Luk

19 Ọyena vwọ wan nu, ọ da ro evunrẹ Jẹriko, kọ wanvrẹ. 2 Asaọkiephana ọshare ọvo re se Zakiọs hẹ etiyin; ọyen onotu rẹ ihwo ri phi osa uyovwin, ọdafe yen o ruẹ. 3 Ọ davwẹngba rọ vwọ mrẹ ohwo ri Jesu nana hepha, ẹkẹvuọvo ọ sa mrẹ-ẹ fikirẹ otu na, kidie ọ pha krẹkrẹ. 4 Ọtiọyena ọ da djẹ kpo obaro, o de yerin urhe ri sikamọ* ọvo rere ọ sa vwọ mrẹ, kidie ọ guọnọ wan idjerhe yena. 5 Ọke ri Jesu vwo te asan na, o de ni obenu, ọ da ta kẹ nẹ: “Zakiọs, brokpakpa wontọ rhe, kidie nonẹna me cha dia uwevwin wẹn.” 6 Ọtiọyena o de brokpakpa wontọ, o de dede vẹ aghọghọ kerẹ ọrhorha. 7 Ọke rẹ ayen vwọ mrẹ ọnana, kẹ ayen eje guẹn nẹ: “O won uwevwin rẹ ọshare rọ dia orumwemwu na kerẹ ọrhorha.” 8 Ẹkẹvuọvo Zakiọs de vrẹn mudia, ọ da ta kẹ Ọrovwori na nẹ: “Nighere! Ọrovwori, ubro rẹ ekuakua mẹ, me cha vwọ kẹ igbere na, kemu kemu ri mi gborho* mie kohwo kohwo, me cha hwa rhivwin ọhwọhwọ ẹne.” 9 Ọtiọyena Jesu da ta kẹ nẹ: “Nonẹna, usivwin rhe uwevwin nana re, kidie ọyen jẹ ọmọ rẹ Ebraham. 10 Kidie Ọmọ rẹ ohwo rhere rhe guọnọ ji sivwin obo ri ghwruru.”

11 Rẹ ayen vwọ kerhọ rẹ eta nana, o de ru udje ọfa, kidie nẹ o sikẹre Jerusalẹm re, ayen ji roro nẹ Uvie rẹ Ọghẹnẹ na cha vwomaphia vwẹ ugege yena. 12 Ọtiọyena ọ da tanẹ: “Ọshare ọvo ro nẹ orua ro titiri rhe, kpo otọ ọvo rọ pha shesheri ra reyọ ogangan rẹ ovie vwọ kẹ oma rọyen rere o rhivwin rhe. 13 O de se ihwe vwẹ usun rẹ idibo rọyen, ọ da kẹ ayen imaina* ihwe, ọ da ta kẹ ayen nẹ, “Ovwan vwẹ enana vwọ chueki bẹsiẹ me vwọ rhe.’ 14 Ẹkẹvuọvo ihwo rẹ ẹkuotọ rọyen vwo utuoma kpahọn, ayen de ji ẹko rẹ ikọn nene ra tanẹ, ‘Avwanre guọnọre nẹ ọshare nana dia ovie vwẹ enu rẹ avwanre-e.’

15 “Ọke rọ vwọ reyọ ogangan rẹ ovie* na ji rhivwin rhe nu, o de se idibo rọ vwẹ igho* na kẹ, rere ọ sa vwọ riẹn erere rẹ ayen mrẹre vwẹ eki rẹ ayen choro. 16 Ọtiọyena ọrẹsosuọ na da rhe, ọ da tanẹ, ‘Ọrovwori, me vwẹ imaina wẹn na vwọ mrẹ erere rẹ imaina ihwe.’ 17 Ọ da ta kẹ nẹ, ‘Wo ruru, odibo esiri! Kidie vwẹ orọnvwọn rọ hanvwere mamọ, wo dje oma wẹn phia kerẹ ohwo ra sa vwẹroso, ọtiọyena gbe vwo ogangan vwẹ enu rẹ irere ihwe.’ 18 Asaọkiephana ọrivẹ na da rhe, ọ da tanẹ, ‘Ọrovwori, me vwẹ imaina wẹn na vwọ mrẹ erere rẹ imaina iyorin.’ 19 Ọ da je ta kẹ ọnana nẹ, ‘Gbe ji vwo ogangan vwẹ enu rẹ irere iyorin.’ 20 Ẹkẹvuọvo ọfa da rhe, ọ da tanẹ, ‘Ọrovwori, imaina wẹn na, mi siro nu vwevunrẹ amwa. 21 Wọ mrẹrẹ, oshọ wẹn mu vwe, kidie wẹwẹ ohwo rọ djoma; oborẹ wo phi phiyọ asa-an ọyen wọ reyọ, oborẹ wọ kọnre-e ọyen wo vuẹn.’ 22 Ọ da ta kẹ nẹ, ‘Eta romobọ wẹn yen mi vwo gun we ẹdjọ, odibo umwemwu na. Wọ riẹnre nẹ mẹvwẹ ohwo rọ djoma, rọ reyọ obo ro phi phiyọ asa-an, ro ji vuẹn obo rọ kọnre-e, gbanẹ ọ dia ọtiọyen? 23 Kẹ diesorọ wo rhe phi igho* mẹ phiyọ ibanki-i? Me vwọ rhe na, ke me rha reyọ vẹ erere.’

