ Idẹbono kpokpo ro nẹ orere na rhe da vwa. Vwẹ ọke grongron re, o ji rhi ku ewun phiyọ-ọ, ọ je dia uwevwi-in, ẹkẹvuọvo ohri rẹ ishi* na. 28 Rọ vwọ mrẹ Jesu, o de kperi phia, o de she teyen otọ vwẹ obaro rọyen, ọ da ta vẹ urhuru ọgangan nẹ: “Die yen mẹ vẹ owẹ vwo kugbe, Jesu, Ọmọ rẹ Ọghẹnẹ ro Me Kpenu na, me rẹ wẹ, wo gboja kẹ vwẹ-ẹ.” 29 (Kidie Jesu dje ẹwẹn ro jẹfuọn na ẹvuẹvuẹ jovwo re nẹ o nẹ oma rẹ ọshare na. Ọ gba ọshare na abọ buebun re,* a je vwẹ ejọnrọn vẹ igoni vwọ gba je vwẹ ohwo rhẹrẹ abọ buebun re, ẹkẹvuọvo ọ savwan erọnvwọn ra vwọ gba na kuẹfia, ẹwẹn rẹ Idẹbono na mi muo vwo kpo asan rẹ ihwo hepha-a.) 30 Jesu da nọ nẹ: “Die yen odẹ wẹn?” Ọ da tanẹ: “Lijọn,” kidie ẹwẹn rẹ Idẹbono buebun yen ro oma rọyen. 31 Kẹ ayen rẹ nẹ o jurhi kẹ ayen nẹ ayen kpo evunrẹ ukpotọ ro jẹ oba evwo na-a. 32 Asaọkiephana ẹko rẹ isi buebun riemu vwẹ enu rẹ ugbenu na, ọtiọyena ayen da rẹ nẹ ọ rhọnvwe kẹ ayen rere ayen ro evunrẹ isi na, ọ da rhọnvwe kẹ ayen. 33 Ọtiọyena ẹwẹn rẹ Idẹbono na de nẹ oma rẹ ọshare na, ayen da ra ro evunrẹ isi na, ẹko rẹ isi na da họrhọ nene ọghwrọrọ na ro evunrẹ ẹtẹrhe ame na, ayen de divwin ghwu. 34 Ẹkẹvuọvo ọke rẹ ihwo ri suẹn isi na vwọ mrẹ obo re phiare na, ayen da djẹ ra niyẹnrẹn rọyen vwevunrẹ orere na kugbe eko na.

35 Ihwo da rhe rhe mrẹ obo re phiare na. Ayen de bru Jesu rhe, ayen da mrẹ ọshare rẹ ẹwẹn rẹ Idẹbono nẹ oma rọyen na, o ku ewun phiyọ, iroro rọyen je gba, o chidia asan awọ ri Jesu, oshọ de mu ayen. 36 Ihwo re mrẹrẹ da vuẹ ayen obo re sivwin ọshare rẹ ẹwẹn rẹ Idẹbono kpokpo jovwo na wan. 37 Ihwo buebun ri nẹ ekogho ri Gẹrasa kugbe ekogho re riarierẹ phiyọ rhe da vuẹ Jesu nẹ o vrẹn nẹ etiyin, kidie oshọ mu ayen gangan. Ọtiọyena ọ da ro okọ ro vwo vrẹn nẹ etiyin. 38 Ẹkẹvuọvo ọshare rẹ ẹwẹn rẹ Idẹbono nẹ oma rọyen na, kọ rẹ nẹ o jẹ ọyen nene, ẹkẹvuọvo o de jo yanran, rọ vwọ tanẹ: 39 “Rhivwin kpo uwevwin, rere wo rhe gbikun rẹ oborẹ Ọghẹnẹ ru kẹ wẹ.” Ọtiọyena ọ da yanran, jẹ o ghwoghwo nene orere na eje oborẹ Jesu ru kẹ na.

