Ẹvwọphia ri Jọn

1 Ẹvwọphia* rẹ Ọghẹnẹ vwọ kẹ Jesu Kristi, ro vwo dje erọnvwọn re cha phia kẹrẹkpẹ kẹ idibo rọyen. O de ji amakashe rọyen, ọ da vwẹ ayen phia vwọrẹ eka wan oma rọyen vwọ kẹ odibo rọyen Jọn, 2 ohwo ro soseri kpahen ota rẹ Ọghẹnẹ vwọ phia kugbe oseri ri Jesu Kristi seri, e, vwọ kpahen erọnvwọn eje rọ mrẹre. 3 Omavwerhovwẹn dia vwọ kẹ ohwo ro se aroẹmrẹ nana phia gorigori kugbe ihwo ri nyo eta re si phiyọ evun rọyen ri ji ru nene erọnvwọn re si phiyọ, kidie ọke re bruphiyọ na sikẹre re.

4 Mẹvwẹ ri Jọn yen si ọbe nana vwo rhe ikoko ighwrẹn rehẹ ubrakpọ rẹ Esha:

E jẹ ovwan vwo ẹse re muwan rọye-en kugbe ufuoma ro nẹ obọ rẹ “Ohwo rọ herọ enẹna rọ je herọ rhabae rọ je cha,” kugbe vwo nẹ obọ rẹ ẹwẹn ighwrẹn rehẹ obaro rẹ ekete rọyen, 5 kugbe vwo nẹ obọ ri Jesu Kristi, “Oseri rọ Fuevun Na,” “ọmọkpako vwẹ usun rẹ ihwo ri vrẹn nẹ ushi,” kugbe “Osun rẹ ivie rẹ akpọ na” rhe.

Ohwo ro vwo ẹguọnọ rẹ avwanre ro ji si avwanre vwo nẹ imwemwu rẹ avwanre womarẹ ọbara romobọ rọyen— 6 rọ da nẹrhẹ avwanre dia uvie ọvo, irherẹn vwọ kẹ Ọghẹnẹ kugbe Ọsẹ rọyen—e, e jẹ urinrin kugbe ẹgba dia erọyen rhirin bẹdi bẹdẹ. Isẹ.

7 Nighere! Ọ cha vẹ evwru na, kẹro kẹro cha mrẹ, kugbe ihwo ri duvwinro; uvwiẹ rẹ akpọ na eje cha ghwiẹ oma rayen vwọrẹ uvweri fiki rọyen. E, Isẹ.

8 “Mẹvwẹ yen Alfa kugbe Omẹga na,”* ọtiọyen Jihova* Ọghẹnẹ tare, “Ohwo rọ herọ enẹna, rọ je herọ rhabae, rọ je cha, Ọromevwẹgba na.”

9 Mẹvwẹ ri Jọn, oniọvo rẹ ovwan kugbe ohwo rọ vẹ ovwan gbe vwo ẹkẹn vwẹ ukpokpogho na kugbe uvie kugbe akoechiro vwọrẹ orukugbe vẹ Jesu, hẹ otọ rẹ ame riariẹ phiyọ re se Patmọs, kidie me ta ota kpahen Ọghẹnẹ ji soseri kpahen Jesu. 10 Womarẹ ẹwẹn na me da rhe dia vwẹ ẹdẹ rẹ Ọrovwori na, mi de nyo urhuru ọgangan ọvo vwẹ obuko mẹ kerẹ edo rẹ owanre,* 11 rọ tanẹ: “Si obo ru wọ mrẹ na phiyọ ukpirhin ọbe, wọ reyọ vwo rhe ikoko ighwrẹn na: vwẹ Ẹfesọs, Smaina, Pẹgamọm, Tayataira, Sadis, Filadẹlfia, kugbe Laodisha.”

12 Mi de kuomarhẹriẹ rere me mrẹ ohwo ro nene uvwe ta ota na, me da mrẹ igburhukpẹ* rẹ oro ighwrẹn, 13 kugbe ohwo ọvo rọ họhọ ọmọ rẹ ohwo vwẹ ohri rẹ igburhukpẹ* na, o ku ewun ro she te obotọ awọ phiyọ, ọ da vwẹ amwa rẹ oro vwọ gba udu rọyen. 14 Vwọba, uyovwin vẹ ẹton rọyen pha fuanfon kerẹ oruru ọfuanfon, kerẹ imicho, ibiẹro rọyen pha kerẹ ẹkuerhanre, 15 awọ rọyen pha kerẹ ẹrovwo oyoyovwin ro lo vwevunrẹ ogidi erhanre, urhuru rọyen pha kerẹ edo rẹ ame buebun. 16 Isio ighwrẹn hẹ obọrhen rọyen, ọlọkọ ogrongron ọvo rọ pha dandan ro vwo akon ivẹ yoro nẹ unu rọyen cha, opharo rọyen pha kerẹ ọnre vwẹ ọke ro de lo gangan. 17 Ọke me vwọ mrẹ, mi de she teyen otọ vwẹ asan awọ rọyen kerẹ ohwo ro ghwure.

Ọ da ghwẹ obọrhen rọyen kpahen ovwẹ, ọ da tanẹ: “Wọ djoshọ-ọ. Mẹvwẹ yen Ọrẹsosuọ kugbe Ọrọkoba, 18 kugbe ọ ro yerẹn na, mi de ghwu, ẹkẹvuọvo nighere! me herọ yerẹn rhirin bẹdi bẹdẹ, mi vwo isiaphrẹ rẹ ughwu kugbe Ushi.* 19 Ọtiọyena si erọnvwọn ru wọ mrẹre na phiyotọ, kugbe erọnvwọn re phia asaọkiephana, kugbe erọnvwọn re cha phia ọke rẹ enana da wan nu. 20 Vwọ kpahen odjahọn ọfuanfon rẹ isio ighwrẹn ru wọ mrẹre vwẹ obọrhen mẹ kugbe igburhukpẹ* rẹ oro ighwrẹn na: Isio ighwrẹn na mudiaphiyọ emekashe rẹ ikoko ighwrẹn na, igburhukpẹ* ighwrẹn na de rhe mudiaphiyọ ikoko ighwrẹn na.