24 “Ọtiọyena ọ da ta kẹ ihwo ri mudia etiyin nẹ, ‘Ovwan reyọ imaina na mie, rere ovwan vwọ kẹ ọ ro vwo imaina ihwe na.’ 25 Ẹkẹvuọvo ayen da ta kẹ nẹ, ‘Ọrovwori, o vwo imaina ihwe!’ 26 ‘Me ta kẹ ovwan nẹ, kohwo kohwo ro vwori, a cha vwẹ efa ba kẹ, ẹkẹvuọvo ọ ro je vwo na, obo rọ tobọ vwo na, a cha reyọ mie. 27 Vwọba, ovwan reyọ ivwighrẹn mẹ re guọnọre nẹ me dia ovie vwẹ enu raye-en na rhe etinẹ, rere ovwan hwe ayen vwẹ obaro mẹ.’”

28 Ọke rọ vwọ ta eta nana nu, ọ da yan kpo Jerusalẹm. 29 Ọke ro vwo sikẹre Bẹtfaji kugbe Bẹtani vwẹ ugbenu re se Ugbenu rẹ Oliv, o de ji ivẹ vwẹ usun rẹ idibo na, 30 ọ da tanẹ: “Ovwan kpo evunrẹ ọko ra kparo mrẹ na, ọke rẹ ovwan da ruọ nu, ovwan cha mrẹ ọmọ rẹ ekẹkẹtẹ ọvo re churu si asan, rẹ ohwo vuọvo ji rhi chidia enu rọyen dẹvo-o. Ovwan rhan rere ovwan reyọ rhe etinẹ. 31 Ẹkẹvuọvo, ọ da dianẹ ohwo nọ ovwan nẹ, ‘Diesorọ ovwan vwọ rhan?’ Ovwan tanẹ, ‘Ọrovwori na guọnerọ.’” 32 Ọtiọyena ihwo re jiri na da yanran, ayen da mrẹ kirobo rọ ghwa vuẹ ayen na. 33 Ẹkẹvuọvo ọke rẹ ayen vwọ rhan ọmọ rẹ ekẹkẹtẹ na, ihwo ri vworo da ta kẹ ayen nẹ: “Diesorọ ovwan vwọ rhan ọmọ rẹ ekẹkẹtẹ na?” 34 Ayen da tanẹ: “Ọrovwori na guọnerọ.” 35 Ayen da reyọ bru Jesu ra, ayen de do iwun rẹ obotafe rayen phiyọ enu rẹ ọmọ rẹ ekẹkẹtẹ na, ayen da vwẹ Jesu vwo chidia enu rọyen.

36 Rọ vwọ yanran na, jẹ ayen vwẹ iwun rẹ obotafe rayen vwọ hwa idjerhe na. 37 Ugege ro ghwe vwo sikẹrẹ idjerhe ro nẹ Ugbenu rẹ Oliv rhe, idibo na eje re pha buebun na, ke ghọghọ ji jiri Ọghẹnẹ vẹ urhuru ọgangan fikirẹ iruo rẹ igbevwunu eje rẹ ayen mrẹre, 38 kẹ ayen tanẹ: “Ebruba kẹ ohwo rọ cha kerẹ Ovie vwẹ odẹ ri Jihova!* Ufuoma vwẹ obodjuvwu, kugbe urinrin vwẹ asan ri kpenu vwẹ obenu na!” 39 Ẹkẹvuọvo ihwo ri Farisi evo rehẹ otu na da ta kẹ nẹ: “Oyono, ghwọku idibo wẹn.” 40 Ẹkẹvuọvo ọ da kpahen kẹ ayen nẹ: “Me ta kẹ ovwan nẹ, enana de fotovwin, ikuta na che kperi phia.”

41 Ọke ro vwo sikẹre orere na, o de no, ọ da viẹ fiki rọyen, 42 rọ vwọ tanẹ: “Ọ da dianẹ owẹ, wẹ dede, vwo ẹruọ rẹ erọnvwọn ri shekpahen ufuoma vwẹ ẹdẹ nana⁠—ẹkẹvuọvo asaọkiephana, e si ayen nu vwọ kẹ ẹro wẹn. 43 Kidie ẹdẹ cha kẹ wẹ, rẹ ivwighrẹn wẹn cha vwọ reyọ irhe vẹ unu piọpiọpiọ vwọ gbogba riariẹ owẹ phiyọ, ayen cha riariẹ owẹ phiyọ je so okeke* kẹ wẹ vwẹ kẹbẹre kẹbẹre. 44 Ayen cha reyọ owẹ vẹ emọ wẹn rehẹ evun wẹn vwọ ghwiotọ, ayen cha yanjẹ ukuta ọvo vwo vwẹ enu rẹ ọfa vwẹ evun wẹ-ẹn, kidie wo vwo ẹruọ rẹ ọke ra rhe vwọ fuẹrẹn owẹ ni-i.”

45 Ọyena vwọ wan nu, ọ da ro uwevwin rẹ ẹga na, kọ djẹ ihwo re shẹ erọnvwọn rua otafe, 46 rọ vwọ ta kẹ ayen nẹ: “E siro nẹ, ‘Uwevwin mẹ cha dia uwevwin rẹ ẹrhovwo,’ ẹkẹvuọvo ovwan reyerọ vwo ru unu rẹ iji.”

47 Ko yono vwẹ uwevwin rẹ ẹga na kẹdi kẹdẹ. Ẹkẹvuọvo irherẹn ride na vẹ isiẹbe na kugbe ihwo ri titiri vwẹ usun rẹ ihwo na ke guọnọ idjerhe rẹ ayen vwo hwe; 48 ẹkẹvuọvo ayen mrẹ idjerhe vuọvo rẹ ayen se vwo ru ọnana-a, kidie ihwo na ejobi ghwiẹ nene ọkieje rẹ ayen vwọ kerhọ rọyen.