40 Ọke ri Jesu vwo rhivwin rhe, otu na da nabọ dede, kidie ayen eje rhẹro rọyen jovwo. 41 Ẹkẹvuọvo nighere! ọshare ọvo re se Jairọs da rhe; ọshare nana ọvo vwẹ usun rẹ isun ri sinagọg na. O de she teyen otọ vwẹ asan awọ ri Jesu, kọ rẹ nẹ ọ rhe uwevwin rọyen, 42 kidie ọmọtẹ rọyen vuọvo rọhẹ omarẹ ẹgbukpe 12 ghwẹ.

Rẹ Jesu vwọ yanran na, otu na ki keke. 43 Asaọkiephana o vwo aye ọvo rẹ ọbara hwẹ nẹ oma rọyen vwẹ ẹgbukpe 12 re, ọ je rhe mrẹ ohwo vuọvo ro se sivwo-on. 44 Ọ da yanrhe obuko rọyen, o de djobọte ejọjọ rẹ ewun rẹ obotafe rọyen, ugege yena ọbara ro hwẹ nẹ oma rọyen na da ka. 45 Ọtiọyena Jesu da tanẹ: “Ono yen djobọte vwe?” Ọke rẹ ayen ejobi vwọ sian, Pita da tanẹ: “Oyono, otu na riariẹ owẹ phiyọ, ayen ji keke uwe.” 46 Ẹkẹvuọvo Jesu da tanẹ: “Ohwo ọvo djobọte vwe, kidie me riẹnre nẹ ẹgba nẹ uvwe oma.” 47 Rọ vwọ mrẹ nẹ ọyen che se siomanu-u, aye na da rhe, jẹ ọ phariẹ, o de she teyen otọ vwẹ obaro rọyen, ọ da ta vwẹ obaro rẹ ihwo ejobi oboresorọ o vwo djobọte kugbe oborẹ oma rọyen kpori vwẹ ugege yena. 48 Ẹkẹvuọvo ọ da ta kẹ nẹ: “Ọmọtẹ, esegbuyota wẹn nẹrhẹ oma wẹn gan nure. Yanran vwọrẹ ufuoma.”

49 Rọ je vwọ ta ota na, ohwo ọvo rẹ osun ri sinagọg na jiri da rhe, ọ da tanẹ: “Ọmọtẹ wẹn ghwure; wo rhe kpokpo Oyono na ọfa-a.” 50 Ro vwo nyo ọnana, Jesu da kpahen kẹ nẹ: “Wọ djoshọ-ọ, takpe vwo esegbuyota, ọ cha rhọ.” 51 Ọke ro vwo te uwevwin na, ọ rhọnvwere nẹ ohwo vuọvo nene ọyen ruọ-ọ, jokparẹ Pita, Jọn, Jems kugbe ọsẹ vẹ oni rẹ ọmọtẹ na. 52 Ẹkẹvuọvo ihwo na eje rha viẹ je ghwiẹ oma rayen vwọrẹ uvweri fikirẹ ọmọtẹ na. Ọtiọyena ọ da tanẹ: “Ovwan rha viẹ-ẹ, kidie ọmọtẹ na ghwuru-u, ẹkẹvuọvo ọ vwerhẹn.” 53 Ọtiọyena kẹ ayen reyọ vwọ jehwẹ, kidie ayen riẹnre nẹ o ghwure. 54 Ẹkẹvuọvo ọ da yọnrọn obọ rẹ ọmọtẹ na, ọ da ta kẹ nẹ: “Ọmọtẹ, vrẹn!” 55 Ẹwẹn* rọyen de rhivwin rhe, o de vrẹn ugege yena, Jesu da tanẹ a vwẹ orọnvwọn kẹ rere ọ re. 56 Ọsẹ vẹ oni rọyen ke ghọghọ, ẹkẹvuọvo ọ da vuẹ ayen nẹ ayen vuẹ ohwo vuọvo kpahan obo re phiare na-a.